Mga Ginikanan​—Tabangi ang Inyong mga Anak nga ‘Magmaalamon Alang sa Kaluwasan’

1, 2. Nganong mabalaka ang pipila ka ginikanan dihang ang ilang mga anak gusto nang magpahinungod ug magpabawtismo?

LIBOLIBO ka Bible study ang nagpahinungod sa ilang kaugalingon kang Jehova ug nagpabawtismo. Daghan nila mga batan-on pa, kinsa namatuto sa kamatuoran ug mipili sa kinamaayohang paagi sa pagkinabuhi. (Sal. 1:1-3) Kon Saksi ka nga ginikanan, seguradong nangandoy ka sa adlaw nga mabawtismohan ang imong anak.​—Itandi ang 3 Juan 4.

² Apan, basin mabalaka gihapon ka. Tingali may nakita kang mga batan-on nga nabawtismohan pero sa ulahi ilang gikuwestiyon kon maalamon ba gyod ang pagsunod sa mga sukdanan sa Diyos. Ang pipila mibiya pa gani sa kamatuoran. Maong mabalaka tingali ka nga ang imong anak mosugod sa pagsunod sa Kristohanong pagkinabuhi pero sa ulahi mausab ug mobugnaw ang unang gugma sa kamatuoran. Basin maparehas siya niadtong sa unang siglong kongregasyon sa Efeso kinsa giingnan ni Jesus: “Imong gibiyaan ang gugma nga imong nabatonan sa sinugdan.” (Pin. 2:4) Unsay imong buhaton aron dili maingon ana ang imong anak ug matabangan siyang ‘motubo ngadto sa kaluwasan’? (1 Ped. 2:2) Aron matubag kana, atong konsiderahon ang ehemplo ni Timoteo.

 3. (a) Sa unsang paagi nahimong Kristohanon si Timoteo, ug giunsa niya pagpadapat ang iyang nakat-onan? (b) Unsang tulo ka bahin sa pagkat-on ang gitambag ni Pablo kang Timoteo?

³ Si Timoteo lagmit nakakat-on sa pagtulon-an ni Jesus sa unang pagbisita ni apostol Pablo sa Listra niadtong 47 C.E. Lagmit tin-edyer pa siya niadto, pero gipadapat dayon niya ang iyang nakat-onan. Duha ka tuig sa ulahi, nahimo siyang kauban ni Pablo sa pagbiyahe. Mga 16 ka tuig human niadto, si Pablo misulat kang Timoteo: “Magpadayon ka sa mga butang nga imong nakat-onan ug nakakombinsir kanimo sa pagtuo, nga nahibalo kon kang kinsa nimo nakat-onan kini ug nga sukad pa sa pagkamasuso ikaw nahibalo na sa balaang mga sinulat [ang Hebreohanong Kasulatan], nga makahimo kanimong maalamon alang sa kaluwasan pinaagi sa pagtuo maylabot kang Kristo Jesus.” (2 Tim. 3:14, 15) Matikdi nga si Pablo naghisgot bahin sa (1) pagkahibalo sa balaang mga sinulat, (2) pagkakombinsir nga motuo sa mga butang nga nakat-onan, ug (3) pagkahimong maalamon alang sa kaluwasan pinaagi sa pagtuo kang Kristo Jesus.

 4. Unsang mga galamiton ang nakita nimong epektibo sa pagtudlo sa imong gagmayng anak? (Tan-awa ang hulagway sa sinugdan sa artikulo.)

⁴ Ingong Saksing ginikanan, gusto nimong mahibalo ang imong anak sa balaang mga sinulat, nga karon naglangkob sa Hebreohanong Kasulatan ug sa Kristohanon Gregong Kasulatan. Depende sa ilang katakos, bisan ang gagmayng bata makakat-on bahin sa mga tawo ug hitabo diha sa Bibliya. Ang organisasyon ni Jehova nagtaganag mga galamiton nga magamit sa mga ginikanan sa pagtabang sa ilang mga anak. Naa ba kay mahunahunaan nga nahubad diha sa inyong pinulongan? Hinumdomi, ang kahibalo sa Kasulatan mao ang pundasyon sa lig-ong relasyon kang Jehova.

 5. (a) Unsay ipasabot sa ekspresyong ‘nakombinsir nga motuo’? (b) Sa unsang paagi nahibalo ta nga si Timoteo nakombinsir nga motuo sa maayong balita bahin kang Jesus?

