Ikaw Bililhon sa Panglantaw sa Diyos!
“Gihigugma ko ikaw sa usa ka gugma nga walay kataposan. Maoy hinungdan nga uban sa mahigugmaong-kalulot gidani ko ikaw.”—JEREMIAS 31:3.
1. Sa unsang paagi ang tinamdan ni Jesus sa komon nga mga tawo sa iyang adlaw lahi nianang sa mga Pariseo?
MAKITA nila kini sa iyang mga mata. Kining maong tawo, si Jesus, dili sama sa ilang relihiyosong mga lider; siya may kahangawa. Naluoy siya niining mga tawhana tungod kay sila “pinanitan ug binalibag samag mga karnero nga walay pastol.” (Mateo 9:36) Ang ilang relihiyosong mga lider angay untang mahimong mahigugmaong mga magbalantay nga naghawas sa usa ka mahigugmaon, maluluy-ong Diyos. Hinunoa, ilang gitamay ang komon nga mga tawo ingong musimos—ug tinunglo!a (Juan 7:47-49; itandi ang Ezekiel 34:4.) Tin-aw, ang maong tinuis, dili-kasulatanhong panglantaw lahi kaayo sa pag-isip ni Jehova sa iyang katawhan. Giingnan niya ang iyang nasod, ang Israel: “Gihigugma ko ikaw sa usa ka gugma nga walay kataposan.”—Jeremias 31:3.
2. Sa unsang paagi ang tulo ka kauban ni Job misulay sa pagpatuo kaniya nga siya walay-bili sa panglantaw sa Diyos?
2 Apan, ang mga Pariseo dili gayod mao ang unang nagpatuo sa hinigugmang mga karnero ni Jehova nga sila walay-bili. Tagda ang pananglitan ni Job. Alang kang Jehova siya matarong ug walay sala, apan ang tulo ka “tighupay” nagpasabot nga si Job maoy usa ka imoral, tuman-kadaotang apostata nga mamatay nga walay igabilin nga ebidensiya sa iyang paglungtad. Sila miinsister nga ang Diyos dili mopabili sa bisan unsang pagkamatarong sa bahin ni Job, sanglit ang Diyos wala mosalig bisan gani sa iyang kaugalingong mga manulonda ug nag-isip sa langit mismo nga mahugaw!—Job 1:8; 4:18; 15:15, 16; 18:17-19; 22:3.
3. Unsang paagi ang gigamit ni Satanas karong adlawa sa pagpaningkamot sa pagpatuo sa mga tawo nga sila dili-bililhon ug dili-hiligugmaon?
3 Karong adlawa, si Satanas nagagamit gihapon niining ‘malipatlipatong kaugdahan’ sa pagpaningkamot nga patuohon ang mga tawo nga sila wala higugmaa ug walay-bili. (Efeso 6:11, potnot) Tinuod, siya subsob nga nagahaylo sa mga tawo pinaagi sa pagtukbil sa ilang garbo. (2 Corinto 11:3) Apan siya usab malipay nga hugnoon ang pagtahod-sa-kaugalingon sa mga mahuyang. Kini ilabinang nahitabo niining malisod nga “kataposang mga adlaw.” Daghan karong adlawa nagatubo diha sa mga pamilya diin “walay kinaiyanhong pagbati”; daghan ang kinahanglang makiglabot matag adlaw niadtong mga mabangis, hakog, ug gahig-ulo. (2 Timoteo 3:1-5) Ang katuigan sa dili-maayong pagtratar, pagpihig sa rasa, pagdumot, o pag-abuso lagmit nagpatuo nianang mga tawhana nga sila walay-bili ug dili-hiligugmaon. Usa ka tawo ang misulat: “Dili ako mobati ug gugma kang bisan kinsa o mobati nga gihigugma ni bisan kinsa. Gilisdan ako sa pagtuo nga ang Diyos may kahangawa kanako.”
4, 5. (a) Nganong ang ideya sa personal nga pagkawalay-bili supak sa Kasulatan? (b) Unsa ang usa ka peligrosong sangpotanan sa atong pagtuo nga ang atong mga paningkamot walay-bili?
4 Ang ideya sa kawalay-bili sa kaugalingon molagbas sa kinauyokan sa kamatuoran sa Pulong sa Diyos, ang pagtulon-an sa lukat. (Juan 3:16) Kon ang Diyos mobayad ug taas kaayong bili—ang bililhong kinabuhi sa iyang kaugalingong Anak—sa pagpalit sa kahigayonan alang kanato nga mabuhi sa walay kataposan, sa pagkatinuod Siya nahigugma gayod kanato; sa pagkatinuod bililhon kita sa Iyang panglantaw!
