Makabaton Ka bag Kaayohan sa Mga Pakigtugon sa Diyos?
“‘Pinaagi kanimo mapanalanginan ang tanang nasod.’ Busa kadtong magapabilin sa pagtuo mapanalanginan uban sa matinuohon nga Abraham.”—GALACIA 3:8, 9.
1. Unsay gipakita sa kasaysayan bahin sa epekto sa daghang pagmando?
“ANG maayohon [o, nalamdagan] nga mga mahariharion” mao ang pagtawag sa pila ka Uropanhong magmamando sa ika-18ng siglo. Sila ‘maayo untag tuyo nga mandoan ang ilang katawhan uban sa inamahang kalulot, apan nasipyat ang ilang mga plano ug nalumpag ang ilang mga reporma.’a (The Encyclopedia Americana) Kadto usa ka dakong hinungdan sa mga rebolusyon nga milukop sa Uropa sa wala madugay.
2, 3. Sa unsang paagi si Jehova lahi sa tawhanong mga hari?
2 Pagkalahi ni Jehova gikan sa dimatagnang mga tawong magmamando. Masabot dayon nato ang makaguol nga panginahanglan sa kausaban nga sa kataposan mopatunghag tinuod nga mga kasulbaran sa inhustisya ug pag-antos. Apan dili angay nga kita mabalaka nga ang kalihokan sa Diyos sa pagpatungha niini mag-agad sa kapritso. Diha sa labing kaylap gipanagtag nga basahon sa kalibotan, gipasulat niya ang iyang saad nga patunghaon ang malungtarong mga panalangin alang sa matinuohon nga katawhan. Kini unya dili magpakabana sa nangaging nasyonalidad, rasa, edukasyon, o sosyal nga kahimtang sa katawhan. (Galacia 3:28) Apan makasalig ka ba niini?
3 Gikutlo ni apostol Pablo ang bahin sa pasalig nga gihatag sa Diyos kang Abraham: “Tino nga sa panalangin ako magapanalangin kanimo.” Gidugang ni Pablo nga sanglit “ang Diyos dili magbakak,” kita “makabaton untag dakong pagdasig nga mangupot sa paglaom nga gibutang sa atong atubangan.” (Hebreohanon 6:13-18) Ang atong pagsalig nianang mga panalangin dugang mapalig-on pinaagi sa pagmatikod sa mahusayng paagi nga gipahiluna sa Diyos ang pasukaranan aron molampos kini.
4. Giunsa paggamit sa Diyos ang nagkalainlaing mga pakigtugon sa pagpalampos sa iyang katuyoan?
4 Nakita na nato nga gihimo sa Diyos ang usa ka pakigtugon uban kang Abraham nga naglangkit sa usa ka binhi nga maoy gamiton aron panalanginan ang “tanang nasod sa yuta.” (Genesis 22:17, 18) Ang mga Israelinhon nahimong unodnong binhi, apan sa labi pang bililhon espirituwal nga diwa, si Jesu-Kristo napamatud-ang mao ang pangunang bahin sa binhi ni Abraham. Si Jesus mao usab ang Anak, o Binhi, sa Labaw nga Abraham, si Jehova. Ang mga Kristohanon nga “iya ni Kristo” maoy naglangkob sa ikaduhang bahin sa binhi ni Abraham. (Galacia 3:16, 29) Tapos sa pagporma sa Abrahamikong pakigtugon, temporaryong gidugang sa Diyos ang pakigtugon sa Kasugoan uban sa nasod sa Israel. Nagpamatuod kadto nga ang mga Israelinhon maoy mga makasasala nga nagkinahanglag permanente nga saserdote ug hingpit nga halad. Kadto nanalipod sa linya sa Binhi ug nakabulig sa pag-ila kaniya. Sa usa ka paagi, gipakita usab sa pakigtugon sa Kasugoan nga patunghaon sa Diyos ang usa ka nasod sa mga hari-saserdote. Samtang gipatuman pa ang Kasugoan, gihimo sa Diyos ang usa ka pakigtugon uban kang David nga magbaton ug harianong dinastiya sa Israel. Ang Davidnong pakigtugon sa Gingharian mipunting usab sa usa nga maoy permanenteng magmando sa yuta.
