Ang Dakong Panon sa Ubang mga Karnero Nagdayeg sa Diyos ug sa Kristo

 1. Unsay epekto sa usa ka pakigpulong sa kombensiyon niadtong 1935 ngadto sa usa ka batan-ong lalaki?

ANG batan-ong lalaki 18 anyos dihang siya nabawtismohan niadtong 1926. Ang iyang ginikanan mga Estudyante sa Bibliya, nga maoy pagtawag kaniadto sa mga Saksi ni Jehova. Sila may tulo ka anak nga lalaki ug duha ka anak nga babaye, nga ilang gitudloan sa pag-alagad kang Jehova nga Diyos ug pagsundog kang Jesu-Kristo. Sama sa tanang Estudyante sa Bibliya kaniadto, kining matinumanong batan-ong lalaki nakig-ambit sa tinapay ug bino kada tuig panahon sa Panihapon sa Ginoo. Pero nausab pag-ayo ang iyang panglantaw sa kinabuhi tungod sa usa ka makasaysayanhong pakigpulong nga nag-ulohang “Ang Dakong Pundok.” Kana nga pakigpulong gipahayag ni J. F. Rutherford niadtong 1935 sa usa ka kombensiyon sa Washington, D.C., U.S.A. Unsay nasayran sa mga Estudyante sa Bibliya niana nga kombensiyon?

 2. Unsang makapalipay nga kamatuoran ang gipatin-aw ni Brader Rutherford sa iyang pakigpulong?

² Sa iyang pakigpulong, gipatin-aw ni Brader Rutherford kon kinsa ang mahimong bahin sa “dakong pundok” (King James Version), o “dakong panon,” nga gihisgotan sa Pinadayag 7:9. Una pa niana, kining grupoha gituohan ingong segundaryo nga langitnong matang nga dili kaayo matinumanon. Pinaagi sa Kasulatan, gipatin-aw ni Brader Rutherford nga ang dakong panon wala pilia nga mopuyo sa langit, kondili sila ang ubang mga karnerob sa Kristo nga makalabang sa “dakong kasakitan” ug mabuhi sa walay kataposan sa yuta. (Pin. 7:14) Si Jesus misaad: “Ako dunay ubang mga karnero nga wala niining torila; kinahanglang giyahan usab nako sila, ug sila mamati sa akong tingog. Sila mahimong usa ka panon ubos sa usa ka magbalantay.” (Juan 10:16) Kining ubang mga karnero nagtumong sa maunongong mga Saksi ni Jehova nga may paglaom nga mabuhi sa walay kataposan sa Paraiso sa yuta. (Mat. 25:31-33, 46) Tan-awon nato kon sa unsang paagi kining bag-ong espirituwal nga kahayag nakapausab sa kinabuhi sa daghang alagad ni Jehova, apil niadtong sa 18 anyos nga brader.​—Sal. 97:11; Prov. 4:18.

3-4. Sa kombensiyon niadtong 1935, unsay nasabtan sa linibo bahin sa ilang paglaom, ug ngano?

³ Ang eksayting nga bahin niana nga kombensiyon nahitabo dihang gipangutana sa mamumulong ang mga nanambong: “Puwede bang manindog ang tanan nga may paglaom nga mabuhi sa walay kataposan sa yuta?” Ang usa ka brader nga presente niana nga kombensiyon miingon nga kapig katunga sa mga 20,000 nga nanambong ang nanindog. Dayon si Brader Rutherford miingon: “Tan-awa! Ang dakong panon!” Ang mga nanambong nanghugyaw sa kalipay. Nasabtan sa mga nanindog nga wala sila pilia nga mopuyo sa langit. Nahibalo sila nga wala sila dihogi sa espiritu sa Diyos. Pagkasunod adlaw sa kombensiyon, 840 ka bag-ong Saksi ang nabawtismohan, ug kadaghanan kanila sakop sa ubang mga karnero.

⁴ Human niana nga pakigpulong, ang batan-on nga gihisgotan ganina ug ang linibo pa mihunong sa pagpakig-ambit sa tinapay ug bino panahon sa Panihapon sa Ginoo. Daghan ang mibatig sama sa mapainubsanong brader kinsa miingon: “Ang Memoryal niadtong 1935 ang kataposang higayon nga nakig-ambit ko sa mga emblema. Akong nasabtan nga wala gamita ni Jehova ang iyang balaang espiritu aron hatagan kog paglaom nga mabuhi sa langit; hinunoa, gihatagan ko niyag paglaom nga mabuhi sa yuta ug motabang sa paghimo niini nga paraiso.” (Roma 8:16, 17; 2 Cor. 1:21, 22) Sukad niadto, ang mga sakop sa dakong panon midaghan ug nag-alagad uban sa nahibiling mga dinihogan.c

