Kapitulo 14

Ikaw ug ang Bibliya

Ang modernong mga mananaway miingon nga ang Bibliya dili siyentipikonhon ug nagkasumpaki, nga kini katigoman lamang sa mga tinumutumo. Si Jesus, sa laing bahin, miingon: “Ang imong [Diyos] pulong mao ang kamatuoran.” (Juan 17:​17) Ang ebidensiya nagpaluyo kang Jesus inay kay sa mga mananaway. Ang kamatuoran nagpakita nga ang Bibliya matinud-anon sa kasaysayan. Dugang pa, ang kahibudnganang harmonya niini, ang matuod nga mga tagna niini, ang lalom nga kaalam niini, ug ang gahum niini alang sa maayo sa kinabuhi sa katawhan tanan nagpasundayag nga ang Bibliya mao ang sinulat nga Pulong sa Diyos. Sama sa gisulat ni apostol Pablo: “Ang tanang Kasulatan gidasig sa Diyos ug mapuslanon.”​—2 Timoteo 3:16.

 1. (Ilakip ang introduksiyon.) (a) Unsa ang gipamatud-an sa kamatuoran mahitungod sa Bibliya? (b) Unsa ang gipasabot sa kamatuoran nga ang Bibliya mao ang dinasig nga Pulong sa Diyos?

ANG kamatuoran nga ang Bibliya mao ang pulong sa Diyos, dili sa tawo, may lalom nga kahulogan. Kini nagkahulogan nga ang Diyos sa pagkamatuod nakigkomunikar sa mga tawo. Siya nakatubag sa daghan sa atong mga pangutana ug nakapakita sa solusyon sa daghan sa atong mga suliran. Kini usab nagkahulogan nga ang mga paglaom alang sa umaabot nga gibatbat sa Bibliya matuod. Ang Gingharian sa Diyos sa pagkamatuod nagmando ug sa igong panahon molihok sa pagwagtang niining yuta sa tanang inhustisya, pagdaogdaog, ug pag-antos.

 2. Ang kahibalo nga ang Bibliya mao ang Pulong sa Diyos kinahanglan mopalihok kanimo sa pagbuhat sa unsa?

² Karon, ang pangutana mao: Unsa man ang imong himoon sa impormasyon? Sa labing kubos, ang kahibalo nga ang Bibliya mao ang Pulong sa Diyos modasig kanimo sa pagsud-ong niini. Ang salmista misaad ug kalipay alang niadtong kinsa mobuhat niana sa dihang siya misulat: “Malipayon ang tawo nga wala maglakaw sa tambag sa mga daotan . . . apan ang iyang kalipay anaa sa kasugoan ni Jehova, ug sa iyang kasugoan siya nagbasa sa ubos nga tingog adlaw ug gabii.”​—Salmo 1:​1, 2.

Dawata ang Tabang

 3, 4. (a) Sama sa gipakita mismo sa Bibliya, unsa ang kinahanglan buhaton nato kon makakaplag kita ug mga butang sa Bibliya nga dili nato masabtan? (b) Kinsa ang kanunay sugot sa pagtabang sa katawhan sa mas maayong pagsabot sa Bibliya?

³ Lagmit nga sa imong pagbasa sa Bibliya, makaplagan nimo ang mga butang dili nimo masabtan. (2 Pedro 3:16) Ang usa ka hitabo nga girekord sa basahon sa mga Buhat sa Bibliya nagpakita nga kini dahoman. Wala madugay human sa kamatayon ni Jesus, ang usa ka Etiopiahanon nagbasa sa mga tagna sa basahon ni Isaias sa Bibliya. Ang Kristohanong ebanghelista nga si Felipe miduol sa lalaki ug nangutana: “Nakasabot ka ba sa imong ginabasa?” Ang Etiopiahanon wala, busa gidapit niya si Felipe sa pagtabang kaniya sa pagsabot.​—Buhat 8:​30, 31.

⁴ Ang usa ka babaye sa Tinipong Bansa naa sa susamang kahimtang. Siya makanunayon nga nagbasa sa Bibliya ug wala siya makasabot sa iyang kaugalingong pagbasa. Diha lamang nga siya nakighisgot uban sa mga Saksi ni Jehova nga siya nakakat-on sa pasukaranang mga kamatuoran sa Bibliya, lakip sa importansiya sa Gingharian sa Diyos ug sa daghang mga panalangin nga dad-on nianang Gingharian sa katawhan. Kon dapiton nimo sila, ang mga Saksi ni Jehova magmalipayon sa pagtabang kanimo usab aron masabtan nimo kon unsa ang gibasa nimo sa Bibliya.

