Si Jehova Nagtabang Nato sa Pagtuman sa Atong Ministeryo

 1. Unsay atong madahom, ug sa unsa ta makaseguro?

MAKADAHOM tag pagsupak sa atong pagsangyaw. Ang maong pagsupak tingali mas mograbe pa sa umaabot. (Dan. 11:44; 2 Tim. 3:12; Pin. 16:21) Pero makaseguro ta nga tabangan ta ni Jehova. Ngano? Si Jehova kanunayng nagtabang sa iyang mga alagad sa pagtuman sa ilang asaynment bisag unsa pa kini ka lisod. Pananglitan, hisgotan nato ang pipila ka hitabo sa kinabuhi ni propetang Ezequiel kinsa nagsangyaw sa mga Hudiyo nga nabihag sa Babilonya.

 2. Unsay giingon ni Jehova bahin sa mga tawo nga kinahanglang sangyawan ni Ezequiel, ug unsay hisgotan nato niining artikuloha? (Ezequiel 2:3-6)

² Unsang klaseha sa mga tawo ang kinahanglang sangyawan ni Ezequiel? Si Jehova miingon nga sila “masukihon,” “tig-ag kasingkasing,” ug “rebelyoso.” Sama sila ka peligroso sa mga sampinit ug tanga. Mao nay rason nga balikbalik nga giingnan ni Jehova si Ezequiel: “Ayawg kahadlok”! (Basaha ang Ezequiel 2:3-6.) Natuman ni Ezequiel ang iyang ministeryo kay siya (1) gipadala ni Jehova, (2) gihatagag kusog sa espiritu sa Diyos, ug (3) gipalig-on sa mga pulong sa Diyos. Sa unsang paagi kining tulo ka butang nakatabang kang Ezequiel? Ug sa unsang paagi motabang ni nato karon?

 3. Unsa nga mga pulong ang posibleng nakapalig-on kang Ezequiel, ug sa unsang paagi siya gipasaligan ni Jehova nga Iya siyang tabangan?

³ Si Jehova miingon kang Ezequiel: “Ipadala ka nako.” (Ezeq. 2:3, 4) Kining mga pulonga seguradong nakapalig-on kang Ezequiel. Ngano? Walay duhaduha nga nahinumdoman niya nga ingon ini ang giingon ni Jehova kang Moises ug Isaias dihang Iyang gipili sila ingong Iyang mga propeta. (Ex. 3:10; Isa. 6:8) Nahibalo sab si Ezequiel kon giunsa pagtabang ni Jehova ang maong mga propeta nga molampos sa ilang lisod nga asaynment. Busa dihang kaduha giingnan ni Jehova si Ezequiel: “Ipadala ka nako,” nakapalig-on to sa pagsalig sa propeta nga tabangan siya ni Jehova. Dugang pa, kadaghan misulat si Ezequiel: “Nakadawat kog mensahe gikan kang Jehova.” (Ezeq. 3:16) Balikbalik sab siyang misulat: “Nakadawat ko pag-usab ug mensahe gikan kang Jehova.” (Ezeq. 6:1) Seguradong kombinsido si Ezequiel nga gipadala siya ni Jehova. Ug kay si Ezequiel anak sa usa ka saserdote, posibleng gitudloan siya sa iyang amahan nga kanunayng gipasaligan ni Jehova ang Iyang mga propeta nga Iya silang tabangan. Pananglitan, gipasaligan ni Jehova si Isaac, Jacob, ug Jeremias nga Siya nagauban kanila.​—Gen. 26:24; 28:15; Jer. 1:8.

 4. Unsay posibleng nakapahupay ug nakapalig-on kang Ezequiel?

⁴ Maminaw kaha ang mga Israelinhon sa mensahe nga isangyaw ni Ezequiel? Si Jehova miingon: “Ang panimalay ni Israel modumili sa pagpamati kanimo, kay dili sila buot mamati kanako.” (Ezeq. 3:7) Ang pagsalikway sa mga tawo kang Ezequiel maoy pagsalikway kang Jehova mismo. Ang giingon ni Jehova nagpasalig kang Ezequiel nga bisan pag ang mga tawo dili maminaw niya, molampos gihapon siya sa iyang asaynment ingong propeta. Gipasaligan sab ni Jehova si Ezequiel nga dihang matuman na ang mensahe sa paghukom nga iyang ipahayag, ang mga tawo “mahibalo gayod nga may propeta sa ilang taliwala.” (Ezeq. 2:5; 33:33) Seguradong nakapahupay ug nakapalig-on to kang Ezequiel nga tumanon ang iyang asaynment.

