Dapig Ka ba sa Pagkasoberano ni Jehova?
“Isulti taliwala sa kanasoran: ‘Si Jehova nahimong hari.’”—SALMO 96:10.
1, 2. (a) Unsang hinungdanong hitabo ang nahitabo sa Oktubre 29 K.P.? (b) Unsay kahulogan sa maong panghitabo alang kang Jesus?
NIADTONG Oktubre 29 K.P., dihay usa ka hinungdanong hitabo nga wala pa mahitabo sukad. Ang magsusulat sa Ebanghelyo nga si Mateo nagtaho: ‘Human mabawtismohi, si Jesus mihaw-as gilayon sa tubig; ug, tan-awa! ang mga langit nabuksan, ug nakita [ni Juan Bawtista] nga mikunsad diha [kang Jesus] ang espiritu sa Diyos ingon sa usa ka salampati. Tan-awa! Dihay tingog usab gikan sa mga langit nga nag-ingon: “Kini mao ang akong Anak, ang hinigugma, nga akong giuyonan.”’ Usa kini sa pipila ka hitabo nga parehong gihisgotan sa upat ka magsusulat sa Ebanghelyo.—Mateo 3:16, 17; Marcos 1:9-11; Lucas 3:21, 22; Juan 1:32-34.
2 Ang pagbubo sa balaang espiritu diha kang Jesus nagpaila kaniya ingong Usa nga Dinihogan, nga nagkahulogang Mesiyas, o Kristo. (Juan 1:33) Sa kataposan, mitungha ra gayod ang sinaad nga “binhi”! Anaa sa atubangan ni Juan Bawtista ang usa kansang tikod pagasamaran ni Satanas. Ang maong binhi magasamad usab sa ulo sa pangunang kaaway ni Jehova ug sa Iyang pagkasoberano. (Genesis 3:15) Sukad niadto, si Jesus nahibalo gayod nga siya kinahanglang manglimbasog sa pagtuman sa katuyoan ni Jehova maylabot sa Iyang pagkasoberano ug sa Gingharian.
3. Sa unsang paagi giandam ni Jesus ang iyang kaugalingon maylabot sa iyang papel sa pagpaluyo sa pagkasoberano ni Jehova?
3 Aron siya maandam sa buluhaton nga gihatag kaniya, “si Jesus, nga puno sa balaang espiritu, mipalayo gikan sa Jordan, ug gidala siya sa espiritu didto sa kamingawan.” (Lucas 4:1; Marcos 1:12) Didto, sulod sa 40 ka adlaw, si Jesus nakahigayon sa pagpalandong pag-ayo bahin sa isyu sa pagkasoberano nga gipatungha ni Satanas ug bahin sa iyang pagabuhaton aron paluyohan ang pagkasoberano ni Jehova. Ang maong isyu naglangkit sa mga manulonda ug sa mga tawo. Busa angay natong tagdon ang pagkamatinumanon ni Jesus ug susihon kon unsay angay natong buhaton sa pagpakita nga gusto usab natong paluyohan ang pagkasoberano ni Jehova.—Job 1:6-12; 2:2-6.
Gihagit ang Pagkasoberano ni Jehova
4. Unsay gibuhat ni Satanas nga nagpadayag nga iyang gihagit ang pagkasoberano ni Jehova?
4 Siyempre, nahibalo nianang tanan si Satanas. Iya dayong giatake ang pangunang “binhi” sa langitnong “babaye” sa Diyos. (Genesis 3:15) Gitental ni Satanas si Jesus sa tulo ka higayon, pinaagi sa pagpabuhat kang Jesus sa mga butang nga daw makaayo kaniya imbes buhaton ang gipabuhat kaniya sa iyang Amahan. Sa ikatulong pagsulay mas nadayag pa nga gihagit ni Satanas ang pagkasoberano ni Jehova. Sa pagpakita niya kang Jesus sa ‘tanang gingharian sa kalibotan ug sa ilang himaya,’ si Satanas way-lipodlipod nga miingon kang Jesus: “Kining tanan nga butang ihatag ko kanimo kon mohapa ka ug mohimog usa ka buhat sa pagsimba kanako.” Kay nahibalo nga ang Yawa mao gayod ang nagkontrolar sa “tanang gingharian sa kalibotan,” gipakita ni Jesus kon asa Siya dapig maylabot sa isyu sa pagkasoberano pinaagi sa pagtubag: “Pahilayo, Satanas! Kay kini nahisulat, ‘Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad.’”—Mateo 4:8-10.
