“Dili Gyod Ka Nako Biyaan”!

 1. Kanus-a makompleto ang mga dinihogan didto sa langit?

KATUIGAN kanhi, ang katawhan ni Jehova naghunahuna, ‘Kanus-a mosaka sa langit ang kataposan sa nahibiling mga dinihogan nga naa pa sa yuta?’ Kaniadto nagtuo ta nga posibleng ang ubang dinihogan magpabilin kadiyot sa Paraisong yuta human sa gubat sa Armagedon. Pero sa Hulyo 15, 2013 nga Bantayanang Torre, atong nakat-onan nga ang tanang dinihogan nga nia pa sa yuta mosaka sa langit sa dili pa magsugod ang Armagedon.—Mat. 24:31.

 2. Unsang pangutana ang motungha tingali, ug unsay atong konsiderahon niini nga artikulo?

² Pero naa tingali pangutana nga motungha: Unsay mahitabo sa “ubang mga karnero” sa Kristo nga mag-alagad nga matinumanon kang Jehova dinhi sa yuta panahon sa “dakong kasakitan”? (Juan 10:16; Mat. 24:21) Ang uban karon basig mabalaka nga wala nay motabang o mogiya nila dihang ang ilang minahal nga dinihogang mga igsoon mosaka na sa langit. Atong hisgotan ang duha ka asoy sa Bibliya nga tingali ilang mahunahunaan. Dayon atong hisgotan ang mga rason kon nganong wala tay angayng kabalak-an.

UNSAY DILI MAHITABO?

3-4. Unsa tingali gihunahuna sa uban, ug ngano?

³ Naa tingali maghunahuna nga ang ubang mga karnero mobiya sa kamatuoran dihang wala nay mogiya nila nga mga dinihogan nga membro sa Nagamandong Lawas. Tingali ila nang bation tungod sa pipila ka asoy sa Bibliya. Atong hisgotan ang duha ka pananglitan. Ang una maoy bahin sa hataas nga saserdoteng si Jehoiada. Siya maoy matinumanon nga alagad sa Diyos. Gipanalipdan niya ug sa iyang asawa nga si Jehosabet ang batang lalaki nga si Jehoas ug gitabangan siya nga mahimong maayo ug matinumanong hari. Sa buhi pa ang tigulang nga si Jehoiada, si Jehoas mialagad kang Jehova ug mihimog maayo. Pero pagkamatay ni Jehoiada, si Jehoas mihimo nag daotan. Naminaw siya sa daotang mga prinsipe ug mibiya kang Jehova.—2 Cron. 24:​2, 15-19.

⁴ Ang sunod nga pananglitan mao ang mga Kristohanon sa ikaduhang siglo. Si apostol Juan, ang kataposang apostoles nga buhi niadtong panahona, maoy maayong impluwensiya sa daghang Kristohanon ug gitabangan niya sila nga magmatinumanon sa ilang pag-alagad kang Jehova. (3 Juan 4) Kauban sa ubang matinumanong mga apostoles ni Jesus, naningkamot si Juan nga masuklan ang apostasya nga anam-anam nga mikaylap. (1 Juan 2:18; tan-awa ang mga study note sa 2 Tesalonica 2:7.) Pero pagkamatay ni Juan, ang apostasya paspas nga mikaylap. Paglabay lag pipila ka katuigan, ang Kristohanong kongregasyon nahugawan na pag-ayo sa apostasya.

 5. Unsay dili nato angayng hunahunaon bahin sa maong duha ka asoy?

⁵ Kini bang duha ka asoy sa Bibliya nagpakita nga ingon ana pod ang mahitabo sa ubang mga karnero sa Kristo dihang ang mga dinihogan mosaka na sa langit? Nianang panahona, biyaan ba sa matinumanong mga Kristohanon dinhi sa yuta ang ilang nakat-onan, sama sa gihimo ni Jehoas? Magpaimpluwensiya ba sila sa apostasya, sama sa daghang Kristohanon sa ikaduhang siglo C.E.? Dili gyod! Makaseguro ta nga dihang ang mga dinihogan mobiya na sa yuta, ang ubang mga karnero maatiman pag-ayo ug padayong moalagad kang Jehova sa hustong paagi. Nganong makaseguro ta niana?

ANG PUTLING PAGSIMBA DILI GYOD MAHUGAWAN

 6. Unsang tulo ka panahon ang atong hisgotan?

⁶ Nganong makaseguro ta nga ang putling pagsimba dili gyod mahugawan sa apostasya, bisan sa lisod nga mga panahon sa umaabot? Tungod sa atong nakat-onan gikan sa Bibliya bahin sa atong panahon karon. Kini nga panahon lahi kaayo sa panahon sa karaang Israel ug sa mga Kristohanon sa ikaduhang siglo. Busa hisgotan natog dugang kining tulo ka panahon: (1) ang panahon sa karaang Israel, (2) ang panahon human mamatay ang mga apostoles, ug (3) ang atong panahon karon, ang “mga panahon sa pagpasig-uli sa tanang butang.”—Buh. 3:21.

