Usa ra ba ang Diyos sa Tanang Relihiyon?

“Duna na koy relihiyon, ug dili na ko mobalhin sa lain. Total, di man importante kon unsay imong tinuohan tungod kay ang tanang relihiyon usa ray Diyos.”

NAKADUNGOG ka na bag tawo nga misulti niana? Daghang tawo nagtuo nga bisan unsang relihiyon makatabang sa usa nga makaila sa Diyos ug makahibalo sa katuyoan sa kinabuhi. Ang mga tawo nagtuo usab nga adunay maayo ug dili maayo sa matag relihiyon ug walay relihiyon nga makapangangkon nga ang ila ray tinuod o bugtong dalan paingon sa Diyos.

Mao kanay hunahuna sa mga tawo nga nagtuong parehas ra ang tanang relihiyon. Gani, kon lahi kag hunahuna, isipon kang panatiko o mapihigon. Unsay imong opinyon bahin niana? Nagtuo ka ba usab nga usa ra ang Diyos sa tanang relihiyon? Hinungdanon ba kon unsay imong relihiyon?

Duna ba Gayoy Kalainan?

Sumala sa usa ka encyclopedia, adunay 9,900 ka relihiyon sa tibuok kalibotan karon, ug ang pipila niini adunay milyonmilyong membro sa lainlaing mga nasod. Gibanabana nga mga 70 porsiyento sa mga tawo maoy membro sa lima ka dagkong relihiyon—Budhismo, Hinduismo, Islam, Judaismo, ug Kristiyanismo. Kon ang tanang relihiyon nagsimba sa usa ra ka Diyos, kita makadahom gayod nga kining lima ka relihiyon halos managsama rag mga pagtulon-an, ilabina bahin sa Diyos ug sa iyang katuyoan. Mao ba kanay kahimtang?

Ang Romano Katolikong teologo nga si Hans Küng nag-ingon nga ang dagkong mga relihiyon parehas ug ginatudlo kon bahin sa pagpakiglabot sa ubang tawo. Pananglitan, kadaghanan sa mga relihiyon nagtudlo nga daotan ang pagpatay, pagpamakak, pagpangawat, ug pagpakigsekso tali sa mga membro sa pamilya. Sila nagtudlo usab bahin sa pagtahod sa mga ginikanan ug paghigugma sa mga anak. Apan, kon maylabot sa ubang butang, ilabina sa pagtulon-an bahin sa Diyos, kining mga relihiyona nagkasumpaki gayod.

Pananglitan, ang mga Hindu nagsimbag daghang diyos, samtang ang mga Budhista nagduhaduha kon duna bay Diyos. Ang Islam nagtudlo nga usa ra ang Diyos. Mao pod kanay gitudlo sa mga relihiyon sa Kakristiyanohan, apan kadaghanan kanila nagtudlo usab nga ang Diyos usa ka Trinidad. Gani, mismong ang mga relihiyon sa Kakristiyanohan lainlaig mga pagtulon-an. Ang mga Katoliko nagsimba kang Maria nga inahan ni Jesus, apan ang mga Protestante wala magsimba kaniya. Ang mga Katoliko nagdili sa birth control apan ang kadaghanan sa mga Protestante wala magdili niini. Dugang pa, ang mga Protestante wala magkauyon kon daotan ba o dili ang homoseksuwalidad.

Kon lainlain ang ilang mga pagtulon-an, makaingon ba kita nga usa ra ang Diyos niining mga relihiyona? Dili gayod. Hinunoa, makapatungha kinig kalibog kon kinsa ang Diyos ug kon unsay iyang gidahom sa mga tawo nga nagsimba kaniya.

Ang mga Relihiyon ba Nakapahiusa o Nakapabahin-bahin sa mga Tawo?

Kon usa ra ang Diyos sa tanang relihiyon, kita makadahom gayod nga ang matag usa kanila maningkamot nga magkahiusa ang katawhan. Ila ba kanang gibuhat? Gipakita sa kasaysayan nga ang relihiyon wala makapahiusa sa mga tawo, apan hinungdan pa hinuon kini sa pagkabahin-bahin ug kagubot. Hisgotan nato ang pipila ka pananglitan.

