Ang Dalan Balik sa Paraiso
TUNGOD sa pangandoy sa tawo sa Paraiso ug sa mga paninguha nga dagko ug gagmay sa pagmugna niini pag-usab, ang usa makahunahuna nga sa pagkakaron ang yuta mahimong usa na ka paraiso. Apan dili diay.
Ang katawhan, hinunoa, nagpalabi sa kadalo, nga sagad maghari sa kapildihan sa kalikopan ug sa nagkadaiyang mga buhing butang niini.
Kay nagtuong ang materyal nga bahandi maoy modaog, daghang tawo ang nawad-an sa tanang paglaom nga kining yutaa mahimo pang usa ka Edenhong paraiso. Sa kapulihay, sila nagpaabot sa laing kinabuhi sa langit ingong ilang bugtong paglaom sa Paraiso. Kining pagtuoha nagpasabot, una, nga ang atong tawhanong pangandoy sa Eden sa walay kataposan mapakyas ug, ikaduha, nga giabandonar sa Diyos kining planetaha ngadto sa tawhanong binuang ug kadalo. Tinuod ba kini? Unsa ba gayod ang umaabot? Ug asa ba masinati ang maong umaabot?
Paraiso—Sa Langit o sa Yuta?
Duolag 2,000 ka tuig kanhi, sa nakigsulti sa usa ka mahinulsolong kawatan nga gilansang sa iyang tapad, si Jesu-Kristo miingon: “Ikaw mahiuban kanako sa Paraiso.” (Lucas 23:43) Gipasabot ba ni Jesus nga ang kawatan moadto sa langit nga kauban niya? Wala.
Ang mamumuhat ug daotan wala gayod maghunahuna niana. Nganong wala man? Tungod kay lagmit siya nahibalo sa mga teksto sa Hebreohanong Kasulatan, nga naglungtad sa iyang adlaw, sama sa unang bahin sa Salmo 37:29: “Ang mga matarong magapanunod sa yuta.” Si Jesus nagtudlo sa samang kamatuoran, nga mipahayag: “Malipayon ang mga malumog-buot, sanglit magapanunod sila sa yuta.” (Mateo 5:5) Kining kasulatana nahiuyon sa kasagarang gitawag nga Pag-ampo sa Ginoo, nga nag-ingon: “Matuman unta ang imong kabubut-on, maingon sa langit, dinhi usab sa yuta.”—Mateo 6:9, 10.
Ang Bibliya nagtudlo nga ang Diyos naglalang sa yuta, dili sa langit, ingong puy-anan sa tawhanong banay. Ang iyang Pulong nag-ingon nga siya “wala maglalang [sa yuta] sa wala lamay kapuslanan” kondili “nag-umol niini aron pagapuy-an.” (Isaias 45:18) Hangtod kanus-a? “Iyang gitukod ang yuta diha sa tinong mga dapit niini; kini dili matarog hangtod sa panahong walay tino, o sa walay kataposan.” (Salmo 104:5) Oo, “ang yuta nagbarog bisan ngadto sa panahong walay tino.”—Ecclesiastes 1:4.
Katuyoan sa Diyos alang sa kinabag-an niadtong magaalagad kaniya nga himoon kining yutaa nga ilang puy-anan sa walay kataposan. Matikdi kon unsay komento bahin niini sa Pulong sa Diyos, ang Bibliya. Ang Salmo 37:11 nagtagna: “Ang mga maaghop mismo magapanunod sa yuta, ug sila makakaplag gayod sa ilang tumang kalipay sa kadagaya sa pakigdait.” Hangtod kanus-a? Ang Salmo 37:29 nag-ingon: “Ang mga matarong mismo magapanunod sa yuta, ug sila magapuyo ibabaw niini sa walay kataposan.” Nianang panahona ang kasulatan matuman nga nagpahayag: “Ikaw [Diyos] nagbukas sa imong kamot ug nagtagbaw sa tinguha sa tanang buhing butang,” nga mao, ang tinguha nga nahiuyon sa kabubut-on sa Diyos.—Salmo 145:16.
Komosta kadtong walay tinguha sa pagbuhat sa kabubut-on sa Diyos? Ang Proverbio 2:21, 22 nagpahayag: “Ang mga matul-id mao ang magapuyo sa yuta, ug ang mga walay ikasaway mao ang mahibilin ibabaw niini. Mahitungod sa mga tuman-kadaotan, sila pagaputlon gikan sa yuta mismo; ug mahitungod sa mga maluibon, sila pagalangkaton gikan niini.”
Paraiso Napasig-uli
Sa dili na madugay, ang mga paghukom sa Diyos igapatuman batok niining tuman-kadaotang kalibotan. (Mateo 24:3-14; 2 Timoteo 3:1-5, 13) Apan ang Diyos magapreserbar sa “usa ka dakong panon” sa katawhan latas sa maong umaabot nga kalaglagan ngadto sa usa ka bag-ong kalibotan nga iyang hinimo.—Pinadayag 7:9-17.
Unya, dumalahon sa Diyos ang makalipay nga tahas nga mabatonan sa iyang tawhanong mga sakop nga mao ang pagbalhin sa tibuok nga yuta ngadto sa paraisong puy-anan alang sa katawhan. Ang Bibliya nagsaad: “Ang kamingawan ug ang mamalang dapit maglipay, ug ang desyertong kapatagan magmasadyaon ug mamulak nga sama sa sapron. . . . Kay sa kamingawan ang mga tubig mobugwak, ug ang mga bul-og sa tubig sa desyertong kapatagan.”—Isaias 35:1, 6.
