Padayong Isul-ob ang “Bag-ong Personalidad” Human sa Bawtismo

 1. Unsay dakog impluwensiya sa atong personalidad?

BAG-O man tang nabawtismohan o dugay na, gusto natong tanan nga maugmad ang personalidad nga ganahan ni Jehova. Aron mahimo nâ, kinahanglang kontrolahon nato ang atong hunahuna. Ngano? Kay ang atong hunahuna dakog epekto sa atong personalidad. Kon pirme tang maghunahuna sa mga butang nga makapukaw ug makasasalang tinguha, makasulti ug makahimo tag dili maayo. (Efe. 4:17-19) Pero kon maghunahuna tag maayong mga butang, ang atong sinultihan ug binuhatan mas makapalipay sa atong Amahan, si Jehova.—Gal. 5:16.

 2. Unsang mga pangutana ang atong hisgotan niining artikuloha?

² Sa nahisgotan na sa miaging artikulo, di kalikayan nga usahay, makasulod sa atong hunahuna ang dili maayong mga butang. Pero kaya nato nang suklan. Sa dili pa ta mabawtismohan, kinahanglan nga undangon na nato ang sinultihan ug binuhatan nga gidumtan ni Jehova. Kana ang una ug pinakaimportanteng paagi nga atong mahukas ang daang personalidad. Pero aron mapalipay gyod nato si Jehova, kinahanglan pod natong sundon kini nga sugo: “Isul-ob ang bag-ong personalidad.” (Col. 3:10) Niining artikuloha, hisgotan nato ang mosunod nga mga pangutana: Unsa ang “bag-ong personalidad”? Unsay atong himoon aron masul-ob nato ang bag-ong personalidad ug dili kini mahukas?

 3. Base sa Galacia 5:22, 23, unsa ang “bag-ong personalidad,” ug unsaon pagpakita sa usa ka tawo nga iya ning gisul-ob?

³ Ang tawo nga nagsul-ob sa “bag-ong personalidad” nagsundog sa personalidad ni Jehova. Masul-ob sa usa ka tawo ang bag-ong personalidad pinaagi sa pagpakita sa bunga sa espiritu sa Diyos, sa ato pa, tugotan niya ang balaang espiritu sa paggiya sa iyang panghunahuna, pagbati, ug binuhatan. (Basaha ang Galacia 5:22, 23.) Pananglitan, gihigugma niya si Jehova ug ang Iyang katawhan. (Mat. 22:36-39) Malipayon gihapon siya bisan pa sa mga kalisdanan. (Sant. 1:2-4) Malinawon siyag relasyon sa uban. (Mat. 5:9) Mapailobon siya ug buotan. (Col. 3:13) Gusto kaayo niyang mohimog maayo. (Luc. 6:35) Ginapakita niya sa buhat nga lig-on siyag pagtuo sa iyang langitnong Amahan. (Sant. 2:18) Kalmado gihapon siya bisag gusto siyang pasuk-on sa uban ug naa siyay pagpugong sa kaugalingon dihang tentalon.—1 Cor. 9:25, 27; Tito 3:2.

 4. Aron masul-ob ang bag-ong personalidad, nganong kinahanglan natong ipakita ang tanang hiyas nga gihisgotan sa Galacia 5:22, 23 ug sa ubang teksto sa Bibliya?

⁴ Aron masul-ob ang bag-ong personalidad, kinahanglan natong ugmaron ang tanang hiyas nga gihisgotan sa Galacia 5:22, 23 ug sa ubang teksto sa Bibliya.b Kini nga mga hiyas dili parehas sa lainlaing sinina nga tagsatagsaon ug sul-ob. Ang tinuod, daghan niini nga mga hiyas halos parehas sa ubang hiyas. Pananglitan, kon gihigugma gyod nimo ang imong isigkatawo, mapailobon ug buotan ka niya. Ug aron mapakita nga tinuod ang imong kaayo, kinahanglan nga lumo ka ug may pagpugong sa kaugalingon.

