Unsa ang Orihinal nga Sala?

Si Adan ug Eva mao ang unang mga tawo nga nakasala. Dihang gisupak nila ang Diyos pinaagi sa pagkaon gikan sa “kahoy sa kahibalo sa maayo ug sa daotan,” ilang gihimo ang gitawag sa daghan nga orihinal nga sala.a (Genesis 2:16, 17; 3:6; Roma 5:19) Wala ipakaon kang Adan ug Eva ang bunga sa maong kahoy kay ang kahoy nagrepresentar sa awtoridad, o katungod, sa Diyos sa pagdesisyon kon unsay husto ug sayop para sa mga tawo. Pinaagi sa pagkaon sa bunga sa maong kahoy, si Adan ug Eva mipili sa pagdesisyon para sa ilang kaugalingon kon unsay husto ug sayop. Sa pagbuhat niana, ilang gisalikway ang awtoridad sa Diyos sa pagdesisyon kon unsay husto ug sayop.

• Sa unsang paagi ang “orihinal nga sala” nakaapektar kang Adan ug Eva?

• Sa unsang paagi ang “orihinal nga sala” nakaapektar kanato?

• Makalingkawas ba ta sa mga epekto sa “orihinal nga sala”?

• Sayop nga mga ideya bahin sa “orihinal nga sala”

Tungod kay nakasala si Adan ug Eva, sila natigulang ug namatay. Gidaot nila ang ilang relasyon sa Diyos ug wala na silay kahigayonan nga mabuhi hangtod sa hangtod sa hingpit nga panglawas.​—Genesis 3:19.

Napasa ni Adan ug Eva ang ilang pagkamakasasala ngadto sa tanan nilang kaliwat. Susama ni sa paagi nga mapasa sa mga ginikanan ngadto sa ilang mga anak ang mga depekto sa genes. (Roma 5:12) Busa, ang tanang tawo natawo “sa sala,”b nga nagpasabot nga kita natawo nga dili hingpit ug may tendensiya sa paghimog sayop.​—Salmo 51:5; Efeso 2:3.

Tungod sa napanunod nga sala, o pagkadili-hingpit, kita masakit, matigulang, ug mamatay. (Roma 6:23) Mag-antos sab ta sa mga resulta sa atong kasaypanan ug sa kasaypanan sa uban.​—Ecclesiastes 8:9; Santiago 3:2.

Oo. Ang Bibliya nag-ingon nga si Jesus namatay “ingong halad sa pagtabon para sa atong mga sala.” (1 Juan 4:10, footnote) Tungod sa halad ni Jesus, makalingkawas ta sa mga epekto sa napanunod nga sala ug mabatonan nato ang butang nga giwala ni Adan ug Eva—ang kahigayonan nga mabuhi hangtod sa hangtod nga may hingpit nga panglawas.​—Juan 3:16.c

Sayop nga ideya: Tungod sa orihinal nga sala, dili gyod ta masuod sa Diyos.

Ang tinuod: Wala ta basola sa Diyos tungod sa gihimo ni Adan ug Eva. Nakasabot siya nga dili ta hingpit, ug wala siya magdahom nga mohimo tag labaw sa atong makaya. (Salmo 103:14) Bisag nag-antos ta tungod sa napanunod nga sala, duna tay kahigayonan ug pribilehiyo nga masuod sa Diyos.​—Proverbio 3:32.

Sayop nga ideya: Ang bawtismo magpahigawas sa usa gikan sa orihinal nga sala, mao nga ang gagmayng bata (o, baby) kinahanglang bunyagan o bawtismohan.

Ang tinuod: Bisan tuod importante ang bawtismo aron maluwas, ang pagtuo sa halad ni Jesus mao ray makahinlo sa tawo gikan sa sala. (1 Pedro 3:21; 1 Juan 1:7) Tungod kay ang tinuod nga pagtuo gibase sa kahibalo, imposible nga makabaton ug pagtuo ang gagmayng bata. Busa ang Bibliya wala magtudlo nga bawtismohan ang gagmayng bata. Makita nato nga tinuod kini sa mga Kristohanon sa unang siglo. Ang ilang gibawtismohan dili gagmayng bata, kondili mga magtutuo​—“mga lalaki ug babaye” nga may pagtuo sa Pulong sa Diyos.​—Buhat 2:41; 8:12.

Sayop nga ideya: Gitunglo sa Diyos ang mga babaye kay si Eva ang unang mikaon sa gidiling bunga.

Ang tinuod: Dili ang mga babaye ang gitunglo sa Diyos, kondili “ang orihinal nga halas, ang gitawag ug Yawa ug Satanas,” nga maoy nagtental kang Eva sa paghimog sala. (Pinadayag 12:9; Genesis 3:14) Ug para sa Diyos, si Adan ang may pangunang tulubagon sa orihinal nga sala, dili ang iyang asawa.​—Roma 5:12.

Nganong miingon man ang Diyos nga dominahon ni Adan ang iyang asawa? (Genesis 3:16) Dihang gisulti ni sa Diyos, wala ni magpasabot nga giuyonan niya ang maong buhat. Igo lang siyang nagtagna sa pait nga resulta sa sala. Gidahom sa Diyos nga higugmaon ug pasidunggan sa lalaki ang iyang asawa ug tahoron ang mga babaye.​—Efeso 5:25; 1 Pedro 3:7.

Sayop nga ideya: Ang orihinal nga sala mao ang pagpakigsekso.

Ang tinuod: Ang pagpakigsekso dili mao ang orihinal nga sala tungod sa mosunod nga mga rason:

• Dihang gisugo sa Diyos si Adan nga dili mokaon sa bunga sa kahoy sa kahibalo sa maayo ug sa daotan, si Adan nag-inusara pa lang; wala pa siyay asawa.​—Genesis 2:17, 18.

• Gisugo sa Diyos si Adan ug Eva nga ‘manganak ug magdaghan.’ (Genesis 1:28) Daotan ang Diyos kon silotan niya ang unang magtiayon sa pagbuhat sa butang nga iyang gisugo.

• Si Adan ug Eva wala magdungan sa pagpakasala. Si Eva ang unang nakasala, dayon ang iyang bana.​—Genesis 3:6.

• Gitugotan sa Bibliya ang seksuwal nga relasyon sa bana ug asawa.​—Proverbio 5:18, 19; 1 Corinto 7:3.