⁵ Importante ang kahibalo sa balaang mga sinulat. Pero, dili igo ang pagtudlo sa mga bata bahin sa mga tawo ug hitabo diha sa Bibliya. Si Timoteo ‘nakombinsir nga motuo.’ Sa orihinal nga pinulongan, kana nga ekspresyon nagpasabot ug “pagkasegurado” o “pagkakombinsido nga tinuod ang usa ka butang.” Si Timoteo nahibalo sa Hebreohanong Kasulatan sukad pa sa pagkamasuso. Pero, sa ulahi, nakombinsir siya sa lig-ong ebidensiya nga si Jesus mao ang Mesiyas. Sa ato pa, ang iyang kahibalo napalig-on kay nakombinsir siya. Gani, kombinsido kaayo si Timoteo sa maayong balita maong siya nagpabawtismo ug miuban kang Pablo sa misyonaryong buluhaton.

 6. Unsaon nimo pagtabang ang imong mga anak aron sila makombinsir nga motuo sa ilang nakat-onan sa Pulong sa Diyos?

⁶ Unsaon nimo pagtabang ang imong anak aron makombinsir siya nga motuo sama ni Timoteo? Una, magmapailobon. Nagkinahanglag panahon aron makombinsir ang usa. Dili pod nimo ni mapasa sa imong anak tungod lang kay nakombinsir ka nga motuo. Kinahanglang gamiton sa matag bata ang iyang “gahom sa pagpangatarongan” aron makombinsir sa kamatuoran sa Bibliya. (Basaha ang Roma 12:1.) Ingong ginikanan, importante ang imong papel sa maong proseso, ilabina kon may mga pangutana ang imong anak. Konsideraha ang usa ka pananglitan.

7, 8. (a) Sa unsang paagi ang usa ka Saksing amahan nagpakitag pailob sa iyang anak? (b) Kanus-a sab ka angayng magpakitag pailob?

⁷ Si Thomas, nga may 11 anyos nga anak nga babaye, miingon: “Mangutana usahay ang akong anak, ‘Migamit kahag ebolusyon si Jehova sa pagpatunghag kinabuhi sa yuta?’ o, ‘Nganong dili man ta moapil sa kalihokan sa komunidad​—sama pananglitan sa pagbotar—​aron moarang-arang ang kahimtang?’ Usahay, kinahanglang pugngan nako ang akong dila aron dili nako siya basta na lang sultihan kon unsay angayng tuohan. Ang usa makombinsir dili tungod sa usa lang ka dakong kamatuoran, kondili sa daghan ug ginagmayng ebidensiya.”

⁸ Si Thomas nahibalo nga nagkinahanglag pailob ang pagtudlo. Ang tinuod, importante ang pailob para sa tanang Kristohanon. (Col. 3:12) Siya nahibalo nga gikinahanglan tingali ang panahon ug balikbalik nga pag-estoryahanay. Kinahanglan siyang mangatarongan base sa Bibliya aron makombinsir ang iyang anak sa nakat-onan niini. Si Thomas miingon: “Ilabina sa importanteng mga punto, kami sa akong asawa gustong mahibalo kon mituo ba gyod ang among anak sa iyang nakat-onan ug kon nasabtan ba gyod nâ niya. Kon naa siyay pangutana, maayo nâ. Sa tinuod lang, mabalaka ko kon modawat na lang siya nga dili mangutana.”

 9. Unsaon nimo pagtudlo ang Pulong sa Diyos ngadto sa imong mga anak?

⁹ Kon mapailobong tudloan sa ginikanan ang ilang mga anak, anam-anam nga masabtan sa mga anak “ang gilapdon ug gitas-on ug gihabogon ug giladmon” sa ilang pagtuo. (Efe. 3:18) Matudloan nato sila sa paagi nga haom sa ilang edad ug abilidad. Samtang magkalig-on ang ilang kombiksiyon sa ilang nakat-onan, mas sayon para nila ang pagdepensa sa ilang pagtuo ngadto sa uban, apil na sa ilang mga eskolmet. (1 Ped. 3:15) Pananglitan, masaysay ba sa imong mga anak gamit ang Bibliya kon unsay mahitabo dihang mamatay? Nasabtan ba gyod nila ang eksplinasyon sa Bibliya?a Oo, nagkinahanglag pailob ang pagtudlo sa Pulong sa Diyos ngadto sa imong anak, pero dili mausik ang imong paningkamot.​—Deut. 6:6, 7.

