Ang Hunahuna sa Bibliya

Ikaw Bililhon sa mga Mata sa Diyos!

“KANUNAY AKONG GIHAMPAK SA MGA PAGBATI SA KAWALAY-PULOS SA DAKONG BAHIN SA AKONG KINABUHI,” MISULAT ANG USA KA KRISTOHANONG BABAYE. “BISAN PAG UNSA KA DAKO SA AKONG GUGMA KANG JEHOVA O UNSA KA DAKO SA AKONG PANINGKAMOT NGA GINAHIMO SA PAG-ALAGAD KANIYA, KANUNAY NAKONG GIBATI NGA KINI KULANG RA GIHAPON.”

ADUNA ka bay nahibaloang usa ka tawo nga nakigbisog sa hilabihang mga pagbati sa pagkadili-takos o pagkawalay-bili? O ikaw ba mismo adunay ingon niana nga mga pagbati usahay? Ang maong mga pagbati maoy kasagaran, bisan taliwala sa matinumanong mga magsisimba sa Diyos. Walay usa nga dili maapektohan sa mga epekto sa pagkinabuhi niining “makuyaw nga mga panahong lisod sagubangon.” Daghan ang nakasinati ug pagpasagad ug pag-abuso gikan sa mga tawong “walay pagpugong-sa-kaugalingon, mabangis, walay gugma sa pagkamaayo”—mga hiyas nga kaylap sa “kataposang mga adlaw.” (2 Timoteo 3:1-5) Ang ingon nianang masakit nga mga kasinatian mahimong magbilin ug lalom nga emosyonal nga mga samad, nga mohatag ug mga pagbati nga wala gayoy kapuslanan.

Sa ubang mga kaso, ang negatibong mga pagbati tingali maoy resulta sa pagbutang sa mga tawo ug sobra ka taas nga mga sukdanan alang sa ilang kaugalingon. Ang kawalay-katakos sa pagkab-ot niining maong mga sukdanan nagpasamot sa pagbati nga sila wala gayoy igong katakos. Bisag unsa man ang hinungdan, kadtong nakigbisog sa mga pagbati sa kawalay-bili tingali malisdan sa pagsabot kon nganong ang Diyos—o si bisan kinsa, kon bahin niana—nagmahal kanila. Sa pagkamatuod, basin magtuo pa gani sila nga dili gayod sila hiligugmaon.

Apan dili ingon niana ang pagbati ni Jehova nga Diyos! Diha sa iyang Pulong, si Jehova nagpasidaan kanato sa pagbantay batok sa “malipotong mga taktika” sa iyang Kaaway, si Satanas nga Yawa. (Efeso 6:11, Jewish New Testament) Si Satanas nagagamit sa iyang malipotong mga taktika sa pagtinguha nga pahunongon kita sa pagsimba sa atong Diyos. Tungod niana, si Satanas nagdasig sa pagbati nga kita walay-pulos, nga dili gayod kita makaplagan ni Jehova nga hiligugmaon. Apan si Satanas “bakakon”—sa pagkamatuod, “ang amahan sa bakak.” (Juan 8:44) Busa, kinahanglang dili kita magpalimbong pinaagi sa iyang malipotong mga taktika! Diha sa Bibliya, si Jehova mismo maoy nagsulti, nga nagpasalig kanato sa atong bili sa iyang mga mata.

Usa ka Timbang nga Panglantaw sa Atong Bili

Ang Bibliya nagpasidaan sa negatibong epekto sa pagkawala sa kadasig diha kanato. Ang Proverbio 24:10 nag-ingon: “Ikaw ba nagpakita nga nawad-ag kadasig sa adlaw sa kalisdanan? Ang imong kusog diyutay ra.” Ang dugay nang naglungtad nga negatibong mga pagbati sa sulod nato makawala sa atong kusog, nga makapaluya kanato ug daling maapektohan. Makaseguro ka nga si Satanas nasayod gayod niini. Malisod na gani kon ang atong kasingkasing gihampak sa mga pagbati sa pagkawalay-bili. Bisan pa, sa dihang mosulay si Satanas sa pagpahimulos sa maong mga pagbati, kini maghimo sa maong kahimtang nga labi pa ka bug-at.

Nan, hinungdanon nga aduna kitay maayo, timbang nga panglantaw sa atong bili. “Ako magasulti sa tanan dinha taliwala kaninyo,” miawhag si apostol Pablo, “nga dili maghunahunag labaw bahin sa iyang kaugalingon kay sa gikinahanglan nga pagahunahunaon; apan sa paghunahuna sa paaging batonan ang mabuot nga panghunahuna.” (Roma 12:3) Ang laing hubad nagpahayag niining mga pulonga: “Akong isulti sa matag usa kaninyo nga dili maghunahuna sa iyang kaugalingon nga labaw sa iyang tinuod nga bili, apan sa paghimog makasaranganong pag-isip sa iyang kaugalingon.” (Charles B. Williams) Busa ang kasulatan nagdasig kanato sa pagbaton ug timbang nga panglantaw sa atong kaugalingon. Sa usa ka bahin, angay kitang magbantay batok sa pagkamapahitas-on; sa laing bahin, angay kitang maningkamot nga dili moadto sa laing paghingapin, tungod kay gipasabot ni Pablo nga aron mabatonan ang mabuot nga panghunahuna, kinahanglanon nga aduna kitay hunahunaon bahin sa atong kaugalingon. Oo, ubos sa pag-inspirar sa Diyos gipakita ni Pablo nga ang matag usa kanato bililhon sa mga mata ni Jehova.

