Ang Pagkadaotan Seguradong Matapos!

ANG Diyos naghatag kanato sa iyang inspiradong Pulong, nga nagpatin-aw kon nganong ang mga tawo mohimog daotan. Siya naghatag usab kanatog kagawasan sa pagpili ug sa katakos sa pagpugong-sa-kaugalingon nga makatabang kanato sa paglikay sa paghimog daotan. (Deuteronomio 30:15, 16, 19) Kay aduna kita niana nga katakos, atong masusi kon unsay atong mga kahuyangan ug maningkamot kita sa pagtul-id niana. Kon atong likayan ang paghimog daotan, kita magmalipayon maingon man ang mga tawo nga atong ikauban.—Salmo 1:1.

Apan bisan pa sa atong paningkamot nga dili mohimog daotan, ang mga tawo padayong mag-antos tungod sa daotang buhat sa uban. Ang Bibliya nagpasidaan: “Hibaloi kini, nga sa kataposang mga adlaw moabot ang makuyaw nga mga panahong lisod sagubangon.” Sa pagpakita kon nganong “lisod sagubangon” ang atong panahon, kini nagpadayon sa pag-ingon: “Ang mga tawo unya magmahigugmaon sa ilang kaugalingon, magmahigugmaon sa salapi, mapagawalon, mapahitas-on, mapasipalahon, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo, mga mahigugmaon sa kalipayan inay nga mga mahigugmaon sa Diyos, nga nagbaton sa dagway sa diyosnong pagkamahinalaron apan nagpanghimakak sa gahom niini; ug magpahilayo ka kanila.”—2 Timoteo 3:1-5.

Lagmit imong namatikdan ang pamulong nga “kataposang mga adlaw” nga gihisgotan diha sa tagna. Unsay kahulogan niana alang kanimo? Buweno kon moingon kitag “kataposang mga adlaw,” nagpasabot kana nga adunay matapos. Unsa kana? Matikdi kon unsay gisaad sa Diyos diha sa iyang Pulong.

Ang mga daotan bug-os laglagon.

“Sa dili na madugay, ug ang daotan mawala na; ug pagasusihon mo gayod ang iyang dapit, ug siya mawala diha. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”—SALMO 37:10, 11.

“Si Jehova nagabantay sa tanang nahigugma kaniya, apan iyang pagalaglagon ang tanang daotan.”—SALMO 145:20.

Wala na unyay pagdaogdaog.

“Pagaluwason niya ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang. Gikan sa pagpanglupig ug sa kapintasan tubson niya ang ilang kalag.”—SALMO 72:12, 14.

“Ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”—ROMA 8:21.

Ang mga tawo tagan-an sa tanan nilang panginahanglan.

“Sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila.”—MIQUEAS 4:4.

“Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon. Kay ang mga adlaw sa akong katawhan mahisama sa mga adlaw sa usa ka kahoy; ug gamiton sa bug-os sa akong mga pinili ang buhat sa ilang mga kamot.”—ISAIAS 65:21, 22.

Maghari ang hustisya.

“Nan, sa tino, dili ba ipatuman sa Diyos ang hustisya alang sa iyang mga pinili nga nagatuaw kaniya adlaw ug gabii . . . ? Ako magaingon kaninyo, Iyang ipatuman sa madali ang hustisya kanila.”—LUCAS 18:7, 8.

“Si Jehova mahigugmaon sa hustisya, ug dili niya pagabiyaan ang mga maunongon kaniya. Sila pagabantayan hangtod sa panahong walay tino.”—SALMO 37:28.

Wala nay kahakog ug motunhay ang pagkamatarong.

“Ang pagkamatarong mao gayod ang makat-onan sa mga molupyo sa mabungahong yuta.”—ISAIAS 26:9.

“Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.”—2 PEDRO 3:13.

Naghimog mga Kausaban—Bisan Karon

Sa walay duhaduha, kita nalipay sa maong mga saad. Apan matuman ba gayod kana? Sa pagkatinuod, karon pa lang aduna nay pamatuod nga matuman ang mga saad sa Diyos. Unsa ang maong pamatuod? Milyonmilyon na sa tibuok kalibotan ang nakahimo sa pagwagtang sa ilang mahakogon, imoral, ug mabangis nga kinaiya ug nahimong matinud-anon, makigdaiton, ug buotang mga tawo. Karon, ang mga Saksi ni Jehova, nga may gidaghanong kapin sa pito ka milyon, nakatagamtam ug internasyonal nga panagsoonay. Wala silay rasanhon, tribonhon, nasodnon, politikanhon, ug ekonomikanhong mga panagbangi nga maoy hinungdan sa pagdinumtanay, kapintasan, ug pagpinatyanay sa tibuok kasaysayan.a Ang maong mga kausaban nga nagakahitabo karon maoy lig-ong pamatuod nga ang mga saad sa Diyos aduna unyay mas dakong katumanan.

