HUSAI

[lagmit pinamubo sa Hasabias, nga nagkahulogang “Si Jehova Nag-isip (Nagtagad)”].

Usa ka maunongong Arkihanon nga higala ni Haring David nga mitabang sa pagsumpo sa pagrebelde ni Absalom. (1Cr 27:33) Si Husai, nga ginisi ang iyang hataas nga besti ug may yuta ibabaw sa iyang ulo, misugat sa mikalagiw nga hari didto sa Bukid sa mga Olibo. Gisunod niya ang sugyot ni David nga mobalik siya sa siyudad, magpakaaron-ingnon nga maunongon kang Absalom, maningkamot sa pagpakyas sa tambag ni Ahitopel, ug kanunayng hatagag impormasyon si David pinaagi sa mga saserdoteng si Zadok ug Abiatar. (2Sa 15:​30, 32-37) Sa sinugdan matahapon si Absalom, apan naangkon ra ni Husai ang pagsalig ni Absalom. (2Sa 16:16-19) Sa dihang si Absalom nangayog opinyon kang Husai bahin sa labing maayong estratehiya sa pagpakiggubat, si Husai misulti ug kasukwahi sa gitambag ni Ahitopel ug mirekomendar ug usa ka paagi nga sa pagkatinuod maghatag ug panahon kang David nga makapangandam pag-ayo. Gipresentar ni Husai ang iyang ideya sa paagi nga mas maayo kini sa tan-aw ni Absalom ug sa iyang mga kaubanan kay sa tambag ni Ahitopel sa pag-atake dayon. Unya gipahibalo ni Husai ang mga saserdote kon unsay nahitabo. (2Sa 17:1-16) Tungod sa tambag ni Husai napakyas ang tambag ni Ahitopel, ingon sa gipangaliya ni David sa Diyos, ug busa ‘si Jehova nagpahamtang ug katalagman kang Absalom.’​—2Sa 15:31; 17:14; tan-awa ang HIGALA (Higala [Kauban] sa Hari).