 5. Base sa Isaias 44:8, unsay makapalig-on nato?

⁵ Kita pod mapalig-on kay nahibalo ta nga gipadala ta ni Jehova. Gipasidunggan ta niya pinaagi sa pagtawag nato nga iyang “mga saksi.” (Isa. 43:10) Dako gyod kaayo nâ nga pribilehiyo! Giingnan ni Jehova si Ezequiel: “Ayawg kahadlok.” Sa samang paagi, giingnan pod ta ni Jehova: “Ayawg kalisang.” Nganong dili ta angayng mahadlok sa atong mga magsusupak? Kay sama kang Ezequiel, kita gipadala ug ginatabangan ni Jehova.—Basaha ang Isaias 44:8.

 6. (a) Sa unsang paagi gipasaligan ta ni Jehova nga iya tang tabangan? (b) Unsay makapahupay ug makapalig-on nato?

⁶ Gipasaligan ta ni Jehova nga iya tang tabangan. Pananglitan, sa wala pa moingon si Jehova: “Kamo ang akong mga saksi,” siya miingon: “Kon motabok ka sa katubigan, ako mag-uban kanimo, ug kon motabok ka sa kasubaan, dili ka malapawan niini. Kon molatas ka sa kalayo, dili ka masunog o mapaso sa siga niini.” (Isa. 43:2) Sa atong pagministeryo, usahay makaatubang tag samag baha nga mga kalisdanan ug samag kalayo nga mga pagsulay. Pero sa tabang ni Jehova, padayon tang nagsangyaw. (Isa. 41:13) Sama sa panahon ni Ezequiel, daghan karon ang dili maminaw sa atong mensahe. Pero hinumdomi nga wala nâ magpasabot nga wala ta molampos sa atong pagsangyaw. Mahupayan ta ug mapalig-on kay nahibalo ta nga si Jehova malipay kon padayon natong isangyaw ang iyang mensahe. Si apostol Pablo miingon: “Ang matag tawo makadawat sa iyang ganti sumala sa iyang binuhatan.” (1 Cor. 3:8; 4:1, 2) Usa ka sister nga dugay nang payunir miingon: “Nalipay gyod ko kay kabalo ko nga gantihan ni Jehova ang atong mga paningkamot.”

 7. Unsa tingali gibati ni Ezequiel dihang mamalandong siya sa panan-awon nga iyang nakita? (Tan-awa ang hulagway sa atubangan sa magasin.)

⁷ Nakita ni Ezequiel kon unsa ka gamhanan ang espiritu sa Diyos. Sa panan-awon, nakita niya nga ang balaang espiritu naglihok diha sa gamhanang espiritung mga linalang. Mao pod ni ang nagpalihok sa dagko kaayong ligid sa langitnong karo. (Ezeq. 1:20, 21) Unsay reaksiyon ni Ezequiel sa iyang nakita? Siya misulat: “Dihang nakita nako kini, ako mihapa.” Nahingangha kaayo si Ezequiel maong siya mihapa. (Ezeq. 1:28) Dihang mamalandong si Ezequiel sa makapahinganghang panan-awon nga iyang nakita, seguradong napalig-on gyod ang iyang pagsalig nga sa tabang sa espiritu sa Diyos, matuman niya ang iyang ministeryo.

8-9. (a) Unsay epekto kang Ezequiel dihang gisugo siya ni Jehova sa pagtindog? (b) Unsa pay gihimo ni Jehova aron mapalig-on si Ezequiel sa iyang lisod nga asaynment?

⁸ Gisugo ni Jehova si Ezequiel: “Anak sa tawo, tindog kay makigsulti ko nimo.” Kana nga sugo ug ang espiritu sa Diyos naghatag kang Ezequiel ug kusog aron makatindog. Si Ezequiel misulat: “Ang espiritu midangat kanako ug gipatindog ko niini.” (Ezeq. 2:1, 2) Sa tibuok ministeryo ni Ezequiel, ang “kamot” sa Diyos, nga mao ang balaang espiritu, naggiya kaniya. (Ezeq. 3:22; 8:1; 33:22; 37:1; 40:1) Ang espiritu sa Diyos nagpalig-on kang Ezequiel sa pagtuman sa iyang asaynment nga sangyawan ang mga tawo nga “gahig ulo ug tig-ag kasingkasing.” (Ezeq. 3:7) Si Jehova miingon kang Ezequiel: “Gihimo nako ang imong nawong nga sama gayod ka gahi sa ilang nawong ug ang imong agtang nga sama gayod ka gahi sa ilang agtang. Gihimo nako ang imong agtang nga samag diamante, nga gahi pa kay sa batong santik. Ayawg kahadlok kanila o kalisang sa ilang mga nawong.” (Ezeq. 3:8, 9) Sama bag giingnan ni Jehova si Ezequiel: ‘Ayawg kaluya tungod sa kagahig ulo sa mga tawo. Palig-onon ti ka.’

