Nailhan Ka ba ni Jehova?
“Si Jehova nakaila sa mga iyaha.”—2 TIM. 2:19.
1, 2. (a) Sa unsa mahunahunaon si Jesus? (b) Unsay angay natong isukna?
USA ka adlaw may Pariseo nga nangutana kang Jesus: “Unsa ang kinadak-ang sugo diha sa Balaod?” Si Jesus mitubag: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mat. 22:35-37) Si Jesus nahigugma pag-ayo sa iyang langitnong Amahan ug iyang gipakita kana sa iyang pagkinabuhi. Si Jesus mahunahunaon usab sa iyang baroganan kang Jehova, nga nagpasundayag niana pinaagi sa iyang pagkamatinumanon. Busa sa hapit na siyang mamatay, siya nakaingon bahin sa iyang pagkamatinumanon sa Diyos: “Ako nagsunod sa mga sugo sa Amahan ug nagpabilin sa iyang gugma.”—Juan 15:10.
2 Daghan karon ang nag-angkon nga sila nahigugma sa Diyos. Segurado nga apil kita niana. Apan angay natong isukna: ‘Nailhan ba ko sa Diyos? Unsay pag-isip ni Jehova kanako? Ako ba nailhan nga iyaha?’ (2 Tim. 2:19) Pagkadakong pribilehiyo nga kita makabatog suod nga relasyon uban sa Soberano sa uniberso!
3. Nganong ang uban malisdan sa pagtuo nga sila mahimong iya ni Jehova? Unsay makatabang nila aron mausab ang maong panghunahuna?
3 Apan bisan kadtong nahigugma pag-ayo kang Jehova malisdan sa pagtuo nga sila giila sa Diyos ingong mga higala. Ang uban mibati nga sila way-pulos, busa sila nagtuo nga dili sila mahimong iya ni Jehova. Apan makapalipay nga ang Diyos motan-aw kanato sa laing paagi! (1 Sam. 16:7) Si apostol Pablo miingon sa iyang isigka-Kristohanon: “Kon ang usa ka tawo nahigugma sa Diyos, kini siya nailhan niya.” (1 Cor. 8:3) Ang imong gugma sa Diyos maoy hinungdanong kinahanglanon aron mailhan ka niya. Tagda kini: Nganong nagbasa ka niining magasina? Nganong naningkamot ka sa pag-alagad kang Jehova sa tibuok mong kasingkasing, kalag, kaisipan, ug kusog? Kon ikaw dedikado na ug bawtismado, nganong gihimo mo kana? Ang Bibliya nag-ingon nga si Jehova, kinsa nagasusi sa kasingkasing, nagkabig sa mga tilinguhaon. (Basaha ang Haggeo 2:7; Juan 6:44.) Busa makaingon ka nga ikaw nag-alagad kang Jehova kay siya nagkabig kanimo. Dili gayod niya biyaan kadtong iyang gikabig kon sila magmatinumanon. Giisip sila sa Diyos nga bililhon kaayo, ug siya nahigugma gayod kanila.—Sal. 94:14.
4. Nganong angayng hunahunaon kanunay ang atong bililhong baroganan sa Diyos?
4 Dihang kita nakabig na ni Jehova, angay kitang magpabilin sa iyang gugma. (Basaha ang Judas 20, 21.) Hinumdomi, ang Bibliya nag-ingon nga kita posibleng mahilayo sa Diyos. (Heb. 2:1; 3:12, 13) Pananglitan, una pa sa mga pulong ni apostol Pablo sa 2 Timoteo 2:19, siya naghisgot kang Himeneo ug Fileto. Mopatim-aw nga sila iya ni Jehova kanhi apan sa ulahi mibiya sa kamatuoran. (2 Tim. 2:16-18) Dugang pa, ang pipila diha sa mga kongregasyon sa Galacia nga nailhan sa Diyos mibiya usab sa kamatuoran. (Gal. 4:9) Hinaot nga dili nato pakamenoson ang atong bililhong baroganan sa Diyos.
5. (a) Unsa ang pipila ka hiyas nga gipabilhan sa Diyos? (b) Unsang mga panig-ingnan ang atong hisgotan?