5. Unsang mga pangutana o mga suliran ang kinahanglang sulbaron pa?
5 Bisan pa niana, may mga bahin o mga katuyoan sa maong mga pakigtugon nga daw dili kompleto o nagkinahanglag katin-awan. Pananglitan, kon ang umaabot nga Binhi mahimong usa ka hari sa linya ni David, sa unsang paagi siya mahimong permanenteng saserdote nga labawg mahimo kay sa nangaging mga saserdote? (Hebreohanon 5:1; 7:13, 14) Ang mao bang Hari makamando labaw pa sa limitadong yutan-ong dominyo? Sa unsang paagi ang ikaduhang bahin sa binhi mahimong takos nga masakop sa pamilya sa Labaw nga Abraham? Ug bisan pag sila mahimong takos, unsang dominyoha ang maangkon nila, sanglit ang kadaghanang membro dili man gikan ni David? Atong tan-awon sa unsang paagi ang Diyos mihimog legal nga mga lakang sa dagway sa dugang mga pakigtugon nga maghusay niining mga pangutanaha, nga mag-abli sa dalan sa atong walay-kataposang panalangin.
Pakigtugon Alang sa Langitnong Saserdote
6, 7. (a) Sumala sa Salmo 110:4, unsang dugang pakigtugon ang gihimo sa Diyos? (b) Unsang pasiunang kasayoran ang mobulig kanato sa pagsabot niining dugang nga pakigtugon?
6 Sumala sa atong nakita, sulod sa gilapdon sa pakigtugon sa Kasugoan, ang Diyos nakigsaad kang David alang sa usa ka kaliwat (usa ka binhi) nga magharing permanente sa yutan-ong dominyo. Apan gibutyag usab ni Jehova kang David nga moabot ang usa ka malungtarong saserdote. Si David misulat: “Si Jehova nanumpa (ug dili siya magbasol): ‘Ikaw maoy usa ka saserdote sa panahong walay katinoan sumala sa paagi ni Melkisedek!’” (Salmo 110:4) Unsay nagpaluyo sa maong panumpa sa Diyos nga mitumbas sa usa ka personal nga pakigtugon tali kang Jehova ug sa umaabot nga Saserdote?
7 Si Melkisedek maoy hari sa karaang Salem, nga lagmit diha sa dapit diin sa ulahi gitukod ang siyudad sa Jerusalem (usa ka ngalang naapilan sa “Salem”). Ang asoy sa mga pakiglabot ni Abraham uban kaniya nagpasiugda nga siya usa ka hari nga nagsimba sa “Labing Hataas nga Diyos.” (Genesis 14:17-20) Bisan pa niana, ang pahayag sa Diyos sa Salmo 110:4 nagapakitang si Melkisedek maoy usa ka saserdote usab, nga naghimo niyang talagsaon nga tawo. Siya hari ug saserdote, ug siya nag-alagad sa dapit diin gituman sa ulahi sa Davidnong mga hari ug sa Levihanong mga saserdote ang ilang gihikay-sa-Diyos nga mga buluhaton.