Sa maong magakadakong Paraiso, wala na unyay kagutmanan, kakabos, mga barongbarong, mga tawong walay puy-anan, o mga dapit nga punog krimen. “Aduna unyay daghang lugasong pagkaon sa yuta.” (Salmo 72:16) “Ang kahoy sa kapatagan mohatag gayod sa iyang bunga, ug ang yuta mismo mohatag sa iyang abot.” (Ezequiel 34:27) “Sila magatukod ug mga balay ug magapuyo niana; ug sila magatanom ug mga kaparasan ug magakaon sa ilang mga bunga. Sila dili magatukod ug lain ang magapuyo; sila dili magatanom ug lain ang magakaon.” (Isaias 65:21, 22) “Sila magalingkod gayod, ang matag usa sa ilalom sa iyang paras ug ilalom sa iyang kahoy nga igira, ug walay magapakurog kanila.”—Miqueas 4:4.
Kon Nganong ang Pipila Moadto sa Langit
Ang kadaghanang tawo lagmit moangkon nga sila nangandoy sa usa ka paraiso sa yuta. Kinaiyanhon kana, kay ang Diyos wala gayod magbutang diha kanila ug pangandoy alang sa langit; sila dili gani makahanduraw kon sama sa unsa ang kinabuhi sa langit. Pananglitan, sa pagpakigsulti sa iyang ministro sa Iglesya sa Inglaterra, si Pat, bisan pag usa ka debotadong membro sa iglesya, miingon: “Wala gayod ako maghunahuna bahin sa pag-adto sa langit. Dili ko gustong moadto, ug unsa bay akong buhaton didto?”—Itandi ang Salmo 115:16.
Tinuod, ang Bibliya nagtudlo nga ang usa ka limitadong gidaghanon sa mga tawo, nga 144,000, moadto gayod sa langit. (Pinadayag 14:1, 4) Kini nagpatin-aw usab kon ngano: “Gihimo mo sila nga usa ka gingharian ug mga saserdote ngadto sa atong Diyos, ug sila magamando ingong mga hari ibabaw sa yuta.” (Pinadayag 5:9, 10) Kauban sa ilang Hari, si Jesu-Kristo, kini sila maoy maglangkob sa “gingharian,” ang bag-ong langitnong kagamhanan sa yuta, nga alang niana ang mga Kristohanon nag-ampo. Kini nga kagamhanan maoy magdumala sa bug-os nga pagpasig-uli sa yuta ug sa tawo.—Daniel 2:44; 2 Pedro 3:13.
Bisan pa niana, sanglit ang tinguha nga mopuyo sa langit dili kinaiyanhong anaa sa mga tawo, ang usa ka linaing paglihok sa espiritu sa Diyos “nagapanaksi” ngadto sa 144,000 aron sila mobatyag niining linaing ‘pagtawag sa kahitas-an.’ (Roma 8:16, 17; Filipos 3:14) Hinuon, dayag nga walay ingon nga paglihok sa balaang espiritu ang gikinahanglan alang sa katawhan sa katibuk-an tungod kay ang ilang walay-kataposang puy-anan diha man sa usa ka paraisong yuta.
Usa ka Espirituwal nga Paraiso Mag-andam sa Dalan
Sa unsang paagi ang usa mahimong takos sa kinabuhing dayon sa Paraiso sa yuta? “Kini nagakahulogan ug kinabuhing walay-kataposan,” matod ni Jesus, “ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Sa paglangkit sa malinawong relasyon sa mga tawo uban sa kahibalo bahin sa Diyos, ang Isaias 11:9 nag-ingon: “Sila dili magbuhat ug bisan unsang kadaot o magpahinabo ug bisan unsang panglaglag sa tibuok nakong bukid nga balaan; tungod kay ang yuta mapuno gayod sa kahibalo kang Jehova maingon sa mga tubig nga nagtabon sa dagat mismo.”—Itandi ang Isaias 48:18.
Kining kahibaloa, siyempre, dili lamang pagkat-on ug daghang kasayoran. Mag-impluwensiya kini sa personalidad sa usa ug mag-ugmad sa diyosnong mga hiyas, sama sa “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” (Galacia 5:22, 23) Ang mga Saksi ni Jehova nanlimbasog sa pag-ugmad niining mga hiyasa, ug busa, bisan karon, sila gipanalanginan sa makapaayong espirituwal nga paraiso.—Isaias 65:13, 14.
Pagkalahi sa ilang espirituwal nga kahimtang kay sa iya sa kalibotan, nga nagkaunlod nga labaw ug labaw pa ngadto sa pagkadili-diyosnon ug kahiwian! Sa dili madugay, hinunoa, kining tuman-kadaotang kalibotan pagalaglagon sa Diyos. Kasamtangan, ang mga Saksi ni Jehova nagdapit kanimo sa pagduaw—oo, pagsusi—sa espirituwal nga paraisong ilang gipahimuslan. Tan-awa sa imong kaugalingon nga sa pagkakaron si Jesus, ang dili-makitang langitnong Hari, sa mahilomon nag-agak sa umaabot nga mga molupyo sa maong bag-ong kalibotan ubay sa piot nga dalan ngadto sa yutan-ong Paraiso ug sa kinabuhing dayon!—Mateo 7:13, 14; Pinadayag 7:17; 21:3, 4.
[Hulagway sa panid 8, 9]
Ang mga makalabang-buhi sa kalaglagan niining kalibotana magkalipay nga makigbahin sa paghimo sa yuta nga usa ka paraiso