Dagko Pang mga Panalangin Pinaagi sa Bag-ong Pakigsaad

“Si Jesus . . . mao usab ang tigpataliwala sa usa ka katugbang nga mas maayong pakigsaad.”​—HEBREOHANON 8:6.

 1. Kinsay napamatud-ang mao ang ‘binhi sa babaye’ nga gisaad sa Eden, ug sa unsang paagi siya ‘gisamaran sa tikod’?

HUMAN makasala si Adan ug Eva, gihukman ni Jehova si Satanas, ang usang naglimbong kang Eva, nga nag-ingon: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magasamad kanimo sa ulo ug ikaw magasamad kaniya sa tikod.” (Genesis 3:15) Sa dihang si Jesus gibawtismohan sa Subang Jordan sa 29 K.P., ang Binhing gisaad sa Eden sa kataposan mitungha. Sa iyang pagkamatay sa usa ka kahoy sa pagsakit sa 33 K.P., ang usa ka bahin nianang karaang tagna natuman. Si Satanas ‘nakasamad sa tikod’ sa Binhi.

 2. Sumala sa mga pulong mismo ni Jesus, sa unsang paagi ang iyang kamatayon nakahatag ug kaayohan sa katawhan?

² Ikalipay, kadtong samara, bisan tuod grabe ang kasakit, maoy dili permanente. Si Jesus gibanhaw gikan sa mga patay ingong dili-mamatay nga espiritu ug misaka ngadto sa iyang Amahan sa langit, diin iyang gitanyag ang bili sa iyang inulang dugo ingong “usa ka lukat baylo sa daghan.” Sa ingon, ang iyang mga pulong mismo natuman: “Ang Anak sa tawo kinahanglang igaisa, aron ang tanan nga nagatuo kaniya makabaton ug kinabuhing walay-kataposan. Kay gihigugma pag-ayo sa Diyos ang kalibotan mao nga iyang gihatag ang iyang bugtong nga Anak, aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.” (Mateo 20:​28; Juan 3:​14-16; Hebreohanon 9:​12-14) Ang bag-ong pakigsaad adunay pasukaranang papel sa katumanan sa tagna ni Jesus.

Ang Bag-ong Pakigsaad

 3. Kanus-a unang nakita nga naglihok ang bag-ong pakigsaad?

³ Sa dayon na siyang mamatay, giingnan ni Jesus ang iyang mga sumusunod nga ang iyang iula nga dugo mao ang “dugo sa [bag-ong] pakigsaad.” (Mateo 26:​28; Lucas 22:20) Napulo ka adlaw sa pagkasaka na niya sa langit, ang bag-ong pakigsaad nakit-ang naglihok na sa dihang ang balaang espiritu gibubo diha sa mga 120 ka tinun-ang nagtigom sa usa ka ibabaw nga lawak sa Jerusalem. (Buhat 1:​15; 2:​1-4) Ang pagpasulod sa maong 120 ka tinun-an ngadto sa bag-ong pakigsaad nagpakitang ang “unang” pakigsaad, ang Balaodnong pakigsaad, niadtong panahona maoy hupas na.​—Hebreohanon 8:13.

 4. Pakyas ba ang daang pakigsaad? Isaysay.

⁴ Pakyas ba ang daang pakigsaad? Dili gayod. Tinuod, sanglit kini niadtong panahona gipulihan na, ang unodnong Israel dili na linaing katawhan sa Diyos. (Mateo 23:38) Apan tungod kana sa pagkamasupilon sa Israel ug pagsalikway sa Dinihogang Usa ni Jehova. (Exodo 19:​5; Buhat 2:​22, 23) Bisan pa niana, sa wala pa mapulihi ang Balaod kadto dakog nalampos. Sulod sa kasiglohan, kadto mitaganag usa ka paagi sa pagduol sa Diyos ug panalipod gikan sa bakak nga relihiyon. Kadto naundan ug mga pasiunang hulagway sa bag-ong pakigsaad ug, tungod sa nagbalikbalik nga mga halad niadto, nagpasundayag sa dakong panginahanglan sa tawo sa pagtubos gikan sa sala ug kamatayon. Tinuod, ang Balaod maoy usa ka “magtutudlo nga nagatultol ngadto kang Kristo.” (Galacia 3:​19, 24; Roma 3:​20; 4:​15; 5:​12; Hebreohanon 10:​1, 2) Hinuon, maoy pinaagi sa bag-ong pakigsaad nga ang panalanging gisaad kang Abraham bug-os nga matuman.

