Kataposang mga Adlaw
Kahubitan: Ang Bibliya nagagamit sa panultihong “kataposang mga adlaw” sa pagpunting sa paniklop nga yugto sa panahon nga mohatod ngadto sa langitnong tinudlong pagpahamtang ug silot nga magtimaan sa kataposan sa usa ka sistema sa mga butang. Ang Hudiyong sistema uban sa pagsimba niana nga gitukod palibot sa templo didto sa Jerusalem nakasugamak sa iyang kataposang mga adlaw sulod sa yugto nga misangko sa kalaglagan niana sa 70 K.P. Kon unsa ang nahitabo niadto maoy malandongon sa masugamak pa diha sa dako malangkobong paagi ug sa globonhong gisangkaron sa usa ka panahon sa dihang ang tanang kanasoran makaagom sa pagpahamtang ug paghukom nga gimbut-an sa Diyos. Ang karong daotang sistema sa mga butang, nga nagasangkad sa tibuok kalibotan, misulod sa iyang kataposang mga adlaw sa 1914, ug ang pipila sa kaliwatan nga buhi sa maong panahon sa gihapon anaa pa aron sa pagsaksi sa kompletong kataposan niana diha sa “dakong kasakitan.”
Unsa ang nagapakita nga kita nagakinabuhi na karon sa “kataposang mga adlaw”?
Ang Bibliya nagapatin-aw sa mga hitabo ug mga kahimtang nga magatimaan niining hinungdanong yugto sa panahon. “Ang ilhanan” maoy linangkob nga naglakip sa daghang ebidensiya; mao nga ang katumanan niana nagakinahanglan nga ang tanang bahin sa ilhanan matin-aw nga mapadayag sulod sa usa ka kaliwatan. Ang lainlaing mga bahin sa ilhanan natala sa Mateo kapitulo 24, 25, Marcos 13, ug Lucas 21; adunay dugang mga detalye sa 2 Timoteo 3:1-5, 2 Pedro 3:3, 4, ug Pinadayag 6:1-8. Ingong ilustrasyon, atong pagatagdon ang pipila sa talagsaong bahin sa maong ilhanan.
“Nasod motindog batok sa nasod ug gingharian batok sa gingharian” (Mat. 24:7)
Ang gubat nagmantsa sa kinabuhi sa yuta sulod sa linibo ka tuig. Ang internasyonal nga mga gubat ug ang mga gubat sulod sa mga nasod gibugno. Apan sugod sa 1914 ang unang gubat sa kalibotan gibugno. Kini dili lang kay kagubot tali sa duha ka kasundalohan diha sa natad sa panggubatan. Sa unang higayon, ang tanang dagkong mga gahom naggubatay. Ang interong mga nasod—apil ang mga molupyong sibilyan—gipanawag sa pagsuportar sa pangagpas sa gubat. Gibanabana nga sa pagkatapos sa gubat 93 porsiyento sa mga molupyo sa kalibotan ang nalambigit. (Maylabot sa kasaysayanhong kahinungdanon sa 1914, tan-awang mga panid 126, 127.)
Ingon sa gitagna sa Pinadayag 6:4, ang ‘kalinaw gikuha gikan sa yuta.’ Busa ang kalibotan nagpadayon nga anaa sa kagubot sukad gayod sa 1914. Ang Gubat sa Kalibotan II gibugno gikan sa 1939 hangtod sa 1945. Sumala pa sa retiradong Admiral nga si Gene La Rocque, sa pagdangat sa 1982 dihay laing 270 ka gubat sukad sa 1945. Labaw sa 100 ka milyong mga tawo ang nangamatay sa gubat sulod niining sigloha. Usab, sumala sa 1982 nga edisyon sa World Military and Social Expenditures, dihay sa maong tuig 100 ka milyong mga tawo nga sa laktod o sa dili laktod misalga sa militaryong mga kalihokan.