 5. Unsay gipasabot sa pagbaton sa “panghunahuna sa Kristo,” ug nganong angay natong tun-an ang kinabuhi ni Jesus? (1 Corinto 2:16)

⁵ Basaha ang 1 Corinto 2:16. Aron masul-ob nato ang bag-ong personalidad, kinahanglan nga mabatonan nato ang “panghunahuna sa Kristo.” Sa ato pa, kinahanglan natong makat-onan ang panghunahuna ni Jesus ug dayon sundogon siya. Napakita gyod ni Jesus ang bunga sa espiritu sa Diyos. Samag perpekto o tin-aw kaayong samin, perpekto niyang napakita ang mga hiyas ni Jehova. (Heb. 1:3) Kon maningkamot ta nga mosundog sa panghunahuna ni Jesus, masundog pod nato ang iyang binuhatan ug mapakita nato ang iyang personalidad.—Filip. 2:5.

 6. Unsay angay natong hinumdoman sa atong pagpaningkamot nga masul-ob ang bag-ong personalidad?

⁶ Posible ba gyod nga masundog nato si Jesus? Basig maghunahuna ta: ‘Perpekto si Jesus. Dili gyod nako siya masundog!’ Kon kanay imong gibati, hinumdomi ni: Una, gidisenyo ka nga maparehas kang Jehova ug Jesus. Busa kaya nimo silang sundogon, bisag dili pa sa bug-os. (Gen. 1:26) Ikaduha, ang balaang espiritu sa Diyos mao ang pinakagamhanang puwersa sa uniberso. Makatabang ni nimo nga mahimo ang mga butang nga dili gyod nimo makaya nga ikaw-ikaw ra. Ikatulo, si Jehova wala magdahom nga perpekto nimong mapakita karon ang bunga sa espiritu. Gani, kadtong naay paglaom nga mabuhi sa yuta hangtod sa hangtod hatagan sa atong mahigugmaong Amahan ug 1,000 ka tuig aron mahimong perpekto. (Pin. 20:1-3) Ang gihangyo lang ni Jehova karon mao nga himoon nato ang atong makaya ug mosalig sa iyang tabang.

 7. Unsay sunod natong hisgotan?

⁷ Unsa ang espesipikong mga paagi nga masundog nato si Jesus? Hisgotan nato kadiyot ang upat ka bahin sa bunga sa espiritu sa Diyos. Sa matag usa niini, atong tan-awon kon unsay atong makat-onan sa paagi ni Jesus sa pagpakita niini nga mga hiyas. Ug hisgotan nato ang mga pangutana nga makatabang nato sa pagsusi kon unsa nay atong nahimo sa pagpakita sa bag-ong personalidad.

 8. Sa unsang paagi nagpakita si Jesus ug gugma?

⁸ Gihigugma pag-ayo ni Jesus si Jehova maong mihimo siyag mga sakripisyo para sa iyang Amahan ug para nato. (Juan 14:31; 15:13) Ang iyang paagi sa pagkinabuhi dinhi sa yuta nagpakita nga gihigugma niya pag-ayo ang mga tawo. Kada adlaw, nagpakita siyag gugma ug kaluoy bisan dihang naay misupak niya. Ang importanteng paagi nga nagpakita siyag gugma sa mga tawo mao ang pagtudlo kanila bahin sa Gingharian sa Diyos. (Luc. 4:43, 44) Gihigugma gyod ni Jesus ang Diyos ug mga tawo kay kinabubut-on niyang giantos ang sakit nga kamatayon diha sa kamot sa mga makasasala. Pinaagi ana, iyang giablihan ang kahigayonan nga makabaton ug kinabuhing walay kataposan ang tanan.

 9. Unsaon nato pagsundog si Jesus sa pagpakitag gugma?

⁹ Atong gipahinungod ang atong kaugalingon kang Jehova ug nagpabawtismo ta kay gihigugma nato ang atong langitnong Amahan. Busa parehas kang Jesus, angay tang magpakitag gugma kang Jehova pinaagi sa atong maayong pagtratar sa uban. Si apostol Juan misulat: “Kon wala siya mahigugma sa iyang igsoon nga iyang nakita, unsaon man niya paghigugma sa Diyos nga wala niya makita?” (1 Juan 4:20) Puwede natong pangutan-on ang atong kaugalingon: ‘Dako ba kog gugma sa mga tawo? Maluluy-on ba ko sa uban bisag dili sila maayog tinagdan nako? Tungod sa akong gugma, andam ba kong mogamit sa akong panahon ug mga nabatonan aron tabangan ang uban nga makakat-on bahin kang Jehova? Andam ba kong mohimo ani bisag ang kadaghanan dili makaapresyar sa akong paningkamot o ila kong supakon? Makapangita ba kog mga paagi nga madugangan ang akong panahon sa ministeryo?’—Efe. 5:15, 16.

