Pagtanyag ug mga Halad nga Makapahimuot Kang Jehova
“Pinaagi kang [Jesu-Kristo] sa kanunay magatanyag kita ug halad sa pagdayeg ngadto sa Diyos, nga mao, ang bunga sa mga ngabil nga nagahimo sa katilingbanong pagpahayag sa iyang ngalan.”—HEBREOHANON 13:15.
1. Unsay giagda ni Jehova nga buhaton sa makasasalang mga Israelitas?
SI Jehova mao ang Magtatabang niadtong nagatanyag sa kahimut-anang mga halad kaniya. Busa, ang iyang kahimuot napatong kas-a diha sa mga Israelitas nga nagtanyag ug mga halad nga mananap. Apan unsay nahitabo human nga sila subsob nga nakasala? Pinaagi ni propetang Oseas, sila giagda: “Bumalik ka, Oh Israel, kang Jehova nga imong Diyos, kay ikaw nahulog tungod sa imong kasal-anan. Dad-a ninyo ang mga pulong ug bumalik kang Jehova. Umingon kaniya, kamong tanang katawhan, ‘Hinaot ikaw magapasaylo sa tanan namong kasal-anan; ug dawata ang maayo, ug among ihalad kanimo sa ingon ang mga nating baka sa among mga ngabil.’”—Oseas 14:1, 2.
2. Unsa ‘ang mga nating baka sa mga ngabil,’ ug giunsa ni apostol Pablo paghisgot ang tagna ni Oseas?
2 Busa ang karaang katawhan sa Diyos gidasig nga maghalad kang Jehova nga Diyos ‘sa mga nating baka sa ilang mga ngabil.’ Unsa man kadto? Aw, mga halad sa tim-os nga pagdayeg! Naghisgot niining tagnaa, giawhag ni apostol Pablo ang Hebreohanong mga Kristohanon sa “pagtanyag sa Diyos ug halad sa pagdayeg, nga mao, ang bunga sa mga ngabil nga nagahimo sa katilingbanong pagpahayag sa iyang ngalan.” (Hebreohanon 13:15) Unsay makatabang sa mga Saksi ni Jehova sa pagtanyag nianang maong mga halad karong adlawa?
“Sundoga ang Ilang Pagtuo”
3. Sa katibuk-an, unsay giingon ni apostol Pablo diha sa Hebreohanon 13:7, nga nagbangon ug unsang pangutana?
3 Ang pagpadapat sa tambag ni Pablo nga gihatag sa mga Hebreohanon makahimo kanato sa pagtanyag ug kahimut-anang mga halad sa atong Dakong Magtatabang, si Jehova nga Diyos. Pananglitan, ang apostol misulat: “Hinumdomi kadtong nagapanguna kaninyo, nga nagasulti kaninyo sa pulong sa Diyos, ug samtang ginapalandong ninyo ang gisangpotan sa ilang paggawi sundoga ang ilang pagtuo.” (Hebreohanon 13:7) Kinsay gipunting ni Pablo sa dihang siya miingon, “Hinumdomi kadtong nagapanguna kaninyo,” o “mga magdudumala kaninyo”?—New World Translation Reference Bible, potnot.
4. (a) Sumala sa Gregong teksto, unsay ginabuhat niadtong “nagapanguna”? (b) Kinsa kadtong “nagapanguna” taliwala sa mga Saksi ni Jehova?
4 Si Pablo naghisgot niadtong “nagapanguna,” o nagamando. (Bersikulo 7, 17, 24) Ang Ingles nga pulong “govern” (pagmando) gikuha sa Latin gikan sa Grego nga ky·ber·naʹo, nga nagkahulogang “nagdala sa sakayan, nagtultol, nagmando.” Ang Kristohanong mga ansiano nagamando pinaagi sa paggamit sa ilang “mga katakos sa pagtultol” (Grego, ky·ber·neʹseis) sa pagpanguna ug paggiya sa lokal nga mga kongregasyon. (1 Corinto 12:28) Apan ang mga apostoles ug ang ubang mga ansiano sa Jerusalem nag-alagad isip usa ka lawas aron sa paghatag ug giya ug tambag sa tanang kongregasyon. (Buhat 15:1, 2, 27-29) Busa karong adlawa, usa ka nagamandong lawas sa mga ansiano ang nagataganag espirituwal nga pagdumala sa mga Saksi ni Jehova sa tibuok kalibotan.