Ipadapat ang Tambag sa Bibliya

 5. Sumala sa Bibliya, unsang kurso ang magdalag kalipay?

⁵ Gidasig kita dili lamang sa pagbasa sa Bibliya apan usab sa paglihok sa kon unsa ang atong nabasa. (Salmo 119:2) Dugang pa, ang Bibliya nagdasig: “Tilawi ug tan-awa nga si Jehova maayo, O kamong katawhan; malipayon ang tawo nga lig-on-lawas nga modangop kaniya.” (Salmo 34:8) Sa epekto, kini nagdapit kanato sa pagbutang sa Diyos sa pagsulay. Sulayi ang magkinabuhi sumala sa mga prinsipyo sa Diyos, nga nagpakita nga nagsalig ka sa Diyos nga nahibalo kon unsa ang labing maayo alang kanimo. Diha lamang makita nimo nga kini sa pagkamatuod mao ang hustong dalan. Kadtong duna sa maong pagsalig sa Diyos sa pagkamatuod malipayon.

 6. Praktikal ba ang pagpaningkamot sa pagkinabuhi sumala sa mga sukdanan sa Bibliya karon? Ipatin-aw.

⁶ Ang uban nangangkon nga walay mausa ang mahimong mabuhi pinaagi sa mga prinsipyo sa Bibliya niining dili matinud-anon, imoral, mapintas nga kalibotan. Ang kamatuoran, bisan pa, mao nga daghan ang nagkinabuhi niana. Kinsa? Ang usa ka batan-ong lalaki sa Aprika nakakaplag sa usa ka grupo niana. Misulat siya: “Akong namatikdan latas sa miaging pipila ka tuig nga dinhi sa Zimbabwe kamong katawhan, mga Saksi ni Jehova, mao ang sa pagkamatuod naningkamot sa pagsunod sa panig-ingnan ni Jesus mismo . . . Kamo lamang ang bugtong grupo, hangtod karon, ang nakahimo sa pagkombensir kanako sa gugma sa Diyos ug sa gahum sa Iyang ebanghelyo, pinaagi sa inyong kinabuhi ug dili pinaagi lamang sa mga pulong ug mga sulat. Kamo nagkinabuhi ug nagwali sa ebanghelyo samtang ang daghan, daghang katawhan nagwali sa ebanghelyo apan wala magkinabuhi niini.”

Dawata ang Awtoridad Niini

 7. Unsang kumon nga mga buhat karon ang sukwahi sa giingon sa Bibliya?

⁷ Ang apostol Pablo nag-ingon nga ang Bibliya “mapuslanon alang sa pagpanudlo, alang sa pagpamadlong, alang sa pagpanul-id sa mga butang.” (2 Timoteo 3:16) Usahay, bisan pa, kon unsa ang giingon sa Bibliya dili popular. Pananglitan, ang Bibliya nagtunglo sa homoseksuwal nga mga buhat, apan ang homoseksuwalidad kanat nga giisip ingon madawat nga estilo sa kinabuhi. (Roma 1:​24-27; 1 Corinto 6:​9-11; 1 Timoteo 1:​9-11) Ang Bibliya usab nag-ingon nga ang kinabuhi sa wala pa matawong bata importante ug kinahanglan dili tuyuon nga laglagon, apan mga 50 ka milyon ka aborsiyon ang gihimo sa tibuok kalibotan matag tuig. (Exodo 21:​22, 23; Salmo 36:9; 139:​14-16; Jeremias 1:5) Unsa na man kon kita sa personal nakakaplag niini nga malisod ang pagdawat sa kon unsa ang giingon sa Bibliya niining mga butang?

 8, 9. Kon kita sa una makakaplag niini nga malisod ang pagdawat sa pipila ka punto sa Bibliya, unsa ang angay natong hinumdoman, ug kansang mga sukdanan ang kanunay natong dawaton?

⁸ Buweno, ang mga Kristohanon nakakat-on nga kini kanunay maalamon ang pagsunod sa Pulong sa Diyos. Ngano? Tungod sa dagan sa panahon, ang pagsunod sa kon unsa ang giingon sa Bibliya kanunay magbuhat ug labing maayo alang sa tanan. (Proverbio 2:​1-11) Ang kamatuoran mao, nga ang mga tawo limitado kaayo kon bahin sa kaalam. Panagsa ra silang makakitang daan sa pangataposang mga sangpotanan sa mga aksiyon nila. Ang manalagna Jeremias mikumpisal: “Ako maayong nahibalo, O Jehova, nga dili iya sa yutan-ong tawo ang iyang dalan. Dili iya sa tawo kinsa naglakaw bisan ang pagtultol sa iyang lakang.”​—Jeremias 10:23.

⁹ Kinahanglan lamang magtan-aw kita sa palibot aron makita nga husto kining banabana. Kadaghanan sa mga suliran nga naghapak sa kalibotan direkta nga mga resulta sa dili pagsunod sa katawhan sa tambag sa Pulong sa Diyos. Ang hataas, gubot nga kasaysayan sa katawhan nakapakita nga ang mga tawo dili sa malamposon makahukom alang sa ilang kaugalingon sa moral nga mga butang. Ang Diyos sa walay kinutuban mas maalamon kay kanato. Nganong dili dawaton ang iyang gisulti, inay kay sa pagsalig sa atong kaugalingong kaalam?​—Proverbio 28:26; Jeremias 17:9.