5 May mga hiyas nga ilabinang gipabilhan ni Jehova. (Sal. 15:1-5; 1 Ped. 3:4) Duha niini mao ang pagtuo ug pagkamapaubsanon. Ato karong susihon ang panig-ingnan sa duha ka lalaki nga gihigugma ni Jehova tungod niining mga hiyasa. Hisgotan usab nato ang usa ka lalaki nga nagtuong siya nailhan sa Diyos apan gisalikway ni Jehova tungod sa iyang garbo. Kita makakat-on gikan kanila.
Ang Amahan Niadtong Nagbatog Pagtuo
6. (a) Giunsa pagpasundayag ni Abraham ang iyang pagtuo sa mga saad ni Jehova? (b) Unsay pag-ila ni Jehova kang Abraham?
6 Si Abraham maoy usa ka tawo nga “nagbutang ug pagtuo kang Jehova.” Gani siya gitawag nga “amahan sa tanan nga nagbatog pagtuo.” (Gen. 15:6; Roma 4:11) Tungod sa pagtuo, gibiyaan ni Abraham ang iyang balay, mga higala, ug kabtangan aron moadto sa halayong yuta. (Gen. 12:1-4; Heb. 11:8-10) Ang pagtuo ni Abraham nagpabiling lig-on human sa daghang katuigan. Nadayag kini sa iyang kaandam sa pagsunod sa sugo ni Jehova nga ihalad ang iyang anak, si Isaac. (Heb. 11:17-19) Si Abraham nagpasundayag ug pagtuo sa mga saad ni Jehova, busa siya giisip sa Diyos nga espesyal. Ang Diyos nakaila gayod kang Abraham. (Basaha ang Genesis 18:19.) Si Jehova wala lang mahibalo nga naglungtad si Abraham; siya nagmahal kaniya ingong higala.—Sant. 2:22, 23.
7. Unsay atong nahibaloan sa katumanan sa mga saad ni Jehova kang Abraham? Sa unsang paagi kini nakaapekto kaniya?
7 Kita nahibalo nga wala madawat ni Abraham ang yuta nga gisaad kaniya sa buhi pa siya. Wala usab niya makita ang iyang binhi nga nahimong “sama sa mga lugas sa balas nga anaa sa baybayon.” (Gen. 22:17, 18) Bisag wala makita ni Abraham ang katumanan sa maong mga saad, ang iyang pagtuo kang Jehova nagpabiling lig-on. Siya nahibalo nga kon ang Diyos mosaad, kana samag natuman na. Oo, si Abraham nagkinabuhi uyon sa maong pagtuo. (Basaha ang Hebreohanon 11:13.) Nailhan ba kita ni Jehova nga may pagtuo sama kang Abraham?
Ang Paghulat Kang Jehova Timailhan sa Pagtuo
8. Unsay gitinguha sa pipila nga gusto nilang matuman?
8 Lagmit may mga tinguha kita nga gusto natong matuman, sama sa pagminyo, pagbatog mga anak ug maayong panglawas. Dili kana sayop. Apan para sa daghan, wala tingali matuman ang tanan nilang gitinguha. Kon kanay atong kahimtang, ang pag-atubang niana magpakita kon unsa ka lig-on ang atong pagtuo.
9, 10. (a) Unsay gihimo sa uban aron matuman ang ilang gitinguha? (b) Unsay imong pagbati bahin sa katumanan sa mga saad sa Diyos?
9 Dili gayod maalamon nga supakon ang giya sa Diyos aron lang matuman ang atong gitinguha. Makadaot kana sa atong espirituwalidad. Pananglitan, ang pipila mipilig mga paagi sa pagtambal nga supak sa prinsipyo sa Bibliya. Ang uban midawat ug trabaho nga layo sa ilang pamilya o kongregasyon. O komosta ang pagpakigtrato sa dili Saksi? Kon himoon kana sa usa ka Kristohanon, siya ba nagtinguha nga mailhan ni Jehova? Unsa kahay bation ni Jehova kon si Abraham nawad-ag pailob bahin sa katumanan sa mga saad sa Diyos? Komosta kon si Abraham mihukom nga magtukod pag-usab ug dakong balay ug maghimog dungganong ngalan alang sa iyang kaugalingon inay maghulat kang Jehova? (Itandi ang Genesis 11:4.) Ilhon pa kaha siya ni Jehova ingong higala?
