MIRA, I

Usa ka humot nga salong. (Aw 1:13; 4:​6, 14; 5:​1, 13) Ang tukmang tinubdan niini sa karaang kapanahonan dili matino. Apan sagad ang mira mao ang salong nga naggikan sa nagkadaiyang tunokon nga mga kahoykahoy o gagmayng kahoy sa pamilya sa Commiphora, sama sa Commiphora myrrha o Commiphora abyssinica. Kini nga mga kahoykahoy mabuhi diha sa batoong mga lugar, ilabina sa anapog nga mga bungtod. Ang kahoy ug panit niini isog ug baho. Bisan tuod nga ang salong mogawas rag iya gikan sa punoan o gikan sa baga ug gahing mga sanga sa bisan hain niini nga matang, modaghan pa gayod ang tinulo pinaagi sa pagdisdis niini. Sa sinugdan ang salong humok ug hagkot apan, sa dihang motulo na nganha sa yuta, kini mogahi.

Ang mira maoy usa sa mga sambog nga gigamit alang sa balaang igdidihog nga lana. (Ex 30:23-25) Gipabilhan kini pag-ayo tungod sa kahumot niini, gigamit kini sa pagpahumot sa mga besti, higdaanan, ug sa uban pang mga butang. (Itandi ang Sal 45:8; Pr 7:17; Aw 3:​6, 7.) Ang dalagang Sulamita sa Awit ni Solomon mopatim-awng naghaplas ug mira diha sa iyang lawas sa dili pa matulog inigkagabii. (Aw 5:​2, 5) Ang mga pagmasahe ginamit ang lana sa mira maoy lakip sa linaing pagpatahom nga gihimo kang Ester. (Est 2:12) Ang mira usa usab sa mga substansiya nga gigamit sa pag-andam sa mga patayng lawas nga ilubong. (Ju 19:​39, 40) Dayag nga giisip kini nga mahalon tungod kay gigasa kini alang sa usa nga natawong hari sa mga Hudiyo.​—Mat 2:​1, 2, 11.