Unsa ka Lawom ang Imong Pagkaila Kang Jehova?

1-2. Base sa eksperyensiya ni Angelito, unsay angayng buhaton sa matag usa kanato?

SAKSI ba ang imong ginikanan? Kon oo, hinumdomi nga dili ka awtomatikong masuod kang Jehova tungod lang kay Saksi sila. Nag-alagad man ang atong mga ginikanan o wala, ang matag usa nato kinahanglang maningkamot nga makabaton ug personal nga relasyon kang Jehova.

² Konsideraha ang eksperyensiya ni Angelito. Nagdako siya sa Saksi nga pamilya. Pero niadtong batan-on pa siya, wala siya mobati nga suod kaayo sa Diyos. Siya miingon, “Nag-alagad ko kang Jehova tungod lang kay gusto nakong sundogon ang ginahimo sa akong pamilya.” Pero midesisyon si Angelito nga mogahin ug mas daghang panahon sa pagbasa ug pagpamalandong sa Pulong sa Diyos ug sa pag-ampo kang Jehova. Unsay resulta? Siya miingon, “Akong nakat-onan nga masuod lang ko sa akong Amahan nga si Jehova kon maningkamot ko nga mailhan siya.” Base sa eksperyensiya ni Angelito, makapangutana ta: Unsay kalainan sa pagkahibalo lang bahin kang Jehova ug sa pagkaila pag-ayo kaniya? Ug unsay atong buhaton aron mailhan pag-ayo si Jehova?

 3. Unsay kalainan sa pagkahibalo lang bahin kang Jehova ug sa pagkaila pag-ayo kaniya?

³ Makaingon ta nga ang usa ka tawo nahibalo bahin kang Jehova kon siya nahibalo sa ngalan sa Diyos o pamilyar sa mga butang nga Iyang gisulti o gihimo. Pero labaw pa ana ang gikinahanglan aron makaila pag-ayo kang Jehova. Kinahanglan tang mogahin ug panahon sa pagkat-on bahin kang Jehova ug sa iyang nindot nga mga hiyas. Kana ray paagi nga masabtan nato ang mga rason sa iyang mga gisulti ug gihimo. Makatabang nâ aron mahibaloan nato kon giuyonan ba niya ang atong mga opinyon, desisyon, ug binuhatan. Dihang mahibalo na ta kon unsay gusto ni Jehova para nato, kinahanglan natong ipadapat ang atong nakat-onan.

 4. Sa unsang paagi makatabang nato ang pagkonsiderar sa mga pananglitan diha sa Bibliya?

⁴ Ang uban magbugalbugal tingali nato kay gusto tang moalagad kang Jehova, ug mograbe pa gani ang ilang pagsupak dihang makig-uban na ta sa iyang katawhan. Pero kon mosalig ta kang Jehova, dili gyod ta niya pasagdan. Makaugmad tag panaghigalaay uban sa Diyos nga molungtad hangtod sa hangtod. Posible ba gyod nga mailhan nato pag-ayo si Jehova? Oo! Posible kana, base sa pananglitan sa dili hingpit nga mga tawo sama ni Moises ug Haring David. Samtang atong konsiderahon ang ilang mga gibuhat, atong tubagon kining duha ka pangutana: Unsay ilang gihimo aron mailhan nila si Jehova? Ug unsay atong makat-onan kanila?

 5. Unsay gipili ni Moises?

⁵ Si Moises milihok base sa iyang nakat-onan. Dihang mga 40 anyos si Moises, gipili niyang makig-uban sa katawhan sa Diyos, ang mga Hebreohanon, imbes mailhang “apo sa Paraon.” (Heb. 11:24) Iyang gibiyaan ang iyang taas nga posisyon. Dihang misuportar si Moises sa mga Hebreohanon nga mga ulipon sa Ehipto, nahibalo siya nga masuko gyod ang Paraon, usa ka gamhanang magmamando nga giisip ingong diyos. Pagkadako sa iyang gipakitang pagtuo! Si Moises misalig kang Jehova. Kana nga pagsalig maoy lig-ong rason kon nganong si Moises suod kang Jehova sa tibuok niyang kinabuhi.​—Prov. 3:5.

