Kadaogan Didto sa Uropanhong Korte sa Tawhanong mga Katungod
NIADTONG Enero 11, 2007, ang Uropanhong Korte sa Tawhanong mga Katungod sa Strasbourg, Pransiya, nagpakanaog ug hiniusang desisyon pabor sa mga Saksi ni Jehova sa Rusya maylabot sa ilang kaso batok sa Pederasyon sa Rusya. Ang maong desisyon nagtuboy sa kagawasan sa relihiyon sa mga Saksi ni Jehova ug sa ilang katungod sa makiangayong husay. Atong susihon kon nganong nahitabo man kining kasoha.
Ang kadaghanang membro sa usa ka kongregasyon sa mga Saksi ni Jehova sa siyudad sa Chelyabinsk, Rusya, maoy mga bungol. Ang ilang tigomanan maoy usa ka inabangang pasilidad nga iya sa kolehiyo alang sa bokasyonal nga kurso. Sa Dominggo, Abril 16, 2000, ang ilang tigom gibalda sa babayeng tsirman o Komisyonera sa rehiyonal nga Komisyon sa Tawhanong mga Katungod ug sa duha ka de-ranggo nga mga polis ug usa ka polis nga wala mag-uniporme. Tungod sa pagpihig, ilabina sa bahin sa Komisyonera, ilang gipakgang ang panagkatigom tungod kay kini supak kono sa balaod. Sa Mayo 1, 2000, wala na sila pagamita sa maong awditoryum.
Mipasakag sumbong ang mga Saksi ni Jehova ngadto sa piskal sa Chelyabinsk, apan wala ray nahitabo. Ang Konstitusyon sa Rusya ug ang Kombensiyon Alang sa Pagpanalipod sa Tawhanong mga Katungod ug Sukaranang mga Kagawasan naghatag ug kagawasan sa relihiyon ug kagawasan sa panagkatigom. Busa gipasaka ang usa ka sibil nga kaso ngadto sa distrito nga korte ug pagkahuman giapelar kini ngadto sa rehiyonal nga korte. Sayosayo pa niana, sa Hulyo 30, 1999, may laing kaso nga gidesisyonan sa korte suprema nga “sumala sa Balaod sa Rusya bahin sa kagawasan sa tanlag ug relihiyosong mga asosasyon, ang mga pulong nga ‘walay pagbabag’ nagpasabot nga dili na kinahanglang mangayo pag permiso o pagtugot gikan sa mga awtoridad kon dunay himoong relihiyosong mga seremonyas diha sa mga dapit nga gitagana [alang sa maong katuyoan].” (Ilaha ang mga braket.) Bisan pa sa maong susamang kahimtang, ang mga reklamo didto sa distrito ug rehiyonal nga mga korte gisalikway.
Sa Disyembre 17, 2001, ang kaso gisang-at ngadto sa Uropanhong Korte sa Tawhanong mga Katungod. Ang husay gihimo niadtong Septiyembre 9, 2004. Ang mosunod mao ang pipila ka kinutlo gikan sa pangataposang desisyon sa Korte:
“Nakita sa Korte nga gibabagan ang katungod sa mga aplikante maylabot sa kagawasan sa relihiyon sa dihang, niadtong Abril 16, 2000, gipahunong sa mga opisyales sa Estado ang ilang relihiyosong panagkatigom nga wala pa sa oras.”
“Wala gayoy legal nga basehanan ang pagpakgang sa maong relihiyosong panagkatigom nga gihimo diha sa legal nga inabangang dapit alang sa maong katuyoan.”
“[Ang Korte] nagsusi sa naestablisar nang balaod sa Korte Suprema sa Rusya nga ang relihiyosong mga panagkatigom dili na kinahanglang mangayo pag awtorisasyon, o permiso gikan sa mga awtoridad.”
“Busa, nalapas gayod ang Artikulo 9 [kagawasan sa relihiyon] sa Kombensiyon sa dihang gipakgang sa Komisyonera ug sa iyang mga kauban ang relihiyosong panagkatigom sa mga aplikante niadtong Abril 16, 2000.”
“Nakaplagan sa Korte nga ang ubos nga mga hukmanan napakyas sa pagbuhat sa ilang katungdanan . . . nga ang mga akusado ug mga nag-akusar angay untang husayon sa makiangayong paagi. Nalapas gayod ang Artikulo 6 [katungod sa makiangayong husay] sa Kombensiyon.”
Ang mga Saksi ni Jehova mapasalamaton sa Diyos sa paghatag kanilag kadaogan didto sa Uropanhong Korte sa Tawhanong mga Katungod. (Salmo 98:1) Unsa ka kaylap ang epekto sa desisyon sa Korte? Si Joseph K. Grieboski, presidente sa Institute on Religion and Public Policy, nag-ingon: “Kini maoy lain na usab nga hinungdanong desisyon may kalabotan sa kagawasan sa relihiyon sa tibuok Uropa, tungod kay ang maong desisyon makaapekto sa relihiyosong mga katungod diha sa tanang estado nga sakop sa Uropanhong Korte sa Tawhanong mga Katungod.”