8. Uban ni kinsa kining pakigtugon alang sa usa ka saserdoteng sama kang Melkisedek, ug unsay sangpotanan?
8 Gitagan-an kita ni Pablo ug dugang detalye mahitungod niining pakigtugona alang sa usa ka saserdoteng sama kang Melkisedek. Pananglitan, siya nag-ingon nga si Jesu-Kristo mao ang “gitawag sa Diyos nga usa ka hataas nga saserdote sumala sa paagi ni Melkisedek.” (Hebreohanon 5:4-10; 6:20; 7:17, 21, 22) Bisan pag si Melkisedek dayag may tawhanong mga ginikanan, walay talaan sa iyang kabanayan. Busa inay mapanunod ni Jesus ang katungdanan sa pagkasaserdote sumala sa nahitalang kabanayan gikan kang Melkisedek, ang pagkatudlo niya direktang naggikan sa Diyos. Ang pagkasaserdote ni Jesus dili igapasa ngadto sa usa ka sumusunod, kay “siya nagapabiling usa ka saserdote sa walay kataposan.” Kini matuod, kay ang mga kaayohan sa iyang saserdotehanong pag-alagad maoy walay kataposan. Kita mapanalanginan gayod sa pagbatog saserdote nga “makaarang sa pagluwas sa hingpit niadtong nagaduol sa Diyos pinaagi niya” ug sa pagtudlo ug paggiya sa mga matinuohon sa walay kataposan.—Hebreohanon 7:1-3, 15-17, 23-25.
9, 10. Sa unsang paagi ang kahibalo bahin niining ikalimang pakigtugon magapauswag sa atong pagsabot sa unsang paagi ang katuyoan sa Diyos pagatumanon?
9 Ang laing bililhong kamatuoran mao nga ang papel ni Jesus ingong Hari-Saserdote misaylo sa yutan-ong dominyo. Sa samang konteksto diin gihisgotan niya kini nga pakigtugon alang sa usa ka saserdoteng sama kang Melkisedek, si David misulat: “Ang ginaingon ni Jehova sa akong Ginoo mao: ‘Lumingkod ka sa akong tuo nga kamot hangtod ibutang ko ang imong mga kaaway nga tumbanan sa imong mga tiil.’” Busa atong makita nga si Jesus—ang Ginoo ni David—makabatog dapit sa langit uban kang Jehova, nga nahitabo sa iyang pagkayab. Gikan sa langit, si Kristo makagamit sa gahom uban sa iyang Amahan aron pukgoon ang mga kaaway ug ipatuman ang mga paghukom.—Salmo 110:1, 2; Buhat 2:33-36; Hebreohanon 1:3; 8:1; 12:2.
10 Busa, kay nasayran nato kanang ikalimang pakigtugon, atong nabatonan ang mas dakong panglantaw sa mahusay, bug-os nga paagi nga niana pagatumanon ni Jehova ang iyang katuyoan. Kini nagatino nga ang pangunang bahin sa binhi mahimo usab nga saserdote sa langit ug ang iyang gahom ingong Hari-Saserdote maoy tibuok uniberso.—1 Pedro 3:22.
Bag-ong Pakigtugon ug ang Ikaduhang Bahin sa Binhi
11. Unsang mga komplikasyon ang naglungtad bahin sa ikaduhang bahin sa binhi?
11 Sa dihang gihisgotan nato ganina ang Abrahamikong pakigtugon, atong giingon nga si Jesus nahimong ang pangunang bahin sa binhi pinaagig kinaiyanhong katungod. Siya naggikan sa laktud sa patriarkang si Abraham, ug ingong hingpit nga tawo, siya dinawat nga Anak sa Labaw nga Abraham. Apan, unsa na man ang mga tawo nga may pribilehiyong mahimong ikaduhang bahin sa binhi ni Abraham, “mga manununod maylabot sa usa ka saad”? (Galacia 3:29) Kay dili hingpit, nga bahin sa pamilya sa makasasalang si Adan, sila dili takos mahisakop sa pamilya ni Jehova, ang Labaw nga Abraham. Sa unsang paagi mabuntog ang babag sa pagkadili-hingpit? Kana imposible alang sa mga tawo, apan kana dili imposible sa Diyos.—Mateo 19:25, 26.
12, 13. (a) Giunsa pagtagna sa Diyos ang laing pakigtugon? (b) Unsang linaing bahin sa maong pakigtugon ang angayan sa atong pagtagad?
