“Kanus-a na man Sab Ta Mag-asembliya?”

HINAPOS kadto sa Nobyembre 1932 sa Mexico City. Usa ka semana una pa niana, ang unang mga signal sa trapiko gigamit niining puliki nga siyudad nga may kapig usa ka milyong molupyo. Apan niining tungora, dili na kana ang kinabag-ohang balita. Ang mga reporter naghinamhinam sa panghitabo niining semanaha. Sila nag-atang sa estasyon sa tren dala ang ilang mga kamera, nga nagpaabot sa usa ka espesyal nga bisita​—si Joseph F. Rutherford, nga presidente niadto sa Watch Tower Society. Didto sab ang lokal nga mga Saksi nga mainitong nag-abiabi kang Brader Rutherford, nga motambong sa ilang tulo ka adlawng nasyonal nga kombensiyon.

Ang The Golden Age nag-ingon: “Walay duhaduha nga kining kombensiyona mahisulat sa kasaysayan ingong importante kaayong panghitabo sa pagpakaylap sa Kamatuoran sa republika sa Mexico.” Apan unsay nakapatalagsaon niining kombensiyona nga gitambongan sa mga 150 lang ka tawo?

Una pa niana, diyutay ra ang bunga sa Gingharian sa Mexico. Sukad sa 1919, gipahigayon ang ginagmayng asembliya, apan ang gidaghanon sa kongregasyon mius-os sa nagsunod nga mga tuig. Ang pagbukas sa sangang buhatan sa Mexico City niadtong 1929 morag makatabang sa pag-uswag. Pero, may mga babag. Dihang may instruksiyon nga dili magnegosyo samtang magsangyaw, usa ka colporteur ang nasuko pag-ayo, mibiya sa kamatuoran, ug nagpormag kaugalingong grupo sa pagtuon sa Bibliya. Kasamtangan, ang tigdumala sa sangang buhatan nakahimog dili kasulatanhong panggawi ug kinahanglang pulihan. Ang maunongong mga Saksi sa Mexico nagkinahanglag pagdasig.

Sa iyang duaw, gidasig gyod ni Brader Rutherford ang matinumanong mga igsoon. Naghatag siyag duha ka makapatandog nga pakigpulong sa kombensiyon ug lima ka puwersadong mga diskurso sa radyo. Sa unang higayon, ang mga estasyon sa radyo sa Mexico nagpakaylap sa maayong balita sa tibuok nasod. Human sa kombensiyon, usa ka bag-ong gitudlo nga tigdumala sa sangang buhatan ang nag-organisar sa buluhaton. Uban sa panalangin ni Jehova, ang mga Saksi mas madasigong nagsangyaw.

Pagkasunod tuig, duha ka kombensiyon ang gipahigayon, usa sa dunggoanang siyudad sa Veracruz ug usa sa Mexico City. Nagsugod pagpamunga ang ilang paghago sa kanataran. Pagka-1931 dihay 82 ka magmamantala. Napulo ka tuig sa ulahi, miuswag kinig 10 ka pilo! Mga 1,000 ang mitambong sa 1941 nga Teokratikanhong Asembliya sa Mexico City.

Pagka-1943 ang mga Saksi nagsul-ob ug sandwich nga mga karatula aron ipahibalo ang “Gawasnong Nasod” nga Teokratikanhong Asembliya nga gipahigayon diha sa 12 ka siyudad sa Mexico.a Duha ka plakard ang gisumpayg pisi ug gisul-ob sa abaga, usa sa atubang ug usa sa likod. Paagi kini sa pagpahibalo nga gigamit sa mga Saksi sukad sa 1936.

Sa pagkomento sa kalamposan sa paggamit sa sandwich nga mga karatula sa Mexico City, ang magasing La Nación nag-ingon: “Sa unang adlaw [sa asembliya], [ang mga Saksi] giawhag sa pag-imbitar pag mga tawo. Pagkaugma, napuno na ang asembliyahanan.” Ang Simbahang Katoliko wala malipay niini nga kalamposan, busa gisupak nila ang mga Saksi. Bisan pa niana, ang maisogong mga igsoon padayong nagsangyaw diha sa kadalanan. Ang La Nación nag-ingon usab: “Ang tibuok siyudad nakakita nila . . . mga lalaki​—ug mga babaye—​nga nahimong ‘sandwich’ nga mga karatula.” Makita diha sa artikulo ang letrato sa mga igsoon diha sa kadalanan sa Mexico City. Ubos sa letrato, naay kapsiyon nga nag-ingon: “Napuno ang kadalanan.”

Niadtong mga tuiga, kadaghanan sa mga Saksi ang kinahanglang mosakripisyo aron makatambong sa pipila ka kombensiyon sa Mexico. Daghang delegado ang naggikan sa hilit nga mga baryo, nga dili maabot sa tren o wala ganiy karsada. Usa ka kongregasyon ang misulat, “Linya lang sa telegrapo ang nakaabot dinhi.” Busa, ang mga delegado kinahanglang mosakayg kabayo o mobaktas ug pipila ka adlaw aron lang makaabot sa tren nga kasakyan nila paingon sa siyudad sa kombensiyon.

Kadaghanan sa mga Saksi pobre, nga halos dili makaplete paingon sa kombensiyon. Daghan ang magsaka sa balay sa mga igsoon, kinsa mahigugmaong mag-abiabi nila. Ang uban mangatulog sa Kingdom Hall. Sa usa ka higayon, mga 90 ka delegado ang miestar sa sangang buhatan, diin ang “higdaanan [sa matag usa] gilangkobag 20 ka kartong libro, nga gilinya.” Ang Yearbook mikomento nga ang mapasalamatong mga bisita miingon nga ang maong mga higdaanan “mas humok ug mas init kay sa sementong salog.”

Alang niadtong mapabilhong mga Saksi, ang malipayong pagpakig-uban sa mga igsoon diha sa asembliya takos gayod sa sakripisyo. Karon, samtang nagkadaghan ang magmamantala sa Mexico, nga halos moabot nag usa ka milyon, nagpabilin gihapon ang maong apresasyon.b Ang usa ka report sa sangang buhatan sa Mexico niadtong 1949 nag-ingon nga bisan pa sa kalisdanan, wala mamenosi ang kadasig sa mga igsoon. Ang matag asembliya maoy “usa sa kanunay nilang hisgotan bisag dugay na kining nahuman ug ang mga igsoon kanunayng mangutana, Kanus-a na man sab ta mag-asembliya?” Mao gihapon nay ilang gibati hangtod karon.​—Gikan sa among archives sa Central America.