Dugang pa ba ang gikinahanglan aron sa pagtuman niining bahina sa tagna? Adunay mga tagnapulo ka libo sa nukleyar nga mga hinagiban nga gikay-ag pagpunting aron gamiton dihadiha. Ang iladong mga siyentipiko nag-ingon nga kon gamiton sa mga nasod bisan ug tipik lang sa ilang gitipigang nukleyar nga mga armas, ang buhilaman ug posibleng ang tanang tawhanong matang mangalaglag. Pero dili kining maong sangpotanan ang gipunting sa tagna sa Bibliya.
“Adunay mga kanihit sa pagkaon . . . sa lainlaing mga dapit” (Mat. 24:7)
Dihay daghang mga gutom sa tawhanong kasaysayan. Ngadto sa unsang gilapdon nga ang ika-20 nga siglo gihampak niana? Ang gubat sa kalibotan misangpot sa kaylap nga pagkagutom sa Uropa ug Asya. Ang Aprika gihampak sa hulaw, nga misangpot sa dakong mga kanihit sa pagkaon. Ulahi sa 1980 ang ‘Food and Agriculture Organization’ nagbanabana nga 450 ka milyong katawhan maoy gutom nga paingon na sa pagkamatay sa kagutom, ug mokabat sa usa ka bilyon ang walay igong gikaon. Niini kanila, mga 40 ka milyon ang mamatay gayod sa matag tuig—sa pipila ka tuig moabot ug 50 ka milyon—tungod sa kanihit sa pagkaon.
Aduna bay unsa mang kalainan maylabot niining mga kanihit sa pagkaon? Oo; sila nagpadayon bisan pag anaay pagkaon. Ang pila ka nasod may daghang sobra, ug ang modernong transportasyon makahatod dayon ug mga suplay ngadto sa mga nagkinahanglan. Apan ang polisa sa nasod ug komersiyal nga intereses mahimong magdiktar sa lahi niana. Ngani, ang mga nasod diin ang minilyon diyutay rag ginakaon tingalig nagaeksportar sa ilang labing maayong pagkaon ngadto sa kanasoran nga daghan nag pagkaon.
Kining kahimtanga dili na sa lokal lamang, kondili maoy globonhon. Sa 1981 ang The New York Times nagtaho: “Ang pagpauswag sa mga sukdanan sa pagkinabuhi ug ang nagatubong panginahanglan alang sa pagkaon sa tibuok nga kalibotan nagpapit-os sa mga prisyo sa pagkaon, nga nagpalisod sa pobre kaayong mga nasod sa pagpalit sa gawas sa ilang mga panginahanglan sa pagkaon.” Sa daghang kayutaan ang pagpatungha sa pagkaon, bisan pa uban sa tabang sa modernong siyensiya, wala makapasignunot sa pag-uswag sa total nga populasyon. Ang moderno nga mga eksperto sa pagkaon walay nakitang tinuod nga solusyon sa maong problema.
“Adunay dagkong mga linog” (Luc. 21:11)
Tinuod nga dihay dagkong mga linog sa miaging mga siglo; dugang pa, pinaagig ilang sensitibong mga himan ang mga siyentipiko karon makamatikod ug labaw sa milyong mga linog sa kada tuig. Pero ang espesyal nga mga instrumento wala man kinahanglana sa mga tawo aron mahibalo sa dihang mahitabo ang usa ka dakong linog.
Diha ba gayoy makahuloganong gidaghanon sa dagkong mga linog sukad sa 1914? Uban sa kasayoran nga nahipos gikan sa ‘National Geophysical Data Center’ sa Boulder, Colorado, nga inabagan sa pipila sukaranang mga basahong reperensiya, ang usa ka tabulasyon gihimo sa 1984 nga nag-apil lamang sa mga linog nga ang gikusgon maoy 7.5 o mas pa diha sa ‘Richter scale,’ o nianang misangpot sa pagkalaglag sa propyedad nga mokostar ug lima ka milyong dolyar (U.S.) o mas pa sa propyedad, o nianang nagpatay ug 100 o mas pang mga tawo. Gibanabana nga dihay 856 sa maong mga linog sulod sa 2,000 ka katuigan sa wala pa ang 1914. Nagpakita ang samang tabulasyon nga sa 69 ka katuigan lamang pagkahuman sa 1914 dihay 605 sa maong mga linog. Kana nagkahulogan nga, tinandi sa miaging 2,000 ka katuigan, ang aberids sa kada tuig maoy 20 ka besis sa maong kakusgon sukad sa 1914.
