CUSAN-RISATAIM

[lagmit, Cusihanon (Etiopianhon) sa Dobleng Pagkadaotan].

Usa ka hari sa Mesopotamia nga sa iyang pagmando gipahigawas ni Otniel ang mga Israelinhon human sa walo-ka-tuig nga pagkaulipon. Siya gitawag usab “nga hari sa Sirya.” (Huk 3:7-11) Ang ikaduhang bahin (“risataim”) niining gikombinar nga ngalan giisip sa pipila ingong ngalan sa dapit o rehiyon, samtang gihubad kini sa uban nga nagkahulogang “Dobleng Pagkadaotan.” Ang “Cusan” gigamit sa Habacuc 3:7 nga katumbas sa Midian; apan giingon nga si Haring Cusan-risataim naggikan sa Mesopotamia (Heb., ʼAramʹ na·haraʹyim; itandi ang Gen 24:​10, diin gigamit ang samang termino sa paghubit sa lokasyon sa siyudad sa Nahor sa Sirya). Ang usa ka talaan ni Paraon Ramses III naghisgot sa usa ka distrito sa amihanang Sirya nga gitawag ug Qusanaruma, ug gituohan sa ubang mga eskolar nga kini lagmit maoy nahimutangan sa gingharian niini nga hari. Si Cusan-risataim mao ang unang dako nga tigpanglupig sa Israel sa panahon sa mga Maghuhukom.