Sundoga ang Pagkamabinantayon ni Jesus
“Magpadayon sa pagbantay ug mag-ampo.”—MAT. 26:41.
UNSAON NIMO PAGTUBAG?
Sa unsang paagi ikapakita sa atong mga pag-ampo nga kita mabinantayon?
Sa unsang mga paagi atong ikapakita ang pagkamabinantayon diha sa ministeryo?
Nganong hinungdanon nga kita magmabinantayon ilalom sa pagsulay, ug unsaon nato kini paghimo?
1, 2. (a) Unsang mga pangutana ang lagmit motungha bahin sa pagkamabinantayon ni Jesus? (b) Masundog ba sa makasasalang katawhan ang hingpit nga panig-ingnan ni Jesus? Iilustrar.
TINGALI makapangutana ka: ‘Posible ba gayod nga masundog ang pagkamabinantayon ni Jesus? Siya hingpit! Gawas pa, may mga panahon nga nakita niya ang umaabot—bisan libolibo pa ka tuig nga abante! Kinahanglan pa ba siyang magmabinantayon?’ (Mat. 24:37-39; Heb. 4:15) Ato unang tubagon kanang mga pangutanaha aron makita kon unsa ka hinungdanon ug dinalian kini nga ulohan.
2 Masundog ba sa makasasalang katawhan ang usa ka hingpit nga panig-ingnan? Oo, sama nga ang estudyante makasundog sa panig-ingnan sa usa ka maayong magtutudlo. Handurawa ang usa ka tawo nga mao pay pagtuon sa pagpana. Kay dili pa makaigo sa target, siya padayong nagtuon ug nagpraktis. Aron mouswag, gipanid-an niya pag-ayo ang iyang magtutudlo nga eksperto sa pagpana. Giobserbahan niya kon giunsa niini pagbarog, pagposisyon sa bukton, ug paggamit sa iyang mga tudlo diha sa pisi sa pana. Ang estudyante anam-anam nga nakakat-on sa hustong pag-inat sa pisi, pagpahiuyon sa hangin, ug siya padayong nagpraktis. Pinaagi sa pagsundog sa ginahimo sa iyang magtutudlo, sa ngadtongadto iya nang maigo bisan ang sentro sa target. Sa susama, kita padayong mouswag ingong mga Kristohanon kon atong sundon ang instruksiyon ni Jesus ug sundogon ang iyang hingpit nga panig-ingnan.
3. (a) Unsay giingon ni Jesus nga nagpaila nga kinahanglan siyang magmabinantayon? (b) Unsay atong tun-an niini nga artikulo?
3 Gikinahanglan ba gayod ni Jesus nga magmabinantayon? Oo. Pananglitan, sa gabii una siya namatay, giawhag ni Jesus ang iyang matinumanong mga apostoles: “Magpadayon sa pagbantay kauban nako.” Siya midugang: “Magpadayon sa pagbantay ug mag-ampo nga mapinadayonon, aron dili kamo mahiagom sa tentasyon.” (Mat. 26:38, 41) Si Jesus kanunayng mabinantayon, apan niining kritikal nga panahon buot niyang mas magmabinantayon ug masuod pa sa iyang langitnong Amahan. Nahibalo siya nga ang iyang mga sumusunod kinahanglan pod nga magmabinantayon, dili lang niadtong higayona kondili sa umaabot usab. Busa atong tagdon kon nganong buot ni Jesus nga padayon kitang magbantay. Unya atong susihon ang tulo ka paagi nga atong masundog ang pagkamabinantayon ni Jesus.