 5. Unsay panglantaw ni Jehova niadtong mihunong pagpakig-ambit sa mga emblema sa Memoryal?

⁵ Unsay panglantaw ni Jehova niadtong mihunong pagpakig-ambit sa mga emblema sa Memoryal human sa 1935? Ug unsay hunahuna ni Jehova sa usa ka bawtismadong Saksi karon nga nagtuo nga dinihogan siya maong nakig-ambit siya sa tinapay ug bino panahon sa Panihapon sa Ginoo, pero sa ulahi nakaamgo nga sayop diay siya? (1 Cor. 11:28) Ang uban nakig-ambit sa mga emblema kay nasaypan nilag sabot ang ilang paglaom. Pero kon sila matinud-anong modawat nga nasayop sila, mohunong sa pagpakig-ambit, ug mopadayon sa pag-alagad kang Jehova nga matinumanon, seguradong isipon niya sila ingong bahin sa ubang mga karnero. Bisag dili sila makig-ambit sa tinapay ug bino, motambong gihapon sila sa Memoryal kay naapresyar kaayo nila ang gihimo ni Jehova ug Jesus para kanila.

 6. Unsay gisugo ni Jesus sa mga anghel?

⁶ Tungod kay duol na kaayo ang dakong kasakitan, makapadasig ang paghisgot sa giingon sa Pinadayag kapitulo 7 bahin sa dinihogang mga Kristohanon ug sa dakong panon sa ubang mga karnero. Gisugo ni Jesus ang mga anghel nga pugngan ang upat ka hangin sa kalaglagan. Kinahanglan nga dili nila kini buhian ngadto sa yuta hangtod nga ang tanang dinihogang mga Kristohanon maselyohan na, buot pasabot, ipahayag na ni Jehova nga matinumanon sila. (Pin. 7:1-4) Ingong ganti sa ilang pagkamatinumanon, ang dinihogang mga igsoon sa Kristo mahimong mga hari ug mga saserdote uban kaniya sa langit. (Pin. 20:6) Kadtong bahin sa pamilya sa Diyos sa langit malipay gyod sa dihang madawat na sa 144,000 nga mga dinihogan ang ilang langitnong ganti.

 7. Sumala sa Pinadayag 7:9, 10, kinsay nakita ni Juan sa panan-awon, ug unsay ilang gibuhat? (Tan-awa ang hulagway sa atubangan sa magasin.)

⁷ Human maghisgot si Juan bahin niining 144,000 ka hari ug saserdote, nahingangha siya sa sunod niyang nakita, “usa ka dakong panon” nga naluwas sa Armagedon. Dili parehas sa unang grupo, kining ikaduha mas dako ug walay eksaktong gidaghanon. (Basaha ang Pinadayag 7:9, 10.) Sila nagsul-ob ug “puting tag-as nga mga besti,” nga nagpasabot nga wala sila mahugawi sa kalibotan ni Satanas ug nagpabilin silang maunongon sa Diyos ug sa Kristo. (Sant. 1:27) Sila naninggit nga naluwas sila tungod sa gihimo ni Jehova ug Jesus, ang Kordero sa Diyos. Naggunit sab silag mga palwa sa palma, nga nagpakita nga malipayon nilang gidawat si Jesus ingong tinudlong Hari ni Jehova.​—Itandi ang Juan 12:12, 13.

 8. Unsay giingon sa Pinadayag 7:11, 12 bahin sa pamilya ni Jehova sa langit?

⁸ Basaha ang Pinadayag 7:11, 12. Unsay reaksiyon niadtong naa sa langit dihang nakita nila ang dakong panon? Nakita ni Juan nga nalipay pag-ayo ang tibuok pamilya ni Jehova sa langit dihang nakita nila ang mga sakop sa dakong panon nga nagdayeg sa Diyos. Ang pamilya ni Jehova sa langit malipay sa katumanan niini nga panan-awon dihang ang dakong panon makalabang buhi sa dakong kasakitan.

