Juan 15:13—“Kana nga Paghigugma Dili na Gayod Malabwan”

“Walay usa nga may gugma nga labaw pa kay niini, nga ang usa andam mohatag sa iyang kinabuhi alang sa iyang mga higala.”—Juan 15:13, Bag-ong Kalibotang Hubad.

“Kon adunay tawo nga magpakamatay alang sa iyang mga higala, kana nga paghigugma dili na gayod malabwan.”—Juan 15:13, Ang Pulong sa Dios.

Gitudloan ni Jesus ang iyang mga sumusunod aron ilang masabtan nga kinahanglang duna silay dako kaayong gugma nga tungod niana andam silang mamatay para sa usag usa.

Sa nag-unang bersikulo, giingnan ni Jesus ang iyang mga apostoles: “Mao kini ang akong sugo, nga kamo maghigugmaay sama sa akong paghigugma kaninyo.” (Juan 15:12) Unsa nga gugma ang gipakita ni Jesus kanila? Gugma nga masakripisyohon ug dili hakog. Sa iyang ministeryo sa yuta, giuna niya ang panginahanglan ug kaayohan sa iyang mga sumusunod ug sa uban kay sa iyang kaugalingon. Giayo niya ang mga tawo nga dunay sakit ug gitudloan sila bahin sa Gingharian sa Diyos.a Naghimo pa gani siyag ubos nga mga buluhaton para sa kaayohan sa uban. (Mateo 9:35; Lucas 22:27; Juan 13:3-5) Pero sa Juan 15:13, gitumong ni Jesus ang mas labaw pa nga gugma. Gani, pipila lang ka oras human niya kini isulti, gipakita niya ang mas labaw nga gugma dihang kinabubut-on niyang gihatag ang “iyang kinabuhi ingong lukat baylo sa daghan.” (Mateo 20:28; 22:39) Busa gipakita niya sa talagsaon kaayong paagi nga gihigugma niya ang uban kay sa iyang kaugalingon.

Gihigugma ni Jesus ang mga tawo. Pero ilabina niyang gihigugma kadtong mga nagsunod sa iyang mga gitudlo. Giisip niya ang iyang mga tinun-an nga iyang suod nga mga higala kay sila misunod sa iyang mga instruksiyon ug miunong niya panahon sa iyang mga pagsulay. (Lucas 22:28; Juan 15:14, 15) Busa naa siyay mas dakong rason nga isakripisyo ang iyang kinabuhi para nila.

Gipadapat sa unang siglong mga Kristohanon ang giingon ni Jesus, ug andam silang mamatay para sa usag usa. (1 Juan 3:16) Gani, ang dili hakog nga gugma—ang gugma nga gipakita ni Jesus—mao ang pangunang ilhanan sa tinuod nga mga Kristohanon.—Juan 13:34, 35.

Sa kapitulo 13 ngadto sa 17 sa Ebanghelyo ni Juan, mabasa ang kataposang mga tambag ni Jesus sa iyang 11 ka matinumanong apostoles ug ang iyang kataposang pag-ampo uban nila. Namatay siya pipila lang ka oras sa ulahi. Sa kapitulo 15, gipasiugda ni Jesus nga ang iyang mga tinun-an kinahanglang magpabilin nga nahiusa kaniya sa pagpamatuod nga iya gyod silang mga sumusunod. Aron iilustrar kana, gitandi ni Jesus ang iyang mga tinun-an sa mga sanga sa punoan sa ubas nga mamunga. Iya silang gidasig nga “magpadayon sa pagpamungag daghan.” (Juan 15:1-5, 8) Ang usa ka paagi nga ila nang mahimo maoy pinaagi sa pagpakitag masakripisyohong gugma, nga naglakip sa pagsangyaw sa mensahe nga gisangyaw ni Jesus—“ang maayong balita sa Gingharian sa Diyos.”—Lucas 4:43; Juan 15:10, 17.

Tan-awa kining mubo nga video nga nagsumaryo sa basahon sa Juan.