⁹ Human niana, gidala sa espiritu sa Diyos si Ezequiel ngadto sa teritoryo nga iyang sangyawan. “Ang kamot ni Jehova kusganong milihok diha kanako,” misulat si Ezequiel. Usa ka semana niyang gipamalandong ang mensahe ni Jehova aron iya gyod ning masangyaw nga may kombiksiyon. (Ezeq. 3:14, 15) Dayon gipaadto siya ni Jehova sa patag ug didto, ‘ang espiritu misulod kaniya.’ (Ezeq. 3:23, 24) Si Ezequiel andam na sa pagministeryo.

10. Unsay makatabang nato aron molampos ta sa buluhatong pagsangyaw, ug ngano?

¹⁰ Unsay makatabang nato aron molampos ta sa atong buluhatong pagsangyaw? Aron matubag nâ, hunahunaa ang nahitabo kang Ezequiel. Sa wala pa siya magsugod ug sangyaw, gipalig-on siya sa espiritu sa Diyos. Sama kang Ezequiel, molampos lang ta sa buluhatong pagsangyaw pinaagi sa tabang sa espiritu sa Diyos. Ngano? Kay si Satanas nakiggubat nato aron pahunongon ta sa atong buluhaton. (Pin. 12:17) Sa panglantaw sa tawo, wa gyod tay dag-anan kang Satanas. Pero pinaagi sa atong pagsangyaw, ato siyang ginapildi! (Pin. 12:9-11) Sa unsang paagi? Dihang mosangyaw ta, atong gipakita nga wala ta mahadlok niya. Kada sangyaw nato, gipildi nato si Satanas. Kay padayon gihapon tang nagsangyaw bisan pa sa pagsupak, unsay gipakita ana? Nagpakita ni nga gihatagan tag kusog sa balaang espiritu ug giuyonan ta ni Jehova.—Mat. 5:10-12; 1 Ped. 4:14.

11. Sa unsang paagi ang espiritu sa Diyos makatabang nato, ug unsay atong himoon aron padayon nato ning madawat?

¹¹ Simbolikong gipagahi ni Jehova ang nawong ug agtang ni Ezequiel. Unsay gipasalig niini kanato? Ang espiritu sa Diyos makahatag natog kusog sa pag-atubang sa bisan unsang kalisdanan sa ministeryo. (2 Cor. 4:7-9) Busa unsay atong himoon aron padayon natong madawat ang espiritu sa Diyos? Kinahanglang dili ta mohunong sa pag-ampo kay makasalig ta nga tubagon ni Jehova ang atong mga pag-ampo. Gitudloan ni Jesus ang iyang mga tinun-an: “Padayon sa pagpangayo, . . . padayon sa pagpangita, . . . padayon sa pagpanuktok.” Si Jehova “mohatag ug balaang espiritu niadtong nagapangayo kaniya.”—Luc. 11:9, 13; Buh. 1:14; 2:4.

12. Base sa Ezequiel 2:9–3:3, asa gikan ang linukot nga basahon, ug unsay nasulat ani?

¹² Gawas nga nakabaton ug kusog si Ezequiel tungod sa espiritu sa Diyos, napalig-on pod siya sa mga pulong sa Diyos. Sa panan-awon, si Ezequiel nakakitag kamot nga naggunit ug linukot nga basahon. (Basaha ang Ezequiel 2:9–3:3.) Asa gikan ang maong linukot nga basahon? Unsay nasulat ani? Sa unsang paagi napalig-on niini si Ezequiel? Atong tan-awon. Ang linukot nga basahon naggikan sa trono sa Diyos. Posibleng gigamit ni Jehova ang usa sa upat ka anghel nga nakita ni Ezequiel aron itunol kaniya ang linukot nga basahon. (Ezeq. 1:8; 10:7, 20) Nasulat sa maong basahon ang mga pulong sa Diyos—ang taas nga mensahe sa paghukom nga kinahanglang isulti ni Ezequiel ngadto sa rebelyosong katawhan. (Ezeq. 2:7) Ang mensahe gisulat diha sa atubangan ug sa luyo sa basahon.

13. Unsay gisugo ni Jehova nga buhaton ni Ezequiel sa linukot nga basahon, ug nganong tam-is kini?

¹³ Gisugo ni Jehova ang iyang propeta nga kaonon ang linukot nga basahon ug ‘pun-on ang iyang tiyan niini.’ Mituman si Ezequiel. Iyang gihurot ug kaon ang linukot nga basahon. Unsay gipasabot sa sugo ni Jehova? Kinahanglang sabton pag-ayo ni Ezequiel ang mensahe nga iyang ipahayag. Kinahanglang kombinsido siya sa maong mensahe aron madasig siya nga isulti kini. Dayon naay makapainteres nga nahitabo. Pagkaon ni Ezequiel sa linukot nga basahon, nakaingon siya nga “sama kini ka tam-is sa dugos.” (Ezeq. 3:3) Ngano? Para kang Ezequiel, ang pagrepresentar kang Jehova maoy tam-is, o nindot kaayo, nga pribilehiyo. (Sal. 19:8-11) Mapasalamaton siya nga gipili siya ni Jehova ingong iyang propeta.