Mga Nasod Gipanalanginan Pinaagi sa Binhi ni Abraham

5, 6. Sa panguna, espirituwal nga katumanan sa Abrahamikong pakigsaad, kinsa ang Binhi ni Abraham, ug unsa ang nasod nga unang nakadawat ug panalangin pinaagi niya?

⁵ Si Jehova nagsaad kang Abraham: “Pinaagi sa imong binhi ang tanang nasod sa yuta magapanalangin gayod sa ilang kaugalingon.” (Genesis 22:18) Ubos sa daang pakigsaad, daghang maaghop-ug-kasingkasing nga mga langyaw napanalanginan pinaagi sa ilang pagpakig-uban sa Israel, ang nasodnong binhi ni Abraham. Hinuon, sa pangunang espirituwal nga katumanan niini ang Binhi ni Abraham maoy usa ra ka tawong hingpit. Si Pablo nagpatin-aw niini sa miingon siya: “Ang mga saad gipamulong ngadto kang Abraham ug sa iyang binhi. Kini wala magaingon: ‘Ug sa mga binhi,’ nga ingon nianang sa kini daghan, kundili ingon nianang sa usa ra: ‘Ug sa imong binhi,’ nga mao si Kristo.”​—Galacia 3:16.

⁶ Oo, si Jesus mao ang Binhi ni Abraham, ug pinaagi Kaniya ang mga nasod magadawat ug panalangin nga labaw kaayo kay sa bisan unsang posible alang sa unodnong Israel. Tinuod, ang unang nasod nga nakadawat sa maong panalangin mao ang Israel mismo. Wala madugay human sa Pentekostes 33 K.P., si apostol Pedro miingon ngadto sa usa ka grupo sa mga Hudiyo: “Kamo mao ang mga anak sa mga propeta ug sa pakigsaad nga gipakigsaad sa Diyos sa inyong mga katigulangan, nga nag-ingon kang Abraham, ‘Ug sa imong binhi ang tanang kabanayan sa yuta panalanginan.’ Una nganha kaninyo, ang Diyos, human sa pagpatindog sa iyang Alagad, mipadala kaniya sa pagpanalangin kaninyo pinaagi sa pagpahilayo sa matag usa gikan sa inyong mga buhat nga tuman-kadaotan.”​—Buhat 3:​25, 26.

 7. Unsang mga nasora ang gipanalanginan pinaagi ni Jesus, ang Binhi ni Abraham?

⁷ Sa wala madugay ang panalangin gipaabot ngadto sa mga Samarianhon ug dayon ngadto sa mga Hentil. (Buhat 8:​14-17; 10:​34-48) Sa usa ka panahon tali sa 50 ug 52 K.P., si Pablo misulat ngadto sa mga Kristohanon sa Galacia sa Asia Minor: “Ang Kasulatan, sa pagkakita daan nga ipahayag sa Diyos ang katawhan sa kanasoran nga matarong gumikan sa pagtuo, mipahayag nang daan sa maayong balita ngadto kang Abraham, nga mao: ‘Pinaagi kanimo ang tanang kanasoran mapanalanginan.’ Tungod niana kadtong mga nagatapot sa pagtuo ginapanalanginan uban sa matinuohong si Abraham.” (Galacia 3:​8, 9; Genesis 12:​3) Bisan pag daghang Kristohanon sa Galacia maoy “katawhan sa kanasoran,” sila gipanalanginan pinaagi ni Jesus tungod sa ilang pagtuo. Sa unsang paagi?