KON NGANONG BUOT NI JESUS NGA KITA MAGMABINANTAYON
4. Nganong kinahanglan kitang magmabinantayon?
4 Buot ni Jesus nga padayon kitang magbantay tungod sa kon unsay wala nato mahibaloi ug kon unsay atong nahibaloan. Sa dinhi pa si Jesus sa yuta, nahibalo ba siya sa tanan bahin sa umaabot? Wala, kay siya mapaubsanong miingon: “Mahitungod nianang adlawa ug taknaa walay nahibalo, ni ang mga manulonda sa mga langit ni ang Anak, kondili ang Amahan lamang.” (Mat. 24:36) Niadtong tungora, si Jesus, “ang Anak,” wala mahibalo kon kanus-a gyod moabot ang kataposan niining daotang kalibotan. Komosta kita? Limitado lang ang atong kahibalo sa umaabot. Wala kita mahibalo kon kanus-a ipadala ni Jehova ang iyang Anak aron taposon kining daotang sistema. Kon nahibalo pa kita, dili na ta kinahanglang magbantay. Ingon sa gipatin-aw ni Jesus, ang kataposan kalit nga moabot, nga wala damha. Busa angay gayod kitang magmabinantayon.—Basaha ang Mateo 24:43.
5, 6. (a) Sa unsang paagi ang atong kahibalo bahin sa Gingharian sa Diyos motabang nato nga magmabinantayon? (b) Nganong ang atong kahibalo bahin kang Satanas magtukmod kanatong mas magmabinantayon?
5 Sa laing bahin, daghang kahibulongang butang nga nahibaloan si Jesus bahin sa umaabot nga wala mahibaloi sa kadaghanang tawo sa iyang palibot. Ang atong kahibalo dili makatumbas nianang kang Jesus, apan pinaagi kaniya daghan kitag nahibaloan bahin sa Gingharian sa Diyos ug kon unsay himoon niini sa dili madugay. Ang kadaghanang tawo sa atong palibot, sa eskuylahan man, trabahoan, o sa atong teritoryo walay kabangkaagan sa maong kahibulongang mga kamatuoran. Busa kini maoy laing rason nga kita magmabinantayon. Sama ni Jesus, kinahanglang abtik kita kanunayng mangitag kahigayonan nga ikapaambit ang atong nahibaloan bahin sa Gingharian sa Diyos. Bililhon ang matag kahigayonan, ug dili nato kana palabyon. Kinabuhi ang nalangkit niana!—1 Tim. 4:16.
6 May lain pang nahibaloan si Jesus nga nagtukmod kaniya nga magmabinantayon. Siya nahibalo nga si Satanas determinado sa pagtental ug paglutos kaniya ug sa pagdaot sa iyang integridad. Ang maong mabangis nga kaaway kanunayng nagbantay ug “laing angay nga higayon” aron tentalon si Jesus. (Luc. 4:13) Wala mokompiyansa si Jesus. Gusto niyang andam siya sa bisan unsang pagsulay—tentasyon man kini, pagsupak, o paglutos. Ang atong kahimtang susama sa kang Jesus. Kita nahibalo nga si Satanas “sama [gihapon] sa usa ka leyon nga nagangulob, nga nagapangitag matukob.” Kanay hinungdan nga ang Bibliya nag-awhag sa tanang Kristohanon: “Hupti ninyo ang maayong panghunahuna, magmabinantayon.” (1 Ped. 5:8) Apan unsaon nato kana paghimo?
PAGKAMABINANTAYON DIHA SA PAG-AMPO
7, 8. Unsay gitambag ni Jesus bahin sa pag-ampo, ug unsang panig-ingnan ang iyang gipakita?
7 Gipakita sa Bibliya nga ang pag-ampo importante kaayo aron makapabiling mabinantayon. (Col. 4:2; 1 Ped. 4:7) Di pa dugay human sultihi ang iyang mga sumusunod nga padayong magbantay uban kaniya, si Jesus miingon: “Magpadayon sa pagbantay ug mag-ampo nga mapinadayonon, aron dili kamo mahiagom sa tentasyon.” (Mat. 26:41) Niadtong malisod nga situwasyon lang ba mapadapat ang iyang tambag? Dili. Kini maoy prinsipyo nga angay natong ipadapat matag adlaw.
