Usa ka Seguradong Paglaom

“Sukad sa gutlo sa pagkatawo anaa kanunay ang posibilidad nga mamatay ang usa ka tawo sa bisan unsang gutlo; ug nga ang maong posibilidad dili kalikayan maoy bug-os nga kamatuoran.”—ARNOLD TOYNBEE, BRITANIKONG HISTORYANO.

 1. Unsang kamatuoran ang gidawat sa katawhan, nga nagpatungha sa unsang mga pangutana?

KINSAY makalalis sa gihisgotan-sa-ibabaw nga kamatuoran sa kasaysayan? Ang katawhan sa kanunay kinahanglang modawat sa makalilisang nga kamatuoran sa kamatayon. Ug pagkadakong pagbati sa kawalay-mahimo ang atong masinati sa dihang mamatay ang usa nga atong gihigugma! Nianang higayona ang kapildihan maorag bug-os dili na mapasig-uli. Posible bang makauban pag-usab sa atong namatay nga mga minahal? Unsang paglaom ang gihatag sa Bibliya alang sa mga patay? Tagda ang mosunod nga asoy.

‘Ang Atong Higala Namatay’

2-5. (a) Sa dihang namatay ang iyang higalang si Lazaro, giunsa pagpasundayag ni Jesus ang iyang kaandam ug katakos sa pagbanhaw kaniya? (b) Gawas sa pagbanhaw kang Lazaro, unsay nahimo sa milagro sa pagkabanhaw?

² Tuig 32 K.P. kadto. Sa gamayng lungsod sa Betania, tulo ka kilometros sa gawas sa Jerusalem, si Lazaro nagpuyo kauban sa iyang mga igsoong babaye nga si Marta ug Maria. Suod silang mga higala ni Jesus. Usa ka adlaw, si Lazaro grabeng nasakit. Sa gilayon, ang iyang mabalak-ong mga igsoong babaye nagpadala niining tahoa kang Jesus, kinsa didto niadto sa tabok sa Suba sa Jordan. Si Jesus may gugma kang Lazaro ug sa iyang mga igsoong babaye, busa ngadtongadto miadto siya sa Betania. Sa dalan, si Jesus miingon ngadto sa iyang mga tinun-an: “Si Lazaro nga atong higala mipahulay, apan ako mopanaw didto aron pukawon siya gikan sa pagkatulog.” Sanglit ang iyang mga tinun-an wala dayon makasabot sa kahulogan sa maong pahayag, si Jesus sa yano miingon: “Si Lazaro namatay.”​—Juan 11:​1-15.

³ Sa pagkabating si Jesus nagpadulong sa Betania, si Marta midalagan sa gawas aron mosugat kaniya. Kay natandog sa iyang kasub-anan, si Jesus nagpasalig kaniya: “Mobangon ang imong igsoon.” Si Marta mitubag: “Ako nahibalo nga siya mobangon diha sa pagkabanhaw sa kataposan nga adlaw.” Unya si Jesus miingon kaniya: “Ako ang pagkabanhaw ug ang kinabuhi. Siya nga nagapasundayag ug pagtuo kanako, bisan pa siya mamatay, makadangat sa kinabuhi.”​—Juan 11:​20-25.

⁴ Unya si Jesus miadto sa lubong ug mimando nga kuhaon ang batong nagsira sa entrada niini. Human sa pag-ampo ug kusog, siya mimando: “Lazaro, gula!” Ug samtang ang tanang mata gitutok sa lubong, si Lazaro migula gayod. Si Jesus nagbanhaw kang Lazaro​—nagpasig-uli sa kinabuhi ngadto sa usa ka tawong patay na ug upat ka adlaw!​—Juan 11:​38-44.

⁵ Si Marta nagtuo na sa saad sa pagkabanhaw. (Juan 5:​28, 29; 11:​23, 24) Ang milagro sa pagkabalik ni Lazaro sa kinabuhi nagpalig-on sa iyang pagtuo ug nagsilsil sa pagtuo diha sa uban. (Juan 11:45) Apan unsa sa tukma ang gipasabot sa terminong “pagkabanhaw”?