5. Unsang malisod nga sugo ang angayng tumanon ni Jesus?
5 Dayag kaayong makita diha sa paagi sa pagkinabuhi ni Jesus nga iyang giuna ang pagpaluyo sa pagkasoberano ni Jehova. Nahibalo gayod si Jesus nga siya kinahanglang magpabiling matinumanon hangtod sa kamatayon nga ipahinabo ni Satanas kaniya—nga gihisgotan sa tagna ingong pagsamad sa tikod sa “binhi” sa babaye—aron pamatud-an nga ang Diyos adunay katungod sa pagmando ingong Soberano. (Mateo 16:21; 17:12) Kinahanglan usab niyang ipadayag ang kamatuoran nga ang Gingharian sa Diyos maoy gamiton ni Jehova sa paglaglag sa rebeldeng si Satanas ug sa pagpasig-uli sa kalinaw ug kahusay sa tanang linalang. (Mateo 6:9, 10) Unsay gibuhat ni Jesus aron matuman kining malisod nga sugo?
“Ang Gingharian sa Diyos Haduol Na”
6. Sa unsang paagi gipadayag ni Jesus nga ang Gingharian maoy gamiton sa Diyos sa “pagbungkag sa mga buhat sa Yawa”?
6 Sa pagsugod sa iyang ministeryo, “si Jesus miadto sa Galilea, nga nagwali sa maayong balita sa Diyos ug nag-ingon: ‘Ang tinudlong panahon natuman na, ug ang gingharian sa Diyos haduol na.’” (Marcos 1:14, 15) Gani, siya miingon: “Kinahanglan nga sa ubang siyudad usab ipahayag ko ang maayong balita sa gingharian sa Diyos, tungod kay alang niini gipadala ako.” (Lucas 4:18-21, 43) Gilibot ni Jesus ang tibuok nasod, “nga nagwali ug nagpahayag sa maayong balita sa gingharian sa Diyos.” (Lucas 8:1) Si Jesus naghimo usab ug daghang milagro—nagpakaon sa panon sa katawhan, nagpalurang sa bagyo, nag-ayo sa mga masakiton, ug nagbanhaw sa mga patay. Pinaagi niining maong mga milagro, gipamatud-an ni Jesus nga ang Diyos makaarang sa pagwagtang sa tanang kadaot ug pag-antos nga miresulta tungod sa pagrebelde didto sa Eden ug sa ingon ‘magbungkag sa mga buhat sa Yawa.’—1 Juan 3:8.
7. Unsay gisugo ni Jesus sa iyang mga sumusunod, ug unsay resulta niana?
7 Aron ikawali sa bug-os ang maayong balita sa Gingharian, gitigom ni Jesus ang usa ka grupo sa matinumanong mga sumusunod ug gibansay sila nianang buluhatona. Una, iyang gisugo ang iyang 12 ka apostoles ug “gipadala niya sila aron sa pagwali sa gingharian sa Diyos.” (Lucas 9:1, 2) Dayon, iyang gipadala ang 70 pa ka tinun-an aron imantala ang mensahe: “Ang gingharian sa Diyos haduol na kaninyo.” (Lucas 10:1, 8, 9) Sa dihang namauli na ang mga tinun-an ug ilang gitaho kang Jesus nga sila nagmalamposon sa pagsangyaw sa Gingharian, siya mitubag: “Nagsugod na ako pagkakita kang Satanas nga nahulog na ingon sa kilat gikan sa langit.”—Lucas 10:17, 18.
