Komportable Bang Isul-ob ang Imong Sapatos?

“Kon haing dapita sa sapatos ang makapasakit sa tiil, ang nagsul-ob ray nasayod.”—GITUOHANG GISULTI SA USA KA ROMANONG MANGGIALAMON.

KANUS-A ang kataposang higayon nga mipalit ka ug sapatos? Sakar ba kaayo kini sa imong tiil? Komportable ba kini? Unsa ka dugay kang nakadesisyon sa pagpalit niini? Unsa ka matinabangon ang tindera o tigsukod? Gipalit ba nimo kini tungod sa disenyo ug dili tungod sa pagkakomportable niini? Komosta ang pagkasigo niini karon nga dugaydugay na nimo kining gisul-ob? Duna bay parte sa imong tiil nga mosakit inigsul-ob nimo niini?

Dili sayon ang pagpalit ug sapatos. Ug lisod mangitag hustong sukod sa sapatos. Ngano man?

Kuhaa ang Hustong Sukod

Una sa tanan, haing tiila ang mas dako​—ang tuo o wala? Nagtuo ka ba nga parehas ug sukod kining duha? Hunahunaa pag-usab! Ang laing butang nga angayng hunahunaon mao nga ang tagsa ka tiil dunay upat ka matang sa pagsukod: sukod samtang naglingkod, sukod samtang nagtindog, sukod samtang naglihok, ug sukod samtang maladlad sa lainlaing temperatura. Unsa ang mga kalainan niini?

Mahitungod sa sukod samtang naglingkod, ang librong Professional Shoe Fitting nag-ingon: “Mao kini ang sukod sa sapatos samtang relaks ang tiil (ang kustomer naglingkod).” Sumala sa gipadayag sa ekspresyong “sukod samtang nagtindog,” kini maoy pagsukod samtang ang tawo nagbarog. Kining maong posisyon mousab sa gidak-on ug porma sa tiil. Ang mao gihapong libro nag-ingon: “Ang tiil nga nagpahulay maoy tiil nga relaks ang mga bukog ug cartilage nga kalit lang manghugot inigtindog, busa ang tiil nagkinahanglan ug laing sukod sa sapatos.” Apan duna pay duha ka laing mga pagsukod.

Ang sukod samtang naglihok maoy sukod samtang ang usa aktibo​—naglakaw, nagdagan, naglukso, o nag-ehersisyo. “Ang tiil duna nay lahing kombinasyon sa gidak-on, porma ug mga proporsiyon.” Ang ikaupat nga pagsukod maoy samtang ang tiil maladlad sa lainlaing temperatura, nga nagtumong sa kausaban sa sukod sa tiil tungod sa kainit ug kaumog. Modako ug 5 porsiyento ang tiil tungod niini. Dili ikahibulong nga mahupayan ka inighubo nimo sa imong sapatos inigkahapon, ilabina kon guot kini! Ug kasagaran mao gayod kanay mahitabo.

Giunsa Pagsukod ang Imong Tiil?

Sa daghang tuig si Eric nagpalit ug sapatos nga ang sukod maoy 10 ug tunga o 11, nga medyum ang gilapdon. Sulod nianang panahona, nahasol siya sa kalyo sa iyang nabawog nga tudlo ug sa kuko nga mitubo pasulod sa unod sa walang kumagko. Ang iyang doktor sa tiil misugyot nga ipasukod ang iyang tiil sa usa ka propesyonal nga tigsukod ug sapatos. Sa kakurat ni Eric, ang iya diayng eksaktong sukod maoy 12 ug tunga, nga A ang gilapdon! Ang “A” nagpasabot ug niwang nga tiil. Apan kining duha ka pagsukod, sa gitas-on ug gilapdon, igo na ba sa pagseguro nga mao na kini ang imong hustong sukod? Unsaon nimo pagsukod sa imong tiil?