5 Dugang pa, pagkamakapaluya ang pagbati nga kita wala makapahimuot sa Diyos, nga walay bisan usa sa atong mga paningkamot ang bililhon! (Itandi ang Proverbio 24:10.) Niining negatibong panglantaw, bisan ang maayog-tuyo nga pagdasig, nga gidesinyo sa pagtabang kanato nga pauswagon ang atong pag-alagad sa Diyos diin posible, tingali hunahunaon hinuon sa uban ingong pagsaway. Tingali mobanaag kini sa atong kaugalingong pagtuo nga bisan unsa ang atong himoon dili pa igo.
6. Unsa ang labing maayong tambal sa negatibo kaayong mga hunahuna bahin sa atong kaugalingon?
6 Kon namatikdan nimo ang maong negatibong mga pagbati sa imong kaugalingon, ayaw wad-a ang paglaom. Daghan kanato ang dili-makataronganong nagsaway sa atong kaugalingon matag karon ug unya. Ug hinumdomi, ang Pulong sa Diyos gidesinyo aron sa “pagtul-id sa mga butang” ug sa “pagpamukan sa lig-on pagkatarok nga mga butang.” (2 Timoteo 3:16; 2 Corinto 10:4) Si apostol Juan misulat: “Pinaagi niini atong mahibaloan nga kita nagagikan sa kamatuoran, ug atong mapasaligan ang atong mga kasingkasing atubangan kaniya bahin sa bisan unsa nga ang atong mga kasingkasing mahimong maghusga kanato, tungod kay ang Diyos mas labaw kay sa atong mga kasingkasing ug nahibalo sa tanang butang.” (1 Juan 3:19, 20) Nan, tagdon nato ang tulo ka paagi diin ang Bibliya nagtudlo kanato nga kita bililhon kang Jehova.
Gipabilhan Ka ni Jehova
7. Sa unsang paagi gitudloan ni Jesus ang tanang Kristohanon mahitungod sa ilang bili sa panglantaw sa Diyos?
7 Una, ang Bibliya direktang nagtudlo nga ang matag usa kanato bililhon sa panglantaw sa Diyos. Si Jesus miingon: “Ang lima ka goriyon ginabaligya sa duha ka sinsilyong gamayg bili, dili ba? Bisan pa niana walay usa kanila nga mahikalimtan atubangan sa Diyos. Apan bisan ang mga buhok sa inyong mga ulo naihap ang tanan. Ayawg kahadlok; kamo labaw pa ug bili kay sa daghang goriyon.” (Lucas 12:6, 7) Niadtong mga adlawa, ang goriyon mao ang kinabaratohan sa mga langgam nga gibaligya ingong pagkaon, apan walay usa kanila ang wala mamatikdi sa Maglalalang niini. Sa ingon ang patukoranan natukod alang sa usa ka talagsaong kalainan: Maylabot sa mga tawo—kinsa labaw kaayo ug bili—nasayran sa Diyos ang tanang detalye. Sama ra nga ang mga buhok sa atong mga ulo naihap nga tagsatagsa!
8. Nganong makataronganon ang paghunahuna nga si Jehova makaihap sa mga buhok sa atong mga ulo?
8 Ang mga buhok naihap? Kon ikaw nagduhaduha nga kining bahina sa ilustrasyon ni Jesus dili tinuod, hunahunaa: Ang Diyos nahinumdom pag-ayo sa iyang matinumanong mga alagad nga siya makabanhaw kanila—nga maglalang kanila pag-usab sa tanang detalye, lakip na sa ilang makuti nga mga genetic code ug sa tanan nilang mga tuig sa mga handumanan ug mga kasinatian. Ang pag-ihap sa atong mga buhok (nga ang aberids nga ulo magpatubo ug mga 100,000) maoy yanong katakos kon itandi!—Lucas 20:37, 38.
Unsay Atong Bili sa Panglantaw ni Jehova?
9. (a) Unsa ang pipila ka hiyas nga ginapabilhan ni Jehova? (b) Nganong ikaw naghunahuna nga ang maong mga hiyas bililhon kaniya?