5. Ngano ug sa unsang paagi nga kita moampo alang sa mga ansiano sa kongregasyon ug sa mga membro sa Nagamandong Lawas?
5 Ang lokal nga mga ansiano ug mga membro sa Nagamandong Lawas mao ang nagapanguna sa atong taliwala; busa, motahod kita kanila ug moampo nga ang Diyos mohatag kanilag kaalam nga gikinahanglan sa pagdumala sa kongregasyon. (Itandi ang Efeso 1:15-17.) Pagkatukma nga atong hinumdoman ang tanan ‘nga nagasulti sa pulong sa Diyos kanato’! Si Timoteo gitudloan dili lamang sa iyang inahan ug apohan kondili sa ulahi si apostol Pablo ug sa uban. (2 Timoteo 1:5, 6; 3:14) Busa si Timoteo nakapamalandong sa gisangpotan sa paggawi niadtong nagapanguna ug nakasundog sa ilang pagtuo.
6. Kang kinsang pagtuo ang angay natong sundogon, apan kinsa ang atong sundon?
6 Ang maong mga indibiduwal sama kang Abel, Noe, Abraham, Sarah, Rahab, ug Moises nagbaton ug pagtuo. (Hereohanon 11:1-40) Busa, kita makasundog sa ilang pagtuo nga walay-pagduhaduha tungod kay sila namatay nga matinumanon sa Diyos. Apan kita usab ‘makasundog sa pagtuo’ sa matinumanong mga lalaki nga karon nagapanguna taliwala kanato. Siyempre, wala kita magsunod sa dili-hingpit nga mga tawo, kay gitutok man nato ang atong mga mata kang Kristo. Sumala sa gisulti sa maghuhubad sa Bibliya nga si Edgar J. Goodspeed: “Ang mga bayani sa karaang mga panahon dili mao ang mga sulondan sa mga magtutuo, kay diha kang Kristo siya adunay maayong sumbanan . . . Ang magdadagan nga Kristohanon kinahanglang motutok sa iyang mga mata diha kang Jesus.” Oo, si ‘Kristo nag-antos alang kanato, nga nagbilin ug sulondan kanato aron suod natong sundon ang iyang mga lakang.’—1 Pedro 2:21; Hebreohanon 12:1-3.
7. Sa unsang paagi nga ang Hebreohanon 13:8 nagaapektar sa atong tinamdan sa pag-antos alang kang Jesu-Kristo?
7 Gihatagag pagtagad ang Anak sa Diyos, si Pablo midugang: “Si Jesu-Kristo mao ang sa kagahapon ug karon, ug sa umaabot.” (Hebreohanon 13:8) Ang matinumanong mga saksi sama kang Esteban ug Santiago nagpasundayag ug dili-matarog nga pagkamaunongon, nagsunod sa malig-ong sumbanan ni Jesus. (Buhat 7:1-60; 12:1, 2) Sanglit sila andam nga magpakamatay ingong mga sumusunod ni Kristo, ang ilang pagtuo takos nga atong sundogon. Sa miagi, karon, ug bisan sa umaabot, ang diyosnong mga tawo dili mosibog sa pag-antos sa kamatayon ingong mga tinun-an ni Jesus.
Likayi ang Bakak nga mga Pagtulon-an
8. Unsaon nimo pagbatbat sa laing mga pulong ang mga pulong ni Pablo sa Hebreohanon 13:9?
8 Ang pagkawalay-kausaban sa personalidad ug sa mga pagtulon-an ni Kristo angay mopaunong kanato sa gitudlo niya ug sa iyang mga apostoles. Ang mga Hebreohanon gisultihan: “Ayaw kamo pagpadaldal sa nagkalainlain ug lahi nga mga pagtulon-an; kay maayo alang sa kasingkasing nga hatagag kalig-on pinaagi sa dili-takos nga kalulot, dili pinaagig mga kalan-on, diin walay kaayohang nakuha kadtong nagakinabuhi niana.”—Hebreohanon 13:9.
