Pagtabang sa Uban sa Pagsimba sa Diyos

“Kon . . . dunay dili-magtutuo o ordinaryong tawo nga moabot, . . . ang mga tinagoan sa iyang kasingkasing madayag, busa magahapa siya ug simbahon ang Diyos.”​—1 CORINTO 14:24, 25.

 1-3. Sa unsang paagi daghan ang natabangan sa Corinto nga nakabaton sa pag-uyon sa Diyos?

SA IYANG ikaduhang misyonerong panaw, miestar si apostol Pablo sa siyudad sa Corinto sulod sa usa ka tuig ug tunga. Didto siya “puliki sa hilabihan sa pulong, nga nagamantala.” Unsa ang resulta? “Daghan sa mga taga Corinto nakadungog ug mituo ug gibawtismohan.” (Buhat 18:5-11) Sila nahimong “balaan. . . , gipanagtawag ingon nga mga balaan.”​—1 Corinto 1:2.

² Si Apolos sa ulahi miduaw sa Corinto. Sa una pa niana, gitabangan siya ni Priscila ug Aquila sa pagsabot “sa dalan sa Diyos nga labi pa ka tukma,” lakip na ang bahin sa bawtismo. Busa nahimo siyang usa ka Kristohanon nga nakabaton sa maayong kabubut-on, kun pag-uyon sa Diyos. (Buhat 18:24–19:7) Gitabanga ni Apolos, sa baylo, ang mga taga Corinto nga niadto ‘nadaldal sa mga diyosdiyos nga amang.’ (1 Corinto 12:2) Hayan gihatagan kining mga tawhana ug instruksiyon sa Bibliya diha sa ilang mga balay; sila makakat-on usab pinaagi sa pagtambong sa Kristohanong mga tigom.​—Buhat 20:20; 1 Corinto 14:22-24.

³ Ang resulta sa maong pagpanudlo mao nga daghan niadtong ‘dili mga magtutuo ug ordinaryong mga tawo’ nakabig sa matuod nga pagsimba. Pagkamakatagbaw niadto ang pagkakita sa mga lalaki ug mga babaye nga miuswag ngadto sa bawtismo ug sa pag-uyon sa Diyos! Kini makapatagbaw gihapon.

Pagtabang sa ‘mga Dili-Magtutuo ug sa Ordinaryong mga Tawo’

 4. Sa unsang mga paagi daghan karong adlawa natabangan sama sa Corinto?

⁴ Ang mga Saksi ni Jehova karong adlawa nagatuman usab sa sugo ni Jesus sa “paghimog mga tinun-an sa katawhan sa tanang kanasoran, sa pagbawtismo kanila.” (Mateo 28:19, 20) Human makasabod sa mga binhi sa kamatuoran diha sa masanongong mga kasingkasing, sila mobalik ug bisbisan kini. (1 Corinto 3:5-9; Mateo 13:19, 23) Ang mga Saksi nagatanyag ug libreng mga pagtuon sa Bibliya sa balay aron matubag ang mga pangutana sa mga tawo ug makakat-on sa mga kamatuoran sa Bibliya. Kining mga tawhana dapiton usab sa pagtambong sa lokal nga mga tigom sa mga Saksi ni Jehova, sama sa gihimo sa unang siglong “mga dili-magtutuo” sa Corinto. Apan sa unsang paagi lantawon sa mga Saksi ni Jehova ang mga tawo nga nagatuon sa Bibliya ug nagatambongan sa mga tigom?