Gikan sa katuigan sa 1000 hangtod sa katuigan sa 1200, ang mga nasod nga nangangkong Kristohanon nakiggubat sa mga Muslim diha sa sunodsunod nga mga Krusada. Sa katuigan sa 1600 sa Uropa, ang mga Katoliko ug mga Protestante naggubatay, nga gitawag ug Thirty Years’ War. Sa 1947, human makabatog kagawasan ang India sa Gran Britanya, miulbo ang gubat tali sa mga Hindu ug mga Muslim. Di pa dugay, ang mga Katoliko ug mga Protestante naggubatay sa Amihanang Irlandia sulod sa pipila ka tuig. Sa Tungang Sidlakan, ang mga Hudiyo ug mga Muslim walay pakigdait sa usag usa. Ug ang kinagrabehan sa tanan mao ang Gubat sa Kalibotan II, diin nalangkit niana ang lima ka dagkong relihiyon, ug nagsangkaay pa gani nianang gubata ang mga sundalo nga parehas ug relihiyon.

Busa, makahinapos gayod kita nga ang mga relihiyon sa kalibotan wala makapatunghag kalinaw ug panaghiusa, ug wala usab nila magiyahi ang mga tawo ngadto sa matuod nga Diyos. Hinunoa, silay hinungdan kon nganong ang mga tawo nagkabahin-bahin ug nalibog kon kinsa gayod ang Diyos ug kon unsaon siya pagsimba. Busa, si bisan kinsa nga gustong mosimba sa matuod nga Diyos kinahanglang magtimbangtimbang pag-ayo sa relihiyon nga iyang pakig-ubanan. Kini nahiuyon sa gisulti sa Bibliya, nga usa sa kinakaraanan nga relihiyosong basahon.

Pilia Kon Kinsay Imong Alagaron

Ang Bibliya tin-awng nagpakita nga ang usa kinahanglang mamalandong pag-ayo ug mohimog hustong pagpili aron iyang makaplagan ang relihiyon nga nagsimba sa matuod nga Diyos. Si Josue, nga usa ka alagad ni Jehova nga Diyos, miingon ngadto sa karaang nasod sa Israel: “Pagpili alang sa inyong kaugalingon karong adlawa kon kinsay inyong alagaran, kon sa mga diyos ba nga gialagaran sa inyong mga katigulangan didto sa pikas nga bahin sa Suba o sa mga diyos sa mga Amorihanon kang kansang yuta inyong gipuy-an. Apan kon bahin kanako ug sa akong panimalay, kami mag-alagad kang Jehova.” Pipila ka tuig sa ulahi, si propetang Elias nag-awhag sa mga tawo sa paghimo usab niana nga nag-ingon: “Hangtod kanus-a ba nga kamo magakiangkiang sa duha ka lainlaing hunahuna? Kon si Jehova mao ang matuod nga Diyos, sumunod kamo kaniya; apan kon si Baal [diyos sa mga Canaanhon] man, sumunod kamo kaniya.”—Josue 24:15, 16; 1 Hari 18:21.

Kini ug ang uban pang mga teksto sa Bibliya nagpakita nga kadtong gustong moalagad sa matuod nga Diyos kinahanglang mohimog hustong desisyon. Ingon gihapon niana ang kahimtang karon. Kon gusto kitang mosimba ug moalagad sa matuod nga Diyos, kinahanglan usab kitang mohimog hustong desisyon. Apan unsay makatabang kanato sa paghimo niana? Unsaon nato pag-ila sa matuod nga mga magsisimba sa Diyos?

Ang Matuod nga mga Magsisimba Maila Pinaagi sa Ilang mga Bunga

Bahin sa matuod ug bakak nga mga magsisimba, si Jesu-Kristo miingon sa iyang mga sumusunod: “Ang mga tawo dili gayod mamupo ug ubas gikan sa sampinit o igos gikan sa kudyapa, dili ba? Sa ingon usab ang matag maayong kahoy mamungag maayong bunga, apan ang matag daot nga kahoy mamungag walay pulos nga bunga; ang usa ka maayong kahoy dili makabungag walay pulos nga bunga, ni ang usa ka daot nga kahoy makabungag maayong bunga. . . . Nan, sa pagkatinuod, pinaagi sa ilang mga bunga kamo makaila niadtong mga tawhana.” Busa ang matuod nga mga magsisimba mailhan pinaagi sa ilang mga bunga, o binuhatan. Unsa kini nga mga bunga?—Mateo 7:16-20.

Una, ang mga membro sa matuod nga relihiyon gihiusa sa gugma. Giingnan ni Jesus ang iyang mga tinun-an: “Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” Ang matuod nga mga sumusunod ni Kristo angayng magpasundayag ug gugma nga magpaila nga sila matuod gayod nga mga magsisimba.—Juan 13:34, 35.