“Siya Mobangon”

 6. Unsay kahulogan sa terminong “pagkabanhaw”?

⁶ Ang pulong “pagkabanhaw” gihubad gikan sa Gregong pulong a·naʹsta·sis, nga sa literal nagkahulogang “pagtindog pag-usab.” Ang Hebreohanong mga maghuhubad sa Grego naghubad sa a·naʹsta·sis uban sa Hebreohanong mga pulong techi·yathʹ ham·me·thimʹ, nga nagkahulogang “pagbuhi pag-usab sa patay.”a Sa ingon, ang pagkabanhaw naglangkit sa pagbangon sa tawo gikan sa way-kinabuhing kahimtang sa kamatayon​—pagpabuhi pag-usab sa kinaiyahan sa kinabuhi sa indibiduwal.

 7. Nganong dili suliran ni Jehova nga Diyos ug ni Jesu-Kristo ang pagbanhaw sa mga indibiduwal?

⁷ Kay way-kinutoban ang kaalam ug hingpit ang panumdoman, si Jehova nga Diyos daling makabanhaw sa usa ka tawo. Ang paghinumdom sa kinaiyahan sa kinabuhi sa mga patay​—ilang mga kinaiya sa personalidad, ilang personal nga kasaysayan, ug tanang detalye sa ilang pagkamao​—dili suliran alang kaniya. (Job 12:​13; itandi ang Isaias 40:26.) Si Jehova mao usab ang Sinugdanan sa kinabuhi. Busa, siya daling makapabalik sa samang tawo sa kinabuhi, nga maghatag kaniya sa samang personalidad diha sa bag-ong napormang lawas. Dugang pa, sumala sa gipaila sa kasinatian ni Lazaro, si Jesu-Kristo andam ug makaarang sa pagbanhaw sa mga patay.​—Itandi ang Lucas 7:​11-17; 8:​40-56.

8, 9. (a) Nganong ang pagkabanhaw ug ang ideya nga ang kalag dili mamatay dili magkabagay? (b) Unsa ang kasulbaran sa kamatayon?

⁸ Ugaling, ang Kasulatanhong pagtulon-an sa pagkabanhaw wala mahiuyon sa doktrina nga ang kalag dili mamatay. Kon ang kalag nga dili mamatay magpadayong buhi human sa kamatayon, walay usa ang kinahanglang banhawon, o ipasig-uli sa kinabuhi. Sa pagkatinuod, si Marta wala magpahayag sa ideya bahin sa kalag nga dili mamatay nga nagpuyo sa laing dapit human sa kamatayon. Siya wala magtuo nga si Lazaro miadto sa usa ka kalibotan sa espiritu aron magpadayon sa iyang pagkinabuhi. Sa kasukwahi, siya nagpadayag sa iyang pagtuo diha sa katuyoan sa Diyos nga balit-aron ang mga epekto sa kamatayon. Matod niya: “Ako nahibalo nga siya mobangon diha sa pagkabanhaw sa kataposan nga adlaw.” (Juan 11:​23, 24) Sa susama, si Lazaro mismo wala moasoy ug mga kasinatian bahin sa laing-kinabuhi. Walay bisan unsa nga ikataho.

⁹ Tin-aw, sumala sa Bibliya, ang kalag mamatay ug ang kasulbaran sa kamatayon mao ang pagkabanhaw. Apan binilyong tawo ang namatay na sukad sa unang tawo, si Adan, nabuhi sa yuta. Busa kinsay pagabanhawon, ug diin man?

