Makaalagad Ka ba Diin Dako ang Panginahanglan sa mga Magmamantala sa Gingharian?

“Hayahay ang among pagkinabuhi sa Amerika apan nabalaka kami nga basig maapektohan kami ug ang among duha ka anak nga lalaki sa pagkamateryalistiko sa mga tawo didto. Ako ug ang akong asawa mga misyonaryo kanhi, ug buot namong mapahimuslan pag-usab ang maong simple apan malipayong kinabuhi.”

TUNGOD sa maong tinguha, niadtong 1991, misulat si Ralph ug Pam sa pipila ka sangang buhatan sa pagpahayag sa ilang tinguha sa pag-alagad diin dako ang panginahanglan sa mga magmamantala sa Gingharian. Ang sangang buhatan sa Mexico mitubag nga may dinaliang panginahanglan sa mga magmamantala sa Gingharian nga makasangyaw ngadto sa mga tawong nagsultig Iningles nianang nasora. Gani, ang sangang buhatan nag-ingon nga ang maong teritoryo “puti na aron anihon.” (Juan 4:35) Sa wala madugay, si Ralph ug Pam, uban sa ilang mga anak nga nag-edad ug 8 ug 12 niadtong tungora, midawat sa imbitasyon ug nangandam sa pagbalhin ngadto sa Mexico.

Dako Kaayong Teritoryo

Si Ralph miingon: “Sa wala pa kami mobiya sa Amerika, giingnan kami sa ubang mga igsoon: ‘Delikado ra ba sa Mexico!’ ‘Unsay inyong himoon kon masakit mo?’ ‘Nganong mobalhin pa man mo? Sa among tan-aw ang mga tawo didto nga nagsultig Iningles dili interesado sa kamatuoran!’ Apan determinado gihapon kaming moadto. Gani, amo nang napamalandong kon maayo ba kining desisyona. Dugay na namo kining giplano. Wala mi mangutang ug mga butang nga dugayng mabayran, nagtigom mig kuwarta, ug kadaghan na kaming naghisgot bahin sa mga suliran nga tingali among maatubang.”

Una, si Ralph ug ang iyang pamilya miadto sa sangang buhatan sa Mexico. Gipakitaan silag mapa sa tibuok nasod ug giingnan: “Kini ang inyong teritoryo!” Midesidir ang pamilya sa pagpuyo sa San Miguel de Allende, usa ka lungsod diin daghang langyaw ang nagpuyo, ug kini maoy mga 240 kilometros amihanan-kasadpan sa Mexico City. Paglabay sa tulo ka tuig, natukod ang Iningles-ug-pinulongan nga kongregasyon nga may 19 ka magmamantala nianang lungsora. Kadto ang unang Iningles-ug-pinulongan nga kongregasyon sa Mexico—apan dako pa ang buluhaton.

Mga usa ka milyong Amerikano ang nagpuyo sa Mexico. Dugang pa, daghang Mexicano nga mga propesyonal ug mga estudyante didto ang antigong mo-Iningles. Si Ralph miingon: “Nag-ampo kami nga daghan pa ang moboluntaryo sa pag-alagad dinhi. Kanunay kaming may bakanteng kuwarto sa balay alang sa mga igsoong moanha sa among lugar aron ‘mangespiya,’ ingnon ta.”—Num. 13:2.

Gipasimple ang Kinabuhi Aron Makaalagad Diin Dako ang Panginahanglan

Wala madugay nangabot ang ubang mga igsoon nga gustong moalagad diin dako ang panginahanglan. Apil kanila si Bill ug Kathy nga taga-Amerika. Nakaalagad na silag 25 ka tuig sa mga teritoryo diin dako ang panginahanglan. Nagplano sila nga magtuon ug Kinatsila, apan nausab ang ilang plano pagbalhin nila sa lungsod sa Ajijic sa tampi sa Lake Chapala, nga usa ka nindot nga dapit alang sa mga retirado nga taga-Amerika. Si Bill miingon, “Sa Ajijic, nangita kamig mga tawo nga Iningles ug pinulongan nga gustong makakat-on sa kamatuoran.” Nalipay si Bill ug Kathy tungod kay sulod lang sa duha ka tuig natukod ang usa ka kongregasyon nianang lungsora—ang ikaduhang Iningles-ug-pinulongan nga kongregasyon sa Mexico.

