Sa Unsang Paagi Imong Makab-ot ang Tinuod nga Espirituwal nga Katagbawan?

“ANG paghunahuna sa mga butang tawhanon mosangpot sa kamatayon, apan ang paghunahuna kanunay sa mga butang espirituhanon mosangpot sa kinabuhi ug kalinaw,” misulat si apostol Pablo. (Roma 8:6, Maayong Balita Biblia) Nianang mga pulonga, gipakita sa apostol nga ang pagkahimong tawong espirituwal dili usa ka butang nga nag-agad lamang sa personal nga kagustohan o pagbati. Sa pagkatinuod, kini nagkahulogag kinabuhi o kamatayon. Apan, sa unsang diwa nga ang tawong espirituwal makadawat ug “kinabuhi ug kalinaw”? Sumala sa Bibliya, ang maong tawo makabaton ug kalinaw sa hunahuna ug pakigdait uban sa Diyos karon, ug pagagantihan ug kinabuhing walay kataposan sa umaabot. (Roma 6:23; Filipos 4:7) Mao diay nga si Jesus miingon: “Malipayon kadtong mahunahunaon sa ilang espirituwal nga panginahanglan”!—Mateo 5:3.

Ang pagbasa nimo niining magasina nagpakita nga ikaw interesado sa espirituwal nga mga butang—ug maayo kana. Apan, lainlain ang paagi sa mga tawo sa pagtagbaw sa ilang espirituwal nga panginahanglan, busa lagmit mangutana ka: ‘Sa unsang paagi makab-ot ang tinuod nga espirituwal nga katagbawan?’

“Ang Panghunahuna ni Kristo”

Gawas pa sa paghisgot ni apostol Pablo sa kahinungdanon ug mga kaayohan sa pagkahimong mahunahunaon sa espirituwal nga mga butang, daghan usab siyag gisulti kon unsaon pagkab-ot ang espirituwal nga katagbawan. Gipatin-aw ni Pablo sa mga Kristohanon sa karaang siyudad sa Corinto ang kalainan tali sa tawong pisikal ug sa tawong espirituwal. Ang usa ka tawong pisikal nagpaulipon sa iyang unodnong mga tinguha, apan ang tawong espirituwal nagpabili sa espirituwal nga mga butang. Si Pablo misulat: “Ang tawong pisikal dili magadawat sa mga butang nga iya sa espiritu sa Diyos, kay kini kabuangan man alang kaniya.” Sa laing bahin, si Pablo nagpatin-aw nga ang pagbaton sa “panghunahuna ni Kristo” maoy timailhan sa tawong espirituwal.—1 Corinto 2:14-16.

Ang pagbaton sa “panghunahuna ni Kristo” nagpasabot sa paghupot sa “samang tinamdan sa pangisip nga nabatonan ni Kristo Jesus.” (Roma 15:5; Filipos 2:5) Sa ato pa, ang tawong espirituwal mao kadtong naghunahuna sama kang Jesus ug nagsunod sa Iyang mga tunob. (1 Pedro 2:21; 4:1) Kon masundog pag-ayo sa usa ka tawo ang panghunahuna ni Kristo, mas molig-on ang iyang espirituwalidad ug dako ang kahigayonan nga iyang mabatonan ang “kinabuhi ug kalinaw.”—Roma 13:14.

Kon sa Unsang Paagi Mahibaloan ang “Panghunahuna ni Kristo”

Apan, aron mabatonan ang panghunahuna ni Kristo, kinahanglan nga ato unang mahibaloan ang iyang panghunahuna. Busa, ang unang lakang sa pagpauswag sa espirituwalidad mao ang pagkahibalo sa paagi sa paghunahuna ni Jesus. Apan sa unsang paagi mahibaloan nimo ang panghunahuna sa usa ka tawo nga nabuhi sa yuta 2,000 na ka tuig kanhi? Aw, giunsa nimo pagkahibalo sa kaagi sa inilang mga tawo sa atong nasod nga nabuhi kaniadto? Tingali pinaagi sa pagbasa sa ilang kaagi. Sa susama, ang pagbasa sa kaagi ni Jesus maoy pangunang paagi nga mahibaloan ang hunahuna ni Kristo.—Juan 17:3.