12 Samtang gipatuman pa ang Kasugoan, gitagna sa Diyos pinaagi sa iyang manalagna: “Akong pagahimoon uban sa balay sa Israel ug uban sa balay ni Juda ang usa ka bag-ong pakigtugon; dili nga sama sa pakigtugon nga akong gihimo uban sa ilang mga katigulangan . . . ‘nga ang maong akong pakigtugon ilang gilapas’ . . . Igabutang ko ang akong kasugoan sa ilang kahiladman, ug sa ilang kasingkasing akong igasulat kana. Ug ako mahimong ilang Diyos, ug sila mahimong akong katawhan. Ug sila dili na magatudlo . . . ‘Ilha si Jehova!’ kay silang tanan makaila kanako . . . Kay pasayloon ko ang ilang kasaypanan, ug dili ko na hinumdoman ang ilang sala.”—Jeremias 31:31-34.
13 Matikdi nga ang usa ka bahin niining bag-ong pakigtugon mao ang pagpasaylo sa mga sala, lagmit sa paagi nga ‘dili sama’ sa kahikayan uban sa mga halad nga hayop ubos sa Kasugoan. Si Jesus mihatag ug kalamdagan bahin niini sa adlaw nga siya namatay. Tapos moduyog sa iyang mga tinun-an sa pagsaulog sa Paskuwa ingon nga gibaod sa Kasugoan, gisugdan ni Kristo ang Panihapon sa Ginoo. Kining tinuig nga pagsaulog maglangkit sa giambitang kopa sa bino, nga mahitungod niana si Jesus miingon: “Kini nga kopa nagkahulogan sa bag-ong pakigtugon tungod sa akong dugo, nga igabubo alang kaninyo.”—Lucas 22:14-20.
14. Nganong ang bag-ong pakigtugon hinungdanon sa pagpatungha sa ikaduhang bahin sa binhi?
14 Busa, ang bag-ong pakigtugon moepekto tungod sa dugo ni Jesus. Pinasukad nianang hingpit nga halad, ang Diyos ‘makapasaylo sa kasaypanan ug sala’ sa bug-os. Hunahunaa kon unsay kahulogan niana! Kay makapasaylo sa bug-os sa mga sala sa mahinalarong mga tawo sa pamilya ni Adan, ang Diyos makaisip kanilang walay sala, makapanganak kanila ingong espirituwal nga mga anak sa Labaw nga Abraham, ug dayon makadihog kanila sa balaang espiritu. (Roma 8:14-17) Busa, ang bag-ong pakigtugon nga nahimong balido tungod sa halad ni Jesus nakapaarang sa iyang mga tinun-an nga mahimong ikaduhang bahin sa binhi ni Abraham. Si Pablo misulat: “Pinaagi sa iyang kamatayon [si Jesus] magwagtang sa usa nga may gahom sa pagpahinabo sa kamatayon, nga mao, ang Yawa; ug [siya] magapagawas sa tanan nga tungod sa kahadlok sa kamatayon naulipon sa tibuok nilang kinabuhi. Kay siya wala gayod magtabang sa mga manulonda, apan siya nagatabang sa binhi ni Abraham.”—Hebreohanon 2:14-16; 9:14.
15. Kinsa ang mga partido o hingtungdan sa bag-ong pakigtugon?
15 Samtang si Jesus mao ang Tigpataliwala ug ang halad nga nagpabalido sa bag-ong pakigtugon, kinsa ang mga partido sa pakigtugon? Mitagna si Jeremias nga ang Diyos maghimo sa maong pakigtugon uban sa “balay sa Israel.” Hain nga Israel? Dili ang unodnong Israel nga gisirkunsidahan ubos sa Kasugoan, kay ang bag-ong pakigtugon naghimong hupas na sa maong naunang pakigtugon. (Hebreohanon 8:7, 13; tan-awa ang panid 31.) Karon ang Diyos makiglabot sa mga Hudiyo ug mga Hentil nga pinaagi sa pagtuo masambingayong ‘gisirkunsidahan sa kasingkasing pinaagi sa espiritu.’ Kini nahiuyon sa iyang pag-ingon nga kadtong anaa sa bag-ong pakigtugon ‘masulatan diha sa ilang hunahuna ug ilang mga kasingkasing sa iyang mga kasugoan.’ (Roma 2:28, 29; Hebreohanon 8:10) Gitawag ni Pablo ang maong espirituwal nga mga Hudiyo “ang Israel sa Diyos.”—Galacia 6:16; Santiago 1:1.