Walay Mausa nga Hingpit

10, 11. (a) Unsang kamatuoran mahitungod sa paagi sa pagkahimo nato ug sa kalibotan diin kita nagkinabuhi nagpahinabo sa mga suliran sa dihang kita maningkamot sa pagkinabuhi sumala sa mga sukdanan sa Bibliya? (b) Unsang matang sa panag-uban ang gidasig kanato sa Bibliya nga pangitaon, ug asa nato makaplagan ang maong panag-uban?

¹⁰ Ang Bibliya nagpalisto kanato sa laing dapit diin kita nanginahanglan sa tabang. Kitang tanan nakapanunod sa kiling sa pagpakasala. “Ang hilig sa kasingkasing sa tawo mao ang daotan sukad sa iyang pagkabatan-on padayon.” (Genesis 8:21; Roma 7:21) Kining suliran napadako tungod sa kamatuoran nga kita nagkinabuhi sa usa ka kalibotan nga wala magsunod sa mga prinsipyo sa Bibliya. Busa, nanginahanglan kita ug tabang dili lamang sa pagsabot sa Bibliya apan usab sa pagpadapat sa mga butang atong natun-an. Mao kana ngano ang Bibliya nagdasig kanato sa pagpakig-uban niadtong kinsa nagkinabuhi sumala sa diyosnong mga sukdanan. Ang salmista misulat: “Akong gidumtan ang kongregasyon sa mga magbubuhat ug daotan, ug uban sa mga daotan wala ako molingkod. . . . Taliwala sa natigom nga katilingban ako magapanalangin kang Jehova.” Ug ang laing salmo nag-ingon: “Pagkamaayo ug pagkamalipayon alang sa mga magsoon nga magpuyo sa paghiusa!”​—Salmo 26:​5, 12; 133:1.

¹¹ Ang tingob nga panag-uban kinahanglanong bahin sa pagsimba sa mga Saksi ni Jehova. Duna silay pipila ka miting matag semana, maingon man sa matag panahon nga mga kombensiyon, diin sila tingob nga magtuon sa Bibliya ug maghisgot sa unsang paagi ang mga prinsipyo niini magpadapat sa ilang kinabuhi. Naglangkob sila sa tibuok kalibotan nga “panag-uban sa mga igsoon” diin ang matag usa gidasig ug gitabangan sa paghupot niining hataas nga mga sukdanan sa Bibliya. (1 Pedro 2:17) Nganong dili motambong sa usa sa ilang mga miting ug tan-awa kon sa unsang paagi ang maong komunidad makatabang kanimo usab?​—Hebreohanon 10:​24, 25.

Magkinabuhi pinaagi sa Pulong sa Diyos

12. Unsang mga panalangin ang nagauban sa kahibalo nga ang Bibliya mao ang Pulong sa Diyos?

¹² Busa, ang kahibalo nga ang Bibliya mao ang Pulong sa Diyos nagdalag mga panalangin ug mga responsabilidad. Kita gipanalanginan tungod kay kita nakabaton ug giya alang sa atong matag adlaw nga paggawi nga dili mabatonan sa lain. Dugang pa, kita nakakat-on sa gugma sa Diyos sa pagtagana sa iyang kaugalingong Anak sa paglukat kanato aron kita makabaton sa paglaom sa kinabuhing walay kataposan. (Juan 3:16) Kita nakaamgo nga si Jesus karon nagmando na ingon nga Hari ug sa dili madugay molihok sa pagwagtang sa pagkadaotan sa yuta. Ug kita sa masaligon naghulat sa matarong “bag-ong mga langit ug usa ka bag-ong yuta” nga gisaad mismo sa Diyos.​—2 Pedro 3:13.

13. Unsang mga responsabilidad ang mahadangat kanato kon dawaton nato ang Bibliya ingon nga Pulong sa Diyos?

¹³ Ibutang sa hunahuna, bisan pa, nga kita duna sa responsabilidad sa pagtuon sa Bibliya ug sa pagtisok sa kasingkasing sa kon unsa ang giingon niini. Ang Diyos mismo nag-awhag: “Anak ko, ayaw kalimti ang kasugoan ko, ug hinaot unta bantayan sa imong kasingkasing ang akong mga sugo.” (Proverbio 3:1) Bisan pa kon ang daghan naglantaw sa Bibliya ingon nga pulong sa tawo lamang, kinahanglan isog natong “pasagdan ang Diyos nga makaplagan nga matuod, bisan pa ang tagsa ka tawo makaplagan nga bakakon.” (Roma 3:4) Pasagdi ang kaalam sa Diyos maggiya sa imong kinabuhi. “Magsalig kang Jehova uban sa tanan nimong kasingkasing . . . Sa tanan nimong mga dalan tagda siya.” (Proverbio 3:5, 6) Ang maalamong pagpatalinghog sa Pulong sa Diyos niining paagi makaapektar sa imong kinabuhi alang sa maayo karon ug alang sa tanang panahon.

[Blurb sa panid 187]

Dili lamang nato basahon ang Bibliya kondili molihok usab sa kon unsa ang nabasa nato

[Blurb sa panid 188]

Ang pagsunod sa kon unsa ang giingon sa Bibliya kanunay nagbuhat alang sa labing maayo