LEKSIYON 11
Kon sa Unsang Paagi Makabenepisyo Ka Pag-ayo sa Bibliya
Naa bay panahon nga gusto nimong magsugod ug dakong buluhaton pero mibati ka nga lisod ning himoon? Aron dili ka malisdan, tingali imo ning gianam-anam pagtrabaho. Ingon ana pod kon bahin sa pagbasag Bibliya. Tingali maghunahuna ka, ‘Unsaon man nako pagsugod ani?’ Niini nga leksiyon, atong hisgotan ang pipila ka simpleng butang nga imong mahimo aron mag-enjoy ka sa pagbasa ug pagtuon sa Bibliya.
1. Nganong regular natong basahon ang Bibliya?
Ang tawo nga regular nga nagbasa sa Bibliya, o “sa balaod ni Jehova,” magmalipayon ug magmalamposon. (Basaha ang Salmo 1:1-3.) Sa primero, sulayi nga magbasa ug pipila lang ka minuto kada adlaw. Kon magsige kag basa sa Pulong sa Diyos, mas ma-enjoy nimo ang pagbasa sa Bibliya.
2. Unsay makatabang nimo aron makabenepisyo ka sa pagbasa sa Bibliya?
Aron makabenepisyo ta pag-ayo sa pagbasa sa Bibliya, kinahanglan tang mohunong ug maghunahuna bahin sa atong gibasa. Angay nato ning basahon ug “palandongon.” (Josue 1:8) Samtang magbasa ka, pangutan-a ang imong kaugalingon: ‘Unsay akong nakat-onan ani bahin kang Jehova nga Diyos? Unsaon nako ni pagpadapat? Unsaon nako paggamit ni nga mga teksto sa pagtabang sa uban?’
3. Unsay imong himoon aron makagahin kag panahon sa pagbasa sa Bibliya?
Nalisdan ba ka sa pagpangitag panahon sa pagbasa sa Bibliya? Daghan ang mibati ana. Paningkamoti nga ‘magamit ang imong panahon sa kinamaayohang paagi.’ (Efeso 5:16) Mahimo nimo ni pinaagi sa paggahin ug espesipikong panahon sa pagbasa sa Bibliya adlaw-adlaw. Ang uban magbasag Bibliya sayo sa buntag. Ang uban sa tingpaniudto. Naa poy uban nga sa magabii, sa dili pa matulog. Sa imong kahimtang, kanus-a man ang pinakamaayong panahon sa pagbasa?
TUN-IG DUGANG
Sayra kon sa unsang paagi mahimong mas makapainteres ang imong pagbasa sa Bibliya. Tan-awa kon unsaon pagpangandam ug maayo aron makabenepisyo gyod ka sa imong pagtuon sa Bibliya.
Sama nga makakat-on ta nga mag-enjoy ug kaon sa lainlaing pagkaon, makakat-on pod ta nga mag-enjoy ug basa sa Bibliya
4. Kon unsaon nga ma-enjoy nimo ang pagbasa sa Bibliya
Tingali dili sayon ang pagsugod ug basa sa Bibliya. Pero puwede natong ‘ugmaron ang pagpangandoy’ sa paghimo niana, sama nga puwede natong ugmaron ang atong gana para sa bag-ong pagkaon. Basaha ang 1 Pedro 2:2, ug dayon hisgoti kini nga pangutana:
Sa imong hunahuna, kon magbasa kag Bibliya adlaw-adlaw, ma-enjoy kaha nimo ni ug mangandoy nga mobasa pag dugang?
I-play ang VIDEO aron makita nimo kon unsay gihimo sa uban aron mag-enjoy sa pagbasa sa Bibliya. Dayon hisgoti ang mosunod nga mga pangutana:
Sa video, unsay gihisgotan sa mga batan-on nga mga babag sa pagbasa sa Bibliya?
Unsay nakatabang nila nga makapadayon sa pagbasa sa Bibliya?
Unsay ilang gihimo aron mas ganahan silang mobasag Bibliya?
Mga sugyot sa pagbasa sa Bibliya:
Pagpilig hubad nga kasaligan ug sayon sabton. Sulayi ang Bag-ong Kalibotang Hubad kon naa ni sa inyong pinulongan.
Unahag basa ang mga bahin nga makapainteres kaayo nimo. Aron naa kay ideya, tan-awa ang chart nga “Sugdi ang Pagbasa sa Bibliya.”
Irekord kon unsa nay imong nabasa. Gamita ang chart nga “Rekord sa Imong Pagbasa sa Bibliya” niini nga publikasyon.
Gamita ang JW Library® app. Magamit nimo ni sa pagbasa ug pagpaminaw sa Bibliya diha sa imong cellphone o ubang gadyet bisan asa ka.
Gamita ang mga apendise sa Bag-ong Kalibotang Hubad. Naa ni mga mapa, mga chart, ug glossary nga makatabang nga mas mag-enjoy ka sa pagbasa.
5. Pangandam sa imong pagtuon sa Bibliya
Basaha ang Salmo 119:34, ug dayon hisgoti kini nga pangutana:
Nganong maayo nga mag-ampo sa dili pa ka magbasag Bibliya o mangandam para sa imong pagtuon sa Bibliya?
Sa unsang paagi ka makabenepisyo pag-ayo sa matag pagtuon? Samtang mangandam ka sa kada leksiyon niini nga pagtuon, sulayi ang mosunod:
Basaha ang unang mga parapo sa leksiyon.
Pangitaa ug basaha ang mga teksto, ug paningkamoti nga masabtan nimo kon unsay koneksiyon niini sa leksiyon.
Markahi ang mga pulong nga magtubag sa matag pangutana; kini makatabang nimo dihang hisgotan na ninyo ni nga leksiyon sa nag-Bible study nimo.
Nahibalo ba ka?
Ang mga Saksi ni Jehova naggamit ug lainlaing hubad sa Bibliya. Pero ang pinakaganahan namo mao ang Bag-ong Kalibotang Hubad sa Balaang Kasulatan kay kini saktong pagkahubad, sayon sabton, ug naggamit sa ngalan sa Diyos.—Tan-awa ang Web article nga “Duna bay Kaugalingong Bibliya ang mga Saksi ni Jehova?”
ANG UBAN MOINGON: “Lisod kaayo tun-an ang Bibliya. Busy ko ug kapoyan ko ana.”
Unsay imong hunahuna?
SUMARYO
Aron makabenepisyo ka pag-ayo sa Bibliya, pag-eskedyul ug panahon sa pagbasa niini, pag-ampo nga masabtan nimo ang imong basahon, ug pangandam para sa imong pagtuon sa Bibliya.
Review
Unsay makatabang aron makabenepisyo ka pag-ayo sa Bibliya?
Sa imong kahimtang, unsa ang pinakamaayong panahon sa pagbasa ug pagtuon sa Bibliya?
Nganong maayo nga mangandam ka para sa pagtuon sa Bibliya?
SUSIHA
Basaha ang ubang sugyot nga makatabang nimo nga mas makabenepisyo sa pagbasa sa Bibliya.
“Daghan Kag Makat-onan sa Pagbasag Bibliya” (Ang Bantayanang Torre Num. 1 2017)
Sayra ang tulo ka paagi sa pagbasa sa Bibliya.
“Sa Unsang Paagi Matabangan Ko sa Bibliya?—Bahin 1: Pagsusi sa Imong Bibliya” (Web article)
Sayra kon sa unsang paagi ka mag-enjoy sa pagbasa sa Bibliya.
Tan-awa ang mga sugyot gikan sa mga dugay nang nagabasa ug Bibliya.