8. Unsay tataw nga gipakita sa kinabuhi ni Jesus?
8 Walay giusikan si Jesus nga panahon ug wala usab siyay gipalabay nga kahigayonan sa pagpamatuod bahin sa Gingharian. Siya naghago adlaw ug gabii, nga nagsakripisyo pa gani sa normal nga mga kinahanglanon sa kinabuhi. “Ang mga irong ihalas may mga lungib ug ang mga langgam sa langit may mga batoganan, apan ang Anak sa tawo walay dapit nga kapahilunaan sa iyang ulo,” siya miingon. (Lucas 9:58; Marcos 6:31; Juan 4:31-34) Sa hapit na siyang patyon, si Jesus maisogong miingon kang Poncio Pilato: “Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran.” (Juan 18:37) Gipakita sa tibuok kinabuhi ni Jesus nga siya mianhi, dili lamang aron mahimong usa ka dakong magtutudlo o tighimog milagro o bisan ingong nagsakripisyo-sa-kaugalingong Manluluwas, kondili aron sa pagpaluyo sa kabubut-on ni Jehova ug sa pagpamatuod bahin sa katakos sa Diyos sa pagtuman sa iyang kabubut-on pinaagi sa Gingharian.—Juan 14:6.
“Natuman Na!”
9. Sa unsang paagi si Satanas milampos sa pagsamad sa tikod sa “binhi” sa langitnong babaye sa Diyos?
9 Ang tanang gibuhat ni Jesus maylabot sa Gingharian wala makapahimuot sa Kaaway, si Satanas nga Yawa. Sa daghang higayon, pinaagi sa yutan-ong bahin sa iyang “binhi”—politikanhon ug relihiyoso—si Satanas misulay sa pagpatay sa “binhi” sa langitnong babaye sa Diyos. Sukad sa pagkatawo ni Jesus hangtod sa kataposan sa iyang yutan-ong kinabuhi, siya gipuntirya ni Satanas ug sa iyang mga tigpaluyo. Sa kataposan, sa tingpamulak sa 33 K.P., miabot ang panahon nga ang Anak sa tawo mahulog sa kamot sa Kaaway nga magsamad kaniya sa tikod. (Mateo 20:18, 19; Lucas 18:31-33) Ang mga asoy sa Ebanghelyo tataw nga nagpakita kon sa unsang paagi ang mga tawo—si Judas Iscariote, ang pangulong mga saserdote, eskriba, Pariseo, ug ang mga Romano—gimaniobra ni Satanas aron hukman si Jesus ug ipailalom sa masakit nga kamatayon diha sa kahoy sa pagsakit.—Buhat 2:22, 23.
10. Unsa ang labing hinungdanong butang nga napalampos sa kamatayon ni Jesus sa kahoy sa pagsakit?
10 Unsay mosantop sa imong hunahuna kon imong handurawon si Jesus diha sa kahoy sa pagsakit nga nag-antos sa inanay ug masakit nga kamatayon? Tingali imong mahinumdoman ang halad lukat nga mahigugmaong gihatag ni Jesus alang sa makasasalang katawhan. (Mateo 20:28; Juan 15:13) Mahingangha ka tingali sa dakong gugma nga gipakita ni Jehova sa pagtagana nianang maong halad. (Juan 3:16) Hayan bation nimo ang gibati sa Romanong opisyal sa kasundalohan kinsa natukmod sa pag-ingon: “Sa pagkatinuod kini siya maoy Anak sa Diyos.” (Mateo 27:54) Angayan lamang kini nga reaksiyon sa nahimo ni Jesus. Sa laing bahin, hinumdomi nga ang kataposang gilitok ni Jesus diha sa kahoy sa pagsakit mao kini: “Natuman na!” (Juan 19:30) Unsa may natuman? Bisan tuod napalampos ni Jesus ang daghang butang pinaagi sa iyang kinabuhi ug kamatayon, dili ba nga ang pangunang hinungdan sa pag-anhi ni Jesus sa yuta mao ang paghusay sa isyu labot sa pagkasoberano ni Jehova? Wala ba usab itagna nga ingong “binhi,” iyang antoson ang grabeng pagsulay nga ipadangat ni Satanas kaniya aron wagtangon ang tanang pasipala sa ngalan ni Jehova? (Isaias 53:3-7) Bug-at kini nga mga responsibilidad, apan bug-os kining gituman ni Jesus. Pagkadakong kalamposan!
