‘Sunda Ninyo Pag-ayo ang Iyang mga Tunob’

1-2. Nganong posible nga masunod nato ang mga tunob ni Jesus? Iilustrar.

IMADYINA nga kauban ka sa usa ka grupo nga naglakaw latas sa peligroso, punog snow nga kamingawan o awaaw nga dapit. Usa ka eksperyensiyadong tiggiya ang nag-una ninyo. Samtang naglakaw siya, nagbilin siyag mga tunob diha sa humok nga snow. Dayon, wala na mo kakita sa tiggiya! Pero wala mo mahadlok. Hinunoa, gisunod nimo ug sa imong mga kauban ang mga tunob sa tiggiya kutob sa inyong mahimo!

² Ingong tinuod nga mga Kristohanon, kita samag naglakaw latas sa peligrosong kamingawan—kining daotang kalibotan. Maayo na lang kay gihatagan ta ni Jehova ug hingpit nga Tiggiya—ang iyang Anak, si Jesu-Kristo, kansang mga tunob mahimo natong sundon pag-ayo. (1 Ped. 2:21) Sumala sa usa ka reperensiya sa Bibliya, gikomparar dinhi ni Pedro si Jesus sa usa ka tiggiya. Sama sa usa ka tiggiya nga nagbilin ug mga tunob, si Jesus nagbilin ug mga tunob nga mahimo natong sundon. Atong konsiderahon ang tulo ka pangutana bahin sa pagsunod sa iyang mga tunob—unsa? ngano? ug sa unsang paagi?

 3. Unsay gipasabot sa pagsunod sa mga tunob sa usa ka tawo?

³ Unsay gipasabot sa pagsunod sa mga tunob sa usa ka tawo? Sa Bibliya, ang mga pulong nga “naglakaw” ug “tiil” usahay nagtumong sa paagi sa pagkinabuhi sa usa ka tawo. (Gen. 6:9; Prov. 4:26) Ang ehemplo sa usa ka tawo mahimong ipakasama sa mga tunob nga iyang gibilin samtang nagpadayon siya sa paglakaw. Busa, ang pagsunod sa mga tunob sa usa ka tawo nagpasabot ug pagsunod sa iyang ehemplo, o pagsundog kaniya.

 4. Unsay gipasabot sa pagsunod sa mga tunob ni Jesus?

⁴ Busa, unsay gipasabot sa pagsunod sa mga tunob ni Jesus? Sa simpleng pagkasulti, kini nagpasabot ug pagsundog sa iyang ehemplo. Sa atong temang teksto, si Pedro espesipikong naghisgot sa maayong ehemplo ni Jesus sa paglahutay. Pero duna pay daghang paagi nga masundog nato si Jesus. (1 Ped. 2:18-25) Sa pagkatinuod, ang tibuok kinabuhi ni Jesus—ang tanan niyang gisulti ug gihimo—maoy ehemplo nga angay natong sundon.

 5. Masundog ba gyod sa dili hingpit nga mga tawo ang hingpit nga ehemplo ni Jesus? Ipatin-aw.

⁵ Ingong dili hingpit nga mga tawo, masundog ba gyod nato ang ehemplo ni Jesus? Oo. Si Pedro wala moingon nga kinahanglang sundon nato ang mga tunob ni Jesus sa hingpit nga paagi. Hinunoa, siya nag-awhag kanato nga ‘sundon [kini] pag-ayo.’ Kon sundon nato pag-ayo ang iyang mga tunob, nga maghimo sa atong maarangan bisag dili ta hingpit, atong gipadapat ang giingon ni apostol Juan: ‘Magpadayon sa paglakaw sama sa paglakaw’ ni Jesus.—1 Juan 2:6.

6-7. Nganong makaingon ta nga ang pagsunod sa mga tunob ni Jesus mas makapasuod nato kang Jehova?

⁶ Ang pagsunod sa mga tunob ni Jesus mas makapasuod nato kang Jehova. Nganong makaingon ta niana? Una, si Jesus naghatag ug maayo kaayong ehemplo kon unsaon pagkinabuhi sa paagi nga makapalipay sa Diyos. (Juan 8:29) Busa, pinaagi sa pagsunod sa mga tunob ni Jesus, mapalipay nato si Jehova. Ug makaseguro ta nga ang atong langitnong Amahan makigsuod niadtong naningkamot nga mahimo niyang mga higala.—Sant. 4:8.