 6. Unsay atong makat-onan kang Moises?

⁶ Unsay atong makat-onan niana? Sama kang Moises, kitang tanan kinahanglang modesisyon: Pilion ba natong moalagad sa Diyos ug makig-uban sa iyang katawhan? Kinahanglan tingali tang mohimog mga sakripisyo aron makaalagad sa Diyos, ug tingali lutoson ta niadtong wala makaila kang Jehova. Pero kon mosalig ta sa atong langitnong Amahan, makaseguro ta nga iya tang tabangan!

7-8. Unsay padayong nakat-onan ni Moises?

⁷ Si Moises padayong nagkat-on sa mga hiyas ni Jehova ug nagbuhat sa Iyang kabubut-on. Pananglitan, dihang gisugo si Moises sa pagpanguna sa nasod sa Israel sa paggawas sa Ehipto, wala siyay pagsalig sa kaugalingon ug balikbalik niyang giingnan si Jehova nga mibati siyang dili kuwalipikado. Ang tubag sa Diyos nagpakita sa Iyang pagkamaluluy-on kay Iyang nasabtan ang gibati ni Moises ug gitabangan siya. (Ex. 4:10-16) Ingong resulta, si Moises nakahimo sa pagsulti ug bug-at nga mga mensahe sa paghukom ngadto sa Paraon. Unya nakita ni Moises nga gigamit ni Jehova ang Iyang gahom dihang Iyang giluwas ang mga Israelinhon ug gilaglag ang Paraon ug ang iyang kasundalohan sa Pulang Dagat.​—Ex. 14:24-28; Sal. 136:15.

⁸ Human makagawas ang mga Israelinhon sa Ehipto sa pagpanguna ni Moises, nagsige silag reklamo. Bisan pa niana, naobserbahan ni Moises ang dakong pailob ni Jehova sa katawhan nga Iyang gipagawas sa pagkaulipon. (Sal. 78:40-43) Nakita sab niya ang talagsaong pagkamapainubsanon ni Jehova dihang giusab Niya ang Iyang hunahuna human mohangyo si Moises.​—Ex. 32:9-14.

 9. Sumala sa Hebreohanon 11:27, unsa ka suod si Moises kang Jehova?

⁹ Human sa paggawas sa Ehipto, si Moises nasuod pag-ayo kang Jehova, nga samag nakita niya ang iyang langitnong Amahan. (Basaha ang Hebreohanon 11:27.) Gipakita sa Bibliya kon unsa sila ka suod. Kini nag-ingon: “Si Jehova direktang nakigsulti kang Moises, samag tawo nga nakigsulti sa laing tawo.”​—Ex. 33:11.

10. Unsay angay natong buhaton aron mas mailhan si Jehova?

¹⁰ Unsay atong makat-onan niana? Aron mas mailhan nato si Jehova, dili igo nga mahibalo lang ta sa iyang mga hiyas. Kinahanglan sab natong buhaton ang iyang kabubut-on. Kabubut-on ni Jehova karon nga “ang tanang matang sa tawo maluwas ug makakat-on sa tukmang kahibalo sa kamatuoran.” (1 Tim. 2:3, 4) Usa ka paagi nga mahimo nato ang kabubut-on ni Jehova mao ang pagtudlo bahin kaniya.

11. Sa unsang paagi mas mailhan nato si Jehova dihang magtudlo ta bahin kaniya?

¹¹ Sagad, mas mailhan nato si Jehova dihang magtudlo ta bahin kaniya. Pananglitan, atong makita ang pagkamaluluy-on ni Jehova dihang tabangan ta niya nga makaplagan ang mga tawong gustong makigsuod kaniya. (Juan 6:44; Buh. 13:48) Makita nato nga naglihok ang gahom sa Pulong sa Diyos dihang ang atong mga Bible study mobiya sa ilang daotang mga buhat ug mosugod sa pagsul-ob sa bag-ong personalidad. (Col. 3:9, 10) Ug makita nato ang pailob sa Diyos kay naghatag siyag daghang kahigayonan sa mga tawo sa atong teritoryo nga makakat-on bahin kaniya ug maluwas.​—Roma 10:13-15.

12. Sumala sa Exodo 33:13, unsay gihangyo ni Moises, ug ngano?

¹² Gipabilhan ni Moises ang iyang relasyon kang Jehova. Bisan dihang nakahimo na si Moises ug kahibulongang mga buhat sa ngalan sa Diyos, siya matinahorong mihangyo nga tugotan siyang mas makaila kang Jehova. (Basaha ang Exodo 33:13.) Kapig 80 anyos na si Moises dihang mihangyo siya niana, pero nahibalo siya nga daghan pa siyag angayng makat-onan bahin sa iyang mahigugmaon nga langitnong Amahan.