Gipasimple ni Ken ug Joanne nga taga-Canada ang ilang kinabuhi aron mas daghan silag panahon sa pagsangyaw. Sila usab mibalhin sa Mexico. Si Ken miingon, “Wala dayon mi makapasibo sa pagpuyo niining dapita nga walay init nga tubig diha sa gripo, walay koryente, o telepono sulod sa daghang adlaw.” Apan ang pagsangyaw makapalipay. Wala madugay, si Ken nahimong ministeryal nga alagad ug paglabay sa duha ka tuig siya nahimong ansiyano. Sa sinugdan, ang ilang anak nga babaye, si Britanny, nalisdan kay pipila lang ang mga batan-on sa maong gamayng kongregasyon nga nagsultig Iningles. Apan sa mitabang siya sa pagpanukod ug Kingdom Hall, nakabaton siyag daghang buotang mga higala sa tibuok nasod.

Si Patrick ug Roxanne, nga taga-Texas sa Amerika, nalipay sa pagkadungog nga may dili ra kaayo layo nga teritoryo diin ang mga tawo Iningles ug pinulongan. “Sa pag-adto namo sa Monterrey, usa ka lungsod sa amihanan-silangang Mexico, gibati namong gigiyahan kami ni Jehova aron makatabang didto,” matod ni Patrick. Sulod lang sa lima ka adlaw ilang nabaligya ang ilang balay sa Texas ug mibalhin ngadto nianang lungsora. Lisod manginabuhi sa Mexico, apan sa duha lang ka tuig, sila nalipay nga ang gamayng grupo sa 17 ka Saksi nahimong usa ka kongregasyon nga may 40 ka magmamantala.

Si Jeff ug Deb nagpasimple usab sa ilang kinabuhi aron makaalagad diin dako ang panginahanglan. Ilang gibaligya ang ilang dakong balay sa Amerika ug sila mibalhin sa usa ka gamayng apartment sa Cancún, usa ka siyudad sa silangang baybayon sa Mexico. Sa nangagi, naanad sila sa pagtambong ug asembliya diha sa mga bilding nga aircon ug duol ra sa ilang balay. Apan niining panahona sila mobiyaheg walo ka oras aron makatambong sa labing duol nga asembliya nga Iningles ug pinulongan, nga gipahigayon diha sa way-atop nga estadyum. Bisan pa niana, nalipay kaayo sila kay natukod ang usa ka kongregasyon sa Cancún nga may mga 50 ka magmamantala.

Ang pipila ka igsoong Mexicano misugod usab pagtabang sa pagsangyaw sa pinulongang Iningles. Pananglitan, sa pagkadungog ni Rubén ug sa iyang pamilya nga naporma ang unang Iningles-ug-pinulongan nga kongregasyon sa San Miguel de Allende ug tibuok Mexico ang teritoryo sa maong kongregasyon, sila midesisyon dayon sa pagtabang. Sa ato pa, kinahanglang magtuon silag Iningles, magpaangay sa laing kultura, ug magbiyaheg 800 kilometros kada semana sa pagtambong sa mga tigom. Si Rubén miasoy: “Nalipay kaming nakasangyaw ngadto sa mga langyaw nga dugay nang nagpuyo sa Mexico apan karon lang nakadungog sa mensahe sa maayong balita diha sa ilang kaugalingong pinulongan. Ang pipila kanila nagpasalamat kanamo nga nanglugmaw ang mga luha sa ilang mata.” Human makatabang sa kongregasyon sa San Miguel de Allende, si Rubén ug iyang pamilya nagpayunir sa lungsod sa Guanajuato, sa sentral Mexico, diin sila mitabang aron matukod ang Iningles-ug-pinulongan nga kongregasyon nga may kapig 30 ang magmamantala. Sila nag-alagad karon sa Iningles-ug-pinulongan nga grupo sa Irapuato, usa ka lungsod duol sa Guanajuato.

Pagsangyaw Ngadto sa mga Adunahan

Gawas pa sa mga langyaw, adunay daghang Mexicano nga makasultig Iningles. Sagad lisod ang pagsangyaw kanila sa mensahe sa Gingharian tungod kay nagpuyo sila sa mga lugar sa mga dato diin ang mga katabang ray moabli sa pultahan. O kon ang mga tagbalay maoy moabli sa pultahan, lagmit dili sila gustong mamati sa atong mensahe tungod kay nagtuo sila nga gamay rang sekta ang mga Saksi ni Jehova. Apan kon sila duawon sa mga Saksi nga tagalaing nasod, ang pipila mamati.