“Mga kamatay sa lainlaing mga dapit” (Luc. 21:11)
Pagkatapos sa unang gubat sa kalibotan ang “Spanish flu” mikuyanap sa tibuok globo, nga mihunos sa kapin sa 20 ka milyong kinabuhi ug sa gikusgon nga wala pa matupngi diha sa kasaysayan sa sakit. Bisan pa sa mga pag-uswag sa medikal nga siyensiya, ang dakong kapildihan gipahinabo sa kada tuig sa kanser, sakit sa kasingkasing, ubay-ubay mananakod nga mga sakit pinaagig sekso, multiple sclerosis, malarya, river blindness, ug Chagas’ disease.
‘Nagdagsang nga pagkamalinapason inubanan ug pagkabugnaw sa gugma sa bahin sa kadaghanan’ (Mat. 24:11, 12)
Usa ka inilang kriminolohista nag-ingon: “Ang usa ka butang nga moigo sa imong mata sa dihang motan-aw ka sa krimen sa gilapdon sa kalibotan mao ang makaylapon ug mapadayonong pag-uswag bisan diin. Sa mahimayaong pagkanahilain aduna man ing maong mga eksepsiyon, ug sa dili madugay matabonan kana sa nagadakong taob.” (The Growth of Crime, New York, 1977, ni Sir Leon Radzinowicz ug Joan King, pp. 4, 5) Ang pagdagsang maoy tinuod; dili kana basta maylabot sa mas maayong pagreport. Tinuod, nga aduna usab ing mga kriminal sa miaging mga kaliwatan, apan wala pa sukad masukad nga ang krimen nahimong makaylapon kay sa karon. Ang mga tawo nga nagakahingkod na sa edad nahibalo niana pinasukad sa personal nga kasinatian.
Ang pagkamalinapason nga gipasabot diha sa tagna nagalakip ug pagyubit sa iladong mga sugo sa Diyos, nga ginauna sa kinabuhi sa usa ang iyang kaugalingon inay kay ang Diyos. Ingong resulta niining tinamdana, ang gikusgon sa diborsiyo nagausbaw, ginadawat bisan diin ang sekso nga gawas sa kaminyoon ug homoseksuwalidad, ug mga tagnapulo ka milyon sa mga aborsiyon ang gipahinabo sa matag tuig. Ang maong pagkamalinapason nalambigit (Mateo 24:11, 12) uban sa impluwensiya sa bakakong mga manalagna, sila nga nagahiklin sa Pulong sa Diyos sa pagpalabi sa ilang kaugalingong mga pagtulon-an. Ang pagsunod sa ilang mga pilosopiya inay kay sa pagtapot sa Bibliya nagapasamot sa kalibotan nga dili mahigugmaon. (1 Juan 4:8) Basaha ang kahubitan niini diha sa 2 Timoteo 3:1-5.
“Ang mga tawo panguyapan tungod sa kahadlok ug sa pagpaabot sa mga butang nga nagakahitabo diha sa pinuy-anang yuta” (Luc. 21:25, 26)
“Ang kamatuoran mao nga ang labing dako bugtong pagbati nga nagagahom sa atong kinabuhi mao ang kahadlok,” nag-ingon ang U.S. News & World Report. (Oktubre 11, 1965, p. 144) “Wala pa sukad masukad nga ang katawhan mahadlokon kay sa karon,” nagtaho ang Alemang magasing Hörzu.—No. 25, Hunyo 20, 1980, p. 22.