10. Unsay gihimo ni Jesus aron mamentinar ang kalinaw?

¹⁰ Si Jesus naningkamot nga maayo siyag relasyon sa uban. Dihang gihimoan siyag dili maayo, wala siya manimalos. Pero naa pa siyay laing gihimo. Mihimo siyag paagi aron mamentinar ang kalinaw ug iyang gidasig ang uban nga husayon ang ilang dili pagsinabtanay. Pananglitan, gitudloan niya sila nga makighusay sa ilang igsoon kon gusto nila nga dawaton ni Jehova ang ilang pagsimba. (Mat. 5:9, 23, 24) Ug wala siya moundang sa pagtabang sa mga apostoles nga mahunong ang ilang pagsigeg lalis kon kinsay kinalabwan nila.—Luc. 9:46-48; 22:24-27.

11. Unsay atong mahimo aron mamentinar ang kalinaw?

¹¹ Aron mamentinar ang kalinaw, dili igo nga likayan lang nato nga mahimong hinungdan sa panaglalis. Kinahanglan tang maningkamot aron mabalik ang atong maayong relasyon sa uban ug dasigon ang mga igsoon nga husayon ang ilang dili pagsinabtanay. (Filip. 4:2, 3; Sant. 3:17, 18) Puwede natong pangutan-on ang atong kaugalingon: ‘Unsay andam nakong isakripisyo aron mabalik ang akong maayong relasyon sa uban? Kon mapasakitan ko sa igsoon, maghambin ba kog kasuko? Maghulat ba ko nga ang igsoon maoy mounag duol nako, o akoy mouna, bisan pag para nako siyay hinungdan sa problema? Kon haom sa kahimtang, ginadasig ba nako kadtong naay di pagsinabtanay nga maningkamot nga mauli ang ilang maayong relasyon?’

12. Unsang mga pananglitan ang nagpakita nga buotan si Jesus?

¹² Si Jesus buotan. (Mat. 11:28-30) Buotan siya kay lumo siya ug andam mopailin-ilin bisan sa lisod nga kahimtang. Pananglitan, dihang gihangyo siya sa babayeng Fenicianhon nga ayohon ang anak niini, mibalibad siya sa primero. Apan dihang nagpakitag dakong pagtuo ang babaye, buotan gyod si Jesus kay giayo niya ang anak niini. (Mat. 15:22-28) Pero bisag buotan si Jesus, mihatag gihapon siyag tambag. Usahay, iyang gipakita ang iyang pagkabuotan pinaagi sa pagbadlong niadtong iyang gihigugma. Pananglitan, dihang gipugngan ni Pedro si Jesus sa paghimo sa kabubut-on ni Jehova, gibadlong siya ni Jesus atubangan sa ubang mga tinun-an. (Mar. 8:32, 33) Gihimo nâ ni Jesus, dili aron pakaulawan si Pedro kondili aron bansayon siya ug pasidan-an ang ubang tinun-an nga dili mangahas sa paghimo sa mga butang nga wala silay katungod. Seguradong naulawan si Pedro, pero ang maong disiplina nakahatag niyag kaayohan.

13. Unsaon nato pagpakita nga tinuod tang buotan?

¹³ Kon tinuod tang buotan niadtong atong gimahal, usahay kinahanglan tingali nato silang tambagan. Dihang imo nang himoon, sundoga si Jesus pinaagi sa pagbase sa imong tambag sa mga prinsipyo sa Bibliya. Ipakita ang kalumo. Hunahunaa nga gusto nilang himoon kon unsay husto, ug salig nga kadtong nahigugma kang Jehova ug kanimo maminaw sa imong mahigugmaong tambag. Pangutan-a ang imong kaugalingon: ‘Naa ba koy kaisog nga mosulti dihang akong makita nga sayop ang ginahimo sa usa nga akong gimahal? Kon kinahanglan kong motambag, ang ako bang paagi sa pagsulti buotan o sakit paminawon? Unsay akong motibo sa pagtambag? Tambagan ba nako ang usa ka tawo kay naglagot ko niya o kay gusto nako siyang tabangan?’