Ang usa ka timbang nga pagbati sa pagpabili-sa-kaugalingon masabot usab diha sa mga pulong ni Jesus sa dihang siya miingon: “Higugmaon mo gayod ang imong silingan ingon sa imong kaugalingon.” (Mateo 22:39) Ang mga pulong nga “ingon sa imong kaugalingon” nagpakita nga angay nga kita adunay pagbati sa pagpabili-sa-kaugalingon, o pagtahod-sa-kaugalingon. Tinuod, kita adunay mga sala ug makahimog mga sayop. Apan kon kita naningkamot sa pagpahimuot sa Diyos, nagbasol sa atong mga kakulangan, ug nangayo sa iyang kapasayloan, makabaton gihapon kita ug usa ka sukod sa pagpabili-sa-kaugalingon. Lahi tingali ang iinsistir sa atong sobra-ka-hinawayong mga kasingkasing, apan hinumdomi, “ang Diyos mas labaw kay sa atong mga kasingkasing.” (1 Juan 3:20) Sa laing pagkasulti, si Jehova naglantaw kanato sa paagi nga mahimong lahi kaayo sa atong paagi sa paglantaw sa atong kaugalingon.

Dugmok nga mga Kasingkasing, Masulub-ong mga Espiritu

Ang salmistang si David misulat: “Si Jehova haduol niadtong dugmok ug kasingkasing; ug kadtong masulub-on sa espiritu iyang ginaluwas.” (Salmo 34:18) Nagkomento niining bersikuloha, ang Matthew Henry’s Commentary on the Whole Bible nag-ingon: “Maoy kinaiya sa matarong . . . nga sila dugmok ug kasingkasing ug mahinulsolon ug espiritu, sa ato pa, napaubos tungod sa sala, ug walay pagbati sa pagpabili-sa-kaugalingon; sila ubos ug pagtamod sa ilang kaugalingon, ug walay pagsalig sa ilang kaugalingong bili.”

Kadtong “dugmok ug kasingkasing” o “masulub-on sa espiritu” tingali mobati nga halayo si Jehova ug nga sila walay importansiya mao nga si Jehova walay kahingawa kanila. Apan dili ingon niana ang kahimtang. Ang mga pulong ni David nagpasalig kanato nga si Jehova dili motalikod niadtong “ubos ug pagtamod sa ilang kaugalingon.” Ang atong mabinationg Diyos nasayod nga sa ingon nianang mga higayona kita nanginahanglan kaniya nga labaw pa kay sa kaniadto, ug siya anaa sa duol.

Tagda ang usa ka pananglitan. Pipila ka tuig kanhi usa ka inahan ang midalidali ug dala sa ospital sa iyang dos-anyos nga anak nga lalaki tungod kay nag-antos siya gikan sa grabeng hutoy. Human masusi ang bata, gipahibalo sa mga doktor ang inahan nga kinahanglan nilang ipaospital siya ug usa ka gabii. Diin ba nagpalabay sa maong gabii ang inahan? Diha sa usa ka bangko sa lawak sa ospital, tapad sa higdaan sa iyang anak nga lalaki. Nagsakit ang iyang gamayng bata, ug kinahanglan gayod nga anaa siya duol niya. Segurado nga kita makadahom ug labaw pa gikan sa atong mahigugmaong langitnong Amahan, kang kansang dagway kita gihimo! (Genesis 1:26; Isaias 49:15) Ang makapatandog nga mga pulong sa Salmo 34:18 nagpasalig kanato nga sa dihang kita “dugmok ug kasingkasing,” si Jehova, sama sa usa ka mahigugmaong ginikanan, “haduol”—kanunayng nagbantay, matinagdanon, ug andam sa pagtabang.—Salmo 147:1, 3.

“Nagabili Kamog Labaw sa Daghang Goriyon”

Sa panahon sa iyang yutan-ong ministeryo, si Jesus daghan ug gipadayag maylabot sa mga hunahuna ug mga pagbati ni Jehova, lakip kon unsay pagbati ni Jehova maylabot sa Iyang yutan-ong mga alagad. Sa makadaghang higayon, gipasaligan ni Jesus ang iyang mga tinun-an bahin sa ilang pagkabililhon sa mga mata ni Jehova.—Mateo 6:26; 12:12.