 7. Sa karaang Israel, nganong ang matinumanong mga alagad ni Jehova wala maluya dihang ang nasod ug ang mga hari niini mipili sa paghimog daotan?

⁷ Ang panahon sa karaang Israel. Sa hapit nang mamatay si Moises, iyang giingnan ang mga Israelinhon: “Nahibalo gyod ko nga kon mamatay na ko, mohimo mog daotan ug motipas sa dalan nga akong gisugo kaninyo.” (Deut. 31:29) Nagpasidaan pod si Moises nga kon ang Israel morebelde, sila mabihag ug dad-on sa laing nasod. (Deut. 28:​35, 36) Nahitabo ba na? Oo. Sulod sa daghang katuigan, daghang hari ang mipili nga mobuhat ug daotan ug gipahisalaag nila ang katawhan sa Diyos. Tungod ani, gisalikway ni Jehova ang iyang daotang katawhan ug gitapos ang pagmando sa mga hari sa Israel. (Ezeq. 21:​25-27) Pero ang matinumanong mga Israelinhon nalig-on dihang nakita nila nga natuman ang pulong sa Diyos.—Isa. 55:​10, 11.

 8. Angay ba tang matingala nga nahugawan pag-ayo sa apostasya ang Kristohanong kongregasyon sa ikaduhang siglo? Ipatin-aw.

⁸ Ang panahon human mamatay ang mga apostoles. Angay ba tang matingala nga nahugawan pag-ayo sa apostasya ang Kristohanong kongregasyon sa ikaduhang siglo? Dili. Gitagna ni Jesus nga naay mahitabong grabeng apostasya. (Mat. 7:​21-23; 13:​24-30, 36-43) Gipamatud-an ni apostol Pablo, Pedro, ug Juan nga ang tagna ni Jesus nagsugod na pagkatuman niadtong unang siglo C.E. (2 Tes. 2:​3, 7; 2 Ped. 2:1; 1 Juan 2:18) Sa ikaduhang siglo C.E., ang Kristohanong kongregasyon nahugawan na pag-ayo. Mitungha ang apostatang Kakristiyanohan ug nahimo kining dakong bahin sa Bantogang Babilonya, ang tibuok kalibotang imperyo sa bakak nga relihiyon. Busa natuman ang gitagna ni Jesus.

 9. Sa unsang paagi ang atong panahon karon lahi sa panahon sa karaang Israel ug sa Kristohanong kongregasyon sa ikaduhang siglo?

⁹ “Mga panahon sa pagpasig-uli sa tanang butang.” Ang atong panahon lahi sa panahon sa karaang Israel ug sa panahon sa grabeng apostasya niadtong ikaduhang siglo C.E. Unsay tawag sa atong panahon karon? Sagad, gitawag nato ni nga “kataposang mga adlaw” niining daotang sistema sa mga butang. (2 Tim. 3:1) Pero gipakita sa Bibliya nga nagsugod pod niining panahona ang mas labaw ug mas taas nga yugto. Kini nga yugto magpadayon hangtod nga mapasig-uli sa Mesiyanikong Gingharian ang katawhan ngadto sa kahingpitan ug mahimong paraiso ang yuta. Kini gitawag ug “mga panahon sa pagpasig-uli sa tanang butang.” (Buh. 3:21) Nagsugod ni niadtong 1914. Unsay napasig-uli sukad niadtong tuiga? Si Jesus naentrono ingong Hari sa langit. Busa si Jehova naa na poy hari nga morepresentar Kaniya, nga manununod sa trono sa matinumanong hari nga si David. Pero dili lang ang pagkahari ang gipasig-uli ni Jehova. Wala madugay human niana, nagsugod ang pagpasig-uli sa putling pagsimba! (Isa. 2:​2-4; Ezeq. 11:​17-20) Mahugawan kaha ni pag-usab?

10. (a) Unsay gitagna sa Bibliya bahin sa putling pagsimba sa atong panahon? (Isaias 54:17) (b) Nganong makapalig-on ang maong mga tagna?

