Ang Kamatuoran Bahin sa Diyos ug ni Jesu-Kristo
Bisag daghang diyos ang gisimba sa mga tawo, usa lang ang tinuod nga Diyos. (Juan 17:3) Siya ang “Supremong Diyos,” ang nagbuhat sa tanang butang ug ang Tinubdan sa tanang kinabuhi. Siya lamang ang takos nga simbahon.—Daniel 7:18; Pinadayag 4:11.
Kinsa ang Diyos?
Ang ngalan sa Diyos makita sa orihinal nga kopya MGA 7,000 KA BESES
JEHOVA ang ngalan sa Diyos
GINOO, DIYOS, AMAHAN—Pipila sa mga titulo ni Jehova
Unsay Ngalan sa Diyos? Ang Diyos mismo nag-ingon: “Ako si Jehova. Kana ang akong ngalan.” (Isaias 42:8) Ang personal nga ngalan sa Diyos makitag mga 7,000 ka beses diha sa Bibliya. Pero daghang hubad sa Bibliya ang sayop nga nag-ilis niinig mga titulo, sama sa “Ginoo.” Gusto sa Diyos nga mahimo ka niyang higala, maong gidasig ka niya sa ‘pagsangpit sa iyang ngalan.’—Salmo 105:1.
Mga Titulo ni Jehova. Sa Bibliya, si Jehova gitawag sab sa mga titulo nga “Diyos,” “Labing Gamhanan,” “Maglalalang,” “Amahan,” “Ginoo,” ug “Soberano.” Daghang pag-ampo nga narekord sa Bibliya diin si Jehova gitawag pinaagig titulo ug gamit ang iyang personal nga ngalan, Jehova.—Daniel 9:4.
Ang Dagway sa Diyos. Ang Diyos espiritu ug dili makita. (Juan 4:24) Ang Bibliya nag-ingon nga “wala pay tawo nga nakakita sa Diyos.” (Juan 1:18) Pero gipakita sa Bibliya nga naa siyay pagbati. Ang mga tawo makapaguol o “makapalipay niya.”—Proverbio 11:20; Salmo 78:40, 41.
Mga Nindot nga Hiyas sa Diyos. Ang Diyos dili mapihigon sa mga tawo bisag unsa pay ilang nasod ug kagikan. (Buhat 10:34, 35) Siya sab “maluluy-on ug mabination, dili daling masuko ug dagaya sa maunongong gugma ug kamatuoran.” (Exodo 34:6, 7) Pero naay upat ka hiyas ang Diyos nga makapadani pag-ayo.
Gahom. Kay siya ang “Diyos nga Labing Gamhanan,” dili mahurot ang iyang gahom ug gamiton niya kini sa pagtuman sa iyang mga saad.—Genesis 17:1.
Kaalam. Ang kaalam sa Diyos labaw kay kang bisan kinsa, maong ang Bibliya nag-ingon nga siya “ang bugtong maalamon.”—Roma 16:27.
Hustisya. Matarong kanunay ang ginahimo sa Diyos. Ang iyang mga buhat “walay ikasaway,” ug “walay inhustisya kaniya.”—Deuteronomio 32:4.
Gugma. Ang Bibliya nag-ingon nga “ang Diyos gugma.” (1 Juan 4:8) Ang Diyos wala lang magpakitag gugma—siya mismo ang personipikasyon sa gugma. Kini ang iyang kinalabwang hiyas nga nag-impluwensiya sa tanan niyang ginabuhat, ug nakabenepisyo ta niana sa daghang paagi.
Pagpakighigala sa Diyos sa mga Tawo. Ang Diyos mao ang atong mahigugmaong Amahan sa langit. (Mateo 6:9) Kon naa tay pagtuo kaniya, mahimo ta niyang higala. (Salmo 25:14) Gani, ang Diyos nagdapit kanimo sa pagduol kaniya pinaagi sa pag-ampo ug sa pagtugyan kaniya sa ‘tanan nimong kabalaka, kay gimahal ka niya.’—1 Pedro 5:7; Santiago 4:8.
Unsay Kalainan sa Diyos ug ni Jesu-Kristo?
Si Jesus Dili mao ang Diyos. Talagsaon si Jesus—siya lang ang direktang gilalang sa Diyos. Maong gitawag siya sa Bibliya nga Anak sa Diyos. (Juan 1:14) Human lalanga ni Jehova si Jesus, gigamit niya ang iyang panganayng anak ingong “batid nga magbubuhat” sa paglalang sa tanang ubang butang.—Proverbio 8:30, 31; Colosas 1:15, 16.
Si Jesus wala mangangkon nga siya ang Diyos. Hinuon, siya miingon: “Nakaila ko [sa Diyos] kay ako iyang representante, ug Siya ang nagpadala kanako.” (Juan 7:29) Dihang nakig-estorya sa usa sa iyang mga apostoles, gitawag ni Jesus si Jehova nga ‘akong Amahan ug inyong Amahan’ ug ‘akong Diyos ug inyong Diyos.’ (Juan 20:17) Human mamatay si Jesus, siya gibanhaw ni Jehova ug gihatagag dakong awtoridad.—Mateo 28:18; Buhat 2:32, 33.
Si Jesu-Kristo Makatabang nga Masuod Ka sa Diyos
Si Jesus mianhi sa yuta aron tudloan ta bahin sa iyang Amahan. Si Jehova mismo ang nag-ingon bahin kang Jesus: “Kini mao ang akong Anak, ang akong gihigugma. Pamati kamo kaniya.” (Marcos 9:7) Si Jesus mas nakaila sa Diyos kay ni bisan kinsa. Siya miingon: “Walay nakaila sa Amahan gawas sa Anak ug niadtong buot tudloan sa Anak bahin sa Amahan.”—Lucas 10:22.
Hingpit nga gipakita ni Jesus ang mga hiyas sa Diyos. Gisundog pag-ayo ni Jesus ang mga hiyas sa iyang Amahan maong makaingon siya: “Kadtong nakakita kanako nakakita usab sa Amahan.” (Juan 14:9) Kay gisundog ni Jesus ang gugma sa iyang Amahan diha sa iyang mga pulong ug buhat, natabangan niya ang mga tawo nga makigsuod sa Diyos. Siya miingon: “Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.” (Juan 14:6) Miingon sab siya: “Ang matuod nga mga magsisimba magsimba sa Amahan sa espiritu ug kamatuoran, kay sa pagkatinuod, ang Amahan nangitag mga tawo nga ingon niini sa pagsimba kaniya.” (Juan 4:23) Tiaw mo na! Si Jehova nangitag mga tawo nga sama nimo nga gustong mahibalo sa kamatuoran bahin kaniya.