Apan unsay nagpahinabo sa maong mga kausaban? Ang tubag makita diha sa laing saad sa Bibliya, nga gisulat ni propetang Isaias. Siya miingon:

“Ang lobo mopuyo gayod sa makadiyot uban sa laki nga nating karnero, ug ang leopardo mohigda uban sa nating kanding, ug ang nating baka ug ang may-lambungay nga nating leyon ug ang pinakaon-pag-ayo nga hayop magkauban ang tanan; ug usa lamang ka gamayng bata ang mangulo kanila. . . . Bisan ang leyon mokaon ug uhot sama sa torong baka. Ug ang bata nga masuso magadula sa lungag sa kobra; ug ang usa ka bata nga linutas mokuot sa buho nga lutsanan sa kahayag sa malalang bitin. Dili sila magadaot ni magagun-ob sa tibuok nakong bukid nga balaan; tungod kay ang yuta mapuno sa kahibalo kang Jehova ingon sa katubigan nga nagtabon sa dagat mismo.”—Isaias 11:6-9.

Kini ba nga tagna nagtumong lamang sa kalinaw tali sa mga mananap ug tawo nga mahitabo sa umaabot? Dili. Hinunoa, labaw pa ang nalangkit niana. Matikdi nga gihisgotan sa ulahing bahin sa maong teksto kon unsay magpahinabo sa maong kausaban: “Ang yuta mapuno sa kahibalo kang Jehova.” Kana ba nga kahibalo makapausab sa kinaiya sa mga mananap? Dili gayod. Hinunoa, ang maong kahibalo makapausab sa mga tawo. Kini nga tagna naghisgot nga kadtong samag mananap ug kinaiya magbag-o ug mag-ugmad ug personalidad nga sama nianang kang Kristo tungod sa ilang pagkakat-on ug pagpadapat sa gitudlo sa Bibliya.

Tagda pananglitan si Pedro.b Siya nagtuo nga ang iyang pag-anib sa usa ka grupo sa mga terorista maoy alang sa kawsa sa hustisya. Human bansaya, siya gisugo nga bombahan ang baraks sa mga polis. Samtang nangandam niana, siya nadakpan. Si Pedro napriso sulod sa 18 ka bulan, diin gipadayon niya ang iyang subersibo nga kalihokan. Sa laing bahin, ang iyang asawa misugod sa pagtuon sa Bibliya uban sa mga Saksi ni Jehova. Paggawas ni Pedro sa prisohan, siya usab nagtuon sa Bibliya, ug tungod sa iyang nakat-onan bahin kang Jehova nga Diyos, nausab ang iyang kinaiya ug panglantaw sa kinabuhi. “Ako nagpasalamat kang Jehova nga Diyos nga wala ko makapatayg tawo sa dihang terorista pa ko,” matod ni Pedro. “Karon akong gigamit ang espada sa espiritu sa Diyos, ang Bibliya, sa pagpahayag sa mensahe sa tinuod nga kalinaw ug hustisya—ang maayong balita sa Gingharian sa Diyos.” Giduaw pa gani ni Pedro ang baraks nga giplanohan niyang bombahan aron ipaambit ang mensahe bahin sa kalinaw ug sa usa ka kalibotan nga wala nay kapintasan.

Ang gahom sa Pulong sa Diyos sa pagbag-o sa mga tawo makapalig-on sa atong pagtuo nga matuman gayod ang saad sa Diyos nga taposon ang tanang pagkadaotan. Oo, dili hangtod sa hangtod nga ang mga tawo mohimog daotan; sila mahimong magbag-o. Sa dili madugay laglagon sa Diyos ang utok sa tanang pagkadaotan, si Satanas nga Yawa, nga maoy nagmaniobra sa mga kalihokan sa kalibotan. Ang Bibliya nag-ingon: “Ang tibuok kalibotan nailalom sa gahom sa usa nga daotan.” (1 Juan 5:19) Apan sa dili madugay siya mawala na. Wagtangon usab kadtong dili gustong magbag-o. Pagkanindot unya sa kinabuhi nianang panahona!

Unsay kinahanglang buhaton sa usa aron seguradong matagamtam niya ang maong kaugmaon? Hinumdomi nga ang “kahibalo kang Jehova” maoy nakapausab sa mga tawo karon ug sa dili madugay magpahinabo kini ug tibuok kalibotang kausaban. Pinaagi sa pagkuhag tukmang kahibalo sa Bibliya ug sa pagpadapat niini—sama sa gihimo ni Pedro—ikaw usab may paglaom nga mabuhi sa usa ka kalibotan diin “magpuyo ang pagkamatarong.” (2 Pedro 3:13) Busa samtang may panahon pa, gidasig ka namo nga pahimuslan ang kahigayonan sa pagkuhag kahibalo bahin sa Diyos ug kang Jesu-Kristo, kay kana nagkahulogan ug kinabuhing walay kataposan alang kanimo.—Juan 17:3.

[Mga footnote]

[Blurb sa panid 9]

Ikaw usab may paglaom nga mabuhi sa usa ka kalibotan diin “magpuyo ang pagkamatarong.”—2 PEDRO 3:13