10. Unsay angayng importanteng bahin sa imong pagtudlo?

¹⁰ Siyempre, importante sab ang imong ehemplo aron makombinsir ang imong anak. Si Stephanie, nga may tulo ka anak nga babaye, miingon: “Sukad sa bata pa ang akong mga anak, pangutan-on nako ang kaugalingon, ‘Giestorya ba nako sa akong mga anak kon nganong kombinsido ko sa paglungtad ni Jehova, sa iyang gugma, ug sa pagkamatarong sa iyang mga paagi? Makita ba sa akong mga anak nga gihigugma gyod nako si Jehova?’ Dili nako madahom nga makombinsir ang akong mga anak kon dili ko kombinsido.”

11, 12. Unsay kaalam, ug nganong makaingon ta nga wala lang kana magdepende sa edad?

¹¹ Sa ato nang nahisgotan, si Timoteo (1) nahibalo sa Kasulatan ug (2) kombinsido sa iyang gituohan. Pero unsay gipasabot ni Pablo sa pag-ingon nga ang balaang mga sinulat makahimo kang Timoteo nga “maalamon alang sa kaluwasan”?

¹² Ang Pagtugkad sa Kasulatan, Tomo 1, nag-ingon nga diha sa Bibliya, ang kaalam naglakip sa “katakos sa paggamit sa kahibalo ug pagsabot sa malamposong paagi aron sa pagsulbad sa mga suliran, sa paglikay o pagpahilayo gikan sa mga kapeligrohan, sa pagkab-ot sa tinong mga tumong, o sa pagtambag sa uban sa pagbuhat niana. Kaatbang kini sa kabuangan.” Ang Bibliya nag-ingon nga ang “binuang nabugkos sa kasingkasing sa usa ka bata.” (Prov. 22:15) Busa, klarong ang kaalam​—ang kaatbang sa kabuangan—​maoy pamatuod sa pagkahamtong. Ang pagkahamtong sa espirituwal wala lang magdepende sa edad kondili sa pagkahadlok kang Jehova ug sa pagkaandam mosunod sa iyang mga sugo.​—Basaha ang Salmo 111:10.

13. Unsaon pagpakita sa usa ka batan-on nga siya maalamon alang sa kaluwasan?

¹³ Ang mga batan-on nga makonsiderar nga hamtong sa espirituwal dili ‘matuyatuya sa mga balod ug madala ngadto-nganhi’ sa ilang mga tinguha o sa presyur sa ubang batan-on. (Efe. 4:14) Hinunoa, sila miuswag sa ‘pagbansay sa ilang mga gahom sa pagsabot aron sa pag-ila sa maayo ug sa daotan.’ (Heb. 5:14) Ilang gipakita nga miuswag sila sa pagkahamtong pinaagi sa paghimog maalamong mga desisyon​—bisag wala ang ilang ginikanan o ubang hamtong. (Filip. 2:12) Kana nga kaalam ang gikinahanglan para sa kaluwasan. (Basaha ang Proverbio 24:14.) Unsaon nimo pagtabang ang imong mga anak aron sila magmaalamon? Una, paneguroa nga klaro nimong isulti ang imong binase sa Bibliyang mga prinsipyo ngadto sa imong mga anak. Pinaagi sa pulong ug ehemplo, ipakita nga ang mga prinsipyo sa Bibliya mao sab ang imong gisunod.​—Roma 2:21-23.

14, 15. (a) Unsay angayng konsiderahon sa imong anak nga naghunahunang magpabawtismo? (b) Unsaon nimo pagtabang ang imong mga anak sa paghunahuna sa mga panalangin sa ilang pagsugot sa Diyos?

¹⁴ Pero, dili igo nga sultihan ang imong mga anak kon unsay husto ug sayop. Maayong tabangan sab nimo sila nga mangatarongan sa mga pangutana sama sa: ‘Nganong gidili sa Bibliya ang mga butang nga makapadani sa tawo? Nganong kombinsido ko nga para sa akong kaayohan ang mga sukdanan sa Bibliya?’​—Isa. 48:17, 18.

