Mga Lagda Alang sa mga Magtatan-aw sa Tunghaan

DIHA sa matag kongregasyon, ang usa ka ansiyano gitudlo nga mahimong magtatan-aw sa Teokratikanhong Tunghaan sa Ministeryo. Kon ikaw gisaligan sa maong responsabilidad, ang imong kadasig alang sa tunghaan ug imong personal nga interes sa pag-uswag sa matag estudyante mahimong bililhong mga tabang sa kalamposan sa tunghaan sa inyong kongregasyon.

Ang usa ka hinungdanong bahin sa imong asaynment mao ang pagdumala sa senemanang Teokratikanhong Tunghaan sa Ministeryo sa inyong kongregasyon. Ibutang sa hunahuna nga dugang pa sa mga estudyanteng may mga asaynment sa usa ka espesipikong higayon, adunay uban nga nagatambong. Dumalaha ang tunghaan sa paagi nga ang tibuok kongregasyon makadawat sa makapadasig, praktikal nga mga pahinumdom nga nalangkit sa labing menos usa sa mga tumong sa tunghaan nga gihisgotan sa mga panid 5 hangtod 8 niini nga teksbok.

Pagbaton ug interes sa tanang estudyante, kon sila ba naeskedyul sa mga asaynment sa pagbasa, paghatag sa estilo-demonstrasyon nga mga presentasyon, o sa paghatag ug mga pakigpulong. Tabangi sila nga isipon ang ilang ginabuhat nga dili lamang ingong usa ka asaynment kondili ingong usa ka higayon aron mouswag sa ilang pag-alagad kang Jehova. Siyempre, ang paningkamot nga ilang himoon sa personal maoy usa ka hinungdanong tabang sa ilang pag-uswag. Apan hinungdanon usab nga ikaw magpakitag malulotong interes, motabang kanila sa pagsabot sa pagkabililhon sa mga talambagan nga punto, ug ipatin-aw kon unsaon pagpadapat ang maong tambag. Aron mahimo kana, pamatig maayo sa matag pakigpulong aron ikaw makahatag ug bililhong mga komento.

Tinoa nga ang tunghaan magsugod ug matapos sa eksaktong oras. Ihatag ang maayong panig-ingnan pinaagi sa paghatag sa imong mga komento sulod sa panahong gigahin alang niana. Kon maobertaym ang usa ka pakigpulong sa estudyante, ikaw o ang usa ka katabang angayng mohatag ug pasidaan. Angayng taposon sa estudyante ang iyang tudling-pulong ug mopahawa na sa plataporma. Kon ang laing bahin sa programa maobertaym, pamub-a ang imong kaugalingong mga komento, ug unya hisgoti ang butang uban sa maong igsoong lalaki human sa tigom.

Kon ikaw presente, ikaw ang angayng magdumala sa tunghaan. Kon may panahong ikaw wala, ang laing ansiyano nga sa nangagi gitudlo sa lawas sa mga ansiyano mao ang angayng magdumala sa tunghaan. Kon nagkinahanglan kag tabang sa pag-andam sa mga eskedyul, pagsulat ug pag-apod-apod sa mga pahibalo sa asaynment, o paghikay sa mga kapuling may bahin sa programa, ang usa ka ministeryal nga alagad nga gitudlo sa lawas sa mga ansiyano makatabang niining mga butanga.

Paglista sa mga Estudyante. Dasiga ang tanang magmamantala nga magpalista sa tunghaan. Ang uban nga aktibong nagapakig-uban sa kongregasyon mahimong magpalista kon sila uyon sa mga pagtulon-an sa Bibliya ug ang ilang kinabuhi nahiuyon sa Kristohanong mga prinsipyo. Sa dihang may magpahayag ug tinguha nga magpalista, sa tim-os dayega siya. Kon ang maong tawo dili pa usa ka magmamantala, ingong magtatan-aw sa tunghaan ikaw angayng makigsulti kaniya bahin sa mga kinahanglanon alang sa pagpalista sa tunghaan, nga mas maayong himoon kana atubangan sa usang nagadumalag pagtuon sa Bibliya uban kaniya (o sa presensiya sa usa ka magtutuo nga ginikanan). Ang maong mga kinahanglanon maoy sama ra alang sa usa ka tawo nga mahimong dili-bawtismadong magmamantala. Kini makaplagan sa mga panid 97 hangtod 99 sa Organisado sa Pagtuman sa Atong Ministeryo. Tipigi ang kinabag-ohang listahan sa tanan nga nalista sa tunghaan.

