Magmahanason sa Imong Ministeryo
1 Ang apostol nga si Pablo midasig kanato sa pag-ugmad ug kahanas sa ministeryo. Siya misulat: “Buhata ang imo gayong maarangan sa pagtanyag sa imong kaugalingon nga inuyonan sa Diyos, usa ka magbubuhat nga dili magakaulaw, nga nagapanudlo sa pulong sa kamatuoran sa hustong paagi.”—2 Tim. 2:15.
2 Ang kahanas sa ministeryo pagahuptan. Busa, kita kinahanglang ‘manlimbasog pag-ayo’ kon kita mahimo man ugaling nga mahanasong mga ministro. Apan unsa man ang makatabang kanato?
KAT-ONI GIKAN SA PULONG SA DIYOS
3 Ang pagkasinati ta nga mas maayo pa sa ginatudlo sa Bibliya, mas epektibo man ang atong “pagpanudlo sa pulong sa kamatuoran sa hustong paagi.” Busa hinungdanong gahinan ug panahon alang sa personal nga pagtuon.—1 Tim. 4:15, 16.
4 Gikinahanglan ta usab ang “mas nga pagtagad kay sa kasagaran” sa instruksiyon nga nadawat diha sa mga miting sa kongregasyon. (Heb. 2:1) Ang ekselenteng mga puntong igsusulti alang sa ministeryo ginahisgotan sa mga pakigpulong publiko o sa Pagtuon sa Basahon sa Kongregasyon. Ang Teokratikanhong Ministeryong Tunghaan nagatagana kanato sa hinungdanong pagbansay sa pagkahimong hanas nga mga magtutudlo, ug ang Tigom sa Pag-alagad mohatag ug mga sugyot ug mga pasundayag sa pagbulig kanato sa pagkahimong mas hanas ingong mga ministro.
IPADAPAT ANG MGA SUGYOT
5 Gisultihan ni Pablo ang kongregasyon sa Filipos sa pagbansay sa ilang nakat-onan maylabot kaniya. (Filip. 4:9) Kita usab kinahanglang mopadapat sa mga butang nga atong nakat-onan pinaagig kapunongan ni Jehova. Pananglitan, sa Hulyo 15, 1988 nga Watchtower, mga panid 15-20, atong nakat-onan ang mga paagi nga atong maugmad ang “bag-ong” teritoryo diha sa mga dapit nga siging ginasangyawan. Dugang pa sa pasiugda sa panginahanglan sa presko, makapadaning paagi, ang artikulo nagdasig kanatong andamon daan ang hunahuna sa tagbalay sa pagdahom nga kita sa regular magaduaw. Ang tambag gihatag nga magmabug-os sa pagpangita sa lainlaing mga tawo nga nagapuyo sa samang balay. Sa pagpadapat niining mga sugyota, atong mapauswag ang atong mga kahanas diha sa ministeryo.
6 Regular ba natong ginagamit ang basahong Nangatarongan diha sa ministeryo? Ang sinugyot nga mga pasiuna ug ang seksiyon bahin sa pagtubag sa mga pagsupak makabaid man sa atong mga kahanas. Dugang pa, ang pagbansay sa Ulohan nga Mahisgotan ug ang atong mga presentasyon sa tanyag mopadugang sa atong kalamposan diha sa ministeryo.
7 Kon buot mo pa ug dugang mga sugyot, duola ang magtatan-aw sa pag-alagad o ang imong tigdumala sa pagtuon sa basahon ug pangayo ug tabang. Ang tanan kanato makapauswag man sa atong mga kahanas ingong mga ministro, nga “nagapanudlo sa pulong sa kamatuoran sa hustong paagi,” nga sa ingon nagapatunghag kadungganan ngadto sa atong Diyos si Jehova.—Juan 15:8.