SABEANHON

1. Ang ngalan sa pundok sa mga manunulong nga miatake sa kabtangan ni Job sa yuta sa Uz. Kini nga mga Sabeanhon nagkuha sa mga baka ug mga asna ni Job ug nagpatay sa iyang mga tig-alagad. (Job 1:​14, 15) Diha sa Job 6:19 si Job naghisgot usab sa “nagalakbay nga panon sa mga Sabeanhon.”

Lisod matino kon kinsa gayod kining mga Sabeanhon, tungod kay sila lagmit maoy mga kaliwat sa nagkalainlaing mga tawo nga ginganlag Sheba. Ang anak nga lalaki ni Abraham nga si Joksan may anak nga lalaki nga ginganlag Sheba (Gen 25:1-3), ug dili matino kon kini ba nga mga manunulong nga Sabeanhon naggikan niini nga kaliwat. Apan kasagarang gituohan sa mga eskolar nga ang mga Sabeanhon naggikan kang Sheba nga kaliwat ni Ham pinaagi kang Cus (Gen 10:​6, 7) o kang Sheba nga anak nga lalaki ni Joktan sa linya ni Sem.​—Gen 10:21-29.

2. Ang tag-as nga katawhan nga gihisgotan sa Isaias 45:14 uban sa mga mamumuo sa Ehipto ug mga magpapatigayon sa Etiopia ingong mga tawo nga miila kang Jehova ug sa iyang katawhan. Gihisgotan usab sa Isaias 43:3 ang Ehipto ug Etiopia apan, inay nga “mga Sabeanhon,” kini migamit ug “Seba,” nga nagpakita nga ang mga tawo sa Seba gitawag nga mga Sabeanhon.​—Tan-awa ang SEBA Num. 2.

3. Ang mga kaliwat ni Sheba (dili matino kon gikan ba sa linya ni Sem o ni Ham) nga tatawng nahimong usa ka gingharian duol sa tumoy sa Peninsula sa Arabia. Lagmit nga ang rayna sa Sheba kinsa miduaw kang Solomon maoy gikan niining yutaa. (1Ha 10:1) Ang sekular nga mga tinubdan sagad nagtawag niini nga gingharian ingong Sabeanhon, ug mao usab kanay pagtawag sa Bibliya.​—Tan-awa ang SHEBA Num. 6.

Ang pipila ka hubad mabasa nga “mga Sabeanhon” diha sa Ezequiel 23:42 (KJ, Yg, Da), sa ingon nag-interpretar sa mabasa sa panaplin sa Hebreohanong Bibliya. Apan ang pangunang teksto mabasa nga “mga palahubog,” ug ingon niana ang sagad nga paghubad sa modernong mga hubad niini nga bersikulo.​—Ro, NW, AS, RS.