16. Sa unsang paagi ang bag-ong pakigtugon nagatabang sa paglampos sa gipunting sa Exodo 19:6?
16 Sanglit ang Diyos sa maong panahon nakiglabot sa espirituwal nga Israel, nabuksan ang usa ka ganghaan sa kahigayonan. Sa gitukod sa Diyos ang Kasugoan, siya namulong nga ang mga anak sa Israel alang kaniya nahimong “usa ka gingharian sa mga saserdote ug usa ka balaang nasod.” (Exodo 19:6) Sa pagkamatuod, ang unodnong Israel dili gayod ug wala gayod mahimong usa ka nasod diin ang silang tanan maoy mga hari-saserdote. Apan ang mga Hudiyo ug mga Hentil gidawat ingong ikaduhang bahin sa binhi ni Abraham nga mahimong mga hari-saserdote.b Gipamatud-an kini ni apostol Pedro, nga nagsulti kanila: “Kamo usa ka ‘pinili nga banay, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya, aron inyong igapahayag sa halayo ang mga kahalangdon’ sa usa nga nagtawag kaninyo gikan sa kangitngitan.” Misulat usab siya nga ‘ang panulondon nga dili molubad gitagana sa mga langit alang kanila.’—1 Pedro 1:4; 2:9, 10.
17. Nganong ang bag-ong pakigtugon “labi pang maayo” kay sa pakigtugon sa Kasugoan?
17 Busa, ang bag-ong pakigtugon nagalihok duyog sa naglungtad-na nga Abrahamikong pakigtugon aron patunghaon ang ikaduhang bahin sa binhi. Kining bag-ong pakigtugon tali ni Jehova ug sa inanak-sa-espiritung mga Kristohanon nagatugot sa pagkaporma sa usa ka langitnong nasod sa mga hari-saserdote sa harianong pamilya sa Labaw nga Abraham. Nan, atong makita nganong si Pablo miingon nga kini maoy “labi pang maayong pakigtugon, nga natukod sumala sa kasugoan sa labi pang maayong mga saad.” (Hebreohanon 8:6) Ang maong mga saad nagaapil sa panalangin sa pagkanasulat sa kasugoan sa Diyos diha sa mga kasingkasing sa mga tawong mahinalaron kansang mga sala dili na pagahinumdoman, ug sa tanan ‘nga nakaila kang Jehova, gikan sa labing gamay ngadto sa labing dako.’—Hebreohanon 8:11.
Pakigtugon ni Jesus Alang sa Usa ka Gingharian
18. Sa unsang diwa ang mga pakigtugon nga ato nang nahisgotan wala sa bug-os magtuman sa katuyoan sa Diyos?
18 Sa pagpalandong sa unom ka pakigtugon nga ato nang nahisgotan, morag mopatim-aw nga sa legal gihikay ni Jehova ang tanan nga gikinahanglan aron sa pagtuman sa iyang katuyoan. Bisan pa niana, ang Bibliya naghisgot ug laing pakigtugon nga nalangkit sa ato nang nahisgotan, usa ka pakigtugon nga nagabug-os sa dugang mga bahin niining hinungdanong butang. Ang inanak-sa-espiritung mga Kristohanong tukmang magadahom nga ‘ang Ginoo magaluwas kanila gikan sa tanang daotang buhat ug magaluwas kanila alang sa iyang langitnong gingharian.’ (2 Timoteo 4:18) Sa langit, sila mahimong usa ka nasod sa mga hari-saserdote, apan unsa unya ang ilang dominyo? Sa dihang sila pagabanhawon ngadto sa langit, si Kristo atua na didto ingong hingpit hataas nga saserdote. Siya makabarog na usab unya uban ang harianong gahom aron magmando sa tibuok uniberso. (Salmo 2:6-9; Pinadayag 11:15) Unsay buhaton sa ubang mga hari-saserdote?
