TAGOK SA BEDELIO

[Heb., bedhoʹlach].

Usa ka humot nga salongon nga tagok nga kaamgid ug dagway sa mira ug usahay gigamit aron isambog sa mira. (Tan-awa usab ang MIRA.) Kini makuha gikan sa usa ka kahoy (Commiphora africana) nga makaplagan sa AK sa Aprika ug Arabia ug usab gikan sa susamang matang sa kahoy sa AK sa India. Kini maoy usa ka matang sa gagmayng mga kahoy o kahoykahoy nga sapnot, tunokon ug diyutay rag mga dahon, nga mabuhi diha sa mainit nga mga dapit. Sa dihang hiwaan ang panit niini, ang usa ka humot, salongon nga duga o tagok mogawas. Human patuloon ang tagok gikan sa kahoy kini dayon mogahi, mahimong samag-talo ug sihag, ug susamag dagway sa perlas.

Sa paghubit sa yuta sa Havila nga gilibotan sa suba sa Pison (usa sa upat ka suba nga misanga gikan sa suba nga migula sa Eden), gihisgotan ang bililhong mga manggad niini: ang bulawan, tagok sa bedelio, ug batong onyx. (Gen 2:​11, 12) Sa Numeros 11:7 ang mana nga gipanguha sa mga Israelinhon panahon sa pagpanaw sa kamingawan giingon nga susamag dagway sa “tagok sa bedelio.” Una pa niana, ang mana gipakasama sa “nanibuok nga tun-og diha sa yuta.” (Ex 16:14) Kini maingon-ingon sa pution nga bulok sa tagok sa bedelio. Si Josephus, sa pagbatbat bahin sa tagana nga mana, naghisgot sa bedelio ingong usa ka “yerbang paalimyon.”​—Jewish Antiquities, III, 28 (i, 6).