Pagpatunhay sa Panaghigalaay sa Kalibotan nga Uhaw sa Gugma
“Ako nagsugo kaninyo niining mga butanga, nga kamo maghigugmaay sa usag usa.”—JUAN 15:17.
1. Nganong ang unang-siglong mga Kristohanon kinahanglang magpabiling suod sa usag usa?
SA IYANG kataposang gabii sa yuta, si Jesus nag-awhag sa iyang maunongong mga tinun-an sa pagpatunhay sa ilang panaghigalaay. Sayosayo nianang gabhiona, siya miingon nga ang ilang gugma sa usag usa maoy timailhan nga sila iyang mga sumusunod. (Juan 13:35) Ang mga apostoles kinahanglang magpabiling suod sa usag usa aron sila makalahutay sa mga pagsulay nga ilang maatubang ug mapalampos ang buluhaton nga iyang ipiyal kanila. Sa pagkatinuod, ang unang-siglong mga Kristohanon nailhan tungod sa ilang pagkamaunongon sa Diyos ug sa usag usa.
2. (a) Unsay determinado natong buhaton, ug ngano? (b) Unsang mga pangutana ang atong pagahisgotan?
2 Karong adlawa, makalilipay nga mahimong bahin sa tibuok-kalibotang organisasyon kansang mga membro nagsunod sa sumbanan nga gipakita niadtong unang-siglong mga Kristohanon! Kita determinado sa pagtuman sa sugo ni Jesus nga magpakitag tinuod nga gugma sa usag usa. Apan, niining kataposang mga adlaw, kadaghanan sa mga tawo dili maunongon ug walay kinaiyanhong pagbati. (2 Tim. 3:1-3) Ang ilang panaghigalaay sagad taphaw lamang ug hinakog ang motibo. Aron magpabilin ang atong timailhan ingong matuod nga mga Kristohanon, dili nato sundogon ang maong mga tinamdan. Nan, atong hisgotan ang mosunod: Unsa ang pundasyon sa malungtarong panaghigalaay? Sa unsang paagi kita makabaton ug maayong mga higala? Kanus-a kinahanglang putlon ang panaghigalaay? Ug sa unsang paagi mahuptan ang maayong panaghigalaay?
Unsa ang Pundasyon sa Malungtarong Panaghigalaay?
3, 4. Unsa ang pundasyon sa kinalig-onang panaghigalaay, ug ngano?
3 Ang pundasyon sa kinalig-onang panaghigalaay mao ang gugma kang Jehova. Si Haring Solomon misulat: “Kon ang usa ka tawo makabuntog sa usa nga nag-inusara, ang duha nga magkauban makabarog batok kaniya. Ug ang tulo ka bakukon nga pisi dili daling mabugto.” (Eccl. 4:12) Kon si Jehova ang ikatulong pisi diha sa panaghigalaay, kana molungtad.
4 Tinuod, kadtong wala mahigugma kang Jehova makabaton usab ug makapalipayng panaghigalaay. Apan kon ang mga indibiduwal nasuod tungod sa ilang gugma sa Diyos, ang ilang panaghigalaay molig-on. Kon motungha ang dili pagsinabtanay, ang matuod nga mga higala motratar sa usag usa sa paagi nga makapahimuot kang Jehova. Kon ang mga kaaway sa Diyos mosulay sa pagpahinabog pagkabahinbahin, ilang makita nga ang panaghigalaay sa matuod nga mga Kristohanon dili gayod mabungkag. Latas sa kasaysayan, napamatud-an sa mga alagad ni Jehova nga sila andam mamatay inay luiban ang ilang igsoon.—Basaha ang 1 Juan 3:16.