19. Kanus-a ug sa unsang paagi nahimo ang ikapitong hinungdanong pakigtugon?
19 Sa Nisan 14, 33 K.P., sa gabii nga gisugdan ni Jesus ang Panihapon sa Ginoo ug gihisgotan “ang bag-ong pakigtugon pinasukad sa [iyang] dugo,” siya naghisgot sa laing pakigtugon, ang ikapito nga pagahisgotan. Giingnan niya ang matinumanon niyang mga apostol: “Kamo ang nagpabilin uban kanako sa akong mga kalisdanan; ug akong himoon ang usa ka pakigtugon kaninyo, maingon nga ang akong Amahan naghimog usa ka pakigtugon uban kanako, alang sa usa ka gingharian, aron kamo magakaon ug magainom sa akong lamesa sa akong gingharian, ug magalingkod sa mga trono aron sa paghukom sa napulog-duha ka tribo sa Israel.” (Lucas 22:20, 28-30) Maingon nga ang Amahan mihimo sa pakigtugon uban kang Jesus aron mahimong usa ka saserdote sama kang Melkisedek, si Kristo mihimo usab ug personal nga pakigtugon uban sa maunongon niyang mga sumusunod.
20. Uban ni kinsa gihimo ang pakigtugon sa usa ka Gingharian, ug ngano? (Daniel 7:18; 2 Timoteo 2:11-13)
20 Ang 11 ka apostol tinuod nga nagpabilin uban kang Jesus sa iyang mga kalisdanan, ug gipakita sa pakigtugon nga sila molingkod sa mga trono. Dugang pa, ang Pinadayag 3:21 nagapamatuod nga ang tanang inanak-sa-espiritung mga Kristohanon nga magapamatuod nga matinumanon molingkod sa langitnong mga trono. Busa, kini nga pakigtugon maoy uban sa tanang 144,000 nga gipalit sa dugo ni Jesus aron dad-on sa langit ingong mga saserdote ug “magamando ingong mga hari ibabaw sa yuta.” (Pinadayag 1:4-6; 5:9, 10; 20:6) Ang pakigtugon nga gihimo ni Jesus uban kanila nagahiusa kanila nganha kaniya aron makaambit sa iyang dominyo. Sa usa ka diwa, kini nahisamag ang usa ka pangasaw-onon gikan sa usa ka hamiling pamilya gihiusa pinaagi sa kaminyoon ngadto sa usa ka nagmandong hari. Sa ingon siya makabaton sa katungdanan nga makaambit sa iyang pagmando sa gingharian.—Juan 3:29; 2 Corinto 11:2; Pinadayag 19:7, 8.
21, 22. Unsang panalangin ang madahom tungod sa malampos sa maong mga pakigtugon?
21 Unsang mga kaayohan ang buksan niini alang sa masinugtanong katawhan? Si Jesus o ang 144,000 dili mahimong sama sa maayohong mga mahariharion nga “dili makataganag tinuod nga mga kasulbaran.” Hinunoa, gipasaligan kita nga si Jesus maoy usa ka hataas nga saserdote “nga nasulayan sa tanang bahin sama sa atong kaugalingon, apan walay sala.” Busa kita makasabot nganong siya ‘mahimong mobati’ sa tawhanong mga kahuyangan ug nganong ang “ubang mga karnero,” ingon man ang dinihogang mga Kristohanon, pinaagi kang Kristo, makaduol usab sa trono sa Diyos “uban ang kagawasan sa pagsulti.” Busa, sila usab “makabaton sa kaluoy ug makakaplag ug dili-takos nga kalulot alang sa panabang sa hustong panahon.”—Hebreohanon 4:14-16; Juan 10:16.