Paggamit sa Porma sa Talambagan. Ang porma sa talambagan alang sa matag estudyante anaa sa iyang personal nga kopya sa teksbok, diha sa mga panid 79 hangtod 81. Sumala sa gipaila sa mga kolor isip mga simbolo, ang bisan unsang talambagan nga punto gikan sa 1 hangtod sa 17 magamit sa dihang ang usa ka estudyante hatagan ug asaynment sa pagbasa. Alang sa estilo-demonstrasyon nga mga presentasyon, ang bisan unsang talambagan nga punto gawas sa 7, 52, ug 53 magamit. Ang tambag alang sa mga pakigpulong naglakip sa tanang punto gawas sa 7, 18, ug 30.

Sa dihang iasayn ang usa ka talambagan nga punto, ang magtatan-aw sa tunghaan angayng magtino nga ang sinulat sa lapis nga pagtala himoon ubos sa “Petsa sa Pag-asayn” diha sa lunang gitagana tapad sa maong punto diha sa porma sa talambagan sa basahon sa estudyante. Human makahatag ang estudyante sa iyang asaynment, sa pribado suknaa kon iya bang gihimo ang pagbansaybansay o mga pagbansaybansay nga gipakita sa kataposan sa paghisgot bahin sa talambagan nga punto. Kon mao, markahag tsek ang kahon diha sa porma. Kon imong isugyot nga siya magpadayon sa pagpauswag sa samang talambagan nga punto, dili na kinahanglan ang dugang notasyon diha sa porma sa talambagan; ayawg sulati ang blangko sa “Petsa nga Nakompleto.” Kana markahan lamang sa dihang siya andam nang mobalhin ngadto sa laing punto. Dugang pa, sa panid 82 sa basahon sa estudyante, diha sa wala sa tagboanang gigamit, ang petsa angayng isulat human sa matag pakigpulong sa estudyante. Adunay luna diha sa porma sa talambagan ug diha sa listahan sa mga tagboanan nga ang matag usa magamit nga makaduha. Ang mga estudyante angayng magdala sa ilang mga basahon panahon sa programa.

Iasayn ang usa lamang ka punto sa tambag sa usa ka panahon. Kasagaran, labing maayong iasayn ang mga talambagan nga punto sumala sa han-ay sa pagkalista niini. Bisan pa niana, kon ang pipila ka estudyante magpakitag talagsaong katakos, makadasig ka kanila nga tun-an ug ipadapat ang tinong mga tun-anan sa ilang kaugalingon. Unya ikaw makatabang kanila sa maong mga punto nga sa imong pagtuo makatabang pag-ayo sa ilang pag-uswag ingong epektibong mga mamumulong ug mga magtutudlo.

Bisan pa kon ang usa ka estudyante nalista na sa tunghaan sulod sa daghang katuigan, siya makapahimulos ug dako pinaagi sa pagtuon ug pagpadapat sa matag tun-anan. Sa pagtabang sa mga estudyante nga may tinong mga panginahanglan, ikaw makapilig espesipikong mga hiyas sa pakigpulong nga ilang pauswagon inay sundon ang han-ay sa talaan sa porma sa talambagan.

Paghatag ug Tambag. Sa dihang magatambag, pahimusli ang mga panig-ingnan ug mga prinsipyo sa Bibliya. Angayng matikdan sa mga estudyante nga ang tambag nga gihatag ug ang paagi sa paghatag niini gimandoan sa hataas nga mga prinsipyo sa Pulong sa Diyos.

Ibutang sa hunahuna nga ikaw maoy “isigkamagbubuhat” sa imong mga igsoong lalaki ug babaye. (2 Cor. 1:24) Sama kanila, angay kang magpadayon sa pagkugi aron mouswag ingong mamumulong ug magtutudlo. Tun-i sa personal ang basahong Pahimusli ang Edukasyon sa Teokratikanhong Tunghaan sa Ministeryo, ipadapat ang tambag niini, ug ihatag ang maayong panig-ingnan aron himoon usab kana sa uban.

Samtang buhaton mo kana, himoa nga imong tumong ang pagtabang sa mga estudyante nga mahimong maayong mga magbabasa, may-katakos nga mga mamumulong, ug epektibong mga magtutudlo. Sa maong katuyoan, panlimbasogi nga ihatag ang bisan unsang tabang nga gikinahanglan aron ang mga estudyante makasabot kon unsa ang nagkalainlaing mga hiyas sa pagpanulti, kon nganong hinungdanon kini, ug kon unsaon pag-ugmad niini. Kini nga teksbok gidisenyo sa paagi nga makatabang kanimo sa paghimo niana. Bisan pa niana, kasagarang labaw pa ang gikinahanglan sa imong bahin kay sa pagbasa lamang sa mga pulong diha sa basahon. Ipakighisgot ang ideya nga gipahayag niini ug kon unsaon kini pagpadapat.

