Mateo 11:28-30—“Duol Kanako, . . . ug Papahulayon Ko Kamo”

“Ari kamo kanako, kamong tanang gikapoy ug nabug-atan, ug ako magpalagsik kaninyo. Isangon ang akong yugo ug pagkat-on gikan kanako kay ako malumo ug mapainubsanon, ug kamo mobatig kahayahay. Kay ang akong yugo sayon dad-on, ug ang akong luwan gaan.”—Mateo 11:28-30, Bag-ong Kalibotang Hubad.

“Duol kanako, kamong tanan nga nagbudlay ug nabug-atan ug papahulayon ko kamo. Pas-ana ninyo ang akong yugo ug pagtuon kamo gikan kanako kay ako maaghop ug mapaubsanon sa kasingkasing ug makakaplag kamo ug pahulay alang sa inyong mga kalag. Kay sayon ang akong yugo ug gaan ang akong palas-anon.”—Mateo 11:28-30, Ang Biblia, 2011.

Si Jesus mahigugmaong nagdapit sa iyang mga mamiminaw nga moduol kaniya. Iya silang gipasaligan nga kon mokat-on sila kaniya, mobati silag kalagsik ug kahayahay.

“Ari kamo kanako, kamong tanang gikapoy ug nabug-atan.” Kadtong mahigugmaong gidapit ni Jesus “nabug-atan” tungod sa mga balaod ug tradisyon nga gipatuman sa ilang mga lider sa relihiyon. (Mateo 23:4; Marcos 7:7) Ang kadaghanang tawo nabug-atan pod sa kabalaka ug gikapoy kay kinahanglan silang magtrabahog daghang oras ug maghago pag-ayo aron lang matagan-an ang ilang pamilya.

“Ako magpalagsik kaninyo.” Si Jesus nagsaad nga iyang hatagag kahupayan ug pahulay kadtong modawat sa iyang imbitasyon. Iya nang gihimo pinaagi sa pagtabang kanila nga masabtan kon unsa gyoy gidahom sa Diyos kanila. (Mateo 7:24, 25) Tungod niini, napahigawas sila sa sayop nga mga pagtulon-an ug tradisyon nga nakapabug-at kanila. (Juan 8:31, 32) Ang pagkat-on ug pagpadapat sa mga gitudlo ni Jesus nagkinahanglag paningkamot, pero kini makapalagsik.

“Isangon ang akong yugo ug pagkat-on gikan kanako.” Sa kapanahonan sa Bibliya, ang mga trabahante sagad magbutang ug yugo sa ilang abaga sa pagpas-an ug bug-at nga mga butang. Busa ang pulong “yugo” nagpasabot ug pagpailalom, o pagpasakop, sa awtoridad sa laing tawo ug pagsunod sa iyang instruksiyon. (Levitico 26:13; Isaias 14:25; Jeremias 28:4) Ang mga pulong nga “pagkat-on gikan kanako” puwede pod nga hubaron nga “mahimong akong mga tinun-an.” Busa gidasig ni Jesus ang iyang mga mamiminaw nga mahimong iyang mga tinun-an pinaagi sa pagsunod kaniya ug pagsundog sa iyang ehemplo.—Juan 13:13-15; 1 Pedro 2:21.

“Kamo mobatig kahayahay.” Si Jesus wala magsaad nga mawala dayon ang tanang problema. Pero iyang gitabangan ang iyang mga mamiminaw nga mahupay ug makabatog paglaom. (Mateo 6:25-32; 10:29-31) Kadtong nahimong iyang mga tinun-an ug midawat sa iyang mga gitudlo makapamatuod gyod nga ang pag-alagad sa Diyos dili makapabug-at, kondili makapalagsik.—1 Juan 5:3.

“Kay ang akong yugo sayon dad-on, ug ang akong luwan gaan.” Si Jesus dili sama sa mga lider sa relihiyon sa iyang panahon kay siya mapainubsanon ug lumo. (Juan 7:47-49) Dili gyod siya estrikto ug dili pod siya magdaogdaog sa uban. Siya buotan ug daling duolon. Wala siya magdahom ug labaw sa mahimo sa iyang mga sumusunod. (Mateo 7:12; Marcos 6:34; Lucas 9:11) Iya sab nga gipakita kanila kon unsay ilang himoon aron makabenepisyo sa kaluoy sa Diyos ug mobatig kahayahay nga resulta sa pagbaton ug maayong konsensiya. (Mateo 5:23, 24; 6:14) Tungod sa maayong mga hiyas ni Jesus, miduol ang mga tawo kaniya ug nadasig sila nga dawaton ang iyang yugo ug mahimong iyang tinun-an.

Gisulti ni Jesus ang narekord sa Mateo 11:28-30 samtang nagsangyaw siya sa Galilea sa tuig 31 C.E. Si apostol Mateo lang ang magsusulat sa Ebanghelyo nga nagrekord niini nga mga pulong ni Jesus. Kay si Mateo maniningil ug buhis kaniadto ug usa ka Hudiyo, nahibalo siya pag-ayo nga ang mga tawo nabug-atan tungod sa buhis nga gisingil sa mga Romano ug tungod sa daot nga sistema sa relihiyon sa mga Hudiyo. Busa seguradong nadasig si Mateo sa pagkakita nga gigamit ni Jesus ang awtoridad nga gihatag kaniya sa iyang Amahan, si Jehova,a sa pagdapit sa mga makaluluoy ug dinaogdaog nga moduol kaniya.—Mateo 11:25-27.

Ang Ebanghelyo ni Mateo nagpasiugda sa nindot nga mga hiyas nga gipakita ni Jesus ingong gisaad nga Mesiyas ug umaabot nga magmamando sa Gingharian sa Diyos.—Mateo 1:20-23; Isaias 11:1-5.

Tan-awa kining mubo nga video nga nagsumaryo sa basahon sa Mateo.