Ang kasagarang galamiton diha sa pipila ka nasod sa pagtino sa sukod sa tiil mao ang himang Brannock. (Tan-awa ang hulagway.) Magamit kini sa pagkuha sa tulo ka pangunang mga sukod: ang bug-os nga gitas-on sa tiil, ang distansiya gikan sa tikod ngadto sa ugdo-ugdo sa lapalapa duol sa mga tudlo, ug ang gilapdon sa ugdo-ugdo. Apan, siyempre, ang kada tiil dunay kaugalingong porma ug gibag-on. Mao kana ang dayag nga rason kon nganong atong isukod ang sapatos sa dili pa nato kini paliton. Niining bahina tingali kita matental sa paghimog sayop nga desisyon. Nakasulay ka na ba sa pagsukod sa sapatos nga imong giangayan pag-ayo, ugaling lang imong nadiskobrehan nga kini medyo guot? “Moinat pa ang sapatos,” miingon ang tindero. Gipalit nimo kini ug nagmahay ka pipila ka adlaw o mga semana human nimo kini isul-ob. Ug tuboan ka na usab ug kalyo, ingrown nga kuko, o butoy sa unang lutahan sa kumagko!

Ang Imo Bang Sapatos Eksakto Gayod ug Sukod?

Posible kahang makakita ug sapatos nga eksakto gayod kanimog sukod? Ang Professional Shoe Fitting deretsong mitubag nga dili. Nganong dili man? “Tungod sa daghang dagko kaayong mga kakulian. . . . Walay tawo nga ang duha ka tiil parehas gayod ug gidak-on, porma, mga proporsiyon o paggamit.” Busa kon ang usa ka sapatos eksakto gayod sa imong mas dakong tiil, dili kini mosibo sa imong laing tiil. “Wala kini magpasabot nga imposibleng mabatonan ang maayong sukod, kondili kinahanglang mag-amping lang kita bahin sa paggamit sa termino o ideya nga ‘eksakto gayod’ nga sukod.”

Kon gusto nimong mahibaloan kon diing dapita sa sapatos ang giduot sa imong tiil, susiha ang imong daan, ginamit nang mga sapatos. Tan-awa ang aporo sa sulod sa sapatos. Diing dapita ang imong namatikdan nga mas pudpod na? Ang kanunayng mapudpod mao ang tumbanan sa tikod, luyo nga bahin sa tikod, ug ang gidapatan sa ugdo-ugdo sa lapalapa duol sa mga tudlo. Unsay ipasabot niini? Kini nagpasabot nga “ang pipila ka bahin sa sapatos dili gayod eksaktong pagkasukod sa katugbang nga mga bahin sa tiil. Ang ubang mga bahin pudpod na kaayo samtang ang ubang bahin halos wala maunsa.”

Bisan ang entrada sa sapatos hinungdanon aron komportableng isul-ob. Nakamatikod ka ba nga ang mga sapatos dunay lainlaing mga estilo sa throat line? Sa estilong bal, ang masigkakilid sa sapatos mohugot duol sa mga tudlo. Apan, kon ikaw tambokon ug tiil, nan mas komportable ang estilong blucher, tungod kay ang masigkakilid dili mohugot duol sa mga tudlo. (Tan-awa ang dayagram.) Nganong hinungdanon man kining maong detalye? Ang mao gihapong libro nag-ingon: “Ang tikod kasagarang maluthan tungod sa huot kaayong entrada sa sapatos, nga magduso sa imong tikod diha sa tikodtikod sa sapatos.”

Komosta ang Bahin sa Tag-as-ug-Takon nga Sapatos sa mga Babaye?

Ang pagkahilig sa mga babaye ug tag-as nga mga takon mohatag ug lainlaing kahago sa lawas. Ang tag-as nga mga takon makapayuko sa lawas nga tungod niini ang tuhod mobawog aron mabawi ang pagyuko sa lawas. Tungod sa tag-as nga mga takon mangusog ang mga kaunoran sa bagtak, ug busa mas maklaro kini.