9. Unsang labaw pang mga butang ang gipunting ni Pablo diha sa sulat sa Hebreohanong mga Kristohanon?
9 Gihisgotan sa mga Hudiyo ang mga butang sama sa katingalahang paghatag sa Kasugoan diha sa Bukid sa Sinai ug sa walay-kataposang pagkahari ni David. Apan gipakita ni Pablo sa Hebreohanong mga Kristohanon nga bisan tuod ang pagkatukod sa pakigtugon sa Kasugoan maoy kahibudnganan, mas kusganong gipamatud-an ni Jehova ang mga ilhanan, mga tilimad-on, ang gamhanang mga buhat, ug ang pag-apod-apod sa balaang espiritu sa dihang giinagurahan ang bag-ong pakigtugon. (Buhat 2:1-4; Hebreohanon 2:2-4) Ang langitnong Gingharian ni Kristo dili gayod matarog, sama sa yutan-ong pagkahari sa Davidikong mga magmamando sa 607 W. K. P. (Hebreohanon 1:8, 9; 12:28) Dugang pa, gitigom ni Jehova ang mga dinihogan diha sa atubangan sa labi pa ka katingalahan kay sa milagrosong pasundayag diha sa Bukid sa Sinai, kay sila makaduol sa langitnong Bukid sa Sion.—Hebreohanon 12:18-27.
10. Sumala sa Hebreohanon 13:9, pinaagig unsa nga ang kasingkasing kahatagag kalig-on?
10 Busa ang mga Hebreohanon kinahanglang maglikay nga dili “madaldal sa nagkalainlain ug lahi nga mga pagtulon-an” sa mga tigpasiugda sa Hudaismo. (Galacia 5:1-6) Dili pinaagi sa maong mga pagtulon-an kondili ‘pinaagi sa dili-takos nga kalulot sa Diyos nga hatagag kalig-on ang kasingkasing’ aron nga magpabiling malig-on diha sa kamatuoran. Hayan ang pipila naglalis mahitungod sa pagkaon ug sa mga halad, kay si Pablo miingon nga ang kasingkasing wala mapalig-on “pinaagig mga kalan-on, diin walay kaayohang nakuha kadtong nagkinabuhi niana.” Ang espirituwal nga mga kaayohan mosangpot gikan sa diyosnong pagkamahinalaron ug pagpabili alang sa lukat, dili gikan sa walay-hinungdang kabalaka mahitungod sa pagkaon ug mga kalan-on ug sa pagbantay sa partikular nga mga adlaw. (Roma 14:5-9) Dugang pa, ang halad ni Kristo nagpakawalay-bili sa Levitikanhong mga halad.—Hebreohanon 9:9-14; 10:5-10.
Mga Halad nga Makapahimuot sa Diyos
11. (a) Unsa ang diwa sa mga pulong ni Pablo sa Hebreohanon 13:10, 11? (b) Unsa ang mahulagwayong halaran ang nabatonan sa mga Kristohanon?
11 Ang Levitikanhong mga saserdote mokaon ug karne gikan sa hinalad nga mga mananap, apan si Pablo misulat: “Kita adunay halaran diin ang mga nanag-alagad sa balaang pag-alagad diha sa tolda [ang tabernakulo] walay katungod sa pagkaon. Kay ang mga lawas sa mga mananap kansang dugo gidala ngadto sa dapit nga balaan pinaagi sa labawng saserdote ingon nga halad alang sa sala ginasunog sa gawas sa kampo” sa Adlaw sa Pagtabon sa Sala. (Hebreohanon 13:10, 11; Levitico 16:27; 1 Corinto 9:13) Ang mga Kristohanon adunay mahulagwayong halaran nga nagkahulogan nga makaduol na sa Diyos pinasukad sa halad ni Jesus nga motabon sa kasal-anan ug mosangpot sa kapasayloan ni Jehova ug sa kaluwasan ngadto sa kinabuhing dayon.