Daghang butang nagapasamot niining globonhong atmospera sa kahadlok: ang mabangis nga salaod, pagkawalay trabaho, ekonomikanhong pagkadili pundo tungod kay daghan kaayong nasod nga anaa sa dili na matabang nga utang, tibuok-kalibotang polusyon sa kahanginan, kakulang sa malig-on ug mahigugmaong mga bugkos sa pamilya, ug ang hilabihang pagbati nga ang katawhan anaa sa nagaungaw nga kapeligrohan sa nukleyar nga kalaglagan. Ang Lucas 21:25 naghisgot sa ‘mga ilhanan sa adlaw, bulan, ug mga bituon, ug pagdaguok sa kadagatan’ maylabot sa kaaligutgot nga gibati sa mga nasod. Ang pagsubang sa adlaw sagad nagapahinabo, dili sa malipayong pagpaabot, kondili sa kahadlok kon unsay hayan mahitabo sa maong adlaw; sa mosubang ang bulan ug mga bituon, ang kahadlok sa salaod (krimen) magpaestar sa mga tawo sa luyo sa kinandadohang mga ganghaan. Sa ika-20 nga siglo, dili sa kanhiay, ang mga ayroplano ug mga mesil gigamit sa pagsutoy gikan sa kalangitan alang sa kalaglagan. Ang mga submarino nga may kargang malaglagong mga mesil nga nagaukoy sa kadagatan, ang usa lamang sa maong submarino nasangkapan sa paglumpag sa 160 ka siyudad. Sa walay duhaduha ang mga nasod anaa sa kayugot!
‘Ang tinuod nga mga tinun-an ni Kristo mahimong mga tumong sa pagdumot sa tanang kanasoran tungod sa iyang ngalan’ (Mat. 24:9)
Kini nga paglutos dili tungod sa politikanhong pagpanghilabot kondili ‘tungod sa ngalan ni Jesu-Kristo,’ sanglit kay ang iyang mga tinun-an nagatapot kaniya ingong kang Jehova nga Mesiyanikong Hari, gumikan sa ilang pagsunod kang Kristo nga una kay sa kang bisan kinsang magmamando sa yuta, gumikan sa ilang maunongong pagtapot sa iyang Gingharian ug dili pagpalangkit sa mga kalihokan sa tawhanong mga gobyerno. Ingon sa gipamatud-an sa modernong kasaysayan, mao kana ang nahimong kasinatian sa mga Saksi ni Jehova sa tanang bahin sa yuta.
‘Kining maayong balita sa gingharian iwali sa tibuok pinuy-anang yuta alang sa usa ka pamatuod’ (Mat. 24:14)
Ang mensahe nga igawali mao nga ang Gingharian sa Diyos diha sa mga kamot ni Jesu-Kristo nagsugod na sa pagmando sa mga langit, nga kana sa dili madugay motapos sa bug-os daotang sistema sa mga butang, nga ubos sa pagmando niana ang katawhan pagadad-on sa kahingpitan ug ang yuta mahimong usa ka paraiso. Kanang maong maayong balita ginasangyaw karon sa kapin sa 200 ka kayutaan ug kaislahan, ngadto sa kinalay-ang mga bahin sa yuta. Ang mga Saksi ni Jehova nagagugol ug mga ginatos ka milyong mga oras ngadto niining buluhatona sa matag tuig, nga nagahimog sublisubling mga duaw sa kabalayan aron ang tanan nga anaa mahatagan ug kahigayonan sa pagpatalinghog.
Ngadto sa unsa kining tanang mga hitaboa sa “kataposang mga adlaw” nagapunting?
Luc. 21:31, 32: “Sa dihang inyong makita kining mga butanga nga magakahitabo, sayra ninyo nga nagakahiduol na ang gingharian sa Diyos [nga mao, ang panahon sa dihang kana molaglag sa karong daotang kalibotan ug kana mismo ang bug-os nga magabuot sa mga kalihokan sa yuta]. Sa pagkamatuod ako nagaingon kaninyo, Kining kaliwatana dili gayod mahanaw hangtod ang tanang butang mahitabo.” (Ang “kaliwatan” nga buhi sa sinugdanan sa katumanan sa ilhanan sa 1914 sa pagkakaron nagakatigulang na gayod sa edad. Ang panahong nahibilin kinahanglang hamubo na kaayo. Ang mga hitabo sa kalibotan nagabutyag gayod nga mao kini ang kahimtang.)