Pananglitan, sa pag-ilustrar sa indibiduwal nga bili sa matag usa sa iyang mga tinun-an, si Jesus miingon: “Dili ba ang duha ka goriyon mabaligya man ug usa ka sinsilyo nga gamayg bili? Bisan pa, walay usa kanila ang mahulog sa yuta nga walay kahibalo ang inyong Amahan. Gani ang mismong mga buhok sa inyong ulo naihap ang tanan. Busa ayawg kahadlok: nagabili kamog labaw sa daghang goriyon.” (Mateo 10:29-31) Hunahunaa kon unsa ka makahuloganon tingali niadtong mga pulonga sa unang-siglong mga mamiminaw ni Jesus.

Ang mga goriyon dayag nga lakip sa kinabaratohan sa tanang langgam nga kalan-on. Kining gagmayng mga langgam sagad nga gihimulbolan, gituhog sa mga tukog nga kahoy, ug giasal nga morag mga tinuhog sa hiniwang karne. Si Jesus sa walay duhaduha nakakita ug kabos nga mga babaye diha sa tiyanggihan nga nag-ihap sa ilang mga sensilyo sa pagtan-aw kon pila ka goriyon ang ilang mapalit. Ang mga langgam giisip nga gamay kaayog bili nga sa usa ka sensilyong gamayg bili (sa literal, usa ka assarion, mas ubos ug bili kay sa singko sentimos), ang usa ka tawo makapalit nag duha ka goriyon.

Gisubli pagsulti ni Jesus kini nga ilustrasyon sa usa ka panahon sa ulahi—apan may gamayng kalainan. Sumala sa Lucas 12:6, si Jesus miingon: “Ang lima ka goriyon ginabaligya sa duha ka sinsilyong gamayg bili, dili ba?” Hunahunaa kana. Sa usa ka sensilyong gamayg bili, ang tigpalit makakuhag duha ka goriyon. Apan kon siya andam nga mogastog duha ka sensilyo, siya makakuhag dili upat ka goriyon kondili lima. Ang ekstrang langgam ipakapin sa palitanay nga maora bag kini wala gayoy bili. “Bisan pa niana,” matod ni Jesus, “walay usa kanila [dili bisan ang usa nga gipakapin] nga mahikalimtan atubangan sa Diyos.” Sa pagpadapat sa ilustrasyon, si Jesus mihinapos: “Kamo labaw pa ug bili kay sa daghang goriyon.” (Lucas 12:7) Pagkamakapadasig gayod niadtong mga pulonga alang sa iyang mga mamiminaw!

Nakuha ba nimo ang punto sa makapalipay-sa-kasingkasing nga ilustrasyon ni Jesus? Kon si Jehova nag-isip bisan sa gagmayng mga langgam nga adunay bili, labaw na gayod nga gimahal niya ang iyang yutan-ong mga alagad! Para kang Jehova, kitang tanan may importansiya. Ang matag usa kanato adunay bili kang Jehova nga siya mohatag ug pagtagad bisan sa kinagamyang detalye labot kanato—ang mismong mga buhok sa atong mga ulo tagsatagsang giihap.

Siyempre, si Satanas magpadayon sa paggamit sa iyang “malipotong mga taktika”—sama sa pagpahimulos sa mga pagbati sa pagkawalay-bili—aron pahunongon kita sa pag-alagad kang Jehova. Apan ayaw tugoti nga modaog si Satanas! Hinumdomi ang Kristohanong babaye nga gikutlo sa sinugdanan. Siya natabangan sa usa ka artikulo sa magasing Bantayanang Torre nga nagpasidaan sa mga paningkamot ni Satanas sa pagpahimulos sa atong mga pagbati.a Matod niya: “Wala gayod ako makaamgo nga si Satanas nagtinguha sa paggamit sa akong mga pagbati aron paluyahon ako. Ang pagkasayod niini naghatag kanako sa panukmod sa pagpakigbugno niining mga pagbatia. Karon makasukol na ako niining satanikong mga pag-atake, uban ang pagsalig.”

Si Jehova “nahibalo sa tanang butang.” (1 Juan 3:20) Oo, siya nahibalo kon unsay atong ginaantos karon. Nahibalo usab siya kon unsay atong naagoman sa miagi nga mahimong nakadugmok sa atong pagtahod-sa-kaugalingon. Hinumdomi, ang panglantaw ni Jehova kanato mao ang hinungdanon! Bisan pag unsa ka dili-hiligugmaon o dili-bililhon sa ato tingaling paghunahuna sa atong kaugalingon, si Jehova nagpasalig kanato nga ang matag usa sa iyang mga alagad bililhon kaniya. Makasalig kita sa pulong ni Jehova, tungod kay, dili sama sa iyang Kaaway, ang Diyos “dili makabakak.”—Tito 1:2.

[Footnote]

[Blurb sa panid 12]

Sama sa usa ka mahigugmaong ginikanan, si Jehova haduol niadtong masulub-on sa kasingkasing

[Mga hulagway sa panid 13]

Kon si Jehova dili malimot sa goriyon, unsaon niya pagkalimot kanimo?

Credit Lines]

Lydekker

Illustrated Natural History