⁷ Ikaduha, hingpit nga gisundog ni Jesus ang iyang Amahan. Kanay hinungdan nga nakaingon si Jesus: “Kadtong nakakita kanako nakakita usab sa Amahan.” (Juan 14:9) Sa dihang sundogon nato ang mga hiyas ni Jesus ug ang iyang paagi sa pagpakiglabot sa uban—pananglitan, ang iyang kaluoy sa usa ka sanlahon, ang iyang empatiya sa usa ka babaye nga may grabeng sakit, ang iyang simpatiya sa mga namatyan—gisundog sab nato si Jehova. (Mar. 1:40, 41; 5:25-34; Juan 11:33-35) Kon maningkamot ta sa pagsundog kang Jehova, mas masuod pa ta kaniya.

 8. Ipatin-aw kon nganong ang pagsunod sa mga tunob ni Jesus makatabang nato nga ‘madaog’ ang kalibotan.

⁸ Ang pagsunod sa mga tunob ni Jesus makatabang nato nga dili maimpluwensiyahan niining daotang kalibotan. Sa kataposang gabii ni Jesus dinhi sa yuta, siya miingon: “Gidaog na nako ang kalibotan.” (Juan 16:33) Iyang gipasabot nga wala niya tugoti nga maimpluwensiyahan siya sa panghunahuna, tumong, ug binuhatan sa kalibotan. Nagpokus si Jesus sa rason kon nganong gipadala siya sa yuta—ang pagbalaan kang Jehova. Komosta sa atong bahin? Niining kalibotana, daghan kaayog puwedeng makaimpluwensiya kanato. Pero kon, sama kang Jesus, magpokus ta sa paghimo sa kabubut-on ni Jehova, ‘madaog’ sab nato ang kalibotan.—1 Juan 5:5.

 9. Unsay kinahanglan natong buhaton aron makabaton ug kinabuhing walay kataposan?

⁹ Ang pagsunod sa mga tunob ni Jesus moresultag kinabuhing walay kataposan. Sa dihang ang usa ka dato nga batan-ong lalaki nangutana kang Jesus kon unsay kinahanglan niyang buhaton aron makabatog kinabuhing walay kataposan, si Jesus mitubag: “Kuyog nako ug mahimong akong sumusunod.” (Mat. 19:16-21) Ngadto sa pipila ka Hudiyo nga wala motuo nga siya ang Kristo, si Jesus miingon: “Ang akong mga karnero . . . mosunod kanako. Hatagan nako silag kinabuhing walay kataposan.” (Juan 10:24-29) Ngadto kang Nicodemo, usa ka membro sa Sanhedrin nga nainteres sa mga gitudlo ni Jesus, si Jesus miingon nga kadtong “magpakitag pagtuo kaniya . . . makabaton ug kinabuhing walay kataposan.” (Juan 3:16) Kita nagpakitag pagtuo kang Jesus pinaagi sa pagpadapat sa iyang gitudlo ug pagsundog sa iyang ehemplo. Kon ato nang himoon, makabaton tag kinabuhing walay kataposan.—Mat. 7:14.

10. Unsay atong himoon aron mas ‘mailhan’ nato si Jesus? (Juan 17:3)

¹⁰ Aron makasunod ta pag-ayo sa mga tunob ni Jesus, kinahanglan una tang makaila kaniya. (Basaha ang Juan 17:3.) Ang ‘pagkaila’ kang Jesus maoy padayong proseso. Kinahanglang padayon tang mokat-on bahin kaniya—sa iyang mga hiyas, panghunahuna, ug mga sukdanan. Bisag unsa na ta ka dugay sa kamatuoran, kinahanglang padayon tang maningkamot nga mailhan si Jehova ug ang iyang Anak.

11. Unsay atong mabasa diha sa upat ka Ebanghelyo?

¹¹ Aron tabangan ta nga mailhan ang iyang Anak, mahigugmaong gipasulat ni Jehova diha sa iyang Pulong ang upat ka Ebanghelyo, nga naghisgot sa kinabuhi ug ministeryo ni Jesus. Mabasa diha sa Ebanghelyo kon unsay gisulti, gihimo, ug gibati ni Jesus. Ang maong upat ka basahon makatabang nato sa ‘pagtagad pag-ayo’ sa ehemplo ni Jesus. (Heb. 12:3) Naa dinha ang mga tunob nga gibilin ni Jesus. Busa pinaagi sa pagtuon sa Ebanghelyo, mas mailhan pa gyod nato si Jesus. Pinaagi niana, masunod nato pag-ayo ang iyang mga tunob.