Adunay upat ka basahon nga naghatag ug detalyadong asoy bahin kang Jesus—ang mga Ebanghelyo ni Mateo, Marcos, Lucas, ug Juan. Ang pagbasa niining mga asoya motabang kanimo sa pagkahibalo sa panghunahuna, pagbati, ug motibo ni Jesus. Sa dihang pamalandongon nimo ang imong nabasa bahin kang Jesus, imong mahanduraw kon unsa siyang matanga sa tawo. Bisag giisip nimo ang imong kaugalingon nga sumusunod na ni Kristo, ang pagbasa ug pagpalandong niana motabang kanimo sa ‘pagpadayon sa pagtubo diha sa dili-takos nga kalulot ug sa kahibalo sa atong Ginoo ug Manluluwas nga si Jesu-Kristo.’—2 Pedro 3:18.

Hinumdoman nato kana samtang atong susihon ang pipila ka asoy diha sa mga Ebanghelyo aron atong mahibaloan kon nganong si Jesus matawag nga usa ka tawong espirituwal. Dayon, suknaa ang imong kaugalingon kon sa unsang paagi masundog nimo ang iyang panig-ingnan.—Juan 13:15.

Espirituwalidad ug “ang Bunga sa Espiritu”

Diha sa iyang Ebanghelyo, si Lucas nag-ingon nga ang balaang espiritu sa Diyos gibubo kang Jesus sa dihang siya gibawtismohan ug si Jesus “puno sa balaang espiritu.” (Lucas 3:21, 22; 4:1) Gipasiugda usab ni Jesus sa iyang mga sumusunod nga hinungdanon nga sila magiyahan sa balaang espiritu, o “aktibong puwersa” sa Diyos. (Genesis 1:2; Lucas 11:9-13) Nganong hinungdanon kaayo kana? Tungod kay ang espiritu sa Diyos makahimo sa pagbag-o sa hunahuna sa tawo, aron mahisama kini sa hunahuna ni Kristo. (Roma 12:1, 2) Ang balaang espiritu motabang sa usa ka tawo sa pag-ugmad sa mga hiyas sama sa “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” Kining mga hiyasa nga gitawag sa Bibliya nga “bunga sa espiritu” maoy timailhan sa usa ka tawong espirituwal. (Galacia 5:22, 23) Sa ato pa, ang tawo nga mahunahunaon sa espirituwal nga mga butang mao kadtong gigiyahan sa espiritu sa Diyos.

Si Jesus nagpasundayag sa bunga sa espiritu sa tibuok niyang ministeryo. Ang mga hiyas sama sa gugma, kalulot, ug pagkamaayo dayag kaayong makita sa iyang pagtratar niadtong mga tinamay diha sa katilingban. (Mateo 9:36) Pananglitan, tagda ang usa ka hitabo nga giasoy ni apostol Juan. Atong mabasa: ‘Sa pag-agi [ni Jesus], siya nakakitag usa ka tawo nga buta sukad sa pagkahimugso.’ Nakita usab sa mga tinun-an ni Jesus ang maong tawo apan ilang gilantaw siya nga usa ka makasasala. Sila nangutana: “Kinsa ang nakasala, kining tawhana o ang iyang mga ginikanan?” Nakita usab siya sa iyang mga silingan apan wala silay laing gihunahuna kondili nga siya usa ka makililimos. “Mao kining tawhana nga naglingkoran ug nagpakilimos, dili ba?” sila miingon. Apan sa panglantaw ni Jesus, ang tawong buta nagkinahanglag tabang. Siya nakigsulti sa maong tawo ug nag-ayo kaniya.—Juan 9:1-8.