“Tanan nga Anaa sa Handomanang mga Lubnganan”

10. Unsay gisaad ni Jesus bahin niadtong anaa sa handomanang mga lubnganan?

¹⁰ Si Jesu-Kristo miingon: “Ang takna nagasingabot diin kadtong tanan nga anaa sa handomanang mga lubnganan makadungog sa iyang [kang Jesus] tingog ug managpanggula.” (Juan 5:​28, 29) Oo, si Jesu-Kristo misaad nga kadtong tanang anaa sa handomanan ni Jehova pagabanhawon. Binilyong tawo ang nabuhi na ug namatay. Kinsa taliwala kanila ang anaa sa handomanan sa Diyos, nga nagpaabot sa pagkabanhaw?

11. Kinsay pagabanhawon?

¹¹ Kadtong nagsubay sa matarong nga dalan ingong mga alagad ni Jehova pagabanhawon. Apan minilyong ubang katawhan ang namatay nga wala magpakita kon kaha sila mosunod sa matarong nga mga sukdanan sa Diyos. Mahimong sila walay kabangkaagan sa mga kinahanglanon ni Jehova o kulang ug igong panahon aron himoon ang gikinahanglang mga kausaban. Kini sila anaa usab sa handomanan sa Diyos ug busa pagabanhawon, kay ang Bibliya nagsaad: “Aduna unyay pagkabanhaw sa mga matarong ug sa mga dili-matarong.”​—Buhat 24:15.

12. (a) Unsang panan-awon ang nadawat ni apostol Juan mahitungod sa pagkabanhaw? (b) Unsay ‘gitambog ngadto sa lanaw nga kalayo,’ ug unsay kahulogan nianang pulonga?

¹² Si apostol Juan may kulbahinam nga panan-awon bahin sa mga binanhaw nga nagtindog atubangan sa trono sa Diyos. Nga nagbatbat niini, siya misulat: “Ang dagat nagtugyan sa mga patay nga diha niini, ug gitugyan sa kamatayon ug sa Hades ang mga patay nga diha nila, ug sila gihukman nga tagsa-tagsa sumala sa ilang mga buhat. Ug gitambog ang kamatayon ug ang Hades ngadto sa lanaw nga kalayo. Kini nagakahulogan sa ikaduhang kamatayon, ang lanaw nga kalayo.” (Pinadayag 20:​12-14) Hunahunaa kon unsay kahulogan niana! Ang tanang patay nga anaa sa handomanan sa Diyos pagawson gikan sa Hades, o Sheol, ang komong lubnganan sa katawhan. (Salmo 16:​10; Buhat 2:31) Unya ang “kamatayon ug ang Hades” igatambog ngadto sa gitawag ug “ang lanaw nga kalayo,” nga nagsimbolo sa bug-os nga kalaglagan. Ang komong lubnganan sa katawhan dili na maglungtad.

Diin Pagabanhawon?

13. Nganong mihikay ang Diyos nga ang pipila pagabanhawon ngadto sa langit, ug unsang matang sa lawas ang ihatag kanila ni Jehova?

¹³ Ang diyutay rang mga lalaki ug mga babaye pagabanhawon ngadto sa kinabuhi sa langit. Kini sila magamando uban ni Kristo ingong mga hari ug mga saserdote ug makig-ambit sa pagwagtang sa tanang epekto sa kamatayon nga napanunod sa katawhan gikan sa unang tawo, si Adan. (Roma 5:​12; Pinadayag 5:​9, 10) Sumala sa Bibliya, mokabat lamang silag 144,000 ug pinili gikan sa taliwala sa mga sumusunod ni Kristo, sugod sa matinumanong mga apostoles. (Lucas 22:​28-30; Juan 14:​2, 3; Pinadayag 7:​4; 14:​1, 3) Si Jehova maghatag ug espiritung lawas sa matag usa niining mga binanhaw aron sila mahimong mabuhi sa langit.​—1 Corinto 15:​35, 38, 42-45; 1 Pedro 3:18.

14, 15. (a) Sa unsang matang sa kinabuhi ang kinabag-an niadtong namatay pagabanhawon? (b) Unsang mga panalangin ang masinati sa masinugtanong katawhan?