11. Unsay buhaton ni Jesus aron bug-os nga matuman ang tagna sa Eden?
11 Tungod sa pagkamatinumanon ug pagkamaunongon ni Jesus, siya gibanhaw dili ingong tawo, kondili ingong “nagahatag-kinabuhi nga espiritu.” (1 Corinto 15:45; 1 Pedro 3:18) Sa Salmo 110:1, si Jehova nagsaad sa iyang hinimayang Anak: “Lingkod sa akong tuong kamot hangtod nga ibutang ko ang imong mga kaaway nga tumbanan sa imong mga tiil.” Ang “mga kaaway” naglakip sa pangunang tagsala, si Satanas, ug sa tanang naglangkob sa iyang “binhi.” Ingong Hari sa Mesiyanikong Gingharian ni Jehova, si Jesu-Kristo manguna sa paglaglag sa tanang rebelde, sa langit ug sa yuta. (Pinadayag 12:7-9; 19:11-16; 20:1-3, 10) Dayon bug-os na unyang matuman ang tagna sa Genesis 3:15 maingon man ang pag-ampo nga gitudlo ni Jesus sa iyang mga sumusunod: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.”—Mateo 6:10; Filipos 2:8-11.
Usa ka Sulondan nga Pagasundon
12, 13. (a) Unsang pagsanong sa maayong balita sa Gingharian ang makita karon? (b) Unsay angay natong palandongon kon buot natong sundon ang mga tunob ni Kristo?
12 Karon, ang maayong balita sa Gingharian ginasangyaw na diha sa daghang kayutaan, sumala sa gitagna ni Jesus. (Mateo 24:14) Tungod niini, milyonmilyong tawo ang nagpahinungod sa ilang kinabuhi ngadto sa Diyos. Mahinamon silang nagpaabot sa mga panalangin nga itagana sa Gingharian. Sila naglaom nga mabuhi sa walay kataposan sa kalinaw ug kasegurohan diha sa paraisong yuta, ug sila malipayong nagpaambit niana nga paglaom ngadto sa uban. (Salmo 37:11; 2 Pedro 3:13) Usa ka ba niining mga magmamantala sa Gingharian? Kon mao, dalayegon ka. Apan, aduna pay usa ka butang nga angayng tagdon sa matag usa kanato.
13 Si apostol Pedro misulat: “Si Kristo nag-antos alang kaninyo, nga nagbilin kaninyog sulondan aron kamo managsunod pag-ayo sa iyang mga tunob.” (1 Pedro 2:21) Matikdi nga niining higayona, ang gihisgotan ni Pedro, dili ang kasibot ni Jesus sa pagsangyaw o ang iyang kahanas sa pagpanudlo, kondili ang iyang pag-antos. Kay si Pedro nakasaksi niini, siya nahibalo gayod kon asa kutob nga si Jesus andam nga moantos aron magpasakop sa pagkasoberano ni Jehova ug pamatud-an si Satanas nga bakakon. Nan, sa unsang mga paagi atong masunod ang mga tunob ni Jesus? Angay natong suknaon ang atong kaugalingon: ‘Asa kutob ang akong pagsakripisyo aron sa pag-ila ug pagpaluyo sa pagkasoberano ni Jehova? Ako bang gipakita sa akong pagkinabuhi ug sa pagtuman sa akong ministeryo nga akong gihatagag unang pagtagad ang pagpaluyo sa pagkasoberano ni Jehova?’—Colosas 3:17.