5. Nganong malungtaron kaayo ang panaghigalaay ni Ruth ug Noemi?
5 Sa walay duhaduha, ang labing makalilipay nga panaghigalaay mao kanang maugmad nato uban niadtong nahigugma kang Jehova. Tagda ang ehemplo ni Ruth ug Noemi. Ang ilang panaghigalaay maoy usa sa labing dalayegon diha sa Bibliya. Nganong malungtaron kaayo ang ilang panaghigalaay? Gipadayag ni Ruth ang hinungdan sa dihang siya miingon kang Noemi: “Ang imong katawhan mahimong akong katawhan, ug ang imong Diyos akong Diyos. . . . Hinaot si Jehova magbuhat niana kanako ug magdugang pa niana kon may bisan unsa man gawas sa kamatayon nga magbulag kanako ug kanimo.” (Ruth 1:16, 17) Dayag nga si Ruth ug Noemi may lalom nga gugma sa Diyos, ug kini nag-impluwensiya sa ilang pagtratar sa usag usa. Ingong resulta, sila gipanalanginan ni Jehova.
Kon sa Unsang Paagi Makabaton ug Maayong mga Higala
6-8. (a) Unsay gikinahanglan aron magmalungtaron ang panaghigalaay? (b) Sa unsang paagi makahimo ka sa unang lakang aron makabatog mga higala?
6 Ang ehemplo ni Ruth ug Noemi nagpakita nga ang maayong panaghigalaay kinahanglang ugmaron. Ang gugma kang Jehova mao ang pundasyon. Apan ang malungtarong panaghigalaay nagkinahanglag paghago ug pagsakripisyo. Bisan ang mga managsoon nga nagsimba kang Jehova ug sakop sa Kristohanong pamilya kinahanglang maningkamot aron maugmad ang suod nga panaghigalaay. Nan, sa unsang paagi makabaton ug maayong mga higala?
7 Himoa ang unang lakang. Si apostol Pablo nag-awhag sa iyang mga igsoon sa kongregasyon sa Roma nga ‘sundon ang dalan sa pagkamaabiabihon.’ (Roma 12:13) Ang pagsubay sa usa ka literal nga dalan nagpasabot nga ang usa mohimog sunodsunod nga lakang. Sa susama, ang pagkamaabiabihon nagpasabot nga ang usa mohimog sunodsunod nga ginagmay ug makanunayong mga buhat. Dili mahimo nga ang laing tawo maoy mosubay sa dalan sa pagkamaabiabihon alang kanimo. (Basaha ang Proverbio 3:27.) Ang pagdapit sa lainlaing igsoon sa kongregasyon alang sa usa ka simple nga pagpangaon maoy usa ka paagi nga imong ikapakita ang pagkamaabiabihon. Mahimo ba nimong batasanon ang pagpakitag pagkamaabiabihon sa mga igsoon sa inyong kongregasyon?
8 Ang pagpakig-partner sa lainlaing igsoon diha sa buluhatong pagsangyaw maoy laing paagi nga makabaton kag mga higala. Sa dihang imong madungog ang imong partner nga kinasingkasing nga nagpahayag sa iyang gugma kang Jehova ngadto sa tagbalay, natural lang nga masuod ka sa maong indibiduwal.
9, 10. Unsang ehemplo ang gipakita ni Pablo, ug sa unsang paagi masundog nato siya?
9 Pasangkara ang imong pagmahal. (Basaha ang 2 Corinto 6:12, 13.) Mibati ka ba nga wala kay mahimong higala diha sa inyong kongregasyon? Kon mao, dili kaha nga pilian ka ra kaayo? Si apostol Pablo nagpakitag maayong ehemplo sa pagpasangkad sa iyang pagmahal. Kaniadto, wala gayod siya maghunahuna nga makaugmad siya ug suod nga panaghigalaay sa mga dili Hudiyo. Hinunoa, siya nahimong “apostol alang sa kanasoran.”—Roma 11:13.
