Pagkamaayo​—Unsaon Nimo Kini Pag-ugmad?

GUSTO natong tanan nga isipon ingong maayong tawo. Pero lisod mahimong maayo karon kay daghan ang “walay gugma sa pagkamaayo.” (2 Tim. 3:3) Tingali nagsunod sila sa ilang sukdanan sa husto ug sayop nga sama rag “ang maayo maoy daotan ug ang daotan maoy maayo.” (Isa. 5:20) Ug malisdan pod ta tungod sa atong kagikan ug pagkadili-hingpit. Busa, mobati tingali ta sama kang Anne,a usa ka dugay nang alagad ni Jehova. Siya miingon: “Dili ko makatuo nga posible kong mahimong maayong tawo.”

Ikalipay nga puwede natong maugmad ang pagkamaayo! Kini maoy bahin sa balaang espiritu sa Diyos, ug ang iyang espiritu mas puwersado kay sa bisan unsang negatibong impluwensiya. Susihon nato kon unsa ang pagkamaayo ug kon unsaon pa nato kini pagpakita.

Ang pagkamaayo maoy hiyas nga nag-apil sa maayong moralidad ug walay pagkadaotan. Makita ni sa maayong epekto diha sa uban. Ang maayong tawo kanunayng mangitag paagi sa pagtabang ug paghimog maayo sa uban.

Lagmit nakita nimo nga ang pipila dali rang makahimog maayo para sa ilang pamilya ug mga higala. Pero, mao ra ba nay pagkamaayo? Tinuod, dili ta pirmeng makapakita nianang hiyasa, kay ang Bibliya nag-ingon nga “walay tawong matarong sa yuta nga nagpadayon sa pagbuhat sa maayo ug dili makasala.” (Eccl. 7:20) Si apostol Pablo matinud-anong miingon: “Ako nahibalo nga kanako, nga mao, sa akong unod, walay nagpuyo nga bisan unsang maayo.” (Roma 7:18) Busa kinahanglan gyod natong moduol sa Tuboran sa pagkamaayo aron maugmad kanang hiyasa.

Si Jehova nga Diyos ang naghatag ug sukdanan sa pagkamaayo. Bahin niya, atong mabasa: “Ikaw maayo ug nagabuhat ug maayo. Tudloi ako sa imong mga regulasyon.” (Sal. 119:68) Susihon nato ang duha ka bahin sa pagkamaayo ni Jehova nga gihisgotan nianang bersikuloha.

Si Jehova maayo. Bahin na gyod sa personalidad ni Jehova ang pagkamaayo. Tagda ang nahitabo dihang giingnan niya si Moises: “Ipaagi ko ang tanan ko nga pagkamaayo atubangan sa imong nawong.” Dihang gipakita ni Jehova ang iyang himaya​—apil ang iyang pagkamaayo—​nadungog ni Moises kining mga pulonga: “Si Jehova, si Jehova, usa ka Diyos nga maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran, nagatipig ug mahigugmaong-kalulot alang sa linibo, nagapasaylo ug kasaypanan ug kalapasan ug sala, apan dili gayod magpahigawas gikan sa silot.” (Ex. 33:19; 34:6, 7) Busa, masabtan nato nga ang pagkamaayo makita diha sa tanang bahin sa personalidad ni Jehova. Si Jesus ang hingpit nga panig-ingnan sa pagkamaayo ingong tawo. Pero siya miingon: “Walay bisan kinsa nga maayo, gawas sa usa, ang Diyos.”​—Luc. 18:19.

Maayo ang mga buhat ni Jehova. Makita ang pagkamaayo diha sa tanang buhat ni Jehova. “Si Jehova maayo sa tanan, ug ang iyang mga kaluoy anaa sa ibabaw sa tanan niyang mga buhat.” (Sal. 145:9) Siya nagpakitag pagkamaayo sa patas nga paagi, nga naghatag sa mga tawo ug kinabuhi ug sa tanang gikinahanglan aron padayon silang mabuhi. (Buh. 14:17) Makita sab ang iyang pagkamaayo dihang pasayloon ta niya. Ang salmista misulat: “Ikaw, Oh Jehova, maayo ug andam sa pagpasaylo.” (Sal. 86:5) Makaseguro ta nga “walay bisan unsang maayo nga ihikaw ni Jehova gikan niadtong nagalakaw nga dili salawayon.”​—Sal. 84:11.

Kita gilalang sa larawan sa Diyos, busa may potensiyal ta nga mahimong maayo ug mobuhat ug maayo. (Gen. 1:27) Bisan pa niana, nag-awhag si Jehova sa iyang mga alagad nga ‘tun-an ang pagbuhat ug maayo.’ (Isa. 1:17) Pero, sa unsang paagi? Tagda ning tulo ka paagi.

Una, makapangayo tag balaang espiritu, nga makatabang nato sa pag-ugmad sa tinuod nga pagkamaayo. (Gal. 5:22) Oo, ang espiritu sa Diyos makatabang nato sa paghigugma sa maayo ug pagsalikway sa daotan. (Roma 12:9) Gani, gipakita sa Bibliya nga si Jehova puwedeng magpalig-on nato “diha sa tanang maayong buhat ug pulong.”​—2 Tes. 2:16, 17.

Ikaduha, kinahanglan natong basahon ang Pulong sa Diyos. Kon buhaton nato kana, tudloan ta ni Jehova sa “kinatibuk-ang dalan kon unsay maayo” ug andamon ta niya “alang sa tanang maayong buhat.” (Prov. 2:9; 2 Tim. 3:17) Pinaagi sa maong pagbasa ug pagpamalandong, gipuno nato ang atong kasingkasing sa maayong mga butang bahin sa Diyos ug sa iyang kabubut-on. Sa ingon, gidugangan natog bahandi ang atong tipiganan nga makatabang nato sa ulahi.​—Luc. 6:45; Efe. 5:9.