Kon maayo ang nahimo sa estudyante sa usa ka punto, dayega siya. Sa daklit isulti kon unsay nakapaepektibo niana o kon nganong ang iyang gibuhat mahinungdanon. Kon siya makabenepisyo sa dugang nga pagtagad sa usa ka butang, tinoa nga nakasabot siya kon ngano. Hisgoti kon unsaon pagkab-ot kana. Magmaespesipiko, ug sa samang panahon, magmaluloton.

Amgoha nga alang sa daghan, lisod kaayo ang pagbarog atubangan sa usa ka grupo aron magpakigpulong. Kon ang usa ka tawo mobati nga dili maayo ang iyang nahimo, basin maghunahuna siya kon angay bang ipadayon niya ang pagsulay. Sundoga si Jesus nga wala magagupok sa ‘nagipak nga tangbo’ o magpalong sa ‘wala magbaga nga pabilong lino.’ (Mat. 12:20) Hunahunaa ang emosyonal nga kahimtang sa estudyante. Sa dihang magatambag, magpagiya sa kon kaha ang estudyante bag-ohan pa o eksperyensiyadong magmamantala. Ang mainiton ug tiunayng pagdayeg makapalig-on sa mga tawo sa pagpadayon sa paghimo sa ilang maarangan.

Tagda ang matag estudyante uban sa dignidad. Ang Roma 12:10 nagsugo kanato: “Manguna sa pagpakitag pasidungog sa usag usa.” Pagkamaayong tambag alang sa usa ka magtatambag sa Teokratikanhong Tunghaan sa Ministeryo! Kon ang estudyante mas tigulang kay kanimo, ipadapat nga mainampingon ang direksiyong gihatag sa 1 Timoteo 5:​1, 2. Bisan pa niana, walay sapayan sa edad sa usa ka tawo, sa dihang ang tambag nga naglangkit sa paghimog mga kausaban sa iyang paagi sa pagbuhat sa mga butang ihatag sa malulotong paagi, kini mas daling dawaton.​—Prov. 25:11.

Sa dihang magatambag, ipasiugda ngadto sa estudyante ang tumong sa pagbansay. Ang maong pagbansay dili lamang mao ang pagbuhat ug maayo aron dayegon ug sultihan nga mopadayon sa sunod nga talambagan nga punto. Ang tumong dili maoy aron mahimong mamumulong ug magtutudlo nga pagadayegon sa uban. (Prov. 25:27) Ang atong tinguha mao nga gamiton ang atong katakos sa pagpanulti aron dayegon si Jehova ug aron tabangan ang uban nga makaila ug mahigugma kaniya. Ginabansay kita aron sangkapan sa pagtuman nga epektibo sa buluhatong gilaraw diha sa Mateo 24:14 ug 28:​19, 20. Ang bawtismadong mga igsoong lalaki nga sa ngadtongadto mahimong takos basin dapiton sa pagpakigbahin sa pag-atiman sa “panon sa Diyos” ingong publikong mga mamumulong ug mga magtutudlo.​—1 Ped. 5:​2, 3.

Isugyot nga ang mga estudyante magbasa sa panaghisgot diha sa teksbok sa sunod nilang talambagan nga punto sulod sa pipila ka adlaw human sa pag-asayn niini. Dasiga sila nga ipadapat kon unsay ilang nakat-onan diha sa pag-andam sa ilang bahin alang sa tunghaan, diha sa matag-adlawng pakigkabildo, diha sa pagkomento panahon sa mga tigom, ug diha sa pag-alagad sa kanataran.

Paghimog mga Asaynment. Kini angayng himoon labing menos tulo ka semana nga abante. Ang tanang asaynment mas maayo nga sinulat kon posible.

Ang mga bahin nga naglangkit sa pagtudlo sa kongregasyon angayng iasayn sa mga ansiyano, kon mahimo kadtong epektibong mohatag sa maong mga bahin, ug sa ministeryal nga mga alagad nga epektibong mga magtutudlo.

Sa paghukom kon unsang mga pakigpulong sa estudyante ang iasayn ngadto sa mga igsoong lalaki ug kon unsa ngadto sa mga igsoong babaye, sunda ang mga instruksiyong gihatag uban sa eskedyul sa tunghaan. Kon diyutay ra ang mga igsoong lalaki apan daghang igsoong babaye ang mohatag ug mga pakigpulong sa estudyante, mag-amping sa paghatag sa mga igsoong lalaki ug igong kahigayonan sa paghatag ug mga pakigpulong nga dili lamang ang pagbasa sa Bibliya.

