Unsa ang Bantogang Babilonya?

Ang basahon sa Pinadayag naghisgot ug “babaye” nga usa ka “bantogang pampam” ug dunay ngalan nga “usa ka misteryo: ‘Bantogang Babilonya.’” (Pinadayag 17:1, 3, 5) Kini nga babaye nagrepresentar sa tanang bakak nga relihiyon sa tibuok kalibotan, nga ‘nagbaylo sa kamatuoran sa Diyos’ ngadto sa bakak.a (Roma 1:25) Bisag daghag kalainan ang maong mga relihiyon, silang tanan nagpahilayo sa mga tawo gikan sa pagsimba sa matuod nga Diyos, si Jehova.—Deuteronomio 4:35.

Pag-ila sa Bantogang Babilonya

1. Ang Bantogang Babilonya usa ka simbolo. Ang basahon sa Pinadayag gipresentar “pinaagig mga ilhanan,” mao nang makaingon ta nga ang Bantogang Babilonya maoy simbolo, dili literal nga babaye. (Pinadayag 1:1) Dugang pa, siya “naglingkod ibabaw sa daghang katubigan,” nga mao ang “mga katawhan ug mga panon sa katawhan ug kanasoran ug mga pinulongan.” (Pinadayag 17:1, 15) Dili kana mahimo sa literal nga babaye.

2. Ang Bantogang Babilonya maoy usa ka tibuok kalibotang organisasyon. Siya gitawag nga “ang bantogang siyudad nga dunay gingharian ibabaw sa mga hari sa yuta.” (Pinadayag 17:18) Busa, tibuok kalibotan ang iyang sakop ug impluwensiya.

3. Ang Bantogang Babilonya nagsimbolo sa mga relihiyon, dili sa politika o komersiyo. Ang karaang Babilonya relihiyoso kaayong siyudad, ug nailado kini sa espiritismo, sama sa “mga panglamat” ug “pamarang.” (Isaias 47:1, 12, 13; Jeremias 50:1, 2, 38) Gani, ang mga molupyo sa siyudad aktibo sa bakak nga relihiyon nga nagsupak sa matuod nga Diyos, si Jehova. (Genesis 10:8, 9; 11:2-4, 8) Mapasigarbohong gibayaw sa mga magmamando sa Babilonya ang ilang kaugalingon nga labaw kang Jehova ug sa iyang pagsimba. (Isaias 14:4, 13, 14; Daniel 5:2-4, 23) Sa susama, ang Bantogang Babilonya ilado sa iyang “espiritistikanhong mga buhat.” Kana nagpakita nga siya usa ka organisasyon sa relihiyon.—Pinadayag 18:23.

   Ang Bantogang Babilonya dili puwedeng magsimbolo sa politika, kay “ang mga hari sa yuta” manghilak dihang siya mapukan. (Pinadayag 17:1, 2; 18:9) Dili sab siya organisasyon sa komersiyo, kay sumala sa Bibliya lahi siya sa “mga negosyante sa yuta.”—Pinadayag 18:11, 15.

4. 

   Photograph taken by courtesy of the British Museum

   Ang Bantogang Babilonya haom nga simbolo sa bakak nga relihiyon. Imbes tudloan ang mga tawo nga masuod sa matuod nga Diyos, si Jehova, gitudloan na hinuon sila sa bakak nga relihiyon sa pagsimba sa ubang diyos. Gitawag kini sa Bibliya ug “espirituwal nga prostitusyon.” (Levitico 20:6; Exodo 34:15, 16) Daghang bakak nga relihiyon ang padayong nagtudlog mga pagtulon-an nga nagsugod sa karaang Babilonya, sama sa trinidad, kalag nga dili mamatay, ug ang pagsimba nga naggamit ug mga imahen. Gisagolan sab niini nga mga relihiyon ang ilang pagsimba ug gugma sa kalibotan. Kini nga pagkadili-maunongon gitawag sa Bibliya ingong espirituwal nga pagpanapaw.—Santiago 4:4.

   Ang bahandi sa bakak nga relihiyon ug ang ilang mapasigarbohong paggamit niini mosibo sa pagkahulagway sa Bibliya bahin sa Bantogang Babilonya, kinsa “nagsul-ob ug purpura ug hayag-pula nga besti” ug “may dayandayan nga bulawan ug bililhong mga bato ug perlas.” (Pinadayag 17:4) Ang Bantogang Babilonya mao ang tuboran sa “dulumtanang mga butang sa yuta,” o sa mga pagtulon-an ug binuhatan nga makapasipala sa Diyos. (Pinadayag 17:5) Kadtong mga membro sa bakak nga relihiyon mao “ang mga katawhan ug mga panon sa katawhan ug kanasoran ug mga pinulongan” nga nagpaluyo sa Bantogang Babilonya.—Pinadayag 17:15.

Ang Bantogang Babilonya mao ang nakaingon sa kamatayon sa “tanang gipamatay sa yuta.” (Pinadayag 18:24) Sa tibuok kasaysayan, ang bakak nga relihiyon wala lang makahaling sa mga gubat ug terorismo kondili napakyas sab kini sa pagtudlo sa katawhan sa kamatuoran bahin kang Jehova, ang Diyos sa gugma. (1 Juan 4:8) Tungod niini, daghan ang nangamatay.

Sa panglantaw sa Diyos, ang “mga sala [sa Bantogang Babilonya] nagtipun-og sangko sa langit.” (Pinadayag 18:4, 5) Ang Diyos nasuko sa bakak nga relihiyon kay nagtudlo nig bakak bahin kaniya ug dili kini maayog pagtratar sa mga sumusunod niini.

Ang Bibliya nag-ingon nga “gipahayag sa Diyos ang iyang paghukom” sa Bantogang Babilonya. (Pinadayag 18:20) Pinaagig mga simbolo, gitagna sa Bibliya nga wagtangon sa Diyos ang tanang bakak nga relihiyon. (Pinadayag 18:8) Iyang palihokon ang usa ka hayag-pula nga mananap—nga nagrepresentar sa usa ka gamhanang politikal nga organisasyon—aron atakehon ang bakak nga relihiyon ug bug-os kining laglagon. (Pinadayag 17:16, 17) “Sa ingon niini ka tulin nga pagtambog nga ang bantogang siyudad sa Babilonya itambog, ug siya dili na gayod makaplagan pa.” (Pinadayag 18:21) Makataronganon nga kadtong gustong pahimut-an ang Diyos kinahanglang ‘mogula gikan sa ilang taliwala,’ nga magpalain gikan sa bakak nga relihiyon.—2 Corinto 6:14-17.