Pabilhi ang Regalo sa Diyos nga Kinabuhi

 1. Para kang Jehova, unsa ka importante ang atong kinabuhi?

IMADYINA nga gihatagan ka sa imong higala ug karaan pero talagsaon kaayo nga painting​—usa ka obra maestra. Medyo nausab na ang kolor ani, naa na ni mga mansa, ug nanghup-ak na. Bisan pa ana, minilyon gihapon ka dolyares ang kantidad sa painting. Seguradong imo gyod ning pabilhan ug ampingan. Sa susama, gihatagan ta ni Jehova ug bililhon kaayong regalo, ang regalo nga kinabuhi. Gani, gipakita ni Jehova kon unsa ka importante kaniya ang atong kinabuhi pinaagi sa paghatag sa iyang Anak aron malukat ta.​—Juan 3:16.

 2. Base sa 2 Corinto 7:1, unsay gidahom ni Jehova nga atong himoon?

² Si Jehova ang Tuboran sa kinabuhi. (Sal. 36:9) Nahibalo si apostol Pablo niana nga kamatuoran maong siya miingon: “Pinaagi kaniya kita dunay kinabuhi ug naglihok ug naglungtad.” (Buh. 17:25, 28) Busa makaingon gyod ta nga ang atong kinabuhi regalo gikan sa Diyos. Mahigugmaong gitagana ni Jehova ang atong gikinahanglan aron padayon tang mabuhi. (Buh. 14:15-17) Pero dili niya ipreserbar ang atong kinabuhi sa milagrosong paagi. Hinuon, gidahom niya nga himoon nato ang atong maarangan aron magpabiling himsog sa pisikal ug espirituwal. (Basaha ang 2 Corinto 7:1.) Nganong angay natong ampingan ang atong panglawas ug kinabuhi, ug unsaon nato na paghimo?

 3. Unsay usa ka rason kon nganong angay tang maningkamot nga magpabiling himsog?

³ Ang usa ka rason kon nganong angay tang maningkamot nga magpabiling himsog mao nga gusto natong ihatag kang Jehova ang atong kinamaayohan. (Mar. 12:30) Gusto natong ipresentar ang atong “lawas ingong halad nga buhi, balaan ug dalawaton sa Diyos,” busa likayan nato ang bisan unsa nga makadaot sa atong panglawas. (Roma 12:1) Siyempre, dili kalikayan nga masakit ta usahay. Pero maningkamot gihapon ta nga magpabiling himsog kay gusto natong ipakita sa atong langitnong Amahan nga gipabilhan nato ang regalo nga kinabuhi.

 4. Unsay gustong himoon ni Haring David?

⁴ Gisulti ni Haring David kon nganong gipabilhan niya ang regalo sa Diyos nga kinabuhi. Siya misulat: “Unsay kaayohan sa akong kamatayon, sa akong pagkanaog sa gahong? Modayeg ba kanimo ang abog? Mosaysay ba kini sa imong pagkakasaligan?” (Sal. 30:9) Tingali gisulat kana ni David dihang tigulang na siya. Pero determinado gihapon siya nga magpabiling buhi ug himsog kutob sa mahimo aron makadayeg siya kang Jehova. Seguradong kana poy atong determinasyon.

 5. Bisag tigulang na ta o masakiton, unsay atong mahimo?

⁵ Kon masakiton ta ug tigulang na, daghan na tingali tag dili mahimo. Tungod ana, basig madismayar ta ug maguol. Pero dili gyod ta mosurender ug pasagdan na lang ang atong panglawas. Ngano? Kay bisag tigulang na kaayo ta o masakiton, makadayeg gihapon ta kang Jehova sama kang Haring David. Makapahupay gyong mahibaloan nga gipabilhan gihapon ta sa Diyos bisag ingon ana na ang atong kahimtang. (Mat. 10:29-31) Bisan pag mamatay ta, gusto gyod ni Jehova nga banhawon ta. (Job 14:14, 15) Busa samtang buhi ta, ampingan nato ang atong panglawas ug kinabuhi.

 6. Unsay gidahom ni Jehova bahin sa atong pagkaon ug pag-inom?

⁶ Ang Bibliya dili libro bahin sa panglawas o manual kon unsay kaonon. Pero gipakita ani kon unsay hunahuna ni Jehova niining mga bahina. Pananglitan, gidasig ta niya nga ‘likayan ang mga butang nga makadaot’ sa atong lawas. (Eccl. 11:10) Ang pagkahangol sa pagkaon ug paghuboghubog makapameligro sa kinabuhi ug gisaway sa Bibliya. (Prov. 23:20) Gidahom ni Jehova nga magpugong ta sa kaugalingon kon unsay kaonon ug imnon ug kon unsa ni ka daghan.​—1 Cor. 6:12; 9:25.