Unsay gitudlo niini kanimo bahin sa panghunahuna ni Kristo? Una, gitagad ni Jesus ang mga tinamay ug siya naluoy kanila. Ikaduha, siya nangitag paagi sa pagtabang sa uban. Sa imong hunahuna, nasundog ba nimo si Jesus niining bahina? Giisip mo ba ang mga tawo sama sa pag-isip ni Jesus kanila, nga nagtabang kanila sa pagpauswag sa kalidad sa ilang kinabuhi ug sa pagbaton ug masanag nga kaugmaon? Managsama ba ang imong pagtagad sa mga tinamay ug sa mga tawong prominente? Kon imong giisip ang mga tawo sama sa pag-isip ni Jesus kanila, imo gayong gisundog ang panig-ingnan ni Jesus.—Salmo 72:12-14.

Espirituwalidad ug Pag-ampo

Gipakita sa mga asoy sa Ebanghelyo nga si Jesus kanunayng moduol sa Diyos sa pag-ampo. (Marcos 1:35; Lucas 5:16; 22:41) Sa ministeryo ni Jesus dinhi sa yuta, siya naggahin gayod ug panahon sa pag-ampo. Ang tinun-ang si Mateo misulat: “Kay nakapalakaw na sa mga panon sa katawhan, [si Jesus] mitungas sa bukid nga siya ra aron mag-ampo.” (Mateo 14:23) Nianang mga higayona sa hilom nga pagpakigsulti sa iyang langitnong Amahan, si Jesus napalig-on. (Mateo 26:36-44) Karon, ang tinuod nga tawong espirituwal maggahin usab ug panahon sa pagpakigsulti sa Diyos, kay kini makapalig-on sa iyang relasyon sa Maglalalang ug makatabang kaniya nga mabatonan ang hunahuna ni Kristo.

Si Jesus sagad nga mogugol ug taas nga panahon sa pag-ampo. (Juan 17:1-26) Pananglitan, sa wala pa niya pilia ang iyang 12 ka apostoles, si Jesus “miadto sa bukid aron sa pag-ampo, ug siya nagpadayon sa tibuok gabii sa pag-ampo ngadto sa Diyos.” (Lucas 6:12) Bisag dili kinahanglan nga mag-ampo sa tibuok gabii, ang tawong espirituwal mosundog sa panig-ingnan ni Jesus. Sa dili pa mohimog hinungdanong mga desisyon, mogahin siya ug igong panahon sa pag-ampo sa Diyos, nga mangayo sa tabang sa balaang espiritu sa paghimog mga desisyon nga makapauswag sa iyang espirituwalidad.

Si Jesus nagpakita usab ug panig-ingnan sa kinasingkasing nga pag-ampo nga angay natong sundogon. Matikdi kon unsay gisulat ni Lucas bahin sa pag-ampo ni Jesus sa gabii una siya mamatay. “Samtang nagaantos siya sa labihang kasakit, nag-ampo siya sa labi pa ka mainiton gayod. Nangahulog sa yuta ang iyang singot ingon sa dagkong tulo sa dugo.” (Lucas 22:44, Maayong Balita Biblia) Diha nay mga higayon nga si Jesus mainitong nag-ampo, apan niining tungora nga nag-atubang siya sa kinagrabehang pagsulay sa iyang kinabuhi, siya nag-ampo nga “labi pa ka mainiton”—ug gitubag ang iyang pag-ampo. (Hebreohanon 5:7) Ang tawong espirituwal mosundog sa panig-ingnan ni Jesus. Sa dihang magsagubang ug grabeng mga pagsulay, siya moampo sa Diyos nga “labi pa ka mainiton” nga mangayo sa Iyang balaang espiritu, giya, ug tabang.

Sanglit si Jesus usa ka tawong mainampoon, natural lang nga gusto siyang sundogon sa iyang mga tinun-an niining bahina. Busa, sila mihangyo kaniya: “Ginoo, tudloi kami kon unsaon sa pag-ampo.” (Lucas 11:1) Sa pagkakaron, kadtong nagpabili sa espirituwal nga mga butang ug buot nga magpagiya sa balaang espiritu sa Diyos mosundog usab sa paagi ni Jesus sa pag-ampo sa Diyos. Busa ang pag-ampo gikinahanglan aron makab-ot ang tinuod nga espirituwal nga katagbawan.