9 Ikaduha, ang Bibliya nagtudlo kanato kon unsay ginapabilhan ni Jehova diha kanato. Sa yanong pagkasulti, siya mahimuot sa atong positibong mga hiyas ug sa atong mga paningkamot. Giingnan ni Haring David ang iyang anak nga si Solomon: “Nagasusi si Jehova sa tanang kasingkasing, ug siya nakasabot sa tanang hilig sa mga hunahuna.” (1 Cronicas 28:9) Samtang ang Diyos nagasusi sa binilyong tawhanong kasingkasing niining mapintas, punog-pagdumot nga kalibotan, pagkamalipayon niya sa dihang iyang makaplagan ang usa ka kasingkasing nga nahigugma sa kalinaw, kamatuoran, ug pagkamatarong! (Itandi ang Juan 1:47; 1 Pedro 3:4.) Unsay mahitabo sa dihang ang Diyos makakaplag ug kasingkasing nga napuno sa gugma alang kaniya, nga naningkamot sa pagkat-on bahin kaniya ug makig-ambit sa maong kahibalo sa uban? Sa Malakias 3:16, si Jehova nagtug-an kanato nga siya nagapamati niadtong nagasulti sa uban bahin kaniya ug aduna pa gani “usa ka basahon sa handomanan” alang sa tanan “niadtong may kahadlok kang Jehova ug alang niadtong nagapalandong sa iyang ngalan.” Ang maong mga hiyas bililhon kaniya!
10, 11. (a) Sa unsang paagi ang pipila mokiling sa pagsalikway sa pamatuod nga pabilhan ni Jehova ang ilang maayong mga hiyas? (b) Sa unsang paagi ang panig-ingnan ni Abijah nagpakita nga si Jehova nagpabili sa bisan unsang sukod sa maayong mga hiyas?
10 Apan, ang nagahukom-sa-kaugalingon nga kasingkasing, mahimong makigbisog sa maong ebidensiya sa atong bili sa panglantaw sa Diyos. Kini tingali kanunayng mohunghong, ‘Apan adunay daghan pang uban nga mas sulundan pa sa maong mga hiyas kay kanako. Mahigawad gayod si Jehova kon itandi ko niya kanila!’ Si Jehova dili magatandi sa iyang mga alagad, ni siya may mapig-ot nga mga sukdanan. (Galacia 6:4) Maoy uban sa dakong kaalam nga siya nagabasa sa mga kasingkasing, ug siya nagapabili sa maayong mga hiyas sa bisan unsang sukod.
11 Pananglitan, sa dihang si Jehova nagsugo nga ang tibuok apostatang kaliwat ni Haring Jeroboam pagalaglagon, pagapaphaon samag “kinalibang,” Siya mimando nga usa lamang sa mga anak lalaki sa hari, si Abijah, ang hatagan ug desenteng paglubong. Ngano? “Ang usa ka maayong butang ngadto kang Jehova nga Diyos sa Israel nakaplagan diha kaniya.” (1 Hari 14:10, 13) Nagkahulogan ba kini nga si Abijah maoy usa ka matinumanong magsisimba ni Jehova? Dili sa ingon niana, sanglit siya namatay, sama ra sa uban sa iyang tuman-kadaotang panimalay. (Deuteronomio 24:16) Sa gihapon, si Jehova nagpabili sa “usa ka maayong butang” nga iyang nakita sa kasingkasing ni Abijah ug milihok sumala niana. Ang Matthew Henry’s Commentary on the Whole Bible nag-ingon: “Diin adunay diyutay nga maayong butang, kini makaplagan: ang Diyos nga nangita niana, makakita niana, bisan ug gamay ra kaayo kana, ug nahimuot niana.” Ug ayaw kalimot nga kon ang Diyos makakaplag ug bisan gamay kaayong maayong hiyas diha kanimo, mapatubo niya kana basta maningkamot ka sa pag-alagad kaniya nga matinumanon.
12, 13. (a) Sa unsang paagi gipakita sa Salmo 139:3 nga si Jehova nagpabili sa atong mga paningkamot? (b) Sa unsang diwa ikaingon nga si Jehova nagasusi sa atong mga kalihokan?