¹⁵ Kon ang imong anak gusto nang magpabawtismo, angay siyang tabangan sa pagpangatarongan sa lain pang butang​—kon unsay iyang pagbati sa mga responsabilidad sa pagka-Kristohanon. Unsay mga benepisyo? Unsa ang mga kalisdanan? Nganong mas daghan ang benepisyo kay sa kalisdanan? (Mar. 10:29, 30) Lagmit maatubang kana sa usa human sa bawtismo. Busa, importanteng konsiderahon kana sa dili pa magpabawtismo. Dihang matabangan ang mga anak sa paghunahuna sa mga panalangin sa pagkamaunongon ug sa daotang resulta sa pagkadili-maunongon, lagmit makombinsir sila. Sa unsa? Makombinsir sila nga alang gyod sa ilang kaayohan ang sukdanan sa Bibliya.​—Deut. 30:19, 20.

16. Unsay angayng konsiderahon sa ginikanan kon mohuyang ang pagtuo sa ilang bawtismadong anak?

¹⁶ Pero, komosta kon ang imong anak mosugod sa pagduhaduha pipila ka panahon human sa bawtismo? Pananglitan, madani tingali siya sa mga butang sa kalibotan o mosugod sa pagduhaduha kon maalamon ba gyod ang pagkinabuhi subay sa mga prinsipyo sa Bibliya. (Sal. 73:1-3, 12, 13) Ingong ginikanan, hinumdomi nga ang imong paagi sa pagtubag sa maong mga pangutana makaapektar kon magpadayon ba siya sa pag-alagad o mobiya sa kamatuoran. Magmadeterminadong dili makig-away sa imong anak bahin niining mga butanga​—bata man siya o tin-edyer. Angay nga mahibalo siyang gimahal nimo siya ug gusto nimo siyang tabangan.

17, 18. Kon nagduhaduha ang usa ka batan-on, sa unsang paagi makatabang ang ginikanan?

¹⁷ Siyempre, ang bawtismadong batan-on nakahimog seryosong pagpahinungod kang Jehova. Nanaad siyang higugmaon ang Diyos ug unahon kanunay ang Iyang kabubut-on. (Basaha ang Marcos 12:30.) Giisip ni Jehova nga seryoso ang maong panaad, ug kinahanglang dili kana pakamenoson sa usa nga nanaad. (Eccl. 5:4, 5) Sa haom nga panahon ug sa kalmadong paagi, ipahinumdom kana sa imong anak. Pero, sa dili pa nimo nâ buhaton, basaha ug tun-i ang mga materyal nga gitagana sa organisasyon ni Jehova para sa mga ginikanan. Ang paghimo niana makatabang aron mapasiugda nimo nga ang pagkahimong dedikado kang Jehova ug ang pagpabawtismo maoy seryosong desisyon pero daghag panalangin.

¹⁸ Pananglitan, naay makitang maayong mga tambag sa apendise nga nag-ulohang “Mga Ginikanan Nangutana,” sa likod sa librong Mga Pangutanang Gisukna sa mga Batan-on​—Mga Tubag nga Mosaler, Tomo 1. Kini nag-ingon: “Ayaw dayon paghunahuna nga dili siya interesado sa inyong relihiyon. Kasagaran, dunay laing rason niana.” Basig napresyur siya sa ubang tin-edyer, o kaha siya mibating nag-inusara o mibating ang ubang Kristohanong batan-on mas miuswag sa espirituwal. Ang apendise nagpadayon: “Sumala sa nahisgotang mga rason, nalisdan lang siya sa iyang situwasyon karon, apan wala kana magpasabot nga dili siya interesado sa inyong relihiyon.” Dayon ang apendise naghatag ug mga sugyot kon unsaon pagtabang sa Saksing ginikanan ang ilang anak nga nagduhaduha sa kamatuoran.

19. Unsaon pagtabang sa ginikanan ang ilang mga anak aron mahimo silang “maalamon alang sa kaluwasan”?

¹⁹ Ingong ginikanan, naa kay dakong responsabilidad​—ug pribilehiyo—​sa pagmatuto sa imong mga anak sa “disiplina ug sa pagdumala-sa-kaisipan [o, giya] ni Jehova.” (Efe. 6:4) Sa ato nang nahisgotan, dili lang kay basta tudloan sila kon unsay giingon sa Bibliya, kondili tabangan sab silang makombinsir sa ilang nakat-onan. Oo, kinahanglang mahimo silang kombinsido kaayo nga mapalihok sila sa pagpahinungod kang Jehova ug pag-alagad kaniya sa tibuok nilang kasingkasing. Hinaot ang Pulong ni Jehova, ang iyang espiritu, ug ang imong paningkamot ingong ginikanan magtabang sa imong mga anak nga mahimong “maalamon alang sa kaluwasan.”