 8. Alang sa mga Kristohanon sa adlaw ni Pablo, ang pagkagipanalanginan pinaagi sa Binhi ni Abraham naglakip sa unsa, ug pila, sa kataposan, ang makadawat sa maong panalangin?

⁸ Gisultihan ni Pablo ang mga Kristohanon sa Galacia, walay sapayan sa kagikan: “Kon kamo iya ni Kristo, kamo sa pagkatinuod binhi ni Abraham, mga manununod may kalabotan sa usa ka saad.” (Galacia 3:29) Alang niadtong mga taga-Galacia, ang panalangin pinaagi sa Binhi ni Abraham naglakip sa ilang pagkasumasalmot sa bag-ong pakigsaad ug usab sa pagkakaubang mga manununod ni Jesus, mga kauban ni Jesus diha sa binhi ni Abraham. Wala kita mahibalo sa populasyon sa karaang Israel. Nahibalo lang kita nga kini nahimong “sama ka daghan sa mga lugas sa balas nga naa sa daplin sa dagat.” (1 Hari 4:20) Hinuon, kita nahibalo sa bug-os nga gidaghanon sa mga kauban ni Jesus diha sa espirituwal nga binhi​—144,000. (Pinadayag 7:​4; 14:1) Kanang 144,000 naggikan sa “matag tribo ug dila ug katawhan ug nasod” sa katawhan ug makig-ambit sa pagpadapat ngadto pa sa uban sa mga panalangin sa Abrahamikong pakigsaad.​—Pinadayag 5:9.

Usa ka Tagna Natuman

 9. Sa unsang paagi kadtong diha sa bag-ong pakigsaad nakabaton sa balaod ni Jehova sa sulod nila?

⁹ Sa nagtagna sa bag-ong pakigsaad, si Jeremias misulat: “‘Kini mao ang pakigsaad nga akong buhaton uban sa balay sa Israel human niadtong mga adlawa,’ nagaingon si Jehova. ‘Ibutang ko ang akong balaod sa sulod nila, ug sa ilang kasingkasing akong isulat kini.’” (Jeremias 31:33) Usa ka kinaiyahan niadtong anaa sa bag-ong pakigsaad nga sila magaalagad kang Jehova tungod sa gugma. (Juan 13:35; Hebreohanon 1:​9) Ang balaod ni Jehova nahisulat diha sa ilang kasingkasing, ug sila sa kamadasigon nagtinguha nga mobuhat sa iyang kabubut-on. Tinuod, sa karaang Israel ang pipila ka matinumanong mga indibiduwal nahigugma pag-ayo sa balaod ni Jehova. (Salmo 119:97) Apan daghan ang wala. Bisan pa niana sila nagpabiling bahin sa nasod. Walay makapabilin sa bag-ong pakigsaad kon ang balaod sa Diyos wala masulat diha sa iyang kasingkasing.

10, 11. Alang niadtong anaa sa bag-ong pakigsaad, sa unsang paagi si Jehova ‘nahimong ilang Diyos,’ ug sa unsang paagi silang tanan nakaila kaniya?

¹⁰ Si Jehova dugang miingon mahitungod niadtong anaa sa bag-ong pakigsaad: “Ako mahimong ilang Diyos, ug sila mismo mahimong akong katawhan.” (Jeremias 31:33) Sa karaang Israel ang daghan nagsimba sa mga diyos sa mga nasod, apan sila nagpabiling mga Israelinhon. Pinasukad sa bag-ong pakigsaad, gilalang ni Jehova ang usa ka espirituwal nga nasod, “ang Israel sa Diyos,” aron mopuli sa unodnong Israel. (Galacia 6:​16; Mateo 21:​43; Roma 9:​6-8) Bisan pa niana, walay magpabiling bahin sa bag-ong espirituwal nga nasod kon siya mohunong sa pagsimba kang Jehova ug kaniya lamang.