Tungod niini, ang matuod nga mga Kristohanon dili moapil sa gubat. Nagsunod ba niana ang mga membro sa simbahan? Sa Gubat sa Kalibotan II, ang bugtong relihiyon nga wala mosuportar sa gubat mao ang mga Saksi ni Jehova. Si Dr. Hanns Lilje, nga kanhing obispo sa Simbahan sa Protestante sa Hannover, Germany, misulat bahin sa mga Saksi: “Sila haom gayong makapangangkon nga mao lamang ang relihiyon nga wala magsundalo tungod sa diktar sa ilang tanlag panahon sa pagmando ni Hitler.” Sa maong gubat, ang mga Saksi sa daghang nasod mipili nga silotan inay mosuportar niana.

Unsa ang ubang mga bunga nga magpaila sa tinuod nga mga sumusunod ni Jesus? Diha sa gitawag ug Pag-ampo sa Ginoo, si Jesus miingon: “Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” Ang unang gihisgotan ni Jesus mao ang pagbalaan sa ngalan sa Diyos nga Jehova. Iyang gipahayag ang panghinaot nga pinaagi sa Gingharian sa Diyos, ang kabubut-on ni Jehova matuman dinhi sa yuta. Unsa nga relihiyon ang nagpaila sa ngalan ni Jehova ug nagmantala nga ang Gingharian sa Diyos mao lamang ang makahatag ug kalinaw sa yuta? Ang mga Saksi ni Jehova nagmantala sa maayong balita sa Gingharian diha sa 236 ka nasod ug kayutaan, nga nanagtag ug mga basahon sa kapin sa 470 ka pinulongan.—Mateo 6:9, 10.

Dugang pa, ang mga Saksi ni Jehova nagsunod sa ehemplo ni Jesus nga dili moapil sa politikal ug sosyal nga mga isyu. “Sila dili bahin sa kalibotan, ingon nga ako dili bahin sa kalibotan,” matod pa ni Jesus ngadto sa iyang mga tinun-an. Ang mga Saksi usab nagtuo nga ang Bibliya Pulong sa Diyos ug sila kombinsido nga “ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong, aron ang tawo sa Diyos mahimong takos gayod, bug-os nga masinangkapan alang sa tanang maayong buhat.”—Juan 17:14, 17; 2 Timoteo 3:16, 17.

Ang Matuod nga Relihiyon Lahi sa Uban

Ang mga bunga sama sa masakripisyohon-sa-kaugalingon nga gugma, tinguha nga mabalaan ang ngalan ni Jehova, pagmantala sa Gingharian sa Diyos, pagkahimong bulag sa kalibotan, ug pagtuo sa Bibliya nagpaila sa tinuod nga mga magsisimba. Ang maong mga bunga nagpaila usab nga ang matuod nga mga magsisimba lahi sa ubang mga relihiyon. Ang usa ka babaye nga naestorya sa mga Saksi ni Jehova sa daghang higayon miingon: “Daghan kog nahibaloang relihiyon, ug silang tanan parehas ra. Kamo lang gyod ang lahi sa uban.”

Dayag nga dili tanang relihiyon ang nagsimba sa matuod nga Diyos. Apan adunay usa ka grupo nga lahi sa uban—ang mga Saksi ni Jehova, nga karon mikabat nag kapin sa pito ka milyon sa tibuok kalibotan. Pinaagi sa pagmantala ug pagsunod sa Bibliya, ilang nahiusa ang mga tawo nga lainlaig nasyonalidad, pinulongan, kagikan, ug rasa diha sa pag-alagad sa bugtong matuod nga Diyos nga si Jehova—butang nga wala mahimo sa ubang relihiyon. Sila malipay sa pagtabang kanimo nga makakat-on bahin sa matuod nga Diyos, sa iyang mga sugo, ug sa pagtagamtam ug kalinaw ug kasegurohan diha sa pagsimba kaniya sa paagi nga iyang giuyonan. Dili ba maayong tumong kana?

[Hulagway sa panid 14]

Ortodoksong pari nga nagbendisyon sa bag-ong mga sundalo sa Ukraine sa 2004

[Credit Line]

GENIA SAVILOV/AFP/Getty Images

[Hulagway sa panid 15]

Ang mga Saksi ni Jehova nagtabang sa mga tawo sa tanang dapit sa pagkat-on bahin sa Diyos ug sa iyang Gingharian

[Picture Credit Lines sa panid 12]

Page 12: Buddhist woman: © Yan Liao/Alamy; Hindu holy man: © imagebroker/Alamy; page 13: Man reading Koran: Mohamed Amin/Camerapix; Jewish man: Todd Bolen/Bible Places.com