¹⁰ Basaha ang Isaias 54:17. Hunahunaa ni nga tagna: “Walay hinagiban nga gibuhat batok kanimo ang magmalamposon”! Kini nga tagna nagakatuman karon. Nagakatuman pod kining makapahupay nga tagna: “Ang tanan nimong anak mahimong mga tinudloan ni Jehova, ug matagamtam sa imong mga anak ang dagayang pakigdait. Lig-on kang matukod diha sa pagkamatarong. . . . Wala kay kahadlokan ug walay kalisangan, kay kini dili moduol kanimo.” (Isa. 54:​13, 14) Bisan “ang diyos niini nga sistema sa mga butang,” si Satanas, dili makapugong sa buluhatong pagpanudlo nga ginahimo sa katawhan ni Jehova. (2 Cor. 4:4) Ang putling pagsimba napasig-uli na ug dili gyod ni mahugawan pag-usab. Magpabilin ni karon ug hangtod sa hangtod. Walay hinagiban nga gibuhat batok kanato ang magmalamposon!

UNSAY MAHITABO?

11. Nganong makasalig ta nga dili mapasagdan ang dakong panon dihang ang mga dinihogan mosaka na sa langit?

¹¹ Unsay mahitabo dihang mosaka na ang mga dinihogan sa langit? Hinumdomi nga si Jesus ang atong Magbalantay. Siya ang ulo sa Kristohanong kongregasyon. Si Jesus klarong miingon: “Usa ra ang inyong Pangulo, ang Kristo.” (Mat. 23:10) Ang atong nagamandong Hari dili gyod mapakyas sa paghimo sa iyang buluhaton. Kay ang Kristo ang nanguna, wala gyoy angayng kahadlokan ang iyang mga sumusunod dinhi sa yuta. Siyempre, wala ta mahibalo sa tanang detalye kon unsaon paggiya sa Kristo ang iyang katawhan nianang panahona. Busa atong hisgotan ang pipila ka pananglitan sa Bibliya nga magpasalig nato bahin niana.

12. Giunsa pag-atiman ni Jehova ang iyang katawhan (a) human mamatay si Moises? (b) human mabalhin ug asaynment si Elias? (Tan-awa sab ang hulagway.)

¹² Sa wala pa mosulod ang mga Israelinhon sa Yutang Saad, si Moises namatay. Unsay nahitabo sa katawhan sa Diyos? Mihunong ba si Jehova sa pagtabang sa iyang katawhan human mamatay ang matinumanong si Moises? Wala. Dihang nagmatinumanon sila, gitagan-an sila ni Jehova. Sa wala pa mamatay si Moises, giingnan siya ni Jehova nga iasayn si Josue sa pagpanguna sa katawhan. Daghang tuig nang gibansay ni Moises si Josue. (Ex. 33:11; Deut. 34:9) Dugang pa, daghang kuwalipikadong lalaki ang nanguna—mga pangulo sa kada 1,000, 100, 50, ug bisan 10. (Deut. 1:15) Ang katawhan sa Diyos naatiman gyod pag-ayo. Susama niana ang pananglitan ni Elias. Siya ang nanguna sa pagtabang sa mga Israelinhon sa pagsimba kang Jehova sa daghang katuigan. Pero sa ulahi, giasayn siya ni Jehova nga mag-alagad sa Juda. (2 Hari 2:1; 2 Cron. 21:12) Napasagdan ba ang matinumanong katawhan sa 10 ka tribo nga gingharian sa Israel? Wala. Daghang tuig nang gibansay ni Elias si Eliseo. Naa pod ang “mga anak sa mga propeta” kinsa nakadawat ug pagbansay. (2 Hari 2:7) Busa daghang matinumanong lalaki ang nakatabang sa pagpanguna sa katawhan sa Diyos. Padayong gituman ni Jehova ang iyang katuyoan, ug giatiman niya ang iyang matinumanong mga magsisimba.

13. Unsa nga pasalig ang atong mabasa sa Hebreohanon 13:5b? (Tan-awa sab ang hulagway.)

¹³ Base niana nga mga pananglitan, unsa kahay mahitabo dihang ang kataposan sa nahibiling mga dinihogan mosaka na sa langit? Ang Bibliya nagpasalig nato niining simpleng kamatuoran: Dili gyod biyaan ni Jehova ang iyang katawhan sa yuta. (Basaha ang Hebreohanon 13:5b.) Sama kang Moises ug Elias, ang gamayng grupo sa dinihogang mga Kristohanon nga nanguna karon nakasabot kon unsa ka importante ang pagbansay sa uban. Sa daghan nang katuigan, gibansay sa Nagamandong Lawas ang mga brader nga sakop sa ubang mga karnero sa pagpanguna sa katawhan sa Diyos. Pananglitan, naay mga klase nga ginahimo aron mabansay ang mga ansiyano, tigdumala sa sirkito, membro sa Branch Committee, overseer sa Bethel, ug uban pa. Personal pod nga ginabansay sa Nagamandong Lawas ang mga brader nga nagsilbing katabang sa lainlaing komite sa Nagamandong Lawas. Kini nga mga brader matinumanong nagtuman sa ilang bug-at nga mga responsibilidad. Kay nabansay sila, andam gyod silang ipadayon ang pag-atiman sa mga karnero sa Kristo.