8 Si Jesus maayong panig-ingnan sa pag-ampo. Imo tingaling mahinumdoman nga siya kas-a miampo sa tibuok gabii sa iyang Amahan. (Basaha ang Lucas 6:12, 13.) Handurawa ang esena: Tingpamulak kadto, ug si Jesus lagmit duol sa lungsod sa Capernaum. Sa hapit nang mogabii, siya mitungas sa usa sa mga bukid nga nag-umbaw sa Dagat sa Galilea. Iyang gilantaw ang palibot ug tingali nakita ang nagkidlapkidlap nga mga lampara sa Capernaum ug sa ubang balangay sa duol. Apan dihang misugod na siya sa pag-ampo, wala niya tugoting may makabalda sa iyang pagpakigsulti kang Jehova. Milabay ang mga oras. Wala na siya makabantay sa mga lampara nga anam-anam nang napalong o sa bulan nga misubang o sa tingog sa mga hayop sa palibot. Lagmit siya nag-ampo bahin sa bug-at nga desisyon nga iyang pagahimoon—ang pagpili sa iyang 12 ka apostoles. Atong mahanduraw si Jesus nga tim-os nga nangayog giya ug kaalam sa iyang Amahan samtang nagsugilon sa iyang hunahuna ug mga kabalaka bahin sa matag tinun-an.
9. Unsay atong makat-onan sa pag-ampo ni Jesus sa tibuok gabii?
9 Ang panig-ingnan ba ni Jesus nagtudlo kanato nga mogahig taas nga panahon sa pag-ampo? Wala, kay siya malulotong miingon bahin sa iyang mga sumusunod: “Maikagon ang espiritu, apan maluya ang unod.” (Mat. 26:41) Bisan pa niana, atong masundog si Jesus. Pananglitan, mokonsulta ba kita sa atong langitnong Amahan una mohimog desisyon nga makaapektar sa atong espirituwalidad, sa atong pamilya, o sa mga isigkamagtutuo? Gilakip ba nato ang mga igsoon sa atong mga pag-ampo? Kinasingkasing ba kitang mag-ampo o balikbalik lang ang gigamit nga mga pulong? Matikdi usab nga gipabilhan ni Jesus ang personal ug pribadong pagpakigsulti sa iyang Amahan. Niining puliki nga kalibotan, dali ra kitang malinga ug makalimot sa mas hinungdanong mga butang. Kon mogahin kitag igong panahon sa tim-os ug pribadong pag-ampo, mahimo kitang mas alerto sa espirituwal. (Mat. 6:6, 7) Mas masuod kita kang Jehova, nga determinadong palig-onon ang atong relasyon kaniya ug likayan ang pagbuhat ug bisan unsa nga makapahuyang niini.—Sal. 25:14.
PAGKAMABINANTAYON DIHA SA PAGSANGYAW
10. Unsang pananglitan ang nagpakita nga si Jesus kanunayng alerto sa mga kahigayonan nga makasangyaw?
10 Si Jesus mabinantayon sa buluhaton nga gisugo ni Jehova kaniya. Dunay mga buluhaton nga wala ra kaayo nagkinahanglag konsentrasyon. Apan daghang buluhaton ang nagkinahanglag pokus ug pagkaalerto, sama sa pagsangyaw. Alerto kaayo si Jesus sa iyang buluhaton, nga nangitag kahigayonan nga makasangyaw. Pananglitan, dihang siya ug ang iyang mga tinun-an miabot sa siyudad sa Sikar human sa tibuok buntag nga pagbaktas, ang mga tinun-an milakaw aron mopalit ug pagkaon. Si Jesus mipahulay duol sa atabay sa siyudad, apan kanunay siyang alerto ug nakakitag kahigayonan nga makasangyaw. Usa ka Samarianhong babaye ang miabot aron magkalos. Pwede man untang motagpilaw si Jesus o mangitag rason nga dili makig-estorya. Apan siya nakig-estorya sa babaye ug nakahatag ug kusganong pamatuod nga nakatabang sa daghang tawo sa maong siyudad. (Juan 4:4-26, 39-42) Ato bang masundog ang pagkamabinantayon ni Jesus, nga magmaalerto sa mga kahigayonan nga makasangyaw sa atong mahibalag matag adlaw?