 5. Unsang Kasulatanhong basehanan nga kinahanglang mag-amping sa pagpakiglabot sa pipila ka indibiduwal?

⁵ Kita malipay sa pagtan-aw kanila nga nagaduol sa Diyos. Apan, ibutang nato sa atong hunahuna nga sila wala pay bawtismong mga magtutuo. Isilsil sa hunahuna usab ang duha ka pagtulon-an nga gipasukad sa nag-unang artikulo. (1) Mainampingon ang mga Israelinhon sa dumuloong nga mga molupyo kinsa, bisan tuod nagpakig-uban na sa katawhan sa Diyos ug nagsunod sa pipila sa mga kasugoan, sila dili sirkunsadong mga kinabig, nga mga igsoon sa pagsimba. (2) Ang mga taga Corinto nga mga igsoon nga nakiglabot sa ‘mga dili-magtutuo ug ordinaryong mga tawo’ alisto kanunay tungod sa mga pulong ni Pablo: “Ayaw kamo pagpahiangay sa inyong kaugalingon kauban sa mga dili-magtutuo. Kay unsa may pakigkomboyahan sa pagkamatarong ug sa pagkadaotan?”​—2 Corinto 6:14.

 6. Sa unsang paagi ang “mga dili-magtutuo” “mabadlong” pinaagi sa mga tigom, ug unsa ang kinaiyahan sa maong mga pagbadlong?

⁶ Busa bisan tuod atong abiabihon ang ‘mga dili-magtutuo ug ordinaryong mga tawo,’ kita nahibalo nga sila wala pa makaabot sa mga sukdanan sa Diyos. Sumala sa gipakita sa Bibliya diha sa 1 Corinto 14:24, 25, kini sila kinahanglan pang “susihon pag-ayo,” “ginabadlong” pa ngani, pinaagi sa ilang nakat-onan. Kini dili usa ka hudisyal nga pagbadlong, dili sila paatubangon sa hudisyal nga komite sa kongregasyon sanglit dili pa man sila bawtismadong mga sakop niana. Hinunoa, ingong resulta sa ilang nakat-onan, kining maong mga bag-ohan nakombinsir nga hukman sa Diyos ang bisan unsang dalo ug imoral nga mga buhat.

 7. Unsang dugang kauswagan nga gustong himoon sa mga estudyante ug ngano?

⁷ Daghang mga dili-bawtismado sa ulahi hayan gusto nga mohimog labaw pa sa yanong pagtambong sa mga tigom ingong interesadong mga magtutuon. Kining mga pulonga ni Jesus ang nagpakita kon ngano: “Ang tinun-an dili labaw sa iyang magtutudlo, apan ang matag usa nga katudloan sa hingpit mahisama sa iyang magtutudlo.” (Lucas 6:40) Ang estudyante sa Bibliya makakita nga ang uyang magtutudlo naglantaw sa pag-alagad sa kanataran nga hinungdanon ug gikalipayan kana. (Mateo 24:14) Busa, uban ang nagauswag nga pagtuo, ang tawo nga nagpakakat-on sa mga kamtuoran sa Bibliya ug nagatambongan sa mga tigom maayong isilsil ang mga pulong: “Pagkatahom sa ibabaw sa kabukiran sa mga tiil niadtong nanagdala sa mga maayong balita, nga nanagmantala sa pakigdait, nga nanagdala sa maayong balita sa usa ka butang nga labi pang maayo, nga nanagmantala sa kaluwasan.” (Isaias 52:7; Roma 10:13-15) Bisan pag walay bawtismo, hayan gusto niyang mahimong usa ka magmamantala sa Gingharian nga nagapasakop sa kongregasyon sa mga Saksi ni Jehova.

 8, 9. (a) Unsay buhaton kon ang usa ka estudyante sa Bibliya gusto nang makigbahin sa publikong ministeryo? (b) Sa dihang makigkita ang duha ka ansiano uban sa umaabot nga magmamantala ug sa iyang magtutudlo, unsay ilang buhato? (c) Unsang responsabilidad ang ginadawat sa bag-ong magmamantala?