Tagda ang pananglitan ni Gloria sa siyudad sa Querétaro, sa sentral Mexico. Siya miingon: “Nasangyawan na ako kaniadto sa mga Saksi nga Kinatsila ug pinulongan apan wala ko mamati kanila. Apan sa naproblema ang akong pamilya ug mga higala, ako naguol kaayo ug midangop sa Diyos nga nangaliyupo sa pagtabang kanako nga makakitag kasulbaran. Pagkahuman niadto, usa ka babayeng Iningles ug pinulongan ang mianha sa among balay. Nangutana siya kon may makamao bang mosultig Iningles diha sa among balay. Kay usa man siya ka langyaw, naikag ko, ug giingnan siya nga antigo kog Iningles. Samtang nagsulti siya, naghunahuna ko, ‘Ngano bang nasaag man dinhi kining Amerikanaha? Apan ako nangayo sa Diyos ug tabang. Busa basin kining langyaw nga babaye ang tubag sa akong pag-ampo.” Midawat si Gloria ug pagtuon sa Bibliya ug kusog nga miuswag hangtod nabawtismohan, bisan pag misupak ang iyang pamilya. Si Gloria usa na karon ka regular payunir, ug ang iyang bana ug anak nga lalaki nag-alagad usab kang Jehova.

Mga Panalangin Niadtong Nagpasangkad sa Ilang Ministeryo

Ang pag-alagad diin dako ang panginahanglan sa mga magmamantala sa Gingharian daghag kalisdanan, apan daghan ang panalangin. Si Ralph, nga gihisgotan sa sinugdan, miingon: “Nagdumala mig mga pagtuon sa Bibliya uban sa mga tawo nga gikan sa Britanya, Tsina, Jamaica, Sweden, ug bisan sa mga sakop sa harianong pamilya gikan sa Ghana. Ang pipila sa maong mga estudyante sa Bibliya nangahimong bug-os-panahong mga alagad. Sa miaging katuigan, ang among pamilya nakasaksi sa pagkatukod sa pito ka Iningles-ug-pinulongan nga mga kongregasyon. Ang among duha ka anak nga lalaki nagpayunir uban namo, ug sila nag-alagad karon sa Bethel sa Amerika.”

Karon sa Mexico, aduna nay 88 ka Iningles-ug-pinulongan nga mga kongregasyon ug ubay-ubayng mga grupo. Unsay hinungdan sa maong kusog nga pagtubo? Daghang Iningles-ug-pinulongan nga mga tawo sa Mexico wala gayod makontak sukad sa mga Saksi. Ang uban namati kay walay nagpit-os kanila dili sama sa didto pa sila sa ilang kaugalingong nasod. Ang uban midawat sa tanyag nga magtuon ug Bibliya tungod kay sila retirado ug may panahon na sa pagtuon niana. Dugang pa, kapin sa 30 porsiyento sa mga magmamantala sa Iningles-ug-pinulongan nga mga kongregasyon nagpayunir, nga dakog natabang sa kadasig ug pagtubo sa maong mga kongregasyon.

Makadawat Kag Daghang Panalangin

Walay duhaduha nga daghan pang tawo sa tibuok kalibotan ang mamati sa mensahe sa Gingharian nga isangyaw kanila diha sa ilang kaugalingong pinulongan. Busa makapalipay nga daghang mahunahunaon-sa-espirituwal nga kaigsoonan—batag tigulang, tagsaanon ug minyo—gustong mobalhin ngadto sa mga dapit diin dako ang panginahanglan sa mga magmamantala sa Gingharian. Tinuod, mahimong sagubangon nila ang mga kalisdanan, apan balewala lang kana kon itandi sa kalipay dihang makakaplag silag mga tawong matinud-anon ug kasingkasing nga modawat sa mga kamatuoran sa Bibliya. Makapasibo ka ba sa imong kinabuhi aron makabalhin kag teritoryo diha mismo sa imong kaugalingong nasod o sa laing nasod diin dako ang panginahanglan sa mga magsasangyaw sa Gingharian?a (Luc. 14:28-30; 1 Cor. 16:9) Kon mao, makapaneguro ka nga imong madawat ang daghang panalangin.