¹¹ Si Jehova miingon usab: “Silang tanan makaila kanako, gikan sa labing ubos kanila bisan ngadto sa labing dako kanila.” (Jeremias 31:34) Sa Israel, daghan ang wala manumbaling kang Jehova, nga sa pagkatinuod nag-ingon: “Si Jehova dili mobuhat ug maayo, ug siya dili mobuhat ug daotan.” (Sofonias 1:12) Walay magpabiling bahin sa Israel sa Diyos kon siya dili manumbaling kang Jehova o maghugaw sa maputling pagsimba. (Mateo 6:​24; Colosas 3:5) Ang espirituwal nga mga Israelinhon mao “ang katawhan nga nakaila sa ilang Diyos.” (Daniel 11:32) Sila nagakalipay sa ‘pagkuha ug kahibalo bahin sa bugtong matuod nga Diyos ug kang Jesu-Kristo.’ (Juan 17:3) Ang pagkaila kang Jesus magpalalom sa ilang kahibalo bahin sa Diyos sanglit, sa linaing paagi, si Jesus “mao ang usa nga nagpatin-aw [sa Diyos].”​—Juan 1:​18; 14:​9-11.

12, 13. (a) Pinasukad sa unsa nga si Jehova nagpasaylo sa mga sala niadtong anaa sa bag-ong pakigsaad? (b) Bahin sa pagpasaylo sa mga sala, sa unsang paagi ang bag-ong pakigsaad labaw kay sa daang pakigsaad?

¹² Sa kataposan, si Jehova misaad: “Akong pasayloon ang ilang kasaypanan, ug ang ilang sala dili ko na hinumdoman.” (Jeremias 31:​34b) Ang Balaod ni Moises naglakip sa ginatos ka sinulat nga mga lagda nga kinahanglang sundon sa mga Israelinhon. (Deuteronomio 28:​1, 2, 15) Ang tanang naglapas sa Balaod nagtanyag ug mga halad aron matabonan ang ilang mga sala. (Levitico 4:​1-7; 16:​1-31) Daghang Hudiyo ang nagtuo nga sila mahimong matarong pinaagi sa ilang kaugalingong mga buhat sumala sa Balaod. Ang mga Kristohanon, hinunoa, nakaamgo nga sila dili gayod mahimong maghago aron maangkon ang pagkamatarong pinaagi sa ilang kaugalingong mga buhat. Sila dili makalikay sa pagpakasala. (Roma 5:12) Ubos sa bag-ong pakigsaad, ang matarong nga baroganan atubangan sa Diyos posible lamang pinasukad sa halad ni Jesus. Bisan pa niana, ang maong baroganan maoy gasa, usa ka dili-takos nga kalulot gikan sa Diyos. (Roma 3:​20, 23, 24) Si Jehova nanginahanglan gihapon sa pagkamasinugtanon sa iyang mga alagad. Si Pablo nag-ingon nga kadtong anaa sa bag-ong pakigsaad maoy “ilalom sa balaod ngadto kang Kristo.”​—1 Corinto 9:21.