Ngano ang mga Saksi ni Jehova nagaingon nga sa 1914 nagsugod “ang kataposang mga adlaw”?
Ang tuig 1914 gitiman-an sa tagna sa Bibliya. Alang sa mga detalye bahin sa kronolohiya, tan-awang mga panid 333-336, ubos sa lintunganayng ulohang “Mga Petsa.” Ang pagkahusto sa petsa gipakita sa kamatuoran nga ang mga kahimtang sa kalibotan nga gitagnang magtimaan niining yugtoa sa panahon natuman sukad sa 1914 nga eksakto ingon sa gitagna. Ang mga kamatuoran nga gihan-ay sa itaas nagailustrar niini.
Giunsa man pagtamod sa kalibotanong mga historyano ang tuig 1914?
“Nagalingi sa miagi pinasukad sa bantaaw nga luna sa presente atong tin-awng makita karon nga ang pagbuto sa Gubat sa Kalibotan I nagpatungha sa ikabayente-siglong ‘Panahon sa mga Kasamok’—diha sa mabutyagong pulong sa Britanikong historyanong si Arnold Toynbee—nga gikan niana ang atong sibilisasyon wala pa gayod makalingkawas. Sa diretso o dili diretso ang tanang kagubot sa kataposang katunga sa siglo nagasumikad sa 1914.”—The Fall of the Dynasties: The Collapse of the Old Order (New York, 1963), ni Edmond Taylor, p. 16.
“Ang mga tawo sa kaliwatan sa Gubat sa Kalibotan II, akong kaliwatan, kanunayng nagahunahuna sa ilang gubat ingong dakong modernong utlanan sa kausaban. . . . Kinahanglan kitang pagatugotan sa atong pangandak, sa atong personal nga panagtagbo sa kasaysayan. Apan kinahanglang atong pagailhon nga, sa sosyal nga mga termino, ang labi pang mahukmanong kausaban midangat uban sa Gubat sa Kalibotan I. Maoy niadtong panahona nga ang politikal ug sosyal nga mga sistema, nga gitukod sa kasiglohan, nangabungkag—usahay sa mga semana lamang. Ug ang uban nausab nga permanente. Maoy sa Gubat sa Kalibotan I nga ang gatosan ka katinoan nangawagtang. . . . Nagpadayon ang Gubat sa Kalibotan II, napadako ug naglig-on niining kausabana. Sa sosyal nga mga termino ang Gubat sa Kalibotan II mao ang kataposang gubat sa Gubat sa Kalibotan I.”—The Age of Uncertainty (Boston, 1977), ni John K. Galbraith, p. 133.
“Katunga sa siglo ang miagi na, apan ang marka sa katalagman sa Dakong Gubat [Gubat sa Kalibotan I, nga nagsugod sa 1914] nga nalakra sa lawas ug kalag sa mga nasod wala mapala . . . Ang pisikal ug moral nga gidak-on niining maong mapait nga kaagi mao nga walay nahibilin nga sama sa kanhiay. Ang katilingban mismo sa kabug-osan: mga sistema sa gobyerno, nasodnong mga utlanan, mga balaod, mga kasundalohan, mga relasyon sa estado, hasta usab ang mga ideolohiya, pamilyahanong kinabuhi, mga bahandi, personal nga mga relasyon—ang tanan nausab gikan sa taas paubos. . . . Sa kataposan ang katawhan nawad-an sa katimbang niini, nga dili na gayod maulian hangtod niining adlawa.”—General Charles de Gaulle, nga namulong niadtong 1968 (Le Monde, Nob. 12, 1968, p. 9).
Aduna ba gayoy mabuhi ibabaw sa yuta human sa kataposan sa karong sistema sa kalibotan?
Tino nga aduna. Ang kataposan sa karong globonhong sistema moabot, dili ingong resulta sa pasagad nga pagpatay diha sa nukleyar nga gubat, kondili diha sa dakong kasakitan nga nagaapil sa “gubat sa dakong adlaw sa Diyos nga Labing Gamhanan.” (Pin. 16:14, 16) Kanang gubata dili maglaglag sa yuta, ni wagtangon niana ang tanang katawhan.