10 Dugang pa, si Pablo wala lamang makighigala sa parehas niyag edad. Pananglitan, sila ni Timoteo nahimong suod nga mga higala bisan pag dako ug kalainan ang ilang edad ug kagikan. Karong adlawa, gipabilhan pag-ayo sa daghang batan-on ang ilang panaghigalaay uban sa mga edaran sa kongregasyon. “Duna koy suod nga higala nga nag-edad nag kapin sa 50 anyos,” matod pa ni Vanessa, nga kapin sa 20 ang edad. “Akong maestorya kaniya ang bisan unsa nga akong maestorya sa akong mga higala nga parehas nakog edad. Ug mahunahunaon kaayo siya nako.” Sa unsang paagi maugmad ang maong panaghigalaay? Si Vanessa miingon: “Akong gipaningkamotan nga maugmad kini nga panaghigalaay.” Andam ka bang makighigala niadtong dili nimo parehas ug edad? Si Jehova magapanalangin gayod sa imong mga paningkamot.
11. Unsay atong makat-onan sa panig-ingnan ni Jonatan ug David?
11 Magmaunongon. “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit,” misulat si Solomon. (Prov. 17:17) Sa dihang gisulat niya kini, lagmit naghunahuna si Solomon sa panaghigalaay nga naugmad sa iyang amahan nga si David uban kang Jonatan. (1 Sam. 18:1) Gusto ni Haring Saul nga ang iyang anak nga si Jonatan maoy makapanunod sa trono sa Israel. Apan gidawat ni Jonatan ang kamatuoran nga gipili ni Jehova si David alang niining pribilehiyoa. Dili sama kang Saul, si Jonatan wala masina kang David. Wala siya masuko sa dihang gidayeg si David, ni mituo siya sa pagpangdaot ni Saul kang David. (1 Sam. 20:24-34) Sama ba kita kang Jonatan? Sa dihang nakadawat ug pribilehiyo ang atong mga higala, nalipay ba kita? Sa dihang sila nakaagom sa kalisdanan, ato ba silang gihupay ug gitabangan? Kon makadungog kitag dili-maayong tabi bahin sa usa ka higala, motuo ba dayon kita niana? O, sama kang Jonatan, kita ba maunongong molaban sa atong higala?
Sa Dihang Kinahanglang Putlon ang Panaghigalaay
12-14. Unsang hagit ang giatubang sa pipila ka estudyante sa Bibliya, ug sa unsang paagi kita makatabang kanila?
12 Sa dihang ang usa ka estudyante sa Bibliya mosugod paghimog kausaban sa iyang paagi sa pagkinabuhi, mahimong mag-atubang siyag hagit bahin sa panaghigalaay. Tingali may suod siyang mga higala nga wala magsunod sa mga sukdanan sa Bibliya. Sa nangagi, lagmit kanunay siyang makig-uban nila. Apan karon, iyang nakita nga ang ilang ginabuhat mahimong makaimpluwensiya kaniya, ug iyang gibati nga kinahanglan niyang limitahan ang pagpakigkita kanila. (1 Cor. 15:33) Bisan pa niana, basin bation niya nga dili siya maunongon kon dili na siya makig-uban kanila.
13 Kon ikaw usa ka estudyante sa Bibliya nga nag-atubang niana nga hagit, hinumdomi nga ang tinuod nga higala malipay sa imong paningkamot nga mobuhat ug maayo. Basin moduyog pa gani sila nimo sa pagkuhag kahibalo bahin kang Jehova. Sa laing bahin, ang dili tinuod nga mga higala ‘magpadayon sa pagsulti nga mapasipalahon kanimo’ tungod kay ikaw wala na makig-uban kanila “niining samang paglunang sa unodnong pagpatuyang.” (1 Ped. 4:3, 4) Sa pagkatinuod, kini nga mga higala ang dili maunongon, dili ikaw.
14 Sa dihang ang mga estudyante sa Bibliya isalikway sa ilang kanhing mga higala nga wala mahigugma sa Diyos, sila makakitag bag-ong mga higala sulod sa kongregasyon. (Gal. 6:10) Nailhan ba nimo ang mga estudyante sa Bibliya nga tigtambongan sa inyong mga tigom? Makagahin ka bag panahon sa pagdasig kanila?