14, 15. (a) Unsay reaksiyon ni Jesus sa dili maayong mga sugyot ug tanyag, ug ngano? (b) Unsa nga isyu ang angay natong hunahunaon kanunay? (Ilakip ang komento sa kahon nga “Barog Dapig Kang Jehova.”)
14 Kada adlaw, kita nag-atubang ug mga pagsulay ug kinahanglang mohimog mga desisyon, dagko ug gagmay. Unsay makatabang kanato sa pagtino kon unsay angayng buhaton? Pananglitan, kon kita tentalon sa pagbuhat sa usa ka butang nga makadaot sa atong Kristohanong baroganan, unsay atong buhaton? Sa dihang giingnan ni Pedro si Jesus nga magmaluloton siya sa iyang kaugalingon, unsa may tubag ni Jesus? Siya miingon: “Magpalikod ka kanako, Satanas! . . . Ikaw naghunahuna, dili sa mga hunahuna sa Diyos, kondili nianang sa mga tawo.” (Mateo 16:21-23) O sa dihang kita hatagag kahigayonan nga moasenso o hatagag taas nga posisyon sa trabaho nga makadaot sa atong espirituwalidad, kita ba molihok sama kang Jesus? Sa dihang namatikdan ni Jesus nga ang mga tawo nga nakakita sa iyang milagro “moduol na ug mosakmit kaniya aron himoon siyang hari,” siya mipahawa dayon.—Juan 6:15.
15 Nganong mibarog man si Jesus nga malig-on batok sa maong mga pagsulay? Tungod kay tin-aw sa iyang hunahuna nga labaw pa ang nalangkit kay sa iyang personal nga kaluwasan o kaayohan. Buot niyang buhaton ang kabubut-on sa iyang Amahan ug paluyohan ang pagkasoberano ni Jehova bisan unsa pay mahitabo. (Mateo 26:50-54) Busa, kon dili tin-aw sa atong hunahuna ang isyu bahin sa pagkasoberano ni Jehova, anaa kanunay ang kapeligrohan nga kita mokompromiso o mobuhat ug sayop. Ngano man? Tungod kay dali ra kitang mahaylo sa mga lipatlipat ni Satanas, kinsa batid kaayo sa paghimo sa usa ka daotang buhat nga daw tilinguhaon, sama sa iyang gibuhat sa dihang iyang gitental si Eva.—2 Corinto 11:14; 1 Timoteo 2:14.
16. Unsay atong pangunang tumong sa pagtabang sa uban?
16 Sa atong ministeryo, kita naningkamot sa pagpakigsulti sa mga tawo mahitungod sa ilang gikabalak-an ug sa pagpakita kanila kon unsay giingon sa Bibliya bahin niana. Kini maoy epektibong paagi sa pagpukaw sa ilang interes sa pagtuon sa Bibliya. Apan, ang atong pangunang tumong dili lamang ang pagtabang sa mga tawo nga mahibalo kon unsay giingon sa Bibliya o kon unsang mga panalangin ang itagana sa Gingharian sa Diyos. Kinahanglan nga tabangan nato sila nga makasabot sa tinuod nga isyu. Andam ba sila nga mahimong matuod nga mga Kristohanon ug mopas-an sa ilang “estaka sa pagsakit” ug moantos alang sa Gingharian? (Marcos 8:34) Andam ba silang moduyog niadtong dapig sa pagkasoberano ni Jehova ug sa ingon mapamatud-an si Satanas nga bakakon ug mapasipalahon? (Proverbio 27:11) Atong pribilehiyo nga tabangan ang atong kaugalingon ug ang uban sa pagbuhat niana.—1 Timoteo 4:16.