12 Pabilhan ni Jehova ang atong mga paningkamot sa samang paagi. Sa Salmo 139:1-3, atong mabasa: “Oh Jehova, ikaw nakasusi kanako, ug ikaw nahibalo kanako. Ikaw mismo nahibalo sa akong paglingkod ug sa akong pagtindog. Imong gipalandong ang akong hunahuna gikan sa halayo. Ang akong panaw ug ang akong paghigda imong ginasukod, ug ikaw nasinati bisan sa tanan kong mga dalan.” Busa si Jehova nakamatikod sa tanan natong mga kalihokan. Apan ang pagkamatikod ni Jehova misaylo pa sa pagkaamgo lamang niana. Sa Hebreohanon ang praseng “ikaw nasinati bisan sa tanan kong mga dalan” mahimong nagdala usab sa kahulogang “imong gihimong bililhon ang tanan kong mga dalan” o “imong gimahal ang tanan kong mga dalan.” (Itandi ang Mateo 6:19, 20.) Apan, sa unsang paagi si Jehova magamahal sa atong mga dalan sa dihang kita dili hingpit ug makasasala?
13 Makaiikag, sumala sa pipila ka eskolar, sa dihang si David misulat nga “gisukod” ni Jehova ang iyang mga panaw ug mga yugto sa pagpahulay, ang Hebreohanon sa literal nagkahulogan ug “pag-ayag” o “pagtahop.” Usa ka reperensiya nag-ingon: “Kini nagkahulogang . . . pag-ayag aron pagpagawas sa tanang tahop, ug pagbilin sa tanang lugas—pagbilin sa tanang bililhon. Busa dinhi kini nagkahulogan nga ang Diyos, sa mahulagwayong pagkasulti, nag-ayag kaniya. . . . Iyang gikatag ang tanang tahop, o ang tanang walay bili, ug gitino nga ang nahibilin maoy tinuod ug hinungdanon.” Ang mahukmanon-sa-kaugalingon nga kasingkasing mahimong mag-ayag sa atong mga buhat sa kaatbang nga paagi, nga magbadlong kanato nga way-kukaluoy gumikan sa miaging mga sala ug mag-isip nga walay bili ang atong mga kalamposan. Apan si Jehova mopasaylo sa atong mga sala kon kita sinserong maghinulsol ug maningkamot nga dili na usbon ang atong mga sayop. (Salmo 103:10-14; Buhat 3:19) Siya magasusi ug magahinumdom sa atong maayong mga buhat. Sa pagkatinuod, siya magahinumdom niini hangtod sa hangtod basta kita magpabiling matinumanon kaniya. Ang paghikalimot niana isipon niya nga pagkadili-matarong, ug siya matarong gayod!—Hebreohanon 6:10.
14. Unsay nagpakita nga si Jehova nagpabili sa atong kalihokan diha sa Kristohanong ministeryo?
14 Unsa ang pipila sa maayong mga buhat nga pabilhan sa Diyos? Halos tanan nga atong himoon sa pagsundog sa iyang Anak, si Jesu-Kristo. (1 Pedro 2:21) Nan, tino nga ang usa ka hinungdanon kaayong buluhaton mao ang pagpakaylap sa maayong balita sa Gingharian sa Diyos. Sa Roma 10:15, atong mabasa: “Pagkatahom sa mga tiil niadtong mga nagapahayag sa maayong balita sa maayong mga butang!” Bisan tingali dili nato kasagarang hunahunaon ang atong ordinaryong mga tiil nga “matahom,” ang pulong nga gigamit ni Pablo dinhi sama sa pulong nga gigamit sa Gregong Septuagint nga hubad sa pagbatbat kang Rebecca, Raquel, ug Jose—ngatanan nailhan sa ilang katahom. (Genesis 26:7; 29:17; 39:6) Busa ang atong pagpakig-ambit sa pag-alagad sa atong Diyos, si Jehova, maoy matahom kaayo ug bililhon sa iyang panglantaw.—Mateo 24:14; 28:19, 20.
15, 16. Nganong si Jehova nagpabili sa atong pagkamalahutayon, ug sa unsang paagi ang mga pulong ni Haring David sa Salmo 56:8 nagpasiugda niining maong kamatuoran?