14. Unsa ang pangunang punto niini nga panaghisgot?

¹⁴ Kini ang pangunang punto sa atong panaghisgot: Dihang ang kataposan sa nahibiling mga dinihogan mosaka na sa langit sa hapit nang matapos ang dakong kasakitan, ang putling pagsimba magpadayon dinhi sa yuta. Ubos sa pagpanguna ni Jesu-Kristo, ang mga alagad sa Diyos dili gyod mohunong sa pagsimba kang Jehova. Tinuod, nianang panahona, atakehon ta sa alyansa sa kanasoran nga gitawag ug Gog sa Magog. (Ezeq. 38:​18-20) Pero ang maong mubo nga pag-atake mapakyas; dili ni makapugong sa katawhan sa Diyos sa pag-alagad kang Jehova. Seguradong luwason Niya sila! Sa panan-awon, nakita ni apostol Juan ang “dakong panon” sa ubang mga karnero sa Kristo. Si Juan gisultihan nga kining dakong panon “nakalabang sa dakong kasakitan.” (Pin. 7:​9, 14) Oo, panalipdan gyod sila ni Jehova!

15-16. Sumala sa Pinadayag 17:​14, unsay himoon sa dinihogang mga igsoon sa Kristo panahon sa gubat sa Armagedon, ug nganong makapadasig kana?

¹⁵ Pero ang uban basin maghunahuna gihapon: ‘Unsay buhaton sa mga dinihogan dihang mobiya na sila sa yuta?’ Direktang gitubag sa Bibliya kana nga pangutana. Gipakita niini nga ang politikal nga sistema niining kalibotana “makiggubat sa Kordero.” Siyempre, mapildi sila. Atong mabasa: “Sila dag-on sa Kordero.” Ug kinsay motabang niya? Gitubag kana sa teksto. Kadtong mga “tinawag,” “pinili,” ug “matinumanon.” (Basaha ang Pinadayag 17:14.) Kinsa sila? Ang nabanhaw nga mga dinihogan! Busa dihang ang kataposan sa mga dinihogan nga nahibilin dinhi sa yuta mosaka na sa langit sa hapit nang matapos ang dakong kasakitan, ang usa sa ilang pinakaunang asaynment mao ang pagpakig-away. Pagkatalagsaon niana nga asaynment! Ang ubang dinihogang mga Kristohanon naanad sa pagpakig-away sa wala pa mahimong Saksi ni Jehova. Ang pipila kanila mga sundalo pa gani kaniadto. Pero nahimo silang tinuod nga mga Kristohanon ug nakakat-on nga makigdait. (Gal. 5:22; 2 Tes. 3:16) Wala na sila mosuportar sa mga gubat. Pero dihang naa na sila sa langit, mag-alagad sila uban sa Kristo ug sa iyang balaang mga anghel ug moapil sa kataposang gubat batok sa mga kaaway sa Diyos.

¹⁶ Hunahunaa ni: Karon, ang ubang dinihogan dinhi sa yuta tigulang na ug luya na kaayo. Pero dihang banhawon na sila ngadto sa langit, sila mahimong gamhanan ug imortal nga espiritung mga linalang, nga makig-away uban sa ilang Manggugubat nga Hari, si Jesu-Kristo. Human sa gubat sa Armagedon, motabang sila sa paggiya sa katawhan ngadto sa kahingpitan. Seguradong mas dako unya silag mahimo didto sa langit para sa ilang minahal nga mga igsoon dinhi sa yuta kay sa ilang mahimo ingong dili hingpit nga mga tawo!

17. Nganong nahibalo ta nga ang tanang alagad sa Diyos magpabiling luwas panahon sa gubat sa Armagedon?

¹⁷ Sakop ba ka sa ubang mga karnero? Kon mao, unsay kinahanglan nimong himoon dihang magsugod na ang gubat sa Armagedon? Simple lang: Salig kang Jehova ug sunda ang iyang direksiyon. Unsay apil niana? Makapahupay ang giingon sa Bibliya: “Sulod sa inyong kinasulorang mga lawak, ug sirhi ang mga pultahan. Panago usa mo kadiyot hangtod nga ang kasuko molabay.” (Isa. 26:20) Ang tanang matinumanong alagad sa Diyos sa langit ug sa yuta magpabiling luwas nianang panahona. Sama kang apostol Pablo, kombinsido ta nga ang “mga gobyerno o mga butang nga nia karon o mga butang nga moabot . . . dili makabulag nato gikan sa gugma sa Diyos.” (Roma 8:​38, 39) Hinumdomi ni kanunay: Gimahal ka ni Jehova ug dili gyod ka niya biyaan!