Pangutana

● Nganong importante nga humanon sa pagtuon ang duha ka libro sa bug-os uban sa bag-ong mga tinun-an bisan pa kon sila mabawtismohan na antes mahuman ang ikaduhang libro?

Ang mga bag-ohan nagakinahanglan ug tabang sa pagkadangat sa hustong kahibalo sa kamatuoran. (Col. 1:9, 10) Aduna kita ing pribilehiyo sa pagbulig kanila nga makahupot sa maayong pagsabot sa pasukaranang mga doktrina sa Bibliya, sa moral nga mga suntoan sa Bibliya, ug uban pang nalangkit nga mga butang. Kini moabag kanila sa pagkahimong malig-on diha sa kamatuoran aron makabuntog sa bisan unsang mga pagsulay nga nagapahipi sa unahan.

Ang mga estudyante nagakinahanglan usab sa pagkahimong hamtong sa panabot. (1 Cor. 14:20) Sa pagkahimong bug-os hamtong nga tawo sa espirituwal, ang personal nga pagtuon sa Bibliya uban sa usa ka magtutudlo makatabang. Busa ang kaalam nagadiktar nga ang iyang pagtuon sa Bibliya sa balay kinahanglang magpadayon hangtod nga siya makahuman na sa pagtuon sa duha ka libro.

HUMAN SA BAWTISMO

Si Jesus miingon nga kita gayod maghimog mga tinun-an​—nagabawtismo ug nagatudlo kanila. (Mat. 28:19, 20) Ang kadaghanan sa pagpanudlo ginahimo human sa bawtismo. Ang kahibalo gikan sa usa lang ka libro dili sagad supisyente aron bug-oson ang iyang espirituwal nga pagbansay. Ang dugang pagtudlo gikinahanglan sa pagpahaom kaniya alang sa ministeryo ug sa pagsangkap kaniya sa pagsukol sa mga kapit-osan nga modangat ngadto kanilang nagaalagad kang Jehova karon. Ang unang publikasyon nga gitun-an nagataganag pagsabot sa mga pasukaranan. Ang ikaduhang basahon nagakobre sa Kristohanong mga hiyas. Kining mga basahona mahimong ang librong Mabuhing Walay Kataposan ug unya ang libro kahang Nahiusa sa Pagsimba o librong Matuod nga Kalinaw. Ang padayon nga pagtuon hangtod ang ikaduhang libro mahuman motaganag malig-ong edukasyon sa mga katuyoan ni Jehova maingon man sa iyang hataas Kristohanong mga sukdanan. Kini makabulig sa bag-ohan sa pagkahimong lubasan diha sa pagtuo. (Col. 2:7) Alang sa dugang impormasyon maylabot sa pagtaho sa maong mga pagtuon, tan-awang “Pangutana” sa Enero, 1988 nga Atong Ministeryo sa Gingharian.

Siyempre, human sa bawtismo ang mga bag-ohan pagadahomon sa pag-uswag sa espirituwal. (Heb. 6:1-3) Sa kasagaran dili molungtad ug dugay sa paghuman sa ikaduhang libro. Ang bag-ohang tawo sa ingon matagan-an ug solidong pundasyon.