15, 16. (a) Unsay angay natong buhaton kon ang usa ka higala mohunong sa pag-alagad kang Jehova? (b) Sa unsang paagi atong mapamatud-an ang atong gugma sa Diyos?
15 Apan, komosta man kon ang usa ka higala diha sa kongregasyon motalikod kang Jehova, tingali kinahanglan siyang ipalagpot? Makapasubo gayod ang maong kahimtang. Sa paghubit sa iyang reaksiyon sa dihang ang iyang suod nga higala mihunong sa pag-alagad kang Jehova, usa ka sister miingon: “Nahugno gayod ako. Abi nakog lig-on na siya sa kamatuoran, apan dili diay. Ambot kon nag-alagad lang siya kang Jehova aron pahimut-an ang iyang pamilya. Mao nga gisusi sab nako ang akong motibo. Husto ba ang akong motibo sa pag-alagad kang Jehova?” Sa unsang paagi nakasagubang kining maong sister? “Akong gitugyan ang akong palas-anon kang Jehova,” siya miingon. “Determinado kong ipakita kang Jehova nga ako siyang gihigugma tungod sa kon unsa siya, dili lang tungod kay iya kong gitagan-ag mga higala sulod sa iyang organisasyon.”
16 Dili kita makadahom nga kita magpabiling higala sa Diyos kon kita modapig niadtong gustong makighigala sa kalibotan. Ang disipulo nga si Santiago misulat: “Wala ba kamo mahibalo nga ang pagpakighigala sa kalibotan maoy pagpakig-away sa Diyos? Busa, bisan kinsa nga buot makighigala sa kalibotan maghimo sa iyang kaugalingon nga kaaway sa Diyos.” (Sant. 4:4) Atong mapamatud-an ang atong gugma sa Diyos pinaagi sa pagsalig nga Siya motabang kanato sa pagsagubang sa pagkawala sa usa ka higala kon kita maunongon Kaniya. (Basaha ang Salmo 18:25.) Ang sister nga gihisgotan ganina nag-ingon: “Akong nakat-onan nga dili nato mapugos ang usa sa paghigugma kang Jehova o kanato. Personal kana nga desisyon.” Apan, unsay atong mahimo aron mahuptan ang makapalig-ong panaghigalaay uban niadtong nagpabilin sulod sa kongregasyon?
Paghupot ug Maayong Panaghigalaay
17. Sa unsang paagi ang suod nga managhigala makigsulti sa usag usa?
17 Ang maayong komunikasyon makapalig-on sa panaghigalaay. Samtang imong basahon ang mga asoy sa Bibliya bahin kang Ruth ug Noemi, David ug Jonatan, ug bahin kang Pablo ug Timoteo, imong mamatikdan nga ang suod nga managhigala adunay bukas nga komunikasyon apan buhaton kini sa matinahorong paagi. Si Pablo misulat kon sa unsang paagi kita angayng makigsulti sa uban: “Himoa ang inyong sinultihan nga kanunayng madanihon, tinimplahan ug asin.” Si Pablo espesipikong nagtumong sa paagi nga kita makigsulti “sa mga tagagawas,” sa ato pa, niadtong dili nato mga igsoon sa pagtuo. (Col. 4:5, 6) Kon ang mga dili magtutuo takos pakitaag pagtahod sa dihang kita makigsulti kanila, labi na gayod ang atong mga higala sulod sa kongregasyon!
18, 19. Unsaon nato paglantaw ang tambag nga atong madawat gikan sa usa ka Kristohanong higala, ug unsang panig-ingnan ang gipakita sa mga ansiyano sa Efeso alang kanato?