Ikatulo, maningkamot ta nga “mahimong tigsundog . . . sa maayo.” (3 Juan 11) Duna tay mga ehemplo diha sa Bibliya. Siyempre, ang kinamaayohang ehemplo mao si Jehova ug Jesus. Pero puwede natong konsiderahon ang uban, kinsa nailhan sa ilang pagkamaayo. Ang duha nga mahunahunaan tingali nato mao si Tabitha ug Bernabe. (Buh. 9:36; 11:22-24) Makabenepisyo ka kon tun-an nimo ang rekord bahin nila ug hinumdoman ang praktikal nga mga paagi sa pagtabang sa uban. Hunahunaa kon unsay imong mahimo sa pagtabang sa imong pamilya o sa kongregasyon. Ug matikdi kon sa unsang paagi nakabenepisyo si Tabitha ug Bernabe tungod sa pagbuhat ug maayo. Makabenepisyo pod ka.

Puwede sab natong palandongon ang ehemplo niadtong nagbuhat ug maayo karon. Pananglitan, hunahunaa ang kugihang mga ansiyano kinsa “mahigugmaon sa pagkamaayo.” Ayaw pod kalimti ang matinumanong mga sister kinsa pinaagi sa pulong ug buhat maoy “mga magtutudlo sa maayo.” (Tito 1:8; 2:3) Ang sister nga si Roslyn miingon: “Ang akong amiga naningkamot sa pagtabang ug pagdasig sa mga igsoon. Maghunahuna siya sa ilang kahimtang ug sagad hatagan niya silag gagmayng regalo o tabangan sila sa ubang praktikal nga paagi. Maayo gyod siya.”

Giawhag ni Jehova ang iyang katawhan nga ‘pangitaon ang maayo.’ (Amos 5:14) Kon buhaton nato nâ, matabangan ta sa pagpabili sa iyang sukdanan ug pagpaningkamot nga buhaton ang maayo.

Dili nato angayng hunahunaon nga kinahanglan tang mohatag ug mahalong regalo o mohimog talagsaong butang aron makahimog maayo. Sa pag-ilustrar: Dili mahuman sa pintor ang usa ka hulagway o painting sa duha lang ka agi sa brush. Hinunoa, kadaghan niya kining himoon. Sa susama, makita ang atong pagkamaayo kon kadaghan ta mohimog maayo para sa uban.

Ang Bibliya nag-awhag nato nga ‘magmaandam’ sa pagbuhat ug maayo. (2 Tim. 2:21; Tito 3:1) Kon nahibalo ta sa kahimtang sa uban, makakita tag mga paagi sa pagtabang nila aron sa ‘pagpalig-on kanila.’ (Roma 15:2) Mahimong mag-apil nâ sa paghatag kon unsay naa nato. (Prov. 3:27) Puwede nato silang imbitahon sa simpleng pagpangaon o sa makapadasig nga pag-ubanay. Kon may masakit, makapadala tag kard, makaduaw, o makatawag niya. Oo, makakita tag daghang kahigayonan sa pagsultig “maayo nga makapalig-on sumala sa gikinahanglan, aron makahatag kinig kaayohan sa mga magapatalinghog.”​—Efe. 4:29.

Sama kang Jehova, maningkamot ta sa paghimog maayo ngadto sa tanan. Busa, wala tay diskriminasyon. Ang usa ka maayong paagi mao ang pagsangyaw sa maayong balita sa Gingharian ngadto sa tanan. Ingon sa gisugo ni Jesus, maningkamot ta sa paghimog maayo bisan niadtong nagdumot kanato. (Luc. 6:27) Dili gyod sayop ang pagbuhat ug maayo, kay “batok sa maong mga butang walay balaod.” (Gal. 5:22, 23) Kon mobuhat tag maayo bisag gilutos o nag-antos ug kalisdanan, mahimong madani nato ang uban sa kamatuoran ug mahimaya ang Diyos.​—1 Ped. 3:16, 17.

“Ang maayong tawo matagbaw sa mga sangpotanan [o, benepisyo] sa iyang mga pakiglabot.” (Prov. 14:14) Unsa ang pipila ka benepisyo? Kon maayo ta sa uban, lagmit maayo pod sila nato. (Prov. 14:22) Bisag ang pipila dili mobuhat ug maayo, ang padayon natong pagbuhat ug maayo mahimong makapausab nila.​—Roma 12:20.

Daghan ang makapamatuod nga nakabenepisyo sila sa pagbuhat ug maayo ug pagbiya sa daotang buhat. Tagda ang eksperyensiya ni Nancy. Siya miingon: “Nagdako ko nga walay pagpakabana sa uban, imoral, ug dili matinahoron. Pero dihang nakakat-on ko sa sukdanan sa Diyos sa pagkamaayo ug gipadapat kana, nahimo kong mas malipayon. Karon may pagtahod na ko sa kaugalingon.”

Kon ugmaron nato ang pagkamaayo, malipay si Jehova. Ug mao ni ang pangunang rason sa pagbuhat niana. Bisag daghan ang dili makakita sa atong gibuhat, makita kana ni Jehova. Mahibalo siya sa matag higayon nga kita mobuhat ug maghunahunag maayo. (Efe. 6:7, 8) Unsay benepisyo? “Ang usa ka tawo nga maayo makabaton ug pag-uyon gikan ni Jehova.” (Prov. 12:2) Busa, magpadayon ta sa pag-ugmad sa pagkamaayo. Si Jehova nagsaad ug “himaya ug dungog ug kalinaw alang sa tanan nga nagbuhat kon unsa ang maayo.”​—Roma 2:10.