 7. Sa unsang paagi ang tambag sa Proverbio 2:11 makatabang nato sa paghimog maayong mga desisyon bahin sa atong panglawas?

⁷ Makahimo tag mga desisyon nga magpakita sa atong apresasyon sa regalo sa Diyos nga kinabuhi pinaagi sa paggamit sa atong katakos sa panghunahuna. (Sal. 119:99, 100; basaha ang Proverbio 2:11.) Pananglitan, pilion natog maayo kon unsay atong kaonon. Kon nahibalo ta nga dili maayog epekto sa atong lawas ang usa ka pagkaon, siyempre likayan gyod nato na. Mapakita pod nato nga maayo tag panghunahuna kon paneguroon nato nga sakto tag tulog, regular tang mag-exercise, ug pirmeng hinlo ang atong lawas ug balay.

 8. Giunsa pagpakita sa Bibliya nga importante sa Diyos ang safety?

⁸ Gihatagan ni Jehova ang nasod sa Israel ug mga balaod kon unsaon nga malikayan ang grabeng mga aksidente diha sa balay ug sa trabahoan. (Ex. 21:28, 29; Deut. 22:8) Kon ang usa aksidenteng makapatay, manubag gyod siya. (Deut. 19:4, 5) Ug sumala sa Balaod, silotan bisan kadtong aksidenteng nakapahinabog kadaot sa wala pa matawo nga bata. (Ex. 21:22, 23) Gipakita sa Bibliya nga gusto gyod ni Jehova nga magmahunahunaon ta sa safety.

 9. Unsay atong mahimo aron malikayan ang mga aksidente? (Tan-awa sab ang mga hulagway.)

⁹ Mapakita nato ang atong apresasyon sa regalo sa Diyos nga kinabuhi kon mohimo tag mga paagi nga mahimong safe ang atong balay ug trabahoan. Pananglitan, ibutang nato ang hait nga mga butang, makahilong mga kemikal, o mga medisina sa lugar nga dili maabot sa mga bata. Ug kon dili na nato ni kinahanglan, ilabay nato ni sa safe nga paagi. Mag-amping ta dihang magpasigag kalayo, mag-init ug tubig, ug maggamit ug mga power tool, ug dili nato ni biyaan. Dili pod ta magdrayb kon nakainom ta, kulang ug tulog, o mitomar ug tambal nga makapaduka nato. Ug dili ta mag-cellphone samtang nagdrayb aron dili mawala ang atong pokus.

10. Unsay atong mahimo sa dili pa ug panahon sa kalamidad?

¹⁰ Usahay, dili nato mapugngan ang mga panghitabo nga magpameligro sa kinabuhi, sama sa mga kalamidad, epidemya, ug grabeng kagubot. Dihang mahitabo kana, mamenosan nato ang mga kapeligrohan ug mas dako tag purohan nga makalingkawas kon sundon nato ang mga curfew, evacuation order, ug mga restriksiyon nga ipatuman sa gobyerno. (Roma 13:1, 5-7) Pero naay mga kahimtang nga makapangandam ta, busa maayong sundon nato ang instruksiyon sa lokal nga mga awtoridad bahin niini. Pananglitan, puwede tang magpondog tubig, pagkaon nga dili mapan-os, ug first-aid kit.

11. Kon naay makatakod nga sakit nga mikaylap sa atong lugar, unsay angay natong buhaton?

¹¹ Unsay atong buhaton kon naay makatakod nga sakit nga mikaylap sa atong lugar? Angay natong sundon ang emergency nga mga direksiyon nga ipatuman sa gobyerno sama sa pagpanghunaw, social distancing, pagsul-ob ug mask, ug pag-quarantine. Kon ato ning himoon, atong gipakita nga gipabilhan nato pag-ayo ang regalo sa Diyos nga kinabuhi.

12. Sa unsang paagi ang prinsipyo sa Proverbio 14:15 makatabang nato nga mag-amping sa mga impormasyon nga atong tuohan dihang naay kalamidad?

¹² Panahon sa mga emergency, makadungog tingali tag dili tinuod nga mga impormasyon gikan sa atong mga higala, silingan, ug sa balita. Imbes motuo sa “tanan [natong] madunggan,” didto ta maminaw sa pinakakasaligan nga impormasyon gikan sa gobyerno ug sa mga doktor. (Basaha ang Proverbio 14:15.) Ang Nagamandong Lawas ug ang mga sangang buhatan naningkamot nga makakuhag tukmang impormasyon sa dili pa sila mohatag ug direksiyon bahin sa mga tigom ug sa buluhatong pagsangyaw. (Heb. 13:17) Kon sundon nato ni nga mga direksiyon, maprotektahan nato ang atong kaugalingon ug ang uban. Makatabang pod ni nga mahimong mas maayo ang reputasyon sa mga Saksi ni Jehova sa atong lugar.​—1 Ped. 2:12.