⁸ Sa dihang ang Saksi nga nagadumala sa pagtuon sa Bibliya makakita nga ang estudyante gusto nang makigbahin sa pag-alagad sa kanataran, siya makahimo sa paghisgot sa maong butang uban sa nagadumalang magtatan-aw, nga maoy mohikay alang sa duha ka ansiano sa pakigkita sa estudyante sa Bibliya ug sa iyang magtutudlo. Malipay ang mga ansiano sa dihang ang mga bag-ohan gustong moalagad sa Diyos. Sila dili maglaom nga siya may kahibalo sama sa mga bawtismado ug daghan nang nakat-onan sa kamatuoran, nga kanila daghan pa ang gikinahanglan. Dugang pa, susihon sa mga ansiano nga sa dili pa makigbahin ang bag-ohan sa pag-alagad sa kanataran uban sa kongregasyon, siya dunay igong kahibalo sa mga pagtulon-an sa Bibliya ug nagapahiuyon sa iyang kinabuhi sa mga prinsipyo sa Diyos. Busa alang sa maayong katarongan nga duha ka ansiano ang makigkita sa umaabot nga magmamantala ug sa Saksi nga nagadumala sa pagtuon.a

⁹ Pahibaloon sa duha ka ansiano ang estudyante nga siya kuwalipikado ug makabahin sa pag-alagad sa kanataran, siya makahimo sa paghatag ug report sa pag-alagad sa kanataran ug himoan siyag Publisher Record kard sa kongregasyon sa iyang ngalan. Kini maoy mopadayag sa iyang pagkamembro sa teokratikanhong organisasyon sa mga Saksi ni Jehova ug sa iyang pagpasakop niana. (Tinuod usab kini sa uban pa nga mohatag ug mga report sa pag-alagad sa kanataran.) Kobrehan sa diskusyon ang tambag, sa Bibliya sama nianang gilaraw diha sa panid 98 ug 99 sa Organisado sa Pagtuman sa Atong Ministeryon.b Busa, tukmang panahon kini alang sa estudyante sa Bibliya nga makabaton ug personal nga kopya niining libroha.

10. (a) Sa unsang paagi ang dili-bawtismadong magmamantala makapadayon sa pag-uswag, ug uban sa unsang tumong? (b) Nganong dunay kausaban ang gihimo bahin sa termining “inuyonang kauban”? (Tan-awa ang potnot.)

¹⁰ Ang tawo nga nakakab-ot sa kuwalipikasyon ingong dili-bawtismadong magmamantala sa maayong balita nakaliso sa direksiyon sa pagkahimong usa ka ‘tawo nga maayo ug kabubut-on.’c (Lucas 2:14) Bisan pa ug dili siya dedikado ug bawtismado, siya karon makareport sa iyang kalihokan sa pagsangyaw uban sa minilyon sa mga aktibo sa tibuok-kalibotan nga “nagamantala sa pulong sa Diyos.” (Buhat 13:5; 17:3; 26:22, 23) Ipahibalo sa kongregasyon nga siya usa na ka dili-bawtismadong magmamantala. Siya kinahanglan magpadayon sa pagtuon sa Bibliya, makigbahin sa mga tigom, ipadapat ang iyang nakat-onan, ug ipaambit kana sa uban. Dili madugay, siya gusto nang mohimog lakang sa Kristohanong bawtismo, busa mahimong inuyonan sa Diyos ug may ‘patik’ alang sa kaluwasan.​—Ezekiel 9:4-6.

Tabang Alang sa Usa nga Makasala

11. Sa unsang paagi atimanon sa kongregasyon ang mga bawtismado nga nakadala?

¹¹ Sa nag-unang artikulo, atong gihisgotan ang mga tagan sa kongregasyon sa pagtabang sa tanang bawtismadong mga Kristohanon nga nakahimog seryosong sala. (Hebreohanon 12:9-13) Ug atong nakita sa Bibliya nga kon dili maghinulsol ang usa ka bawtismado nga nakahimog sala, ipalagpot siya sa kongregasyon ug busa malikayan ang bisan unsang pagpakigsandurot kaniya. (1 Corinto 5:11-13; 2 Juan 9-11; 2 Tesalonica 2:11, 12) Apan, unsang lakang ang himoon kon ang walay bawtismong magmamantala seryosong nakahimog kalapasan o kasal-anan?

12. (a) Nganong ang maluloy-ong tabang mabatonan usab sa mga dili-bawtismado nga nakasala? (b) Sa unsang paagi ang prinsipyo sa Lucas 12:48 may kalabotan sa pagkamaytulobagon sa nabuhat nga sala?