Sa Dihang ang Diyos Mahimong “Tanang Butang Ngadto sa Tanan”
17, 18. Unsang mahimayaong panahon ang atong mapaabot kon atong ipakita nga kita dapig sa pagkasoberano ni Jehova?
17 Samtang ginabuhat nato karon ang atong maarangan sa pagpakita pinaagi sa atong panggawi ug sa atong ministeryo nga kita dapig sa pagkasoberano ni Jehova, kita makapaabot sa panahon sa dihang “itugyan na [ni Jesu-Kristo] ang gingharian ngadto sa iyang Diyos ug Amahan.” Kanus-a man kana? Si apostol Pablo nagpatin-aw: “Sa dihang iya nang mawagtang ang tanang kagamhanan ug tanang awtoridad ug gahom. Kay kinahanglan siyang magmando ingong hari hangtod ikabutang na sa Diyos ang tanang kaaway ilalom sa iyang mga tiil. . . . Niana ang Anak magpasakop usab ngadto sa Usa nga nagpasakop sa tanang butang ngadto kaniya, aron ang Diyos mahimong tanang butang ngadto sa tanan.”—1 Corinto 15:24, 25, 28.
18 Sa dihang ang Diyos mahimong “tanang butang ngadto sa tanan”—mahimayaon na gayod unya kana nga panahon! Matuman na sa Gingharian ang katuyoan niini. Mawagtang na ang tanang magsusupak sa pagkasoberano ni Jehova. Mapasig-uli na ang kalinaw ug kahusay sa tibuok uniberso. Unya, moawit ang tanang linalang sama sa giawit sa salmista: “Ipahinungod kang Jehova ang himaya nga alang sa iyang ngalan . . . Isulti taliwala sa kanasoran: ‘Si Jehova nahimong hari.’”—Salmo 96:8, 10.
Makatubag Ka Ba?
• Sa unsang paagi gipakita ni Jesus nga ang isyu labot sa pagkasoberano sa Diyos mao ang labing hinungdanon?
• Unsay pangunang nalampos ni Jesus pinaagi sa iyang ministeryo ug kamatayon?
• Sa unsang mga paagi masundog nato ang panig-ingnan ni Jesus sa pagpakita nga kita dapig sa pagkasoberano ni Jehova?
[Kahon/Mga hulagway sa panid 29]
BAROG DAPIG KANG JEHOVA
Ingon sa nasayran sa daghang igsoon sa Korea ug sa bisan diin, sa dihang ang mga Kristohanon mag-atubang ug grabeng mga pagsulay, makatabang gayod kon tin-aw sa ilang hunahuna ang hinungdan sa maong mga pagsulay.
“Ang nakatabang kanamo sa paglahutay,” matod pa sa usa ka Saksi ni Jehova nga nabilanggo panahon sa rehimeng Sobyet, “mao ang tin-aw nga pagsabot bahin sa isyu nga gipatungha didto sa tanaman sa Eden—ang isyu labot sa katungod sa Diyos sa pagmando. . . . Kami nahibalo nga kami may kahigayonan sa pagbarog dapig sa pagmando ni Jehova. . . . Kini nakapalig-on kanamo ug nakapaarang kanamo sa paghupot sa among integridad.”
Ang laing Saksi mipatin-aw kon unsay nakatabang kaniya ug sa ubang mga Saksi didto sa kampo sa pinugos nga pagtrabaho. “Si Jehova nagpaluyo kanamo,” matod niya. “Bisan pa sa malisod nga mga kahimtang, kami nagtukaw sa espirituwal. Kanunay kaming nagdinasigay pinaagi sa pagpahinumdom sa matag usa nga kami mibarog dapig kang Jehova labot sa isyu sa unibersohanong pagkasoberano.”
[Hulagway sa panid 26]
Sa unsang paagi gipaluyohan ni Jesus ang pagkasoberano ni Jehova sa dihang gitental siya ni Satanas?
[Hulagway sa panid 28]
Unsay nalampos sa kamatayon ni Jesus?