Atong Gugma sa Tanaman

MOANGAY ka ba sa kalinaw sa nindot nga tanaman ingong usa ka dangpanan nga layo sa kalangas ug paspas nga pagkinabuhi? Ang hilom nga mga parke uban sa ilang mga tugkaran, kabulakan, may-landong nga kakahoyan, ug mga linaw mao ba ang palibot nga imong palabihon alang sa usa ka piknik kauban sa imong pamilya o pamaseyo nga kauban sa usa ka higala? Oo, pagkamakapahupay, pagkamakapahayahay, pagkamalinawon, ug gani pagkamakaayo-sa-lawas ang tanaman!

Bisan pag ang pipila tingali dili moangay nga moatiman ug tanaman, tingali tungod sa kakulang sa panahon, kitang tanan malingaw sa mga kolor, mga alimyon, mga kanaas, ug mga bunga sa tanaman. Si Thomas Jefferson​—usa ka arkitekto, siyentipiko, abogado, imbentor, ug presidente sa T.B.​—gustog tanaman. Misulat siya: “Walay trabaho ang makapalingaw kanako kay sa pagtikad sa yuta. . . . Ako hilig gihapon sa tanaman. Ug bisan tuod tigulang na, ako batan-on pang hardinero.”

Daghan gihapon ang nagtuo sa iyang opinyon. Kada tuig milyonmilyong bisita magaganayan ngadto sa bantog nga mga tanaman sa kalibotan​—ang Tanamang Kew (ang Royal Botanic Gardens), sa Inglaterra; ang mga tanaman sa Kyoto, Hapon; ang mga tanaman sa Palasyo sa Versailles, sa Pransiya; ang Longwood Gardens, sa Pennsylvania, T.B.A., sa paghisgot ug pipila. Daghang nasod duna say mga dapit sa siyudad diin ang mga balay, nga nahiluna ubay sa mga dalan nga nalinyahag kakahoyan, gilibotan sa mga kahoykahoy, kakahoyan, ug dan-ag-kolor nga kabulakan​—nga samag usa ka gamayng paraiso.

Makapaayo sa Lawas ang mga Tanaman

Napanid-an nga sa dihang ang mga tawo magpaduol kanunay sa kinaiyahan, ang ilang panglawas moarang-arang, bisan pag ang pagpakigduol tingali mao lamang ang pagkakita sa kabulakan, kakahoyan, mga kahoykahoy, ug kalanggaman lahos sa bentana. Kini misangpot nga usa ka ospital sa New York City mitanom ug tanaman sa bubongan niini. Kana “katingalahan nga gikahinangpan,” matod sa usa ka opisyal sa ospital. “Kini makapausbaw sa kasibot sa mga pasyente ug mga kawani. . . . Nasabtan namo nga kini daghag posibilidad alang sa kaayohan sa panglawas.” Tinuoray, gipadayag sa mga pagtuon nga ang mga tawo makabatog kaayohan sa lawas, sa pangutok, ug sa emosyon pinaagi sa pagtugot nga madagayaong pahimuslan sa mga sentido ang kinaiyahan.

Gawas pa, ang usa ka tawong mahiligon sa espirituwal mahimong mobating mas suod sa Diyos sa dihang anaa taliwala sa Iyang mga binuhat. Ang maong aspeto sa tanaman masubay balik ngadto sa unang tanaman mismo sa yuta, ang Tanaman sa Eden, diin ang Diyos unang nakigsulti sa tawo.​—Genesis 2:15-17; 3:8.

Ang gugma sa tanaman maoy tibuok kalibotan. Ug kini, sumala sa atong hisabtan, makahuloganon. Sa dili pa hisgotan ang maong bahin, hinunoa, dapiton ka namo sa “pagsuroy” sa pipila ka tanaman sa kasaysayan aron sa pagsusi kon unsa gayod ka lalom ang pangandoy sa Paraiso diha sa mga kasingkasing sa tanang mga katawhan.