18 Pabilhan sa suod nga managhigala ang opinyon sa matag usa, busa ang ilang kabildohay kinahanglang matinahoron ug madayganon. Ang maalamong hari nga si Solomon misulat: “Ang lana ug insenso mao ang maglipay sa kasingkasing, mao man usab ang katam-is sa higala sa usa ka tawo gumikan sa tambag sa kalag.” (Prov. 27:9) Mao ba kanay imong panglantaw sa tambag nga imong madawat gikan sa usa ka higala? (Basaha ang Salmo 141:5.) Kon ang usa ka higala nagpahayag sa iyang kabalaka bahin sa imong ginabuhat, unsay imong reaksiyon? Lantawon ba nimo kana ingong pagpakitag mahigugmaong-kalulot, o masuko ka hinuon?
19 Si apostol Pablo nasuod sa mga ansiyano sa kongregasyon sa Efeso. Lagmit nakaila niya ang pipila kanila sa dihang sila nahimong magtutuo. Apan, sa iyang kataposang pagpakigkita kanila, siya naghatag ug madayganong tambag. Unsay ilang reaksiyon? Ang mga higala ni Pablo wala masuko. Hinunoa, ilang gipabilhan ang iyang kahangawa kanila, ug mihilak pa gani sila kay dili na nila siya makita pag-usab.—Buh. 20:17, 29, 30, 36-38.
20. Unsay buhaton sa usa ka mahigugmaong higala?
20 Ang tinuod nga mga higala dili lamang modawat ug maalamong tambag kondili mohatag usab niana. Siyempre, kinahanglang mahibalo kita kon kanus-a “magtagad sa [atong] kaugalingong kalihokan.” (1 Tes. 4:11) Ug kinahanglang ilhon nato nga ang matag usa “manubag alang sa iyang kaugalingon ngadto sa Diyos.” (Roma 14:12) Apan kon gikinahanglan, ang mahigugmaong higala malulotong magpahinumdom sa usa ka igsoon sa mga sukdanan ni Jehova. (1 Cor. 7:39) Pananglitan, unsay imong buhaton kon ang usa ka dili-minyong higala nasuod pag-ayo sa usa ka dili magtutuo? Kay nahadlok ka nga mabungkag ang inyong panaghigalaay, dili na lang ba nimo siya pahinumdoman? O kon dili niya tagdon ang imong tambag, unsa may imong buhaton? Ang tinuod nga higala moduol sa mahigugmaong mga magbalantay aron matabangan ang igsoon nga nakahimog sayop nga lakang. Nagkinahanglan kanag kaisog. Apan, ang panaghigalaay nga gipasukad sa gugma kang Jehova dili daling mabungkag.
21. Usahay, unsay atong mahimo, apan nganong hinungdanon nga atong mahuptan ang lig-ong panaghigalaay diha sa kongregasyon?
21 Basaha ang Colosas 3:13, 14. Usahay, ang atong mga higala “adunay reklamo” batok kanato tungod sa atong nahimo, ug sila usab makabuhat o makasulti ug mga butang nga makapalagot kanato. “Kitang tanan mangapandol sa makadaghan,” misulat si Santiago. (Sant. 3:2) Bisan pa niana, ang panaghigalaay masukod dili sa kon unsa ka subsob nga kita nakasala sa usag usa kondili sa kon unsa ka bug-os nga atong gipasaylo ang maong mga kasaypanan. Hinungdanon gayod nga atong palig-onon ang atong panaghigalaay pinaagi sa bukas nga komunikasyon ug bug-os nga pagpasaylo sa usag usa! Kon atong ipasundayag ang maong gugma, kini mahimong “hingpit nga bugkos sa panaghiusa.”
Unsay Imong Tubag?
• Sa unsang paagi kita makabaton ug maayong mga higala?
• Kanus-a kinahanglang putlon ang panaghigalaay?
• Unsay angay natong buhaton aron mahuptan ang lig-ong panaghigalaay?
[Hulagway sa panid 18]
Unsa ang pundasyon sa malungtarong panaghigalaay ni Ruth ug Noemi?
[Hulagway sa panid 19]
Kanunay ka bang nagpakitag pagkamaabiabihon?