11, 12. (a) Unsay sanong ni Jesus niadtong buot mobalda sa iyang buluhaton? (b) Unsang pagkabalanse ang gipakita ni Jesus maylabot sa iyang buluhaton?
11 Usahay, ang maayog tuyo nga mga tawo buot mobalda sa buluhaton ni Jesus. Sa Capernaum, ang mga tawo natandog pag-ayo sa milagrosong pagpang-ayo ni Jesus ug buot nilang magpabilin siya didto. Apan ang buluhaton ni Jesus mao ang pagsangyaw sa tanang “nawalang mga karnero sa balay sa Israel,” dili lang niadtong anaa sa usa ka siyudad. (Mat. 15:24) Busa iyang gisultihan ang mga tawo: “Kinahanglan nga sa ubang siyudad usab ipahayag ko ang maayong balita sa gingharian sa Diyos, tungod kay alang niini gipadala ako.” (Luc. 4:40-44) Dayag nga napokus sa ministeryo ang kinabuhi ni Jesus. Wala niya tugoting may makabalda kaniya.
12 Napokus ba kaayo si Jesus sa iyang buluhaton nga siya nahimong panatiko o sobrang naghikaw sa iyang kaugalingon? Sige na lang ba siyag sangyaw ug wala na magtagad sa praktikal nga panginahanglan sa mga tawo? Dili, si Jesus maoy hingpit nga sulondan sa pagkabalanse. Siya may panahon sa paglipaylipay uban sa iyang mga higala. Gipabilhan niya ang mga pamilya, nakasabot sa ilang mga panginahanglan ug problema, ug pinangga kaayo niya ang mga bata.—Basaha ang Marcos 10:13-16.
13. Unsaon nato pagsundog ang pagkamabinantayon ug pagkabalanse ni Jesus sa buluhatong pagsangyaw?
13 Samtang atong sundogon ang pagkamabinantayon ni Jesus, sa unsang paagi nato ikapakita ang samang pagkabalanse? Dili nato tugotan kining kalibotana nga mobalda sa atong buluhaton. Ang maayog tuyo nga mga higala ug paryente tingali mag-agda kanato nga maghinayhinay sa ministeryo o magkinabuhi sumala sa giisip nilang normal nga kinabuhi. Apan kon atong sundogon si Jesus, isipon nato ang ministeryo nga samag pagkaon. (Juan 4:34) Ang atong buluhaton makapalig-on sa espirituwal ug makapalipay nato. Hinunoa, dili nato gustong maghinobra, nga ipakamatarong o sobrang hikawan ang kaugalingon. Sama kang Jesus, buot natong mahimong malipayon ug balanseng mga alagad sa “malipayong Diyos.”—1 Tim. 1:11.
PAGKAMABINANTAYON PANAHON SA MGA PAGSULAY
14. Panahon sa mga pagsulay, unsay dili nato angayng kalimtan, ug ngano?
14 Ang pipila sa labing dinaliang tambag ni Jesus iyang gihatag dihang siya nakasinatig mga pagsulay. (Basaha ang Marcos 14:37.) Panahon sa kalisdanan, makatabang gayod nato ang iyang panig-ingnan. Ubos sa pagsulay, daghan ang makalimot sa usa ka hinungdanong kamatuoran nga kaduha hisgoti sa basahon sa Mga Proverbio: “Adunay dalan nga matul-id atubangan sa usa ka tawo, apan ang kataposan niana mao ang mga dalan sa kamatayon.” (Prov. 14:12; 16:25) Kon kita mosalig sa kaugalingong pagsabot, ilabina kon may seryosong mga problema, mahimong gipameligro nato ang kaugalingon ug ang atong mga minahal.