Espirituwalidad ug ang Pagsangyaw sa Maayong Balita

Sa Ebanghelyo ni Marcos, atong mabasa nga si Jesus nag-ayog daghang masakiton bisan hangtod sa lawom nang kagabhion. Pagka-kadlawon, samtang nag-ampo siya, ang iyang mga apostoles miduol kaniya ug miingon nga daghan ang nangita kaniya, tingali gusto nilang maayo sa ilang sakit. Apan, si Jesus miingon kanila: “Mangadto kita sa laing dapit, sa kasikbit nga mga lungsod, aron makawali usab ako didto.” Dayon gipatin-aw ni Jesus kon ngano: “Alang niini nga katuyoan nga ako mianhi.” (Marcos 1:32-38; Lucas 4:43) Bisan tuod hinungdanon kang Jesus ang pag-ayo sa mga masakiton, ang pagsangyaw sa maayong balita sa Gingharian sa Diyos mao ang iyang pangunang buluhaton.—Marcos 1:14, 15.

Karong adlawa, ang pagsangyaw sa Gingharian sa Diyos mao gihapon ang timailhan sa mga tawong nakabaton sa hunahuna ni Kristo. Si Jesus nagsugo sa tanan nga gustong mahimong iyang sumusunod: “Busa panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga akong gisugo kaninyo.” (Mateo 28:19, 20) Dugang pa, si Jesus nagtagna: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Sanglit gipakita sa Pulong sa Diyos nga ang buluhatong pagsangyaw mapalampos sa tabang sa balaang espiritu, ang masibotong pagpakigbahin nianang buluhatona maoy ilhanan sa tinuod nga tawong espirituwal.—Buhat 1:8.

Ang pagsangyaw sa mensahe sa Gingharian sa tibuok kalibotan nagkinahanglag hiniusang paningkamot sa milyonmilyong mga tawo. (Juan 17:20, 21) Kinahanglan nga kadtong nakigbahin niining buluhatona mahunahunaon sa espirituwal nga mga butang ug organisado usab sa pagbuhat niana sa tibuok kalibotan. Maila ba nimo kon unsang grupoha sa mga tawo ang nagsunod sa tunob ni Jesus ug nagsangyaw sa maayong balita sa Gingharian sa tibuok kalibotan?

Nakab-ot ba Nimo ang mga Kinahanglanon?

Siyempre, aduna pay laing mga ilhanan sa tinuod nga tawong espirituwal, apan nakab-ot ba nimo ang mga kinahanglanon nga nahisgotan na? Sa pagsusi niana, pangutan-a ang imong kaugalingon: ‘Ako ba regular nga nagbasa sa Pulong sa Diyos, ang Bibliya, ug namalandong niana? Ako ba nagpasundayag sa bunga sa espiritu? Ako ba mainampoon nga tawo? Ako ba nakig-uban sa mga tawo nga nagsangyaw sa maayong balita sa Gingharian sa Diyos sa tibuok kalibotan?’

Ang matinud-anong pagsusi sa kaugalingon makatabang kanimo sa pag-ila kon ikaw tinuod ba nga tawong espirituwal. Kami nag-awhag kanimo sa paghimo kon unsay gikinahanglang buhaton aron imong maangkon ang “kinabuhi ug kalinaw.”—Roma 8:6; Mateo 7:13, 14; 2 Pedro 1:5-11.

[Kahon/​Mga hulagway sa panid 7]

MGA TIMAILHAN SA TAWONG ESPIRITUWAL

◆ Adunay gugma sa Pulong sa Diyos

◆ Nagpasundayag sa bunga sa espiritu

◆ Makanunayon ug kinasingkasing nga nag-ampo sa Diyos

◆ Nakig-ambit sa pagsangyaw sa maayong balita sa Gingharian

[Hulagway sa panid 5]

Ang Bibliya motabang kanimo nga mahibaloan ang “panghunahuna ni Kristo”