¹³ Busa, alang sa mga Kristohanon usab adunay usa ka halad alang sa sala, apan usa nga labaw pang bililhon kay sa mga halad ubos sa Balaodnong pakigsaad. Si Pablo misulat: “Ang matag saserdote [ubos sa Balaodnong pakigsaad] moanha sa iyang puwesto sa adlaw-adlaw aron sa paghatag ug publikong pag-alagad ug sa pagtanyag nga subsob sa sama rang mga halad, maingon nga kini dili man sa bisan kanus-a bug-os makakuha sa sala. Apan [si Jesus] mitanyag ug usa ka halad alang sa mga sala hangtod sa hangtod ug milingkod diha sa tuong kamot sa Diyos.” (Hebreohanon 10:​11, 12) Sanglit ang mga Kristohanon diha sa bag-ong pakigsaad nagtuo sa halad ni Jesus, si Jehova nagpahayag kanilang matarong, nga walay sala, ug sa ingon anaa sa kahimtang nga madihogan ingong iyang espirituwal nga mga anak. (Roma 5:​1; 8:​33, 34; Hebreohanon 10:​14-18) Sa dihang sila makasala tungod sa tawhanong pagkadili-hingpit, sila makahangyo sa kapasayloan ni Jehova, ug pinasukad sa halad ni Jesus, si Jehova magapasaylo kanila. (1 Juan 2:​1, 2) Bisan pa niana, kon mopalabi sila sa usa ka dalan sa tinuyong pagpakasala, mawad-an sila sa ilang matarong nga baroganan ug sa pribilehiyo sa pagkasumasalmot sa bag-ong pakigsaad.​—Hebreohanon 2:​2, 3; 6:​4-8; 10:​26-31.

Ang Daang Pakigsaad ug ang Bag-o

14. Unsang pagtuli ang gikinahanglan ubos sa Balaodnong pakigsaad? ubos sa bag-ong pakigsaad?

¹⁴ Ang mga lalaki diha sa daang pakigsaad gituli ingong usa ka timaan nga sila nailalom sa Balaod. (Levitico 12:​2, 3; Galacia 5:3) Sa pagsugod sa Kristohanong kongregasyon, gibati sa pipila nga ang di-Hudiyong mga Kristohanon angayng tulion usab. Apan ang mga apostoles ug mga ansiyano sa Jerusalem, nga giniyahan sa Pulong sa Diyos ug sa balaang espiritu, nakasabot nga kadto dili na kinahanglan. (Buhat 15:​1, 5, 28, 29) Pipila ka tuig sa ulahi, si Pablo miingon: “Siya dili Judio nga mao sa panggawas, ni diha sa unod sa panggawas ang pagkatinuli. Apan siya Judio nga mao sa pangsulod, ug ang iyang pagkatinuli maoy sa kasingkasing pinaagi sa espiritu, ug dili pinaagig sinulat nga kalagdaan.” (Roma 2:​28, 29) Ang literal nga pagtuli, bisan alang sa unodnong mga Hudiyo, walay dugang espirituwal nga bili sa panan-aw ni Jehova. Alang niadtong anaa sa bag-ong pakigsaad, ang kasingkasing, dili ang unod, ang kinahanglang tulion. Ang tanang butang diha sa ilang panghunahuna, mga tinguha, ug panukmod nga dili makapahimuot o mahugaw sa panan-aw ni Jehova kinahanglang putlon.a Daghan karong adlawa maoy buhing pamatuod sa gahom sa balaang espiritu sa pagbag-o sa mga sumbanan sa panghunahuna niining paagiha.​—1 Corinto 6:​9-11; Galacia 5:​22-24; Efeso 4:​22-24.

15. Unsay kalainan sa unodnong Israel ug sa Israel sa Diyos kon bahin sa harianong pagmando?

¹⁵ Sa kahikayan sa Balaodnong pakigsaad, si Jehova mao ang Hari sa Israel, ug sa nahaigong panahon iyang gipasundayag ang iyang pagkasoberano pinaagig tawhanong mga hari sa Jerusalem. (Isaias 33:22) Si Jehova mao usab ang Hari sa Israel sa Diyos, ang espirituwal nga Israel, ug sukad sa 33 K.P., siya nagmando pinaagi ni Jesu-Kristo, kinsa nakadawat sa “tanang awtoridad . . . sa langit ug sa yuta.” (Mateo 28:​18; Efeso 1:​19-23; Colosas 1:​13, 14) Karong adlawa, ang Israel sa Diyos nag-ila kang Jesus ingong Hari sa langitnong Gingharian sa Diyos, nga natukod sa 1914. Si Jesus labi pang maayong Hari kay kang Ezekias, Josias, ug sa ubang matinumanong mga hari sa karaang Israel.​—Hebreohanon 1:​8, 9; Pinadayag 11:15.