15. Unsang tentasyon ang lagmit atubangon sa usa ka ulo sa pamilya nga naglisod sa panginabuhi?
15 Pananglitan, ang ulo sa pamilya tingali naglisod sa pagtaganag materyal “alang sa mga iya.” (1 Tim. 5:8) Lagmit madani siya sa pagdawat ug trabaho nga tungod niini dili na siya regular nga makatambong sa mga tigom, makapanguna sa pamilyahanong pagsimba, o makasangyaw. Kon pasumban lang niya ang iyang gihunahuna nga husto, ang pagdawat sa trabaho daw makataronganon. Apan kini lagmit moresulta sa espirituwal nga sakit o kamatayon. Mas maayo nga sundon gayod ang tambag sa Proverbio 3:5, 6. Si Solomon miingon: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.”
16. (a) Unsang panig-ingnan sa pagsalig sa kaalam ni Jehova ang gipakita ni Jesus? (b) Giunsa pagsundog sa daghang ulo sa pamilya ang panig-ingnan ni Jesus sa pagsalig kang Jehova panahon sa kalisdanan?
16 Dihang si Jesus nailalom sa pagsulay, wala gyod siya mosalig sa kaugalingong pagsabot. Hunahunaa kini! Ang labing maalamong tawo nga nabuhi sukad sa yuta wala mosalig sa iyang kaugalingong kaalam. Pananglitan, dihang gitental ni Satanas, sublisubli nga mitubag si Jesus: “Kini nahisulat.” (Mat. 4:4, 7, 10) Siya misalig sa kaalam sa iyang Amahan sa pagsukol sa tentasyon. Pinaagi niini, gipakita ni Jesus ang pagkamapaubsanon—hiyas nga wala kang Satanas ug gidumtan pa gani. Misalig ba usab kita sa kaalam ni Jehova? Ang ulo sa pamilya nga nagsundog sa pagkamabinantayon ni Jesus magpagiya sa Pulong sa Diyos, ilabina sa malisod nga mga panahon. Sa tibuok kalibotan, libolibo ka ulo sa pamilya ang nagabuhat niana. Giuna nila ang Gingharian sa Diyos ug ang putling pagsimba, una pa gani kay sa materyal nga mga panginahanglan. Busa gihimo nila ang labing maayong pag-atiman sa ilang pamilya. Gipanalanginan ni Jehova ang ilang mga paningkamot sa pagtagana sa materyal nga mga kinahanglanon, sumala sa iyang gisaad.—Mat. 6:33.
17. Nganong buot nimong sundogon ang pagkamabinantayon ni Jesus?
17 Walay duhaduha, si Jesus ang labing maayong panig-ingnan sa pagkamabinantayon. Ang iyang panig-ingnan maoy praktikal, mapuslanon, ug makaluwas pa gani sa kinabuhi. Hinumdomi, buot ni Satanas nga ganoyon ka sa espirituwal nga pagkatulog—usa ka kahimtang nga huyang ang pagtuo, walay kasibot sa pag-alagad, ug daling mokompromiso. (1 Tes. 5:6) Ayaw tugoting molampos siya! Magmabinantayon sama ni Jesus—paggahig panahon sa tim-os nga pag-ampo, magmaalerto sa ministeryo, ug salig kang Jehova dihang makaatubag mga pagsulay. Sa paghimo niini, imong matagamtam ang malipayon ug makahuloganong kinabuhi bisan niining himalatyong sistema sa mga butang. Kon magmabinantayon ka, maabtan ka ni Jesus nga alerto ug puliki sa pag-alagad sa Diyos dihang laglagon na niya kining daotang kalibotan. Malipay gayod si Jehova sa pagganti sa imong pagkamatinumanon!—Pin. 16:15.
[Hulagway sa panid 6]
Gisangyawan ni Jesus ang babaye diha sa atabay. Nangita ka bag mga kahigayonan nga makasangyaw kada adlaw?
[Hulagway sa panid 7]
Ang pag-atiman sa espirituwalidad sa imong pamilya nagpakita nga ikaw mabinantayon