22 Kadtong gihimoan sa pakigtugon aron makaambit kang Jesus ingong mga hari-saserdote makaambit usab sa pagpanalangin sa katawhan. Maingon nga ang karaang Levihanong mga saserdote nakahatag ug kaayohan sa tibuok nasod sa Israel, kadtong nagaalagad usab sa langitnong mga trono kauban ni Jesus magahukom sa pagkamatarong sa tanan nga buhi sa yuta. (Lucas 22:30) Ang maong mga hari-saserdote sa nangagi maoy mga tawo, mao nga sila mahimong mabination sa mga panginahanglan sa katawhan. Kining ikaduhang bahin sa binhi mokooperar kang Jesus sa pagtino nga “ang tanang nasod mapanalanginan.”—Galacia 3:8.
23. Sa unsang paagi ang mga indibiduwal molihok nga katimbayayong sa maong mga pakigtugon?
23 Ang tanan nga matinguhaon nga makaambit sa maong panalangin diha sa katawhan, sa ingon makabatog kaayohan sa mga pakigtugon sa Diyos, karon ginadapit sa paghimo niana. (Pinadayag 22:17) Ang usa ka maayong lakang mao ang pagtambong sa pagsaulog sa Panihapon sa Ginoo, nga pagahimoon pagsalop sa adlaw sa Miyerkoles, Marso 22, 1989. Palihog himoa na karon ang mga plano sa pagtambong uban sa usa sa mga kongregasyon sa mga Saksi ni Jehova. Didto imong mahibaloan sa dugang ang mahitungod sa balaang mga pakigtugon ug dugang masabtan sa unsang paagi ikaw makabatog kaayohan kanila.
[Mga Footnote]
a “Bisan ang labing adbenturosong mga reporma nagbilin ug kabos nga mga mamumuo, bulahan kaayo, menos-ug-buluhisan hamiling mga tawo, kasarangang klase nga kulang ang pagkalangkit sa gobyerno ug sa katilingban . . . Igaingon nga sanglit giatubang sa nalamdagan nga pagmandong diniktador ang mga isyu nga dili mahimong dili pakabanaon, kana wala makataganag tinuod nga mga kasulbaran sulod sa politikanhon ug ekonomikanhong mga kamatuoran sa panahon.”—Western Civilization—Its Genesis and Destiny: The Modern Heritage.
b Si Jesus dili usa ka hingtungdan sa bag-ong pakigtugon. Siya mao ang Tigpataliwala niini ug walay mga sala nga nagkinahanglag pagpasaylo. Dugang pa, dili kinahanglan nga siya mahimong hari-saserdote pinaagi niini, kay siya maoy usa ka hari sumala sa Davidnong pakigtugon ug usa usab ka saserdoteng sama kang Melkisedek.
Nahinumdom Ka Ba?
◻ Nganong ang pakigtugon nga gihisgotan sa Salmo 110:4 gihimo, ug unsay nalampos niadto?
◻ Kinsa ang anaa sa bag-ong pakigtugon, ug sa unsang paagi kana nagtabang sa pagpatunghag usa ka nasod sa mga hari-saserdote?
◻ Nganong si Jesus mihimog personal nga pakigtugon uban sa iyang mga sumusunod?
◻ Unsa ang pito ka pakigtugon nga ato nang nahisgotan?
[Diagram sa panid 17]
(Alang sa bug-os nga pagkahan-ay sa teksto, tan-awa ang publikasyon)
Edenhong pakigtugon Genesis 3:15
Abrahamikong pakigtugon
Pakigtugon sa kasugoan
Pakigtugon sa Davidnong Gingharian
Pakigtugon nga mahimong saserdoteng sama ni Melkisedek
Pangunang binhi
Ikaduhang binhi
Dumalayong mga panalangin
[Diagram sa panid 19]
(Alang sa bug-os nga pagkahan-ay sa teksto, tan-awa ang publikasyon)
Edenhong pakigtugon Genesis 3:15
Abrahamikong pakigtugon
Pakigtugon sa kasugoan
Bag-ong pakigtugon
Pakigtugon sa Davidnong Gingharian
Pakigtugon nga mahimong saserdoteng sama ni Melkisedek
Pangunang binhi
Pakigtugon alang sa langitnong Gingharian
Ikaduhang binhi
Dumalayong mga panalangin