10 Unsang mga tinguha ang gusto nimong matuman? May lig-on ka bang pagtuo sa paghulat kang Jehova, kinsa nagsaad nga tagbawon ang imong haom nga mga tinguha? (Sal. 145:16) Lagmit dili dayon matuman ang pipila ka saad sa Diyos sumala sa atong gusto. Bisan pa niana, kon kita padayong magpakitag pagtuo sama kang Abraham, dili kita kalimtan ni Jehova. Iya kitang gantihan.—Heb. 11:6.
Gitandi ang Pagkamapaubsanon ug Pagkamagarbohon
11. Unsay mga pribilehiyo ni Kore, ug unsay gipaila niini bahin sa iyang tinamdan sa Diyos?
11 Si Moises ug Kore magkalahi gayod kon bahin sa pagtahod sa kahikayan ni Jehova ug sa iyang mga desisyon. Ang ilang reaksiyon nakaapektar sa kon unsay pag-isip ni Jehova kanila. Si Kore maoy Levihanon sa banay ni Kohat ug daghag pribilehiyo. Lagmit siya nakakita nga ang nasod giluwas latas sa Pulang Dagat. Siya misuportar sa hukom ni Jehova batok sa masukihong mga Israelinhon sa Bukid sa Sinai ug may katungdanan sa pagbalhin sa arka sa pakigsaad. (Ex. 32:26-29; Num. 3:30, 31) Gipaila niini nga siya maunongon kang Jehova sa daghang katuigan ug busa daghan ang nagtahod kaniya sa Israel.
12. Ingon sa gipakita sa hulagway sa panid 28, sa unsang paagi ang garbo nakaapektar kang Kore?
12 Apan samtang nagpaingon sa Yutang Saad, si Kore naghunahuna nga may sayop sa kahikayan sa Diyos. Dayon may 250 ka ubang pangulo sa nasod nga midapig kaniya aron sa paghimog kausaban. Nagtuo sila nga giila ug giuyonan sila ni Jehova. Giingnan nila si Moises: “Igo na kanang inyo, sanglit ang tibuok katigoman balaan ang tanan ug si Jehova anaa sa ilang taliwala.” (Num. 16:1-3) Pagkasobra ka masaligon sa kaugalingon ug pagkamagarbohon! Sila giingnan ni Moises: “Ipahibalo ni Jehova kon kinsa ang iya.” (Basaha ang Numeros 16:5.) Pagkasunod adlaw, si Kore ug ang tanang midapig kaniya nangamatay.—Num. 16:31-35.
13, 14. Sa unsang mga paagi gipakita ni Moises nga siya mapaubsanon?
13 Sa kasukwahi, si Moises “mao ang labing maaghop sa tanang tawo sa ibabaw sa nawong sa yuta.” (Num. 12:3) Gipakita niya ang iyang kaaghop ug kamapaubsanon pinaagi sa pagsunod sa instruksiyon ni Jehova. (Ex. 7:6; 40:16) Walay rekord nga si Moises kanunayng nagsupak sa kahikayan ni Jehova o napikal sa pagsunod sa Iyang mga sugo. Pananglitan, si Jehova mihatag ug detalyadong mga sugo bahin sa pagtukod sa tabernakulo, sama sa kolor sa hilo ug sa gidaghanon sa galong nga gamiton sa paggamag tabil sa tolda. (Ex. 26:1-6) Kon ang usa ka magtatan-aw sa organisasyon sa Diyos mohatag kanimog detalyado kaayong mga instruksiyon, tingali mapikal ka usahay. Apan si Jehova maoy hingpit nga magtatan-aw, nga nagdelegar sa mga buluhaton ug nagsalig sa iyang mga alagad. Dihang mohatag siyag daghang detalye, kana adunay maayong rason. Matikdi nga si Moises wala mapikal kang Jehova tungod sa paghatag ug detalyadong mga instruksiyon, nga samag si Jehova nakamenos kaniya o naghikaw sa iyang kamamugnaon o kagawasan. Hinuon, gitino ni Moises nga gisunod gayod sa mga trabahante ang mga instruksiyon sa Diyos. (Ex. 39:32) Pagkamapaubsanon ni Moises! Iyang giila nga ang buluhaton iya ni Jehova ug nga gigamit lang siya sa pagtapos niana.