Busa, ang takon sagad maoy hinungdanong bahin sa sapatos sa babaye ug niini magdepende kon komportable ba o dili ang iyang tiil. Ang Professional Shoe Fitting nag-ingon nga dunay tulo ka pangunang mga rason sa tag-as nga mga takon sa sapatos: ‘(1) “pamarog,” para mas motaas ang magsul-ob, (2) dekorasyon​—gidugang nga disenyo o estilo diha sa sapatos, ug (3) mas nindot tan-awon​—ang tag-as nga mga takon sa sapatos sa babaye mas makapanindot sa porma sa mga bitiis.’

Ang mga babaye kinahanglang magbantay gayod sa gitas-on sa handag sa takon, nga maoy magtino kon asang dapita sa takon ang magdala sa gibug-aton sa lawas. Peligroso kon ang gibug-aton matunong diha sa luyo o unahang ngilit sa takon. Ngano man? Kay basin maputol ang takon ug ikaw matumba ug masamdan.

Niining mubo nga panaghisgot, dayag nga ang pagkuhag eksaktong sukod sa sapatos nagkinahanglag panahon ug tingali mokostar ug dako, kay ang paggama ug usa ka maayong sapatos nagkinahanglan ug dakong panahon. Apan ang imong sapatos makaapektar gayod sa imong komportableng pagbati ug bisan sa imong panglawas. Busa ayaw pagdali. Kuhaa ang hustong sukod sa imong tiil. Magmapailobon. Ayaw palimbong sa uso o dagway sa sapatos.

[Kahon sa panid 20]

Mga Butang nga Pagatagdon sa Dihang Mopilig Sapatos

Si William A. Rossi ug Ross Tennant mihatag niining mosunod nga mga sugyot diha sa ilang librong Professional Shoe Fitting.

“Ang tuyo sa pagsukod sa tiil maoy dili aron mahibaloan ang eksaktong sukod sa sapatos nga gikinahanglan, nga mao tingali ang hunahuna sa uban.” Ngano man? Tungod kay ang mga sukod sa sapatos maapektohan sa daghang butang, sama sa gitas-on sa takon, disenyo, mga porma, materyales nga gigamit, ug tatak. Tinuod gayod kini karon tungod kay ang mga sapatos gigama diha sa daghan kaayong mga nasod nga may lainlaing mga sukdanan.

Sa dihang sukdon ang imong tiil, bitara paunahan ang dapit sa tudlo nga bahin sa medyas o estaking aron dili mobawog ang mga tudlo, nga moresulta sa sayop nga pagsukod.

Sa unsang paagi angayng sukdon ang imong tiil​—samtang ikaw naglingkod o nagbarog? “Ang pagsukod samtang naglingkod ang kustomer maoy tinapolan nga paagi.” Moresulta kinig sayop nga sukod. Busa, tindog sa dihang sukdon ang imong tiil. Oo, ang duha ka tiil. Ayaw hunahunaa nga mas dako ang walang tiil. Sukda ang duha ka tiil!

“Ang propesyonal nga paagi sa pagsukod ug sapatos maoy usa ka abilidad ug serbisyo nga giespesyalisar sa gibansay pag-ayong grupo sa mga tawo nga konektado sa daghan kaayong nangunang mga tindahan kinsa nakasabot ug nakaila sa kahinungdanon sa hanas kaayong paagi sa pagsukod ug sapatos.”

[Mga diagram sa panid 19]

(Alang sa aktuwal nga pagkahan-ay, tan-awa ang publikasyon)

Mga bahin sa sapatos

lapalapa

vamp

entrada

aporo

heel breast

top lift

tumoy

suylas

ribete

vamp

throat line

tongue bar

quarter

heel pad

takon

[Mga hulagway sa panid 20]

Ang himang Brannock

[Hulagway sa panid 21]

Ang tanang disenyo sa sapatos gibase niining pito ka pangunang mga estilo

[Mga hulagway sa panid 21]

Mga estilo sa throat line

Blucher

Bal