Mat. 24:21, 22: “Unya moabot ang dakong kasakitan nga ang ingon wala pa mahitabo sukad sa sinugdan sa kalibotan hangtod karon, wala, ni mahitabo pa kana pag-usab. Sa pagkamatuod, gawas kon pamub-an ang maong mga adlaw, walay unod nga maluwas; apan tungod sa mga pinili ang maong mga adlawa pagapamub-an.” (Busa ang pipila ka “unod,” pipila sa katawhan, makalabang buhi.)
Prov. 2:21, 22: “Ang mga matul-id mao ang magapuyo sa yuta, ug ang mga maputli mao ang magapabilin diha niana. Mahitungod sa mga daotan, sila pagaputlon gikan gayod sa yuta; ug sa mga mabudhion, sila pagalukahon gikan niana.”
Sal. 37:29, 34: “Ang mga matarong mismo magapanunod sa yuta, ug sila magapuyo sa ibabaw niini sa walay kataposan. Paglaom kang Jehova ug bantaye ang iyang dalan, ug siya magabayaw kanimo sa pagpanunod sa yuta. Sa dihang pagalaglagon ang mga daotan, ikaw makakita niana.”
Nganong gitugotan man sa Diyos ang paglabay sa dugay kaayong panahon antes laglagon ang mga daotan?
2 Ped. 3:9: “Bahin sa iyang saad si Jehova dili langaylangayan, nianang paglangaylangay nga maoy pagsabot sa uban, apan siya mapailobon kaninyo tungod kay dili niya tinguha nga adunay malaglag kondili nagatinguha nga ang tanan makadangat sa paghinulsol.”
Mar. 13:10: “Sa tanang kanasoran ang maayong balita kinahanglang igawali una.”
Mat. 25:31, 32, 46: “Sa dihang moabot ang Anak sa tawo [Jesu-Kristo] diha sa iyang himaya, ug ang tanang manulonda uban kaniya, unya siya molingkod diha sa iyang mahimayaong trono. Ug sa iyang atubangan pagatigomon ang tanang kanasoran, ug iyang pagalainon ang mga tawo gikan sa usag usa, sama gayod sa usa ka magbalantay nga magalain sa mga karnero gikan sa mga kanding. Ug kini sila [kinsa napakyas sa pag-ila sa espirituwal nga mga igsoon ni Kristo ingong mga hawas sa Hari mismo] mamahawa ngadto sa walay kataposang pagkawagtang, apan ang mga matarong ngadto sa walay kataposang kinabuhi.”
Tan-awa usab ang mga panid 394, 395 ug 301-304.
Kon Adunay Moingon—
‘Dili man hilabihan ka grabe ang mga kahimtang karon; diha man kanunay ing mga gubat, mga gutom, mga linog, krimen’
Mahimong tubagon mo: ‘Masabtan ko kon nganong ingon niana ang imong pagbati. Kita natawo sa kalibotan diin kining mga butanga maoy adlaw-adlaw nga mga balita. Apan ang mga historyano nagapatin-aw nga adunay kalainan gayod maylabot sa atong ika-20 nga siglo. (Basahang mga pangutlo sa mga panid 126, 127.)’
O ikaw makaingon: ‘Dili lamang ang kamatuoran nga adunay mga gubat, mga gutom, mga linog, ug krimen ang hinungdanon. Naamgohan ba nimo nga ang ilhanan nga gihatag ni Jesus maoy malangkobon?’ Dayon tingali modugang: ‘Siya wala mag-ingon nga bisan hain niining hitaboa mao na kana ang magpamatuod nga kita ania na sa “kataposang mga adlaw.” Apan sa dihang madayag na ang interong ilhanan, kana ang hinungdanon—ug ilabina kon kana motungha sa globonhong gilapdon ug magsugod sa tuig nga gitino sa kronolohiya sa Bibliya.’ (Tan-awang mga panid 121-126, usab ang mga panid 333-336.)