¹² Si Judas miawhag nga ipakita ang kaluoy sa dinihogang mga Kristohanon nga natugkan ug pagduhaduha o nahulog sa mga kasal-anan sa unod, basta maghinulsol sila. (Judas 22, 23; tan-awa usab ang 2 Corinto 7:10.) Dili ba mas tukma nga pakitaan ug kaluoy ang usa ka dili-bawtismadong tawo nga nakasala kinsa nagpakitag paghinulsol? (Buhat 3:19) Oo, kay ang iyang espirituwal nga pundasyon dili pa sama ka lig-on, ug ang iyang kasinatian sa Kristohanong pagkinabuhi limitado. Tingali wala pa siya mahibalo sa panghunahuna sa Diyos bahin sa pila ka butang. Siya wala pa makaagi sa mga seryal sa una pa sa bawtismong mga panaghisgot sa Bibliya uban sa mga ansiano, ug wala pa siya magplano sa seryosong lakang sa pagpatuslob sa tubig. Dugang pa, si Jesus miingon nga ang “matag usa nga gikahatagan ug daghan, pagapangayoan ug daghan.” (Lucas 12:48) Busa, dako ang gilaoman sa mga bawtismado si kinsa, uban sa nagadugang nga kahibalo ug mga panalangin, dunay linain nga tulobagon.​—Santiago 4:17; Lucas 15:1-7; 1 Corinto 13:11.

13. Kon makasala ang dili-bawtismadong igsoon, unsay buhaton sa mga ansiano aron makatabang?

¹³ Nahiuyon sa tambag ni Pablo, ang kuwalipikado sa espirituwal nga mga igsoon buot motabang sa tanang walay-bawtismong magmamantala nga makahimog sayop nga lakang nga wala makahibalo niana. (Itandi ang Galacia 6:1.) Pangutan-on sa mga ansiano ang duha sa ilang kauban (tingali kadtong unang nakigkita kaniya) sa pagsulay sa pagtul-id kaniya kon siya gustong magpatabang. Ilang himoon kini, dili sa tinguha sa pagbadlong nga may kabug-at kondili sa malulutong paagi ug diha sa espiritu sa kalumo. (Salmo 130:3) Diha sa kadaghanang mga kaso, ang Kasulatanhong tambag ug praktikal nga mga sugyot igo na sa pagpatunghag paghinulsol ug sa pagbutang kaniya diha sa hustong dalan.

14, 15. (a) Unsay himoon kon ang nakasala tinuod nga naghinulsol? (b) Unsang limitadong nagapatin-awng komento ang himoon diha sa pila ka kaso?

¹⁴ Mohatag ang duha ka ansiano ug mga giya nga angay sa kahimtang sa walay bawtismong tawo nga nakahimog daotang buhat. Diha sa ubang mga kaso, hayan maghikay sila nga sulod sa usa ka panahon ang tawong nakasala dili hatagan ug bahin sa Teokratikanhong Tunghaan sa Ministeryo o tugotan sa pagkomento diha sa mga tigom. O kaha ilang sultihan nga sila dili mahimong makigbahin sa publikong ministeryo uban sa kongregasyon hangtod nga siya makahimog dugang espirituwal nga kauswagan. Ayha pa nga sila makasulti kaniya nga siya makahimo na sa pakig-ambit sa pag-alagad sa kanataran. Kon ang tawo nga nakahimog daotan wala makahatag daotang ngalan ug dili usa ka hulga sa kahinlo sa panon, dili na kinahanglan nga pahibaloon ang kongregasyon pinaagi sa bisan unsang anunsiyo.