16. Unsa ang matang sa pagkasaserdote sa Israel sa Diyos?

¹⁶ Ang Israel dili lamang usa ka gingharian kondili nakabaton usab ug dinihogang mga saserdote. Sa 33 K.P., ang Israel sa Diyos mipuli sa unodnong Israel ug nahimong “alagad” ni Jehova, iyang “mga saksi.” (Isaias 43:10) Ang mga pulong ni Jehova ngadto sa Israel nga natala sa Isaias 43:​21 ug Exodo 19:​5, 6 sukad niadto gipadapat ngadto sa espirituwal nga Israel sa Diyos. Ang bag-ong espirituwal nga nasod sa Diyos sa maong panahon maoy “usa ka piniling rasa, usa ka harianong pagkasaserdote, usa ka balaan nga nasod, usa ka katawhan alang sa linaing pagpanag-iya,” nga gitugyanan sa ‘pagpahayag sa kaylap sa mga kahamili ni Jehova.’ (1 Pedro 2:9) Ang tanang sakop sa Israel sa Diyos, mga lalaki ug mga babaye, maoy naglangkob sa usa ka pundok sa mga saserdote. (Galacia 3:​28, 29) Ingong suplementong bahin sa binhi ni Abraham, sila karon nag-ingon: “Maglipay, kamong kanasoran, uban sa iyang katawhan.” (Deuteronomio 32:43) Kadtong sakop sa espirituwal nga Israel nga ania pa sa yuta naglangkob sa ‘matinumanon ug maalamong ulipon.’ (Mateo 24:​45-47) Diha lamang sa pagpakig-uban kanila nga ang sagradong pag-alagad ikahatag ngadto sa Diyos.

Gingharian sa Diyos—Ang Kataposang Katumanan

17. Unsang pagkatawo ang masinati niadtong anaa sa bag-ong pakigsaad?

¹⁷ Ang mga Israelinhong natawo tapos sa 1513 W.K.P. nailalom sa Balaodnong pakigsaad sa pagkahimugso. Kadtong gipasulod ni Jehova sa bag-ong pakigsaad nakaagi usab sa usa ka pagkatawo​—sa ilang kahimtang, usa ka espirituwal nga pagkatawo. Gihisgotan kini ni Jesus ngadto sa Pariseo nga si Nicodemo sa miingon siya: “Sa pagkamatuod gayod ako magaingon kanimo, Gawas kon ang usa ipakatawo pag-usab, dili niya makita ang gingharian sa Diyos.” (Juan 3:3) Ang 120 ka tinun-an sa Pentekostes 33 K.P. mao ang unang di-hingpit nga mga tawo nga nakasinati sa maong bag-ong pagkatawo. Kay gipahayag nga matarong ubos sa bag-ong pakigsaad, nadawat nila ang balaang espiritu ingong “usa ka pasiunang timaan” sa ilang harianong panulondon. (Efeso 1:14) Sila “natawo gikan sa espiritu” aron mahimong sinagop nga mga anak sa Diyos, nga naghimo kanilang mga igsoon ni Jesus ug sa ingon “kaubang mga manununod ni Kristo.” (Juan 3:​6; Roma 8:​16, 17) Ang ilang pagkahimong ‘natawo pag-usab’ nagbukas sa dalan alang sa kahibulongang mga palaaboton.

18. Ang pagkatawo pag-usab magbukas sa ganghaan ngadto sa unsang kahibulongang mga palaaboton alang niadtong anaa sa bag-ong pakigsaad?