14 Gipakita usab ni Moises nga siya mapaubsanon sa dihang nakasinati siyag makapahigawad nga mga kahimtang. May higayon nga si Moises wala makapugong ug napakyas sa pagbalaan sa Diyos atubangan sa nagbagulbol nga katawhan. Ingong resulta, si Jehova miingon kang Moises nga dili na siya ang manguna sa katawhan paingon sa Yutang Saad. (Num. 20:2-12) Siya ug si Aaron nag-agwanta sa pagkabagulbolan sa mga Israelinhon sa daghang katuigan. Ug kay nasayop man si Moises niadtong tungora, dili niya masinati ang dugay na niyang gidahom! Unsay reaksiyon ni Moises? Siyempre nahigawad siya, apan mapaubsanon niyang gidawat ang desisyon ni Jehova. Siya nahibalo nga si Jehova matarong nga Diyos ug walay inhustisya kaniya. (Deut. 3:25-27; 32:4) Kon maghunahuna kita kang Moises, kita makaingon gayod nga siya nailhan ni Jehova.—Basaha ang Exodo 33:12, 13.
Ang Pagpasakop Kang Jehova Nagkinahanglag Pagkamapaubsanon
15. Unsay atong makat-onan gikan sa pagkamagarbohon ni Kore?
15 Ang atong reaksiyon sa mga kausaban diha sa organisasyon ug sa desisyon sa mga magtatan-aw makaapektar sa pag-ila ni Jehova kanato. Tungod sa sobrang pagsalig sa kaugalingon, garbo, ug kawalay pagtuo, si Kore ug ang iyang mga kauban nahimulag sa Diyos. Bisag sa tan-aw ni Kore ang tigulang nga si Moises ang naghimog mga desisyon matag adlaw, sa pagkatinuod si Jehova mao ang naggiya sa nasod. Busa siya wala magmaunongon niadtong gigamit sa Diyos. Gihulat na lang unta ni Kore si Jehova sa pagpatin-aw sa mga butang o sa paghimog kausaban kon gikinahanglan. Tungod sa iyang garbo, nadaot ni Kore ang iyang rekord sa pagkamatinumanon.
16. Unsay resulta kon atong sundogon ang pagkamapaubsanon ni Moises?
16 Kana nga asoy naghatag ug pasidaan sa mga ansiyano ug sa uban diha sa kongregasyon karon. Ang paghulat kang Jehova ug pagsunod sa direksiyon sa mga magtatan-aw nagkinahanglag pagkamapaubsanon. Kita ba mapaubsanon ug malumo sama kang Moises? Ato bang giila ang katungdanan ug gisunod ang direksiyon niadtong nagapanguna kanato? Kapugngan ba nato ang atong gibati sa dihang mahigawad? Kon mao, kita usab ilhon ug uyonan ni Jehova. Kita iyang higugmaon kon kita mapaubsanon ug mapasakopon.
Si Jehova Nakaila Niadtong mga Iya
17, 18. Unsay atong buhaton aron padayon kitang ilhon ni Jehova?
17 Mapuslanon ang pagpamalandong bahin sa mga tawong gihigugma ug giila ni Jehova. Si Abraham ug Moises dili hingpit ug may mga kahuyangan sama nato. Apan sila giila ni Jehova nga iya. Sa laing bahin, ang nahitabo kang Kore nagpakita nga kita posibleng mahilayo kang Jehova ug dili na niya uyonan. Kita angayng mangutana: ‘Unsay pag-ila ni Jehova kanako? Unsay akong makat-onan niining mga pananglitan sa Bibliya?’
18 Malipay ka gayod nga mahibalo nga giila ni Jehova nga iya ang mga matinumanon. Padayong ugmara ang pagtuo, pagkamapaubsanon, ug ubang hiyas nga makapasuod nimo sa atong Diyos. Usa gayod ka dakong pribilehiyo nga ilhon ni Jehova. Kini maghatag kanatog katagbawan karon ug kahibulongang mga panalangin sa umaabot.—Sal. 37:18.
Nahinumdom Ka Ba?
• Unsang bililhong baroganan ang imong mapahimuslan uban kang Jehova?
• Sa unsang paagi nimo masundog ang pagtuo ni Abraham?
• Unsay atong makat-onan kang Kore ug Moises?
[Hulagway sa panid 26]
Sama kang Abraham, kita ba may pagtuo nga bug-os tumanon ni Jehova ang iyang mga saad?
[Hulagway sa panid 28]
Kay dili mapaubsanon, si Kore wala mosunod sa direksiyon
[Hulagway sa panid 29]
Nailhan ka ba ni Jehova ingong mapaubsanong nagsunod sa mga direksiyon?