12. Sa unsang paagi makabenepisyo ta pag-ayo sa Ebanghelyo?

¹² Aron makabenepisyo ta pag-ayo sa Ebanghelyo, dili igo ang pagbasa lang niini. Kinahanglan nga maggahin tag panahon sa pagtuon ug pagpamalandong pag-ayo niini. (Itandi ang Josue 1:8.) Atong hisgotan ang duha ka sugyot nga makatabang nato sa pagpamalandong ug pagpadapat sa atong mabasa diha sa Ebanghelyo.

13. Unsay imong buhaton aron mahimong buhi ang mga asoy sa Ebanghelyo?

¹³ Una, himoang buhi ang mga asoy sa Ebanghelyo. Gamita ang imong imahinasyon aron makita, madungog, ug bation nimo ang nagakahitabo. Aron matabangan ka sa paghimo niana, pag-research diha sa mga publikasyon nga gitagana sa organisasyon ni Jehova. Susiha ang konteksto—ang mga hitabo una o human sa asoy nga imong gitun-an. Pangitag dugang impormasyon bahin sa mga tawo ug lugar nga gihisgotan sa asoy. Itandi ang asoy nga imong gitun-an sa parehong asoy sa laing Ebanghelyo. Usahay ang usa ka magsusulat sa Ebanghelyo dunay giapil nga makapainteres nga detalye nga wala hisgoti sa laing magsusulat.

14-15. Unsay angay natong buhaton aron mapadapat nato ang mga asoy sa Ebanghelyo?

¹⁴ Ikaduha, ipadapat ang mga asoy sa Ebanghelyo sa imong kinabuhi. (Juan 13:17) Human nimo matun-i pag-ayo ang usa ka asoy sa Ebanghelyo, pangutan-a ang kaugalingon: ‘Duna bay leksiyon niini nga asoy nga akong mapadapat? Sa unsang paagi magamit nako ni nga asoy sa pagtabang sa uban?’ Paghunahunag espesipikong indibiduwal, ug sa hustong panahon, ipaambit sa mahigugmaon ug mataktikanhong paagi ang imong nakat-onan.

¹⁵ Konsiderahon nato ang usa ka pananglitan kon unsaon pagpadapat kining duha ka sugyot. Atong susihon ang asoy bahin sa kabos nga babayeng balo nga nakita ni Jesus diha sa templo.

16. Unsay esena diha sa Marcos 12:41?

¹⁶ Himoang buhi ang asoy. (Basaha ang Marcos 12:41.) Imadyina ang esena. Nisan 11, 33 C.E. kadto; pipila na lang ka adlaw, patyon na si Jesus. Halos tibuok adlaw nga nanudlo si Jesus diha sa templo. Ang mga lider sa relihiyon wala mohunong sa pagsupak kaniya. Una pa niana, gikuwestiyon sa pipila kanila ang iyang awtoridad. Ang uban misulay pagbitik kaniya pinaagig lisod nga mga pangutana. (Mar. 11:27-33; 12:13-34) Dayon, si Jesus mibalhin sa laing bahin sa templo. Dinhi—tingali sa dapit nga gitawag ug Hawanan sa Kababayen-an—makita niya ang mga panudlanag bahandi. Milingkod siya ug naniid sa mga tawo nga naghulog sa ilang amot diha sa mga panudlanan. Nakita niya ang daghang dato nga mga tawo nga naghulog ug daghang sensilyo. Tingali duol ra siya maong madungog niya ang tingog sa mga sensilyo nga gihulog diha sa mga panudlanan.

17. Unsay gibuhat sa kabos nga babayeng balo nga gihisgotan sa Marcos 12:42?

¹⁷ Basaha ang Marcos 12:42. Wala madugay, may namatikdan si Jesus nga babaye. Siya usa ka “kabos nga babayeng balo.” (Luc. 21:2) Pobre kaayo siya, ug posible nga dili siya makapalit sa iyang pangunang mga panginahanglan. Pero miduol siya sa usa sa mga panudlanan ug naghulog ug duha ka gagmayng sensilyo nga ubos kaayog bili. Tingali walay madungog nga tingog sa dihang gihulog niya kini sa panudlanan. Si Jesus nahibalo kon unsay iyang gihulog—duha ka lepton, ang kinagamyag bili nga sensilyo nga gigamit niadtong panahona. Dili gani nâ ikapalit ug usa ka goryon, nga usa sa kinabaratohang langgam nga gibaligya aron kaonon.

