Pangutana

◼ Sa dili pa ang usa ka di-bawtismadong magmamantala aprobahan alang sa bawtismo, unsa kadugay nga siya kinahanglang magatambong sa mga tigom sa kongregasyon ug makigbahin sa ministeryo?

Ang pagpabawtismo mao ang labing hinungdanong desisyon nga himoon sa usa ka tawo. Sa di pa siya maaprobahan alang sa bawtismo, kinahanglang duna na siyay igong pagsabot sa kon unsay gikinahanglan sa Diyos kaniya. Dugang pa, kinahanglang nakapasundayag na siya sa iyang determinasyon sa pagkinabuhi uyon sa mga sukdanan sa Diyos.

Ang mga Kristohanon gisugo nga dili biyaan ang panagkatigom, busa ang usa ka di-bawtismadong magmamantala kinahanglang tigtambongan na sa mga tigom sa kongregasyon. (Heb. 10:24, 25) Sagad siya mokomento na usab diha sa tigom. Lagmit siya nagpaenrol na sa Teokratikanhong Tunghaan sa Ministeryo, bisan tuod nga kini dili lagda.

Dugang pa, sanglit ang mga Kristohanon gisugo man sa pagsangyaw sa maayong balita ug paghimog tinun-an, ang usa ka di-bawtismadong magmamantala kinahanglang regular nang nakigbahin sa ministeryo sa dili pa bawtismohan. (Mat. 24:14; 28:19, 20) Pila ka bulan nga kinahanglan siyang magsangyawan sa dili pa siya bawtismohan? Kinahanglan nga taudtaod na siyang nakapakitag determinasyon sa pagkaregular ug pagkamasiboton sa ministeryo kada bulan. (Sal. 78:37) Apan, dili pod kinahanglang dugay na kaayo ang panahon nga milabay sukad sa pagsugod niyag sangyaw hangtod siya mokuwalipikar sa bawtismo, tingali igo na ang pipila ka bulan. Unsa ka daghang oras sa kanataran ang iyang ireport? Walay lagda alang niini. Kinahanglang tagdon sa mga ansiyano ang kahimtang sa matag magmamantala ug sila angayng magmakataronganon ug magmatimbang.—Luc. 21:1-4.

Kinahanglang hinumdoman sa mga ansiyano (o ministeryal nga mga alagad sa kongregasyong diyutay rag mga ansiyano) nga magrepaso sa kandidato sa bawtismo nga managlahi ang matag magmamantala, ug kinahanglang gamiton nila ang ilang maayong panghukom sa pagtino kon siya kuwalipikado ba sa bawtismo. Ilang tinoon nga siya adunay tinuod nga tinguha nga mahimong Saksi ni Jehova ug nagpabili sa iyang pribilehiyo sa pagpakig-uban sa organisasyon ni Jehova ug sa pagpakigbahin sa ministeryo. Hunahunaon sa mga ansiyano nga siya dili pa gyod hamtong sa espirituwal o batid na sama sa eksperyensiyadong bawtismado nga mga magmamantala. Kon gibati sa mga ansiyano nga siya dili pa kuwalipikado sa bawtismo, maluloton nilang ipasabot kaniya ang Kasulatanhong mga rason sa ilang desisyon ug tabangan siya sa espirituwal.