Gusto Ka Bang Makabaton ug Dugang Kahibalo Bahin sa Bibliya?

Nganong Basahon ang Bibliya?

ANG Bibliya lahi sa bisan unsang ubang libro​—kini nasudlan sa mahigugmaong mga instruksiyon gikan sa Diyos. (1 Tesalonica 2:13) Kon imong ipadapat ang gitudlo sa Bibliya, makabaton ka ug dakong kaayohan. Mapadako nimo ang imong gugma sa Diyos ug masuod kaniya, ang Maghahatag sa “matag maayong gasa ug matag hingpit nga regalo.” (Santiago 1:17) Makat-onan mo kon unsaon pagduol kaniya diha sa pag-ampo. Sa panahon sa kalisod, matagamtam mo ang tabang sa Diyos. Kon ipahiuyon mo ang imong kinabuhi sa mga sukdanan nga gipadayag diha sa Bibliya, hatagan ka sa Diyos ug kinabuhing walay kataposan.​—Roma 6:23.

Ang Bibliya nasudlan sa mga kamatuoran nga naghatag ug kadan-agan. Kadtong makabaton ug kahibalo sa Bibliya mahigawas gikan sa sayop nga mga pagtuo nga naggahom sa mga kinabuhi sa minilyon. Pananglitan, ang pagkahibalo sa kamatuoran bahin sa kon unsay mahitabo sa dihang kita mamatay magpahigawas kanato gikan sa kahadlok nga ang patay makahatag kanato ug kadaot o nga ang atong patay nang mga paryente ug mga higala nag-antos. (Ezequiel 18:4) Ang pagtulon-an sa Bibliya bahin sa pagkabanhaw makahupay sa mga tawong namatyan ug mga minahal. (Juan 11:25) Ang pagkahibalo sa kamatuoran bahin sa daotang mga manulonda magpaigmat kanato batok sa mga kapeligrohan sa espiritismo ug motabang kanato sa pagsabot kon nganong gubot kaayo ang yuta.

Ang mga prinsipyo nga gihatag sa Diyos diha sa Bibliya nagpakita kanato kon unsaon sa pagkinabuhi sa paagi nga mohatag ug pisikal nga mga kaayohan. Pananglitan, ang pagkahimong “makasaranganon sa batasan” mosangpot ug maayong panglawas. (1 Timoteo 3:2) Pinaagi sa ‘paghinlo sa atong kaugalingon sa tanang kahugawan sa unod ug espiritu,’ malikayan nato ang pagdaot sa atong panglawas. (2 Corinto 7:1) Ang pagpadapat sa tambag sa Diyos nga makita diha sa Bibliya mopalambo usab sa kalipay sa kaminyoon ug pagtahod-sa-kaugalingon.​—1 Corinto 6:18.

Kon imong ipadapat ang Pulong sa Diyos, ikaw mahimong mas malipayon. Ang kahibalo sa Bibliya motabang kanato nga makakaplag ug kalinaw ug katagbawan sa kinailadman ug mohatag kanato ug paglaom. Kini motabang kanato sa pag-ugmad sa maayong mga hiyas sama sa kahingawa, gugma, kalipay, kalinaw, kalulot, ug pagtuo. (Galacia 5:22, 23; Efeso 4:24, 32) Kining mga hiyasa motabang kanato aron mahimong mas maayong bana o asawa, amahan o inahan, anak nga lalaki o babaye.

Nakapamalandong ka ba bahin sa umaabot? Ang mga tagna sa Bibliya nagpakita kanato kon hain na kitang bahina sa dagan sa panahon. Dili lamang gibatbat niining mga tagnaa ang kahimtang sa kalibotan karon kondili kini nagpakita usab nga sa dili madugay himoon sa Diyos kining yutaa nga usa ka paraiso.​—Pinadayag 21:3, 4.

Tabang sa Pagsabot sa Bibliya

Tingali nakasulay ka na sa pagbasa sa Bibliya apan naglisod sa pagsabot niini. Tingali wala ka mahibalo kon asa pangitaon diha sa Bibliya ang mga tubag sa imong mga pangutana. Kon mao, wala ka mag-inusara. Kitang tanan nagkinahanglan ug tabang aron masabtan ang Pulong sa Diyos. Ang mga Saksi ni Jehova, sa mga 235 ka kayutaan, nagtagana ug libreng pagtuon sa Bibliya ngadto sa minilyong tawo. Sila malipay sa pagtabang usab kanimo.

Sagad labing maayong tun-an ang Bibliya sa anam-anam nga paagi, nga magsugod sa pangunang mga doktrina. (Hebreohanon 6:1) Samtang magpadayon ka sa pagtuon, mas makaarang ka sa pagkaon ug “gahing pagkaon”​—sa ato pa, sa mas laglom nga mga kamatuoran. (Hebreohanon 5:14) Ang Bibliya mao ang kasaligang tuboran sa impormasyon. Ang pinasukad sa Bibliya nga mga publikasyon, sama sa brosyur nga Unsay Gikinahanglan sa Diyos Kanato?, makatabang kanimo sa pagsabot sa teksto sa Kasulatan bahin sa nagkalainlaing mga ulohan.

Andam Ka Bang Mogahin ug Panahon Matag Semana Aron Masabtan ang Bibliya?

Ang pagtuon sa Bibliya sagad mahikay sa oras ug panahon nga kombenyente kanimo. Daghan ang nagtuon diha sa pribasiya sa ilang kaugalingong balay. Ang uban nagtuon pa gani pinaagi sa telepono. Ang programa sa pagtuon, dili maoy usa ka klase uban sa daghang tawo, kondili usa ka pribadong kahikayan nga gipahiangay sa imong personal nga mga kahimtang, apil sa imong sukod sa kahibalo ug edukasyon. Walay mga eksaminasyon, ug dili ka pakaulawan. Ang imong mga pangutana bahin sa Bibliya tubagon, ug makakat-on ka sa pagpakigsuod sa Diyos.

Dili kinahanglang mobayad ka alang sa maong pagtuon sa Bibliya. (Mateo 10:8) Kini gitanyag nga walay bayad ngadto sa mga tawo sa tanang relihiyon ug niadtong walay relihiyon apan tim-os nga maikagon sa pagpauswag sa ilang kahibalo sa Pulong sa Diyos.

Kinsa ang makapakigbahin niini nga diskusyon? Ang imong tibuok pamilya. Bisan kinsang mga higala nga imong pilion nga dapiton makapakigbahin usab. O kon gusto ka, ang diskusyon mahimong himoon uban lamang kanimo.

Gigahin sa daghan ang usa ka oras matag semana aron magtuon sa Bibliya. Kon makagahin ka ug mas daghang panahon o gamayng panahon lang matag semana, ang mga Saksi andam sa paghatag kanimo ug panahon aron ikaw matabangan.

Usa ka Imbitasyon sa Pagkat-on

Among gidapit ka sa pagkontak sa mga Saksi ni Jehova. Ang usa ka paagi nga mahimo nimo kini maoy sa pagsulat ngadto sa adres diha sa ubos. Dayon himoon ang mga kahikayan aron dunay modumala kanimo ug libreng pagtuon sa Bibliya diha sa balay.

□ Interesado ako nga makadawat ug kopya sa brosyur nga Unsay Gikinahanglan sa Diyos Kanato?

□ Palihog kontaka ako bahin sa libreng pagtuon sa Bibliya diha sa balay.

Gawas kon gipaila, ang tanang kinutlo sa Bibliya maoy gikan sa Bag-ong Kalibotang Hubad sa Balaang Kasulatan.