Hunahunaa ang mga kahimtang sa mga indibiduwal sa dihang maghatag ug mga asaynment. Kinahanglanon ba ang pag-asayn sa usa ka ansiyano o ministeryal nga alagad nga magpahayag diha sa tunghaan sa samang gabii nga siya may bahin sa Tigom sa Pag-alagad o sa samang semana nga siya may pakigpulong publiko sa kongregasyon? Kinahanglan ba nga iasayn ang usa ka igsoong babaye sa paghatag ug usa ka presentasyon nga dungan sa usa niya ka bata pang anak, kinsa basin nagkinahanglan sa iyang tabang? Ilabina sa kahimtang sa usa ka batan-on o usa ka estudyante nga dili pa bawtismado, angay ba ang topiko? Susiha aron matino nga ang asaynment angay alang sa talambagan nga punto nga gipauswag sa estudyante.

Alang sa mga asaynment nga ihatag sa mga igsoong babaye, ang estudyante kasagarang magpili sa iyang kaugalingong tagboanan nga uyon sa mga instruksiyon sa mga panid 78 ug 82. Usa ka katabang ang angayng iasayn, apan ang dugang nga katabang tingali magamit. Kon ang estudyante mangayog katabang nga sa linain angayan nga magpasundayag sa usa ka tinong tagboanan, angayng konsiderahon ang maong hangyo.

Dugang nga mga Klase. Kon kapin sa 50 ka estudyante ang nalista, basin buot ninyong hunahunaon ang paggamit ug dugang mga dapit alang sa mga bahin sa mga estudyante. Sumala sa panginahanglan sa inyong kongregasyon, kining kahikayana magamit alang sa tanang bahin sa estudyante o alang lamang sa kataposang duha ka pakigpulong sa estudyante.

Ang matag dugang nga klase angayng adunay may-katakos nga magtatambag, mas maayo usa ka ansiyano. Kon kinahanglan, ang may-katakos nga ministeryal nga alagad mahimong kapuli. Angay nga may pag-uyon ang lawas sa mga ansiyano sa maong mga magtatambag. Suod nga mokooperar kanila aron adunay epektibong pagsubay sa kauswagan sa mga estudyante walay sapayan sa dapit sa ilang sunod nga pakigpulong.

Espesyal nga Klase sa Pagbasa. Kon ang lawas sa mga ansiyano mohukom nga ang ubay-ubayng indibiduwal diha sa kongregasyon kinahanglang tudloan sa paninugdang paagi sa pagbasa diha sa pinulongan nga gigamit sa kongregasyon, kamo makahimog kahikayan alang niini nga duyog sa Teokratikanhong Tunghaan sa Ministeryo. Ang maong pagtudlo mahimong maglangkit sa paninugdang mga kahanas sa pagbasa o pagsulat, o ang tumong niini mahimong pagpauswag sa pagbasa.

Ang maong mga klase dili kinahanglang himoon sa samang panahon nga ginahatag ang mga pakigpulong sa estudyante diha sa Teokratikanhong Tunghaan sa Ministeryo. Aron ikahatag ang igong tabang, basin kinahanglan ang dugang panahon kay sa posibleng mahimo sa panahon sa tunghaan. Ang lokal nga mga ansiyano makahukom kon unsay gikinahanglan ug kon kanus-a ihatag ang maong pagtudlo. Sumala sa panginahanglan, mahimong himoon ang mga kahikayan alang sa ginurupong pagtudlo o tinagsa nga pagtudlo.

Gikinahanglan ang may-katakos nga magtutudlo. Mas maayo, ang asaynment ihatag sa usa ka igsoong lalaki nga usa ka maayong magbabasa ug nasinati pag-ayo sa pinulongan. Kon walay igsoong lalaki, ang mga ansiyano makahangyo sa usa ka may-katakos, sulondang igsoong babaye sa pagtabang. Angay siyang magpandong sa ulo sa dihang magatudlo sa klase.​—1 Cor. 11:3-10; 1 Tim. 2:​11, 12.

Ang pulyetong Apply Yourself to Reading and Writing nahubad sa daghang pinulongan. Gidisenyo kini aron itudlo ang paninugdang mga kahanas sa pagbasa ug pagsulat. Ang ubang materyal sa instruksiyon mahimong gamiton usab, depende sa sukod sa katakos sa pagbasa niadtong nalista. Sa dihang may igong pag-uswag ang mga estudyante, sila angayng dasigon nga makigbahin sa regular nga programa sa Teokratikanhong Tunghaan sa Ministeryo.

Ingong magtatan-aw sa Teokratikanhong Tunghaan sa Ministeryo, dako kag mahimo aron makabatog kaayohan ang kongregasyon. Pag-andam pag-ayo, ug nahiuyon sa tambag sa Roma 12:6-8, atimana ang imong asaynment ingong usa ka bililhong butang gisalig gikan sa Diyos.