13. Unsa ang usa ka paagi nga atong mapakita nga gipabilhan nato ang atong relasyon sa Diyos?

¹³ Unsay atong makat-onan niana? Bisag unsa na ta ka dugayng nag-alagad kang Jehova, angay natong pabilhan ang atong relasyon kaniya. Ang usa ka paagi nga mapakita nato kana mao ang pagpakig-estorya kaniya sa pag-ampo.

14. Nganong importante kaayo ang pag-ampo aron mas mailhan nato ang Diyos?

¹⁴ Ang maayong komunikasyon importante aron molig-on ang relasyon. Busa pag-ampo kanunay sa Diyos aron masuod ka kaniya, ug ayawg kahadlok sa pagpahayag kon unsa gyoy imong gihunahuna ug gibati. (Efe. 6:18) Si Krista, nga taga-Turkey, miingon: “Matag higayon nga isulti nako kang Jehova ang akong hunahuna pinaagig pag-ampo ug makita ang iyang tabang, mas molig-on ang akong gugma ug pagsalig kaniya. Dihang nakita nako kon giunsa pagtubag ni Jehova ang akong mga pag-ampo, nakatabang ni nako nga isipon si Jehova ingong akong Amahan ug Higala.”

15. Unsay giingon ni Jehova bahin kang Haring David?

¹⁵ Si Haring David natawo sa nasod nga napahinungod kang Jehova nga Diyos. Pero si David wala lang basta magsunod sa relihiyon sa iyang pamilya. Siya mismo ang nakigsuod sa Diyos, ug gimahal siya pag-ayo ni Jehova. Si Jehova miingon nga si David “gikahimut-an sa [Iyang] kasingkasing.” (Buh. 13:22) Nganong si David nasuod pag-ayo kang Jehova?

16. Unsay nakat-onan ni David bahin kang Jehova dihang namalandong siya sa kalalangan?

¹⁶ Si David nagkat-on bahin kang Jehova pinaagi sa mga butang nga Iyang gilalang. Sa batan-on pa si David, pirme siyang naa sa gawas kay nagbantay sa mga karnero sa iyang amahan. Tingali nianang mga panahona siya nagsugod ug pamalandong sa mga butang nga gihimo ni Jehova. Pananglitan, samtang nagtan-aw si David sa langit panahon sa kagabhion, tingali dili lang mga bituon ang iyang nakita. Nakita pod niya ang mga hiyas sa Usa nga naghimo niana. Kanay hinungdan nga si David misulat: “Ang kalangitan nagapahayag sa himaya sa Diyos; ang kawanangan nagasaysay sa buhat sa iyang mga kamot.” (Sal. 19:1, 2) Dihang gihunahuna ni David ang katingalahang pagkahimo ni Jehova sa mga tawo, iyang nakita kon unsa ka maalamon si Jehova. (Sal. 139:14) Sa iyang pagpamalandong sa mga nahimo ni Jehova, nakita niya kon unsa siya ka gamay kon itandi sa Diyos.​—Sal. 139:6.

17. Unsay atong makat-onan kon atong pamalandongon ang kalalangan?

¹⁷ Unsay atong makat-onan niana? Importante nga mainteres ta sa kalalangan. Ayawg kakontento nga basta mabuhi lang niining kalibotana, kondili palandonga ang kanindot niini! Sa adlaw-adlaw, palandonga kon unsay imong makat-onan bahin kang Jehova gikan sa kalalangan​—mga tanom, hayop, ug mga tawo. Pinaagi niana, madugangan kada adlaw ang imong kahibalo bahin sa imong mahigugmaong Amahan. (Roma 1:20) Ug kada adlaw imong makita nga magkalawom ang imong gugma kaniya.