14. Unsay nakatabang kang Ezequiel nga maandam sa pagtuman sa iyang asaynment?

¹⁴ Sa ulahi, si Jehova miingon kang Ezequiel: “Seryosoha ug pamatia ang tanang pulong nga akong isulti kanimo.” (Ezeq. 3:10) Ang sugo ni Jehova nagpasabot nga kinahanglang hinumdoman ni Ezequiel ang mga nasulat sa maong basahon ug pamalandongon kana. Dihang gihimo to ni Ezequiel, napalig-on siya. Nakatabang pod to nga mahimong mas puwersado ang mensahe nga iyang ipahayag. (Ezeq. 3:11) Kay naa na sa iyang kasingkasing ug baba ang mensahe sa Diyos, andam na si Ezequiel nga sugdan ug tumanon ang iyang asaynment.​—Itandi ang Salmo 19:14.

15. Aron makalahutay, unsay kinahanglan natong ‘seryosohon’?

¹⁵ Aron makalahutay sa atong ministeryo, kinahanglan pod natong palig-onon ang atong kaugalingon pinaagi sa mga pulong sa Diyos. Kinahanglan natong ‘seryosohon’ ang tanang gisulti ni Jehova. Si Jehova nakig-estorya nato karon pinaagi sa iyang Pulong, ang Bibliya. Unsaon nato pagseguro nga ang atong hunahuna, pagbati, ug mga motibo padayong magiyahan sa Pulong sa Diyos?

16. Unsay kinahanglan natong himoon aron mapalig-on ta sa Pulong sa Diyos, ug unsaon nato ni pagsilsil sa atong kasingkasing?

¹⁶ Sama nga molig-on ang atong lawas kon kaonon ug usapon natog maayo ang pagkaon, molig-on sab ang atong pagtuo kon atong tun-an ang Pulong sa Diyos ug pamalandongon kini. Hinumdoman nato ang leksiyon bahin sa linukot nga basahon. Gusto ni Jehova nga ‘pun-on nato ang atong tiyan’ sa iyang Pulong, sa ato pa, sabton nato ni pag-ayo. Mahimo nato nâ pinaagi sa pag-ampo, pagbasa, ug pagpamalandong. Una, moampo ta aron maandam ang atong kasingkasing sa pagdawat sa mga instruksiyon sa Diyos. Dayon, basahon nato ang Bibliya. Sunod, mohunong ta aron pamalandongon, o hunahunaon pag-ayo, ang atong nabasa. Unsay mahimong resulta? Kon kanunay tang mamalandong, mas masilsil sa atong kasingkasing ang Pulong sa Diyos.

17. Nganong importante nga mamalandong ta sa atong mabasa sa Bibliya?

¹⁷ Nganong importante ang pagbasa ug pagpamalandong sa Bibliya? Kay makahatag ni natog kaisog sa pagsangyaw sa mensahe sa Gingharian karon ug sa pagpahayag sa sakit nga mensahe sa paghukom sa umaabot. Kon mamalandong sab ta sa nindot nga mga hiyas ni Jehova, mas masuod pa gyod ta niya. Ingong resulta, matagamtam nato ang samag tam-is nga kinabuhi​—kinabuhi nga malinawon ug tagbaw.​—Sal. 119:103.

18. Unsa unyay maamgohan sa mga tawo, ug ngano?

¹⁸ Si Ezequiel propeta, pero kita dili. Bisan pa ana, determinado ta nga mopadayon sa pagsangyaw sa mensahe nga gipasulat ni Jehova diha sa Bibliya hangtod moingon siya nga ang buluhatong pagsangyaw natapos na. Inig-abot sa adlaw sa paghukom, ang mga tawo wa gyoy rason nga moingon nga wala sila makadawat ug pasidaan o gipasagdan sila sa Diyos. (Ezeq. 3:19; 18:23) Maamgohan gyod nila nga ang mensahe nga atong gisangyaw gikan sa Diyos.

19. Unsay makatabang aron matuman nato ang atong ministeryo?

¹⁹ Unsay makatabang aron matuman nato ang atong ministeryo? Sama kang Ezequiel, makapadayon pod ta sa pagsangyaw kay nahibalo ta nga kita gipadala ni Jehova, gihatagag kusog sa Iyang balaang espiritu, ug gipalig-on sa Pulong sa Diyos. Sa tabang ni Jehova, mapalihok ta sa pagtuman sa atong ministeryo ug sa paglahutay “hangtod sa kataposan.”​—Mat. 24:13.