15 Ang laing hiyas nga pabilhan sa Diyos mao ang atong pagkamalahutayon. (Mateo 24:13) Hinumdomi, buot ni Satanas nga mobiya ka kang Jehova. Matag adlaw nga ikaw nagpabiling maunongon kang Jehova maoy laing adlaw nga ikaw nakatabang sa pagtaganag tubag sa mga pagbiaybiay ni Satanas. (Proverbio 27:11) Usahay ang pagkamalahutayon lisod kaayo. Ang mga suliran sa panglawas, mga suliran sa panalapi, emosyonal nga kalisdanan, ug ubang mga babag magahimo sa matag adlaw nga molabay nga usa ka pagsulay. Ang paglahutay atubangan sa maong mga pagsulay ilabinang bililhon kang Jehova. Mao kanay hinungdan nga si Haring David mihangyo kang Jehova nga tigomon ang iyang mga luha sa usa ka mahulagwayong “panit nga botelya,” nga masaligong nangutana, “Wala ba sila diha sa imong basahon?” (Salmo 56:8) Oo, pabilhan ni Jehova ug hinumdoman ang tanang luha ug pag-antos nga atong giagwanta sa paghupot sa atong pagkamaunongon kaniya. Kini usab bililhon sa iyang panglantaw.
16 Tungod sa atong maayong mga hiyas ug sa atong mga paningkamot, pagkatin-aw gayod nga si Jehova daghag makaplagan nga pabilhan diha sa matag usa kanato! Bisan giunsa kita pagtratar sa kalibotan ni Satanas, si Jehova nag-isip kanato ingong bililhon ug bahin sa “tilinguhaong mga butang sa tanang nasod.”—Hageo 2:7.
Kon Unsay Gihimo ni Jehova sa Pagpasundayag sa Iyang Gugma
17. Nganong ang halad lukat ni Kristo angay magpatuo kanato nga si Jehova ug Jesus nahigugma sa matag usa kanato?
17 Ikatulo, dako ug gihimo si Jehova sa pagpamatuod sa iyang gugma kanato. Sa pagkatinuod, ang halad-lukat ni Kristo mao ang labing epektibong tubag sa satanasnong bakak nga kita walay-bili o dili-hiligugmaon. Dili gayod nato hikalimtan nga ang masakit nga kamatayon nga giantos ni Jesus sa sakitanang estaka ug ang mas dako pang kasakit nga giantos ni Jehova sa pagtan-aw sa kamatayon sa iyang Anak nga hinigugma maoy pamatuod sa ilang gugma kanato. Dugang pa, ang maong gugma mapadapat kanato sa personal. Mao kanay paglantaw ni apostol Pablo niana, kay siya misulat: “Ang Anak sa Diyos . . . nahigugma kanako ug nagtugyan sa iyang kaugalingon alang kanako.”—Galacia 2:20.
18. Sa unsang diwa nga si Jehova nagdani kanato ngadto kang Kristo?
18 Gipamatud-an ni Jehova ang iyang gugma alang kanato pinaagi sa pagtabang sa matag usa kanato nga makapahimulos sa mga kaayohan sa halad ni Kristo. Si Jesus miingon sa Juan 6:44: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” Pinaagi sa buluhatong pagsangyaw, nga nakaabot sa matag usa kanato, ug pinaagi sa iyang balaang espiritu, nga gigamit ni Jehova sa pagtabang kanato sa pagsabot ug pagpadapat sa espirituwal nga mga kamatuoran bisan pa sa atong mga limitasyon ug pagkadili-hingpit, si Jehova personal nga nagadani kanato ngadto sa iyang Anak ug sa paglaom nga kinabuhing walay kataposan. Busa si Jehova makaingon bahin kanato sama sa iyang gisulti sa Israel: “Gihigugma ko ikaw sa usa ka gugma nga walay kataposan. Maoy hinungdan nga uban sa mahigugmaong-kalulot gidani ko ikaw.”—Jeremias 31:3.
19. Nganong ang pribilehiyo sa pag-ampo angayng magpatuo kanato sa personal nga gugma ni Jehova kanato?
19 Hinuon, maoy pinaagi tingali sa pribilehiyo sa pag-ampo nga kita makasinati sa gugma ni Jehova sa labing suod nga paagi. Siya nagadapit sa matag usa kanato sa “pag-ampo kanunay” kaniya. (1 Tesalonica 5:17) Siya nagapamati! Gitawag pa gani siya nga “Tigpatalinghog sa pag-ampo.” (Salmo 65:2) Wala niya itugyan kining maong katungdanan sa laing persona, bisan gani sa iyang kaugalingong Anak. Hunahunaa lang: Ang Maglalalang sa uniberso nag-awhag kanato sa pagduol kaniya diha sa pag-ampo, uban ang kagawasnon sa pagsulti. Ang imong mga pangaliyupo mahimong magtukmod kang Jehova sa pagbuhat sa kon unsay dili unta niya himoon.—Hebreohanon 4:16; Santiago 5:16; tan-awa ang Isaias 38:1-16.