18. Base sa Salmo 18, unsay giila ni David?

¹⁸ Giila ni David nga ginatabangan siya ni Jehova. Pananglitan, dihang gipanalipdan ni David ang mga karnero sa iyang amahan batok sa leyon ug oso, iyang giila nga si Jehova ang nagtabang niya aron iyang mapatay ang maong bangis nga mga mananap. Dihang iyang napildi ang higanteng manggugubat nga si Goliat, nakita niya nga si Jehova ang naggiya kaniya. (1 Sam. 17:37) Ug dihang nakaikyas siya sa masinahong hari nga si Saul, giila ni David nga si Jehova ang nagluwas kaniya. (Sal. 18, superskripsiyon) Kon garboso pa si David, lagmit maghunahuna siya nga nahimo niya kining tanan tungod sa iyang kaugalingong katakos. Pero mapainubsanon siya, maong iyang giila nga si Jehova ang nagtabang kaniya.​—Sal. 138:6.

19. Unsay atong makat-onan sa panig-ingnan ni David?

¹⁹ Unsay atong makat-onan niana? Dili lang basta mangayo tag tabang kang Jehova. Kinahanglan sab natong ilhon kon kanus-a ug sa unsang paagi ta niya gitabangan. Kon ilhon nato ang atong limitasyon, ato gyong makita nga si Jehova nagtabang nato nga mahimo ang mga butang nga dili nato kayang himoon. Ug sa matag higayon nga makita nato nga gitabangan ta ni Jehova, mas molig-on ang atong relasyon kaniya. Napamatud-an kana sa usa ka brader sa Fiji nga si Isaac, kinsa nag-alagad kang Jehova sa daghan nang katuigan. Siya miingon: “Sa akong kinabuhi, nakita nako kon giunsa ko pagtabang ni Jehova sukad nga nagtuon kog Bibliya hangtod karon. Busa para nako, tinuod kaayo si Jehova.”

20. Unsay atong makat-onan sa relasyon ni David sa Diyos?

²⁰ Gisundog ni David ang mga hiyas ni Jehova. Gilalang ta ni Jehova nga may katakos sa pagsundog sa iyang mga hiyas. (Gen. 1:26) Kon padayon tang mokat-on sa mga hiyas ni Jehova, mas masundog nato siya. Si David nakaila kaayo sa iyang langitnong Amahan, mao nga iyang nasundog Siya sa pagpakiglabot sa uban. Konsideraha kining usa ka pananglitan. Si David nakasala kang Jehova dihang nanapaw siya kang Bat-seba ug gipapatay ang bana niini. (2 Sam. 11:1-4, 15) Pero si Jehova midesisyon nga pakitaag kaluoy si David, kinsa nagpakitag kaluoy sa uban. Tungod sa maayo kaayong relasyon ni David kang Jehova, gimahal siya pag-ayo sa mga Israelinhon ug gigamit siya ni Jehova ingong sukdanan para sa ubang hari sa Israel.​—1 Hari 15:11; 2 Hari 14:1-3.

21. Sumala sa Efeso 4:24 ug 5:1, unsay resulta kon atong ‘sundogon ang Diyos’?

²¹ Unsay atong makat-onan niana? Kinahanglan natong ‘sundogon ang Diyos.’ Kana makahatag natog kaayohan ug makatabang nga mas makakat-on ta bahin kang Jehova. Kon atong sundogon ang mga hiyas sa Diyos, atong gipamatud-an nga kita iyang mga anak.​—Basaha ang Efeso 4:24; 5:1.

22-23. Unsay resulta kon atong ipadapat ang atong nakat-onan bahin kang Jehova?

²² Sa nahisgotan na, makakat-on ta bahin kang Jehova pinaagi sa iyang kalalangan ug sa iyang Pulong, ang Bibliya. Ang maong libro daghag pananglitan sa matinumanong mga alagad sa Diyos nga atong masundog, sama ni Moises ug David. Nahimo na ni Jehova ang iyang papel. Naa na kanato kon ato bang ablihan ang atong mata, dalunggan, ug kasingkasing kaniya.

²³ Ang atong pagkat-on kang Jehova walay kataposan. (Eccl. 3:11) Pero ang importante, dili kon unsa ka daghan ang atong nahibaloan kaniya, kondili kon unsay atong gihimo sa atong nakat-onan. Kon atong ipadapat ang atong nakat-onan ug maningkamot nga sundogon ang atong mahigugmaong Amahan, padayon siyang makigsuod kanato. (Sant. 4:8) Pinaagi sa iyang Pulong, iya tang gipasaligan nga dili gyod niya biyaan kadtong gustong makaila pag-ayo kaniya.