¹⁵ Apan, komosta, kon nakita sa duha ka ansiano nga ang tawo tinuod nga naghinulsol, apan kaylap nga nahibaloan ang kasal-anan? Komosta kon ang kasal-anan madayag sa ulahi? Bisan hain nga kaso, mahimong ilang pahibaloon ang Komite sa Pag-alagad sa Kongregasyon, nga maoy mohikay sa yanong pahibalo, sama sa mosunod: “Usa ka butang nga nalangkit . . . ang giatiman, ug siya [babaye o lalaki] padayong makaalagad ingong dili-bawtismadong magmamantala sa kongregasyon.” Sama sa tanang ubang mga butang, . . . ang lawas sa mga ansiano ang makahukom kon maayo ba sa umaabot sa paghatag ug Kasulatanhong pakigpulong uban ang tambag bahin sa matang sa kalapasang nalangkit.

16, 17. (a) Unsang duha ka kahimtang nga mahimong basehan alang sa lahi nga pahibalo? (b) Unsa ang kinaiyahan niini nga pahibalo?

¹⁶ May mga panahon, nga ang usa ka dili-bawtismadong magmamantala nga nakahimog daotan dili mosanong sa mahigugmaong tabang. O ang usa ka dili-bawtismadong magmamantala mohukop nga dili na siya gustong mouswag pa hangtod sa bawtismo, ug iyang sultihan ang mga ansiano nga dili siya gustong ilhon pa nga usa ka magmamantala. Unsa may buhaton? Walay pagpalagpot ang himoon maylabot kanila kinsa sa aktuwal wala pa man gayod makadawat sa pag-uyon sa Diyos. Ang kahikayan sa pagpalagpot sa mga dili-mahinulsolong mamumuhat ug daotan ikapadapat lang niadtong ‘gitawag nga mga igsoon,’ sa mga bawtismado lang. (1 Corinto 5:11) Apan, kini ba nagpasabot nga ipalabay lang ang daotang buhat? Dili.

¹⁷ Ang mga ansiano mao ang responsabli sa ‘pagbantay sa panon sa Diyos nga gipaatiman kanila.’ (1 Pedro 5:2) Kon matino sa duha ka ansiano nga mihatag ug tabang nga ang walay bawtismong makasasala dili-mahinulsolon ug dili-kuwalipikado nga mahimong magmamantala, ilang pahibaloon ang indibiduwal.d O kon dunay dili-bawtismadong tawo nga mosulti sa mga ansiano nga dili na siya gustong maila pa ingong magmamantala, ilang dawaton ang iyang desisyon. Sa bisan hain nga kaso, tukma alang sa Komite sa Pag-alagad sa Kongregasyon sa paghimog yanong pahibalo nga buhaton sa angay nga panahon, nga magaiongon “ . . . dili na usa ka magmamantala sa maayong balita.”

18. (a) Human sa pahibalo, unsay ibutang sa hunahuna sa mga Kristohanon sa paghukom kon unsaon sa paglihok? (b) Kinahanglan bang bug-os likayan ang mga walay bawtismo nga sad-an sa daotang buhat sa nangagi?

¹⁸ Unsa may paglantaw sa mga Saksi human niana niining tawhana? Buweno, sa sayo nga yugto siya maoy usa ka ‘dili-magtuto’ nga nagtambongan sa mga tigom. Dayon siya nagtinguha ug kuwalipikado nga mahimong usa ka magmamantala sa maayong balita. Dili na ingon niini ang kahimtang, busa siya usa na usab ka tawo sa kalibotan. Ang Bibliya wala magsugo nga dili na makigsulti pa ang mga Saksi ni Jehova kaniya, kay siya wala man mapalagpot.e Dugang pa, mag-amping ang mga Kristohanon bahin sa maong tawo sa kalibotan nga dili magsisimba ni Jehova, sama sa gihimo sa mga Israelinhon maylabot sa walay-sirkunsisyong dumuloong nga mga molupyo. Kining maong panagana makapanalipod sa kongregasyon gikan sa bisan unsang “gamayng lebadura,” o makadunot nga butang. (1 Corinto 5:6) Kon sa ulahi nga panahon mopakita siyag tinuod nga tinguha alang sa pagtuon sa Bibliya nga himoon uban niya, ug kon makita sa mga ansiano nga kini angay, tingali kini makatabang kaniya sa pagpabili pag-usab sa dakong pribilehiyo nga magasimba kang Jehova uban sa Iyang katawhan.​—Salmo 100.