¹⁸ Sa dihang nagpataliwala sa bag-ong pakigsaad, gihimo ni Jesus ang usa ka dugang nga pakigsaad uban sa iyang mga sumusunod, nga nag-ingon: “Ako nagahimo ug pakigsaad uban kaninyo, maingon nga ang akong Amahan naghimo ug pakigsaad uban kanako, alang sa usa ka gingharian.” (Lucas 22:29) Kining pakigsaad sa Gingharian nag-andam sa kahimtang alang sa pagkatuman sa usa ka talagsaong panan-awon, nga natala sa Daniel 7:​13, 14, 22, 27. Nakita ni Daniel “ang usa nga sama sa usa ka anak sa tawo” nga gihatagan ug harianong awtoridad sa “Karaan sa mga Adlaw,” si Jehova nga Diyos. Unya nakita ni Daniel nga “ang mga balaan nanag-iya sa gingharian mismo.” Si Jesus mao ang usa nga “sama sa usa ka anak sa tawo” kinsa, niadtong 1914, nagdawat sa langitnong Gingharian gikan ni Jehova nga Diyos. Ang iyang dinihogan-sa-espiritung mga tinun-an mao “ang mga balaan” nga makaambit uban niya nianang Ginghariana. (1 Tesalonica 2:12) Sa unsang paagi?

19, 20. (a) Alang niadtong anaa sa bag-ong pakigsaad, unsa ang pangataposan, mahimayaong katumanan sa saad ni Jehova ngadto kang Abraham? (b) Unsang dugang nga pangutana ang kinahanglang tagdon?

¹⁹ Human sila mamatay, kining mga dinihogan nga sama kang Jesus gibanhaw gikan sa mga patay ingong dili-mamatay nga espiritung mga linalang aron mag-alagad uban niya ingong mga hari ug mga saserdote sa langit. (1 Corinto 15:​50-53; Pinadayag 20:​4, 6) Pagkamahimayaong paglaom! “Sila magamando ingong mga hari ibabaw sa yuta,” dili lamang sa yuta sa Canaan. (Pinadayag 5:10) Sila ba ‘manag-iya sa mga ganghaan sa ilang mga kaaway’? (Genesis 22:17) Oo, ug sa bug-os nga paagi, sa dihang masaksihan nila ang kalaglagan sa madaotong relihiyosong bigaon, ang Dakong Babilonya, ug sa dihang kining mga binanhawng dinihogan makaambit uban kang Jesus sa pagbantay sa mga nasod “pinaagi sa puthawng olisi” ug sa pagdugmok sa ulo ni Satanas. Sa ingon sila makabaton ug bahin sa pagtuman sa kataposang detalye sa tagna sa Genesis 3:15.​—Pinadayag 2:​26, 27; 17:​14; 18:​20, 21; Roma 16:20.

²⁰ Sa gihapon, kita mangutana, Ang Abrahamikong pakigsaad ug ang bag-ong pakigsaad naglangkit ba lamang niining 144,000 matinumanong mga kalag? Dili, ang uban nga dili laktod nahiapil niining maong mga pakigsaara panalanginan pinaagi kanila, sumala sa makita sa mosunod nga artikulo.

[Mga footnote]

Nahinumdom Ka Ba?

◻ Kanus-a unang nakita nga naglihok ang bag-ong pakigsaad?

◻ Unsa ang nalampos pinaagi sa daang pakigsaad?

◻ Kinsa ang pangunang Binhi ni Abraham, ug unsang nagsunod nga mga nasod ang gipanalanginan pinaagi sa maong Binhi?

◻ Alang sa 144,000, unsa ang kataposang katumanan sa Abrahamikong pakigsaad ug sa bag-ong pakigsaad?

[Hulagway sa panid 15]

Ang kapasayloan sa mga sala adunay mas lalom nga kahulogan alang niadtong nailalom sa bag-ong pakigsaad kay sa alang niadtong nailalom sa daang pakigsaad