 9. Sumala sa Pinadayag 7:13-15, unsay ginahimo sa dakong panon karon?

⁹ Basaha ang Pinadayag 7:13-15. Si Juan misulat nga “gilabhan [sa dakong panon] ang ilang tag-as nga besti ug gipaputi kini sa dugo sa Kordero.” Kini nagpasabot nga duna silay hinlong konsensiya ug matarong nga baroganan atubangan kang Jehova. (Isa. 1:18) Sila dedikado, bawtismadong mga Kristohanon nga nagpakitag lig-ong pagtuo sa halad ni Jesus ug dunay suod nga relasyon kang Jehova. (Juan 3:36; 1 Ped. 3:21) Busa, sila kuwalipikado nga mobarog atubangan sa trono sa Diyos, nga maghatag kaniyag “sagradong pag-alagad adlaw ug gabii” diha sa yutan-ong bahin sa iyang espirituwal nga templo. Bisan karon, sila madasigong naghimo sa mas dakong bahin sa buluhatong pagsangyaw sa Gingharian ug paghimog mga tinun-an, nga nag-una sa Gingharian sa Diyos imbes sa ilang kaugalingon.​—Mat. 6:33; 24:14; 28:19, 20.

10. Sa unsa gipasaligan ang dakong panon, ug unsang saad ang makita nila nga matuman?

¹⁰ Ang dakong panon nga makalabang sa dakong kasakitan gipasaligan nga padayon silang atimanon sa Diyos, kay “ang Usa nga naglingkod sa trono magbuklad sa iyang tolda ibabaw kanila.” Ang saad nga dugay nang gipaabot sa ubang mga karnero nga matuman, mahitabo na gyod: “Pahiran [sa Diyos] ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit.”​—Pin. 21:3, 4.

11-12. (a) Sumala sa Pinadayag 7:16, 17, unsang mga panalangin ang madawat sa dakong panon? (b) Unsay mahimo sa ubang mga karnero panahon sa Memoryal, ug ngano?

¹¹ Basaha ang Pinadayag 7:16, 17. Karon, ang pipila sa mga alagad ni Jehova nag-antos sa kagutom tungod sa kalisod sa ekonomiya o ingong resulta sa kagubot ug mga gubat. Ang uban gipriso tungod sa ilang pagtuo. Pero, kadtong sakop sa dakong panon malipayng mahibalo nga dihang maluwas sila sa kalaglagan niining daotang sistema sa mga butang, kanunay silang makabaton ug abundang pisikal ug espirituwal nga pagkaon. Sa dihang laglagon na ang daotang sistema ni Satanas, ang dakong panon dili makasinati sa “makapagbang kainit” sa kasuko ni Jehova nga iyang ibubo sa kanasoran. Human sa dakong kasakitan, giyahan ni Jesus ang mga naluwas ngadto sa “mga tubig sa [walay kataposang] kinabuhi.” Hunahunaa ra: Ang dakong panon nindot kaayog paglaom. Sa binilyong tawo nga nabuhi sa yuta, posibleng dili na gyod sila mamatay!​—Juan 11:26.

¹² Ang ubang mga karnero mapasalamaton kang Jehova ug Jesus tungod sa ilang nindot kaayong paglaom. Wala sila pilia nga mopuyo sa langit, pero wala ni magpasabot nga dili kaayo sila bililhon kang Jehova. Ang mga sakop niining duha ka grupo parehong makadayeg sa Diyos ug sa Kristo. Ang usa ka paagi nga ila nang mahimo mao ang pagtambong sa Panihapon sa Ginoo.

13-14. Nganong ang tanan angayng motambong sa Memoryal sa kamatayon sa Kristo?

¹³ Sa di pa dugayng katuigan, mga 1 sa kada 1,000 nga manambong sa Memoryal ang makig-ambit sa tinapay ug bino. Sa kadaghanang kongregasyon, walay makig-ambit sa mga emblema. Ang kadaghanan sa manambong sa Memoryal yutan-og paglaom. Busa, nganong motambong man sila sa Panihapon sa Ginoo? Ang ilang rason parehas nianang sa mga tawo nga motambong sa kasal sa ilang higala. Motambong sila kay gusto nilang ipakita nga ilang gimahal ug gisuportahan ang kaslonon. Sa susama, ang ubang mga karnero motambong sa Memoryal kay gusto nilang ipakita nga ilang gimahal ug gisuportahan ang Kristo ug ang mga dinihogan. Motambong sab sila aron ipakita ang ilang apresasyon sa halad ni Jesus nga nagpaposible nga mabuhi sila sa walay kataposan sa yuta.

¹⁴ Ang laing importanteng rason kon nganong ang ubang mga karnero motambong sa Memoryal maoy aron tumanon ang sugo ni Jesus. Sa dihang gisugdan ni Jesus kanang espesyal nga panihapon uban sa iyang matinumanong mga apostoles, siya miingon kanila: “Ipadayon ninyo ang pagbuhat niini sa paghandom kanako.” (1 Cor. 11:23-26) Busa padayon silang motambong sa Panihapon sa Ginoo samtang naa pay dinihogan sa yuta. Ug ang ubang mga karnero nagdapit sa tanan sa pagtambong sa Memoryal uban kanila.