19. Sa unsang paagi ang mga ansiano sa pribado makahatag dugang tabang diha sa pila ka kaso?

¹⁹ Kon makita sa mga ansiano nga ang usa ka tawo niining matanga nagapameligro sa panon, ilang pasidan-an sa pribado kadtong nameligro. Pananglitan, ang magmamantala kanhi tingali maoy usa ka batan-on nga nagpadala sa pagkapalahubog o sa imoralidad. Bisan pa sa pahibalo nga siya dili na usa ka walay bawtismong magmamantala, siya basin mosulay sa pagpakigsandurot sa mga batan-on diha sa kongregasyon. Niana nga kahimtang, makigsulti ang mga ansiano sa pribado sa mga ginikanan sa nameligrong mga batan-on, ug tingali sa mga batan-on usab. (Hebreohanon 12:15, 16; Buhat 20:28-30) Diha sa talagsaong kaso sa usa ka tawo nga magubtanon o peligroso kaayo, siya mahimong sultihan nga siya dili makatambong sa mga tigom ug ang bisan unsa nga pagsulay sa pagsulod isipong paglapas.

Pagtabang sa mga Minor-de-Edad sa Pagsimba sa Diyos

20. Unsang tabang ang mahatag sa Kristohanong mga ginikanan alang sa ilang mga anak, ug unsa ang resulta?

²⁰ Ang Bibliya naghatag sa mga ginikanan ug responsabilidad sa pagtudlo sa ilang mga anak sa dalan sa kamatuoran sa Diyos. (Deuteronomio 6:4-9; 31:12, 13) Busa, dugay nang gidasig sa mga Saksi ni Jehova ang Kristohanong mga pamilya mga magdumalag senemanang pagtuon sa Bibliya. Kinahanglang dasigon sa Kristohanong mga ginikanan ang ilang mga bata sa pag-uswag paingon sa dedikasyon ug bawtismo ug busa makabaton sa pag-uyon sa Diyos. (Proverbio 4:1-7) Atong makita diha sa mga kongregasyon ang makalipay nga resulta​—ginatos ka libo sa sulondang mga batan-on ang nahigugma kang Jehova ug nagatinguha sa pagsimba kaniya sa walay kataposan.

21-23. (a) Labing hinungdanon, sa unsang paagi atimanon ang sala sa usa ka menor-de-edad? (b) Unsay himoon sa mga ansiano niining kahimtanga?

²¹ Ang Kristohanong mga ginikanan dunay pangunang responsabilidad usab sa pagdisiplina ug sa pagbadlong sa ilang mga anak, magpakanaog ug mga restriksiyon o mahigugmaong mga silot nga ilang nakitang gikinahanglan. (Efeso 6:4; Hebreohanon 12:8, 9; Proverbios 3:11, 12; 22:15) Apan, kon ang usa ka minor-de-edad nga bata nga nagapakig-uban ingong usa ka dili-bawtismadong magmamantala malangkit sa seryosong sala, atimanon kini sa mga ansiano nga ‘nagabantay sa mga kalag’ sa panon.​—Hebreohanon 13:17.

²² Sa paninugdang, ang maong kalapasan kinahanglang atimanon sumala sa gilaraw diha sa sinugdanan niining artikuloha. Duha ka ansiano ang itudlo sa pagsusi sa maong butang. Ila, pananglitan, hisgotan uban sa mga ginikanan (o ginikanan) ang nahitabo, kon unsay tinamdan sa bata, ug unsang mga lakang sa pagtul-id ang gihimo. (Itandi ang Deuteronomio 21:18-21.) Kon nakontrolar na sa Kristohanong mga ginikanan ang kahimtang, susihon lang sa mga ansiano sila sa matag karon ug unya aron sa paghatag ug makatabang nga tambag, mga sugyot, ug mahigugmaong pagdasig.