[Footnote]

[Kahon sa panid 21]

Malipayong mga Retirado Nakapadani

Si Beryl nga taga-Britanya mibalhin sa Canada. Siya nagtrabaho didto ingong manedyer sa ubay-ubayng internasyonal nga mga kompaniya. Siya nahanas sa pagpangabayo ug napili pa nga hawas sa Canada sa 1980 nga Olimpiada. Sa pagretiro sa Chapala, Mexico, si Beryl ug ang iyang bana kasagaran mangaon sa restawran. Sa dihang namatikdan niyang maorag malipayon ang Iningles-ug-pinulongan nga mga retirado, nagpailaila siya sa iyang kaugalingon ug nangutana kon unsay ilang gihimo sa Mexico. Halos tanan sa maong malipayong mga tawo maoy mga Saksi ni Jehova. Si Beryl ug iyang bana naghunahuna nga kon makahatag ug kalipay ug katuyoan sa kinabuhi ang pagkaila sa Diyos, nan gusto usab nilang makaila kaniya. Human makatambong ug Kristohanong mga tigom sa ubay-ubayng mga bulan, si Beryl misugot nga magtuon sa Bibliya ug nahimong Saksi. Si Beryl dugayng nag-alagad ingong regular payunir.

[Kahon sa panid 22]

“Dako Kaayo Silag Natabang Kanamo”

Kadtong namalhin ngadto sa mga nasod diin dako ang panginahanglan sa mga magmamantala sa Gingharian gipabilhan pag-ayo sa lokal nga mga igsoon. Usa ka sangang buhatan sa Caribbean misulat: “Kon mamiya ang ginatos ka langyaw nga nag-alagad dinhi, maapektohan ang kalig-on sa mga kongregasyon. Dako kaayo silag natabang kanamo.”

Ang Pulong sa Diyos nag-ingon nga “ang kababayen-an nga nagapahayag sa maayong balita maoy usa ka dakong panon.” (Sal. 68:11) Busa, dili katingad-ang adunay daghang tagsaanong mga sister nga nag-alagad sa laing nasod. Dakong tabang ang maong nagsakripisyo-sa-kaugalingong mga sister. Usa ka sangang buhatan sa Silangang Uropa nag-ingon: “Daghang kongregasyon ang mas daghag sister, usahay moabot ug 70 porsiyento. Ang kadaghanan kanila bag-o sa kamatuoran, apan ang tagsaanong mga payunir nga sister gikan sa ubang nasod nakatabang pag-ayo tungod sa pagbansay sa mga bag-ohan. Gipabilhan gayod namo ang mga sister nga gikan sa laing nasod!”

Unsay pagbati sa maong mga sister bahin sa pag-alagad diha sa langyawng mga nasod? “Daghan ang mga kalisdanan,” matod ni Angelica, mga 35 anyos nga tagsaanong sister nga nakapayunir ug taastaas nga panahon sa laing nasod. “Sa usa nako ka asaynment, sa sunodsunod nga adlaw, naglisod ko ug baktas sa lapokong kadalanan ug akong nakita ang daghang kabos ug makapaguol gayod kadto. Apan ako natagbaw kay nakatabang sa mga tawo sa ministeryo. Nakapalipay usab kanako ang lokal nga mga sister nga mapasalamaton kanako tungod sa akong pagtabang kanila. Usa ka sister miingon nga siya nadasig usab sa pagsulod sa bug-os-panahong pag-alagad tungod sa akong panig-ingnan sa pag-adto sa ilang nasod aron magpayunir.”

Si Sue, usa ka payunir nga mga 50 anyos na ang edad, nag-ingon: “Makasinati ka gayod ug mga kalisdanan, apan balewala kini kon itandi sa mga panalanging imong madawat. Makapalipay gayod ang ministeryo! Sanglit mga batan-ong sister ang akong sagad nga ikauban diha sa ministeryo, akong ipaambit kanila ang akong natun-an sa Bibliya ug sa atong mga basahon kon unsaon pagsagubang ang kababagan. Kasagarang moingon sila nga makasagubang usab sila sa mga kalisdanan sa ilang kinabuhi tungod sa akong panig-ingnan sa pagsagubang sa mga problema samtang nagpayunir sa daghang katuigan ingong tagsaanon. Gibati ko ang dakong katagbawan nga nakatabang sa maong mga sister.”

[Mapa sa panid 20]

(Alang sa aktuwal nga porma, tan-awa ang publikasyon)

MEXICO

Guanajuato

Irapuato

Chapala

Ajijic

Lake Chapala

Monterrey

San Miguel de Allende

Querétaro

MEXICO CITY

Cancún

[Hulagway sa panid 23]

Ang pipila nalipay nga nakasangyaw sa mga langyaw nga karon pa lang nakadungog sa maayong balita