¹⁴ Ugaling, ang kinabag-an niadtong namatay pagabanhawon ibabaw sa yuta. (Salmo 37:​29; Mateo 6:10) Unsang matanga sa yuta? Ang yuta karong adlawa napuno sa panag-away, pag-ula ug dugo, polusyon, ug kabangisan. Kon ang mga patay mahibalik man sa kinabuhi sa ingon nga yuta, seguradong ang kalipay maoy kadiyot ra. Apan ang Maglalalang misaad nga sa dili madugay iyang taposon ang presenteng katilingban sa kalibotan nga anaa sa ilalom sa paggahom ni Satanas. (Proverbio 2:​21, 22; Daniel 2:44) Ang usa ka matarong nga bag-ong tawhanong katilingban​—“usa ka bag-ong yuta”​—mahimo na unyang tinuod. (2 Pedro 3:13) Nianang panahona “walay molupyo ang moingon: ‘Ako masakiton.’” (Isaias 33:24) Bisan ang kagul-anan sa kamatayon pagawagtangon, kay ang Diyos ‘magpahid sa matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang miagi na.’​—Pinadayag 21:4.

¹⁵ Sa sinaad nga bag-ong kalibotan sa Diyos, ang mga maaghop “makakaplag gayod sa ilang tumang kahimuot sa kadagaya sa pakigdait.” (Salmo 37:11) Ang langitnong kagamhanan ni Kristo Jesus ug sa iyang 144,000 ka kauban sa inanay magdala sa masinugtanong katawhan ngadto sa kahingpitan nga giwala sa atong unang mga ginikanan, si Adan ug Eva. Nalakip sa mga molupyo sa yuta mao unya ang mga binanhaw.​—Lucas 23:​42, 43.

16-18. Unsang kangaya ang dad-on sa pagkabanhaw alang sa mga pamilya?

¹⁶ Ang Bibliya naghatag ug pasiklap sa kangaya nga ipatungha sa pagkabanhaw alang sa mga pamilya. Handurawa ang kalipay nga gibati sa babayeng balo sa Nain sa dihang gipahunong ni Jesus ang panon sa paglubong ug nagbanhaw sa iyang bugtong nga anak lalaki! (Lucas 7:​11-17) Sa ulahi, duol sa Dagat sa Galilea, sa gibanhaw ni Jesus ang usa ka 12-anyos nga batang babaye, ang iyang mga ginikanan “nalipay sa hilabihan.”​—Marcos 5:​21-24, 35-42; tan-awa usab ang 1 Hari 17:​17-24; 2 Hari 4:​32-37.

¹⁷ Alang sa minilyon nga karon natulog diha sa kamatayon, ang pagkabanhaw magkahulogan ug kinabuhi diha sa malinawong bag-ong kalibotan. Hunahunaa lang ang kulbahinam nga palaaboton nga gibuksan niini alang kang Tommy ug sa negosyanteng lalaki, nga gihisgotan sa unang seksiyon niining brosyura! Sa dihang si Tommy momata ngadto sa kinabuhi sa Paraiso sa yuta, siya maoy sama ra nga Tommy nga nailhan sa iyang inahan​—apan wala nay mga sakit. Siya makahimo sa paghikap kaniya, paggakos kaniya, ug paghigugma kaniya. Sa susama, inay nga malit-agan diha sa halos way-kataposang siklo sa mga pagkatawo pag-usab, ang negosyanteng lalaki nga taga-India dunay kahibulongang palaaboton nga mobuka sa iyang mga mata diha sa bag-ong kalibotan sa Diyos ug makakita sa iyang mga anak lalaki.

¹⁸ Ang pagkahibalo sa kamatuoran bahin sa kalag, bahin sa kon unsay mahitabo kanato sa dihang kita mamatay, ug bahin sa paglaom sa pagkabanhaw mahimong duna say dakong epekto niadtong buhi karon. Atong tan-awon kon sa unsang paagi.

[Footnote]

[Hulagway sa panid 26]

Ang pagkabanhaw magdalag malungtarong kangaya