13. Kon bahin sa dugo, giunsa nato pagpakita nga atong gipabilhan ang regalo sa Diyos nga kinabuhi?

¹³ Ang mga Saksi ni Jehova ilado sa ilang pagtahod sa pagkasagrado sa dugo. Gisunod nato ang balaod ni Jehova bahin sa dugo pinaagi sa dili pagpaabono bisan panahon sa emergency. (Buh. 15:28, 29) Pero wala na magpasabot nga gusto natong mamatay. Ang tinuod, gipabilhan nato ang regalo sa Diyos nga kinabuhi. Nagaduol ta sa mga doktor nga andam mohatag ug dekalidad nga paagi sa pagtambal nga walay pag-abonog dugo.

14. Unsay atong himoon aron mamenosan ang posibilidad nga magkinahanglan tag operasyon o seryosong paagi sa pagtambal?

¹⁴ Kon sundon nato ang mga sugyot niining artikuloha bahin sa pag-amping sa panglawas, posibleng dili moabot sa punto nga magkinahanglan tag operasyon o seryosong paagi sa pagtambal. Pero kon kinahanglan gyod tang operahan, ang himsog nga panglawas makatabang aron makaya nato ang operasyon ug mas paspas tang maka-recover. Malikayan pod nato ang emergency nga mga operasyon kon tangtangon nato ang mga butang nga posibleng makaaksidente diha sa balay ug sa trabahoan ug kon sundon nato pag-ayo ang mga balaod sa trapiko.

15. (a) Nganong importante nga magdala ta kanunay ug updated nga durable power of attorney? (Tan-awa sab ang hulagway.) (b) Sumala sa video, unsaon nato paghimog maalamong desisyon bahin sa mga paagi sa pagtambal nga naggamit ug dugo?

¹⁵ Kay gipabilhan nato ang regalo nga kinabuhi, magpil-ap tag durable power of attorney (advance health-care directive) ug dal-on nato ni sa tanang panahon.b Niini nga dokumento, atong masulat ang atong mga desisyon bahin sa pagpaabonog dugo ug sa ubang paagi sa pagtambal. Updated ba ang imong durable power of attorney? Kon kinahanglan kang magpil-ap o mag-update, ayaw na unyaunyaa. Kon atong isulat ang atong mga desisyon, makatabang ni aron dili malangan ang pagtambal kanato. Makatabang pod ni aron dili ta mahatagan sa mga doktor ug tambal nga makadaot diay nato.c

16. Unsay atong mahimo kon dili ta segurado kon unsaon pagpil-ap ug durable power of attorney?

¹⁶ Bata man ta o himsog, kitang tanan posibleng maaksidente ug masakit. (Eccl. 9:11) Busa maayo gyong magpil-ap ug durable power of attorney. Kon dili ka segurado kon unsaon ni pagpil-ap, pangayog tabang sa inyong mga ansiyano. Naningkamot sila nga mapamilyar kon unsaon kini pagpil-ap, pero dili sila ang modesisyon para nimo. Imo nang responsibilidad. (Gal. 6:4, 5) Hinuon, makatabang sila nga masabtan nimo ang mga kapilian ug masulat ang imong desisyon.

17. Kon bahin sa mga desisyon maylabot sa panglawas, unsaon nato pagpakita nga makataronganon ta?

¹⁷ Kadaghanan sa atong mga desisyon bahin sa panglawas ug sa paagi sa pagtambal gibase sa atong konsensiya nga nabansay sa Bibliya. (Buh. 24:16; 1 Tim. 3:9) Dihang maghimog desisyon ug makig-estorya sa uban bahin ana, maayong ipadapat nato ang prinsipyo sa Filipos 4:5: “Ipakita sa tanan ang inyong pagkamakataronganon.” Kon makataronganon ta, dili ta sobrang mabalaka sa atong panglawas ug dili pod nato ipamugos sa uban ang atong opinyon. Gimahal ug gitahod nato ang mga igsoon bisan pag ang ilang mga desisyon lahi sa atoa.​—Roma 14:10-12.

18. Unsaon nato pagpakita nga mapasalamaton ta sa regalo nga kinabuhi?

¹⁸ Mapakita nato nga mapasalamaton ta kang Jehova, ang Tuboran sa kinabuhi, pinaagi sa pag-amping sa atong kinabuhi ug paghatag kaniya sa atong kinamaayohan. (Pin. 4:11) Siyempre, makaatubang tag mga sakit ug kalamidad karon. Pero dili kini ang kinabuhi nga gusto sa atong Maglalalang para nato. Sa dili madugay, hatagan ta niyag kinabuhing walay kataposan nga walay kasakit ug kamatayon. (Pin. 21:4) Sa pagkakaron, pagkanindot gyong mabuhi ug mag-alagad sa atong mahigugmaong langitnong Amahan, si Jehova!