‘Unsaon man nimo sa pagkasayod nga ang pipila umaabot nga kaliwatan dili mohaom sa tagna nga mas maayo pa gani kay niining usa?’
Mahimong tubagon mo: ‘Kana makapainteres nga pangutana, ug ang tubag nagapasiugda sa punto nga kita gayod nagapuyo sa “kataposang mga adlaw.” Sa unsang paagi? Buweno, ang bahin sa tagna nga gihatag ni Jesus maglangkit ug gubat taliwala sa mga nasod ug mga gingharian. Pero unsa may mahitabo karon kon ang katumanan sa ilhanan magkinahanglan pa nga kita maghulat hangtod mahitabo ang laing todas nga gubat tali sa gamhanan kaayong mga nasod? Ang maong gubat mosalin lamang ug pipila kon aduna may mabuhi. Busa, imong masabtan, ang katuyoan sa Diyos nga adunay makalabang buhi nagapakita nga kita karon haduol na kaayo sa kataposan niining daang sistema.’
O ikaw makaingon: ‘Ang pagpatukma sa mga hitabo sa kalibotan nganhi niining tagnaa maoy susama sa pagpatukma sa mga patik sa tudlo nganha sa tag-iya niana. Walay tawo nga magkapareho ang patik sa tudlo. Mao man usab, ang sumbanan sa mga hitabo nga nagsugod sa 1914 dili na pagausbon sa pipila umaabot nga kaliwatan.’ Dayon tingali modugang: (1) ‘Ang tanan nga maoy nagalangkob sa ilhanan dayag na kaayo.’ (2) ‘Tino nga dili ta buot nga mahisama sa mga tawo sa adlaw ni Noe. (Mat. 24:37-39)’
‘Dili nato maabtan ang kataposan sa atong tibuok kinabuhi’
Mahimong tubagon mo: ‘Pero ikaw nagatuo nga may panahong ang Diyos makiglabot, di ba mao?’ Dayon tingali modugang: (1) ‘Ang bugtong paagi nga mahibalo ang bisan kinsa kanato kon kanus-a kana mao kon Siya mohatag kanato sa maong impormasyon. Karon, si Jesus matin-awng misulti nga walay tawo nga nahibalo sa adlaw ug sa oras, apan iyang gihubit sa detalye ang mga butang nga magakahitabo sulod sa kaliwatan sa dihang kana mahitabo.’ (2) ‘Kanang paghubita may kalabotan sa mga hitabo nga ikaw sa personal nasinati. (Kon posible, hisgoti ang mga detalye sa ilhanan, nga nagagamit sa mga puntos nga gitagana sa miaging mga panid.)’
‘Dili ko mabalaka niining mga butanga; basta buhi lang ko sa kada adlaw’
Mahimong tubagon mo: ‘Maayo gayod nga dili hilabihang mabalaka bahin sa ugma-damlag. Pero kitang tanan nagaplano gayod sa atong kinabuhi aron sa pagpanalipod sa atong kaugalingon ug sa atong mga hinigugma. Ang tininuod nga pagplano maoy mapuslanon. Ang Bibliya nagapakita nga adunay maayo kaayong mga butang sa umaabot, ug kita maalamon kon magaplano kita aron makabenepisyo gikan niana. (Prov. 1:33; 2 Ped. 3:13)’
‘Dili ko maglangan paghisgot niining tanang daotang mga kahimtang; gusto ko nga mahimong malaomon bahin sa umaabot’
Mahimong tubagon mo: ‘Nga makapainteres, nag-ingon si Jesus nga adunay maayong katarongan alang sa iyang mga sumusunod nga magmalaomon sa atong adlaw. (Luc. 21:28, 31)’ Dayon tingali modugang: ‘Apan matikdi nga siya wala mag-ingon kanila nga piyongon ang ilang mga mata sa nagakahitabo sa kalibotan ug magmalipayon. Siya nagsulti nga ang ilang pagkamasaligon napasukad pag-ayo; tungod kana kay sila nakasabot sa kahulogan sa mga hitabo sa kalibotan ug nasayod sa mahimong sangpotanan.’