18. Sumala sa Marcos 12:43, 44, unsay giingon ni Jesus bahin sa amot sa babayeng balo?

¹⁸ Basaha ang Marcos 12:43, 44. Nakadayeg kaayo si Jesus niining babayeng balo. Busa gitawag niya ang iyang mga tinun-an, gitudlo ang babayeng balo, ug siya miingon: ‘Kining kabos nga babayeng balo naghulog ug labaw pa kay sa tanan.’ Dayon siya midugang: “Silang tanan [ilabina ang mga tawong dato] naghulog sa ilang sobra, apan siya, bisan pa sa iyang kakabos, naghulog sa tanan niyang nabatonan, ang tibuok niyang panginabuhian.” Sa dihang gihulog niining matinumanong balo ang iyang kataposang kuwarta nianang adlawa, gisalig niya ang iyang kinabuhi sa mahigugmaong pag-atiman ni Jehova.—Sal. 26:3.

19. Unsang importanteng leksiyon ang atong makat-onan sa giingon ni Jesus bahin sa kabos nga babayeng balo?

¹⁹ Ipadapat ang asoy sa imong kinabuhi. Pangutan-a ang kaugalingon, ‘Unsay akong makat-onan sa giingon ni Jesus bahin sa kabos nga babayeng balo?’ Hunahunaa ang babayeng balo. Tingali gusto unta niyang mohatag ug labaw pa kang Jehova. Pero gihimo niya ang iyang maarangan. Gihatag niya kang Jehova ang iyang kinamaayohan. Ug nahibalo si Jesus nga ang amot sa babayeng balo bililhon kaayo sa iyang Amahan. Kini ang importanteng leksiyon para kanato: Si Jehova malipay sa dihang ihatag nato kaniya ang atong kinamaayohan—ang atong tibuok kasingkasing ug tibuok kalag nga pag-alagad. (Mat. 22:37; Col. 3:23) Si Jehova malipay dihang makita niya nga gihimo nato ang atong maarangan! Kana nga prinsipyo mapadapat sa panahon ug kusog nga atong gigamit sa pagsimba, apil na sa atong ministeryo ug mga tigom.

20. Unsaon nimo pagpadapat ang imong nakat-onan bahin sa babayeng balo? Paghatag ug pananglitan.

²⁰ Sa unsang paagi mapadapat nimo ang imong nakat-onan bahin sa babayeng balo? Paghunahunag espesipikong mga indibiduwal nga kinahanglan tingaling pasaligan nga ang ilang mga paningkamot nakapalipay kang Jehova. Pananglitan, may nailhan ka bang tigulang nga sister nga tingali nakonsensiya o mibating way pulos kay dili na kaayo siya makapakigbahin sa ministeryo tungod sa luya nga panglawas? O may nahunahunaan ka bang brader nga naguol kay dili siya pirmeng makaadto sa Kingdom Hall para sa tigom tungod sa dugay na niyang giantos nga sakit? Tabangi sila pinaagi sa pagsultig mga pulong nga “makapalig-on.” (Efe. 4:29) Iestorya kanila ang makapadasig nga leksiyon nga imong nakat-onan bahin sa kabos nga babayeng balo. Ang imong makapadasig nga mga pulong magpasalig kanila nga si Jehova malipay dihang ihatag nato kaniya ang atong kinamaayohan. (Prov. 15:23; 1 Tes. 5:11) Sa dihang imong komendahan ang uban kay gihatag nila kang Jehova ang ilang kinamaayohan—bisag unsa pa tingali ni ka gamay—imong gisunod pag-ayo ang mga tunob ni Jesus.

21. Unsay determinado nimong buhaton?

²¹ Mapasalamaton kaayo ta nga ang mga asoy sa Ebanghelyo naghatag ug daghan kaayong detalye bahin sa kinabuhi ni Jesus kay makatabang ni nato sa pagsundog kaniya—sa pagsunod pag-ayo sa iyang mga tunob! Puwede ninyong tun-an ang Ebanghelyo sa inyong personal nga pagtuon o Pamilyahanong Pagsimba. Angay natong hinumdoman nga aron makabenepisyo pag-ayo sa maong pagtuon, kinahanglan natong himoong buhi ang mga asoy ug ipadapat ni sa atong kinabuhi. Gawas sa pagsundog sa gihimo ni Jesus, kinahanglan tang maminaw sa iyang gisulti. Sa sunod nga artikulo, atong konsiderahon kon unsay atong makat-onan sa kataposang mga pulong ni Jesus una siya mamatay.