²³ Apan, usahay, mapadayag sa pagpakighisgot uban sa mga ginikanan nga labing maayo alang sa mga aniano nga makigkita sa masupilong minor-de-edad ug ang mga ginikanan. Samtang isilsil sa hunahuna ang mga limitasyon ug ang hilig sa mga batan-on, maningkaot ang mga magtatan-aw sa pagtudlo sa batan-on, walay bawtismong magmamantala uban sa kalumo. (2 Timoteo 2:22-26) Diha sa ubang mga kahimtang, hayan matin-aw nga siya dili na kuwalipikado nga mahimong usa ka magmamantala ug ang angay nga pahibalo himoon.

24. (a) Bisag nakahimo ang minor-de-edad ug seryosong kalapasan, unsay maayong buhaton sa mga ginikanan, ug unsaon nila kini sa paghimo? (b) Sa unsang paagi aplikado kini sa usa ka minor-de-edad nga napalagpot?

²⁴ Human niana, unsay himoon sa mga ginikanan alang sa ilang nakasalang minor-de-edad nga anak? Sila gihapon ang responsabli sa ilang anak, bisag dili na siya kuwalipikado ingong dili-bawtismadong magmamantala o bisag gipalagpot siya tungod sa kalapasang nahimo human sa bawtismo. Sama nga magpadayon sila sa pagtagana kaniya ug pagkaon, sapot, ug puloy-anan, kinahanglang ilang tudloan ug disiplinahon siya sumala sa Pulong sa Diyos. (Proverbio 6:20-22; 29:17) Ang mahigugmaong mga ginikanan mahimong makahikay sa paghimog pagtuon sa Bibliya uban kaniya, bisan pa ug napalagpot siya.f Tingali makakuha siya sa labing makatul-id nga kaayohan gikan sa ilang pagtuon kaniya nga siya rang usa. O kaha sila mohukom nga siya makahimo sa pakigbahin sa kahikayan sa pagtuon sa pamilya. Bisan pa ug nahisalaag siya, gusto nilang makita siya nga mobalik kang Jehova, sama sa gihimo sa usikang anak sa sambingay ni Jesus.​—Lucas 15:11-24.

25. Nganong ang mahigugmaong interes ug tabang ipakita sa “mga dili-magtutuo” karong adlawa?

²⁵ Ang tumong sa atong pagsangyaw ug pagpanudlo mao ang pagtabang sa uban nga mahimong malipayong mga magsisimba sa matuod nga Diyos. Ang ‘mga dili-magtutuo ug ordinaryong mga tawo’ sa Corinto natukmod sa ‘paghapa ug sa pagsimba sa Diyos, nga nagmantala: “Ang Diyos anaa gayod sa inyong taliwala.”’ (1 Corinto 14:25) Pagkadakong kalipay karong adlawa sa pagkakitag dugang ug dugang mga tawo nga modangat sa pagsimba sa Diyos! Kini maoy mahimayaong katumanan sa pahayag sa manulonda: “Himaya sa Diyos sa kalangitan, ug sa yuta panagdait sa mga tawo nga maayo ug kabubut-on [o, mga tawo nga gikahimut-an sa Diyos].”​—Lucas 2:14.

[Mga footnote]

Nakahinumdom Ka Ba?

◻ Unsay paglantaw sa mga Kristohanon sa “mga dili-magtutuo” nga nagatambongan sa mga tigom?

◻ Kon gusto nang makigbahin ang estudyante sa Bibliya sa pag-alagad sa kanataran, unsang mga lakang ang himoon sa mga ansiano, ug unsang responsabilidad ang dawaton sa estudyante?

◻ Unsay buhaton kon ang usa ka walay bawtismong magmamantala makahimog seryosong sala?

◻ Sa unsang paagi ang mga ginikanan ug mga ansiano makatabang sa minor-de-edad nga mga anak nga nagpuyo sa balay, bisan kon seryoso ang nahimong sala sa maong mga batan-on?

[Hulagway sa panid 16]

Dihang mahimong magmamantala, bisag walay bawtismo, maoy usa ka hinungdanon ug responsabling lakang sa pagkadawat sa pag-uyon sa Diyos