14. Giunsa pagpakita ni Jesus ang pagkamaayo?

¹⁴ Gawas nga nahibalo si Jesus kon unsay maayo, iya pod ning gipakita. Gihigugma ni Jesus ang iyang Amahan, mao nga kanunay niyang ginahimo kon unsay maayo, ug kanunay pong husto ang iyang motibo. Ang maayong tawo kanunayng maghunahunag mga paagi sa pagtabang sa uban, ug molihok pod siya. Sa ato pa, dili igo ang basta pagkahibalo lang kon unsay maayong himoon; kinahanglan pod nato nang ipakita sa buhat, ug kinahanglang husto ang atong motibo. Tingali naay mangutana, ‘Posible ba diay nang mohimo kag maayo unya sayop imong motibo?’ Oo. Pananglitan, si Jesus naghisgot bahin niadtong nagtabang sa mga pobre, pero gusto nilang makita ni sa uban ug dayegon sila sa ilang gihimo. Maayo ang ilang pagtabang, pero si Jehova wala malipay niana.—Mat. 6:1-4.

15. Unsaon nato pagpakita nga tinuod tang maayo?

¹⁵ Tinuod tang maayo kon himoon nato kon unsay husto nga dili magdahom ug balos o pagdayeg. Puwede nimong pangutan-on ang imong kaugalingon: ‘Ginahimo ba gyod nako kon unsay maayong himoon, o kutob ra ko sa paghunahuna? Unsay akong motibo dihang mohimo kog maayo?’

16. Unsay angay natong himoon kada adlaw, ug ngano?

¹⁶ Dili ta angayng maghunahuna nga dihang mabawtismohan ta, human na ang atong paningkamot nga masul-ob ang bag-ong personalidad. Ang bag-ong personalidad parehas ug nindot nga bag-ong sinina nga angayng mentinahon. Ang usa ka paagi nga mahimo nato nâ mao ang pagpaningkamot nga mapakita ang bunga sa espiritu sa Diyos kada adlaw. Ngano? Kay si Jehova aktibo nga Diyos, ug ang iyang espiritu maoy aktibong puwersa. (Gen. 1:2) Kon maningkamot ta, tabangan ta sa iyang espiritu. Busa angay gyod tang molihok. Pananglitan, ang tinun-ang si Santiago misulat: ‘Patay ang pagtuo nga walay binuhatan.’ (Sant. 2:26) Tinuod pod nâ sa uban pang bahin sa bunga sa espiritu sa Diyos. Matag higayon nga ato ning ipakita, atong gipamatud-an nga naglihok kanato ang espiritu sa Diyos.

17. Unsay atong himoon kon usahay dili nato mapakita ang bunga sa espiritu?

¹⁷ Bisan ang mga Kristohanon nga dugay nang bawtismado, usahay dili makapakita sa bunga sa espiritu. Pero importante nga dili ta moundang sa pagpaningkamot. Hunahunaa ni nga ilustrasyon. Kon magisi ang paborito nimong sinina, imo ba dayon ning ilabay? Dili. Tingali imo ning ipa-repair. Unya mas ampingan na nimo ni. Sa susama, kon usahay dili ka buotan, mapailobon, o mahigugmaon sa uban, ayawg kaluya. Ma-repair nimo ang inyong relasyon pinaagi sa kinasingkasing nga pagpangayog pasaylo. Unya paningkamot nga mas mapakita pa nimo ang bunga sa espiritu.

18. Sa unsa ta makaseguro?

¹⁸ Mapasalamaton gyod ta sa ehemplo ni Jesus! Kon mas maningkamot ta nga mosundog sa iyang panghunahuna, mas sayon para nato nga mosundog sa iyang binuhatan. Ingong resulta, mas mouswag ta sa pagsul-ob sa bag-ong personalidad. Niini nga artikulo, upat lang ka bahin sa bunga sa espiritu sa Diyos ang atong gihisgotan. Puwede nimong tun-an ang uban pang bahin sa bunga sa espiritu ug pamalandongon kon unsa nay imong nahimo sa pagpakita sa maong mga hiyas. Makakita kag mga artikulo bahin niini diha sa Giya sa Pagpanukiduki Para sa mga Saksi ni Jehova ubos sa ulohang “Kristohanong Kinabuhi” ug dayon “Bunga sa Espiritu.” Makaseguro ka nga kon maningkamot ka sa pagsul-ob sa bag-ong personalidad ug dili kini hukason, tabangan ka ni Jehova.