Hinungdanon ba Kon Kinsay Makakita sa Imong Gibuhat?

DILI bag-o kang Bezalel ug Oholiab ang pagpanukod. Ingong mga ulipon sa Ehipto, lagmit daghan na kaayo silag nahimong tisa nga gusto na nilang kalimtan kana. Apan milabay na kadto. Sila mahimo nang dekalibreng mga artesano kay sila ang manguna sa pagtukod sa tabernakulo. (Ex. 31:1-11) Bisan pa niana, diyutay ra ang makakita sa pipila sa maanindot nilang mga hinimo. Maluya ba sila kay gamay ra ang makakita niana? Hinungdanon ba gyod kon kinsay makakita sa ilang gibuhat? Hinungdanon ba sab kon kinsay makakita sa imong gibuhat?

Ang pipila sa mga kasangkapan sa tabernakulo maoy mga obra maestra. Tagda pananglit ang mga kerubin nga bulawan ibabaw sa arka sa pakigsaad. Si apostol Pablo naghubit niana ingong ‘mahimayaon.’ (Heb. 9:5) Handurawa ang kanindot sa maong mga kerubin nga gama sa sinalsal nga bulawan!—Ex. 37:7-9.

Kon makaplagan karon, ang mga hinimo ni Bezalel ug Oholiab seguradong idispley diha sa iladong mga museyo, diin daghan ang makaapresyar niana. Apan niadtong panahona, pila ray nakakita sa katahom niana? Ang mga kerubin nahimutang sa Labing Balaan; busa, ang hataas nga saserdote lang ang makakita niana dihang siya mosulod didto kas-a sa usa ka tuig, sa Adlaw sa Pagtabon sa Sala. (Heb. 9:6, 7) Busa, pipila ra ang nakakita sa maong mga kerubin.

Kon ikaw si Bezalel o Oholiab ug nagkugi ka sa paghimog mga obra maestra, unsa kahay imong bation kon mahibalo ka nga diyutay ra ang makakita niana? Daghan karon ang mobating malamposon dihang dayegon sila sa uban. Sukdanan kana sa kabililhon sa ilang pagkugi. Apan lahi ang mga alagad ni Jehova. Sama kang Bezalel ug Oholiab, kita mobatig katagbawan sa pagbuhat sa kabubut-on ni Jehova ug pagbaton sa iyang pag-uyon.

Sa adlaw ni Jesus, ang relihiyosong mga lider sagad mag-ampo sa paagi nga dayegon sila sa mga tawo. Apan si Jesus nagsugyot ug laing paagi: Mag-ampo nga kinasingkasing ug dili magtinguha nga dayegon sa uban. Unsay resulta? “Ang imong Amahan nga nagatan-aw sa tago magabalos kanimo.” (Mat. 6:5, 6) Tin-aw nga ang hinungdanon mao, dili ang hunahunaon sa uban bahin sa atong pag-ampo, kondili ang hunahunaon ni Jehova. Ang iyang opinyon mao ang maghimo sa atong pag-ampo nga bililhon. Tinuod sab kana sa bisan unsa nga atong malampos diha sa atong sagradong pag-alagad. Hinungdanon ang atong nahimo, dili tungod kay gidayeg ta sa uban, kondili kay nakapahimuot kana kang Jehova, kinsa “nagatan-aw sa tago.”

Dihang nahuman ang tabernakulo, ang panganod “mitabon sa tolda nga tagboanan, ug ang himaya ni Jehova mipuno sa tabernakulo.” (Ex. 40:34) Tin-aw gayod kanang pamatuod sa pag-uyon ni Jehova! Unsa kahay gibati ni Bezalel ug Oholiab nianang higayona? Bisag wala ikulit ang ilang mga ngalan diha sa ilang mga hinimo, sila tinong mibatig katagbawan sa pagkahibalo nga gipanalanginan sa Diyos ang ilang paningkamot. (Prov. 10:22) Paglabay sa katuigan, seguradong nalipay sila nga ang ilang mga hinimo padayong gigamit sa pag-alagad kang Jehova. Dihang banhawon si Bezalel ug Oholiab sa bag-ong kalibotan, seguradong malipay sila sa pagkahibalo nga ang tabernakulo gigamit sa matuod nga pagsimba sulod sa mga 500 ka tuig!

Sa organisasyon ni Jehova karon, ang mga animator, tigdibuho, musikero, letratista, maghuhubad, ug magsusulat nagkugi pero wala magpaila. Sa maong diwa, walay “nakakita” sa ilang ginahimo. Ingon sab niana ang ikaingon sa buluhaton nga ginahimo diha sa kapig 110,000 ka kongregasyon sa tibuok yuta. Kinsay nakakita sa accounts servant samtang siya nag-atiman sa iyang asaynment? Kinsay nakakita sa sekretaryo samtang siya nag-andam sa mga report sa kanataran? Kinsay nakakita sa igsoon nga may giayo diha sa Kingdom Hall?

Si Bezalel ug Oholiab namatay nga walay tropeyo, medalya, o plake nga pamatuod sa ilang maanindot nga mga disenyo ug dekalidad nga trabaho. Apan sila may nabatonan nga bililhon kaayo—ang pag-uyon ni Jehova. Makaseguro kita nga si Jehova nakakita sa ilang kakugi. Hinaot nga sundogon nato ang ilang ehemplo sa mapainubsanon ug kinabubut-ong pag-alagad.