Pangutana

● Unsa ka subsob gayod nga ang mga estudyante hatagan ug mga asaynment diha sa Teokratikanhong Ministeryong Tunghaan?

Ang usa sa lintunganayng mga katuyoan sa Teokratikanhong Ministeryong Tunghaan mao ang pag-ugmad sa mga mamumulong sa publiko. Tungod niana, ang eskedyol nagatagana para sa kadaghanan sa mga pakigpulong nga igatudlo ngadto sa mga igsoong lalaki.

Apan, ang laing importanteng tumong mao ang pagbansay sa tanan nga mahimong epektibong mga magsasangyaw ug mga magtutudlo sa ministeryo. Tungod niining rasona, nga maoy tukma alang sa mga igsoong babaye usab sa pagpaenrol o pagpatala.

Aron bug-os nga mabenepisyohan gikan sa tunghaan, gisugyot nga kadtong naenrol kinahanglang sa labing menos adunay usa ka asaynment sa matag tulo ka bulan. Kon motugot ang lokal nga mga kahimtang, ang mga igsoong lalaki mahatagan man ug adisyonal nga mga asaynment. Dili kinahanglan alang sa mga ansiyano nga regular nga nagahatag ug mga pakigpulong nga nagatudlo ug sa ‘Bible highlights’ nga itudlo usab sa mga pahayag sa estudyante.

Duolan na sa tunga sa siglo, ang Teokratikanhong Ministeryong Tunghaan nakatabang na sa mga minilyon ngadto sa espirituwal nga kauswagan ug nakakat-on sa pagpahayag sa ilang kaugalingon nga mas maayo diha sa pagmantala sa mensahe sa Gingharian. Ang tanan gidasig sa bug-os nga pagpahimulos niining maayong tagana gikan kang Jehova nga Diyos. Ang atong tumong mao gayod ang pagpresentar sa atong kaugalingon nga inuyonan sa Diyos, mga mamumuo nga “walay igakaulaw, nga nagadumala sa pulong sa kamatuoran sa hustong paagi.”​—2 Tim. 2:15.