15. Sa unsang paagi madayeg nato ang Diyos ug ang Kristo panahon sa Memoryal?

¹⁵ Panahon sa Memoryal, duna tay kahigayonan sa pagdayeg sa Diyos ug sa Kristo pinaagi sa pagkanta ug pag-ampo. Ang pakigpulong nga ihatag niining tuiga nag-ulohang “Pabilhi ang Nahimo sa Diyos ug sa Kristo Alang Kanimo!” Kini makapalalom sa atong apresasyon kang Jehova ug sa Kristo. Samtang ipasa ang mga emblema, ang mga nanambong mapahinumdoman sa gisimbolohan niini​—ang lawas ug dugo ni Jesus. Mapahinumdoman sab ta nga gitugotan ni Jehova nga mamatay ang iyang Anak para kanato aron makabaton tag kinabuhi. (Mat. 20:28) Ang tanang nahigugma sa atong langitnong Amahan ug sa iyang Anak motambong gyod sa Memoryal.

16. Sa unsang paagi managsama ang mga dinihogan ug ang ubang mga karnero?

¹⁶ Ang mga dinihogan ug ang ubang mga karnero importante sa Diyos. Kining duha ka grupo parehong gihigugma niya. Nahibalo ta niini kay ang iyang gibayad sa pagpalit sa mga dinihogan ug sa ubang mga karnero parehas ra, ang kinabuhi sa iyang minahal nga Anak. Ang duha ka grupo lainlaig paglaom, pero silang duha kinahanglang magmaunongon sa Diyos ug sa Kristo. (Sal. 31:23) Ug hinumdomi nga si Jehova mohatag sa iyang balaang espiritu sa matag usa sumala sa kon unsay gikinahanglan, sakop man siya sa mga dinihogan o sa ubang mga karnero.

17. Sa unsa naghinamhinam ang nahibiling mga dinihogan?

¹⁷ Ang dinihogang mga Kristohanon wala ipanganak nga may langitnong paglaom. Ang Diyos maoy nagbutang niana sa ilang kasingkasing. Sila naghunahuna bahin sa ilang paglaom, nag-ampo bahin niini, ug naghinamhinam sa pagdawat sa ilang ganti sa langit. Wala sila mahibalo kon sama sa unsa ang ilang espirituwal nga lawas. (Filip. 3:20, 21; 1 Juan 3:2) Pero, ang nahibiling mga dinihogan naghinamhinam nga makita si Jehova, Jesus, mga anghel, ug ang uban pang dinihogan ug makauban sila sa langitnong Gingharian.

18. Unsay gikahinaman sa ubang mga karnero?

¹⁸ Ang ubang mga karnero naghinamhinam nga mabuhi sa walay kataposan sa yuta. Mao ni natural nga tinguha sa tawo. (Eccl. 3:11) Naghinamhinam sila sa adlaw nga makatabang sila sa paghimo sa tibuok yuta nga paraiso. Nangandoy sila sa panahon nga makatukod silag kaugalingong balay, makapananom, ug makapadakog mga anak nga hingpit ug panglawas. (Isa. 65:21-23) Eksayted silang liboton ang yuta​—adtoon ang kabukiran, kalasangan, ug kadagatan—​ug tun-an ang tanang butang nga gilalang ni Jehova. Labaw sa tanan, malipay silang mahibalo nga mas masuod pa sila kang Jehova.

19. Ang panahon sa Memoryal maghatag sa matag usa kanato ug unsang kahigayonan, ug kanus-a ni himoon karong tuiga?

¹⁹ Gihatagan ni Jehova ang tanan niyang dedikadong mga alagad ug nindot nga paglaom. (Jer. 29:11) Ang Memoryal sa kamatayon sa Kristo naghatag sa matag usa kanato ug talagsaong kahigayonan sa pagdayeg sa Diyos ug sa Kristo tungod sa ilang gibuhat para kanato aron makatagamtam tag walay kataposang kinabuhi. Walay duhaduha nga ang Memoryal mao ang labing importanteng panagkatigom sa tinuod nga mga Kristohanon kada tuig. Kini himoon human sa pagsalop sa adlaw sa Sabado, Marso 27, 2021. Niining tuiga, daghan ang may kagawasan sa pagtambong niining importante nga okasyon. Ang uban motambong bisan pa sa pagsupak. Ang pipila magselebrar niini nga okasyon diha sa prisohan. Samtang magtan-aw si Jehova, Jesus, ug ang langitnong bahin sa pamilya sa Diyos, hinaot ang matag kongregasyon, grupo, ug indibiduwal molampos sa ilang pagselebrar sa Memoryal!