Isaias 42:8—“Ako mao ang GINOO”

“Ako si Jehova. Kana ang akong ngalan; dili nako ihatag kang bisan kinsa ang akong himaya, ug ang akong pagdayeg ngadto sa kinulit nga mga larawan.”​—Isaias 42:8, Bag-ong Kalibotang Hubad.

“Ako mao ang GINOO, mao kana ang akong ngalan! Dili ko ihatag ang akong pasidungog kang bisan kinsa o ang pagdayeg nga alang kanako ngadto sa mga dios-dios.”​—Isaias 42:8, Ang Pulong sa Dios.

Gisulti sa Diyos kanato ang iyang personal nga ngalan ug siya midugang nga dili nato siya simbahon gamit ang mga imahen o diyosdiyos.

Siya mismo ang nagpili sa iyang ngalan, nga gihubad ug “Jehova” sa pipila ka Cebuano nga Bibliya.a (Exodo 3:14, 15) Bisan pag ang ngalan sa Diyos makitag halos 7,000 ka beses sa Daang Tugon (Hebreohanon-​Aramaikong Kasulatan), gipulihan kini sa daghang maghuhubad ug titulong “GINOO” (sa dagkong mga letra). Ang pananglitan niini makita sa Salmo 110:1, nga parehong nagtagna bahin kang Jehova ug Jesus. Ang hubad sa Ang Biblia, 2011 nga bersiyon nag-ingon: “Ang GINOO [Jehova] miingon sa akong Ginoo [Jesus].” (Itandi ang Buhat 2:34-36) Aron dili makalibog kon kinsay gitumong nianang duha ka “Ginoo,” gibutang sa Bag-ong Kalibotang Hubad ang ngalan sa Diyos sumala sa kon asa gyod kini angayng makita. Kini mabasa: “Si Jehova miingon sa akong Ginoo: ‘Lingkod sa akong tuong kamot hangtod nga ibutang nako ang imong mga kaaway ingong tumbanan sa imong mga tiil.’”

Daghang eskolar ang nagtuo nga ang ngalan sa Diyos nagkahulogan ug “Iyang Ipahinabo nga Mahimong.” Kini nga ngalan mapadapat lamang sa matuod nga Diyos, kay siya lang ang makahimo sa iyang kaugalingon o sa iyang kalalangan nga mahimong bisan unsa nga gikinahanglan aron matuman ang iyang katuyoan.

Ingong atong Maglalalang ug bugtong matuod nga Diyos, si Jehova takos sa atong eksklusibong debosyon. Gawas kaniya, walay bisan kinsa o bisan unsa ang angayan sa atong pagsimba, apil ang mga idolo ug mga imahen.​—Exodo 20:2-6; 34:14; 1 Juan 5:21.

Sa nag-unang mga bersikulo sa Isaias kapitulo 42, si Jehova nagtagna kon unsay himoon sa iyang “pinili.” Ang Diyos miingon nga ang maong pinili nga alagad “magpahamtang ug hustisya sa kanasoran.” (Isaias 42:1) Bahin niana nga saad, ang Diyos miingon: “Karon magpahayag kog bag-ong mga butang. Sa dili pa kini motungha, isulti nako kini kaninyo.” (Isaias 42:9) Natuman ang tagna bahin sa “pinili” mga gatosan ka tuig sa ulahi dihang ang Mesiyas, o Kristo, miabot ug gituman ang iyang ministeryo dinhi sa yuta.​—Mateo 3:16, 17; 12:15-21.

“Ako mao si Jehova, kini mao ang akong ngalan; ug ang akong himaya dili nako igahatag sa uban, ni ang akong pagdayeg sa mga linilok nga mga larawan.”​—Ang Biblia, Philippine Bible Society.

“Ako mao si Jehova, kini mao ang akong ngalan; ug ang akong himaya dili nako igahatag sa uban, ni ang akong pagdayeg sa mga linilok nga mga larawan.”​—Ang Balaan Nga Kasulatan, American Bible Society.