20. Nganong ang gugma sa Diyos kanato dili katarongan sa pagpakaimportante sa kaugalingon o pagkamahunahunaon-sa-kaugalingon sa atong bahin?
20 Walay timbang nga Kristohanon ang mag-isip sa maong pamatuod sa gugma ug pagtahod sa Diyos ingon nga pasangil sa pag-isip sa iyang kaugalingon nga labi pang hinungdanon kay sa kon unsa gayod siya. Si Pablo misulat: “Pinaagi sa dili-takos nga kalulot nga gihatag kanako ako magasulti sa tanan dinha taliwala kaninyo nga dili maghunahunag labaw bahin sa iyang kaugalingon kay sa gikinahanglan nga pagahunahunaon; apan sa paghunahuna sa paaging batonan ang mabuot nga panghunahuna, ang matag usa sumala sa giapod sa Diyos ngadto kaniya nga sukod sa pagtuo.” (Roma 12:3) Busa bisan tuod kita nagapahimulos sa kainit sa gugma sa atong langitnong Amahan, magmabuot kita sa hunahuna ug magahinumdom nga ang mahigugmaong-kalulot sa Diyos maoy dili takos.—Itandi ang Lucas 17:10.
21. Unsang satanasnong bakak ang padayon natong pakigbisogan, ug unsang kamatuoran sa Diyos ang ato gayong palandongon?
21 Pasagding ang matag usa kanato mohimo sa tanan nga maarangan sa pagsalikway sa tanang ideya nga gipasiugda ni Satanas niining himalatyong daang kalibotan. Kana nag-apil sa pagsalikway sa hunahuna nga kita walay bili o wala higugmaa. Kon ang kinabuhi niining sistemaha nagtudlo kanimo nga lantawon ang imong kaugalingon ingong babag nga lisod buntogon bisan sa dakong gugma sa Diyos, o ang imong maayong mga buhat nga dili gayod hinungdanon nga dili makita sa iyang makakita-sa-tanan nga mga mata, o ang imong mga sala dako ra kaayo nga tabonan bisan sa kamatayon sa iyang bililhong Anak, ikaw gitudloan ug usa ka bakak. Isalikway ang maong mga bakak uban sa tanang pagdumot nga angay niana! Hinumdoman nato kanunay ang dinasig nga mga pulong ni apostol Pablo sa Roma 8:38, 39: “Ako kombinsido nga dili ang kamatayon ni kinabuhi ni mga anghel ni mga kagamhanan ni mga butang nga ania karon ni mga butang nga moabot ni mga gahom ni gihabogon ni giladmon ni bisan unsang ubang linalang ang makahimo sa pagbulag kanato gikan sa gugma sa Diyos nga anaa kang Kristo Jesus nga atong Ginoo.”
[Footnote]
a Sa pagkatinuod, ilang gisalikway ang mga kabos pinaagi sa mabiaybiayong termino nga “ʽam-ha·ʼaʹrets,” o “katawhan sa yuta.” Sumala sa usa ka eskolar, ang mga Pariseo nagtudlo nga kinahanglang dili saligan sa usa kining mga kabos sa bililhong mga butang, ni saligan ang ilang testimoniya, ni abiabihon sila ingong mga bisita, ni mahimong ilang mga bisita, ni mopalit gikan kanila. Ang relihiyosong mga lider miingon nga ang pagpakigminyo sa anak babaye sa usa ngadto sa usa niining mga tawhana sama ra nga gipatara siya nga ginapos ug walay-panalipod sa usa ka mapintas nga mananap.
Unsay Imong Hunahuna?
◻ Nganong si Satanas naningkamot sa pagpatuo kanato nga kita walay-bili ug wala higugmaa?
◻ Sa unsang paagi nagtudlo si Jesus nga si Jehova nagpabili sa matag usa kanato?
◻ Sa unsang paagi kita nahibalo nga si Jehova nagpabili sa atong maayong mga hiyas?
◻ Sa unsang paagi kita makaseguro nga si Jehova nagpabili sa atong mga paningkamot?
◻ Sa unsang paagi si Jehova nagpamatuod sa iyang gugma kanato ingong mga indibiduwal?
[Hulagway sa panid 13]
Si Jehova nagasud-ong ug nagahinumdom niadtong tanan nga nagahunahuna sa iyang ngalan