12. Diha sa Hebreohanon 13:12-14, unsay giagda nga pagabuhaton sa dinihogang mga Kristohanon?
12 Wala ipasiugda ni Pablo ang kaamgiran sa Adlaw sa Pagtabon sa Sala, apan siya midugang: “Sa ingon niini si Jesus usab, aron sa pagbalaan sa katawhan pinaagi sa iyang kaugalingong dugo, nag-antos gawas sa ganghaan” sa Jerusalem. Didto si Jesus namatay ug mitaganag bug-os epektibong halad-pasighiuli. (Hebreohanon 13:12; Juan 19:17; 1 Juan 2:1, 2) Giagda ni apostol Pablo ang kaubang dinihogang mga Kristohanon: “Busa, mangadto kita kaniya [Kristo] gawas sa kampo, nga magapas-an sa mga pagpakaulaw tungod kaniya, kay dinhi wala kitay malungtaron nga siyudad, hinunoa kita tim-os nga nagapangita nianang usa nga umaabot.” (Hebreohanon 13:13, 14; Levitico 16:10) Bisan pa nga kita gipakaulawan sama kang Jesus, kita molahutay ingong mga Saksi ni Jehova. Atong ‘gibiyaan ang pagkadili-diyosnon ug ang mga pangibog nga kalibotanon ug sa pagkinabuhi nga maayog salabotan ug sa pagkamatarong ug sa diyosnong pagkamahinalaron taliwala niining presenteng sistema sa mga butang’ samtang nagalantaw sa bag-ong kalibotan. (Tito 2:11-14; 2 Pedro 3:13; 1 Juan 2:15-17) Ug ang mga dinihogan taliwala kanato tim-os nga nagapangita sa “siyudad,” ang langitnong Gingharian.—Hebreohanon 12:22.
13. Ang mga halad nga makapahimuot sa Diyos dili lamang maglakip sa unsa?
13 Sunod gihisgotan ni Pablo ang mga halad nga makapahimuot sa Diyos, nga nagsulat: “Pinaagi kang [Jesus] sa kanunay magatanyag kita ug halad sa pagdayeg ngadto sa Diyos, nga mao, ang bunga sa mga ngabil nga nagahimo sa katilingbanong pagpahayag sa iyang ngalan. Dugang pa, ayaw ninyo hikalimti ang pagbuhat ug maayo ug ang pagkamanggihatagon, kay ang maong mga halad makapahimuot sa Diyos.” (Hebreohanon 13:15, 16) Ang Kristohanong mga halad dili lamang maglakip sa yanong mga buhat sa pagkamatinabangon. Ang mga tawo sa katibuk-an nagabuhat sa maong mga butang. Pananglitan, kini nahitabo sa dihang ang mga tawo sa daghang nasod mitabang sa mga biktima sa linog sa Armenia sa Sobyet sa naghinapos ang 1988.
14. Ang pagtanyag ngadto sa Diyos ug makapahimuot nga halad nahasandig sa unsang buluhaton?
14 Ang balaang pag-alagad nga atong ginahatag kang Jehova “uban ang diyosnong kahadlok ug pagtahod” natukod diha sa masinakripisyohon sa kaugalingong matang sa gugma nga gipakita ni Jesus. (Hebreohanon 12:28; Juan 13:34; 15:13) Kining pag-alagara nagapasiugda sa atong buluhatong pagsangyaw, kay pinaagi ni Kristo ingong Hataas nga Saserdote ‘kita nagatanyag sa Diyos ug halad sa pagdayeg, ang bunga sa mga ngabil nga nagahimo sa katilingbanong pagpahayag sa iyang ngalan.’ (Oseas 14:2; Roma 10:10-15; Hebreohanon 7:26) Siyempre, kita “dili makalimot sa pagbuhat ug maayo ug sa pagpaambit sa mga butang ngadto sa uban,” apil, bisan ang uban gawas niadtong “sakop kanato sa panimalay sa pagtuo.” (Galacia 6:10) Ilabina kon ang atong kaubang mga Kristohanon makaeksperyensiya ug kalamidad o nga nagkinahanglan o naglisod, kita mohatag mahigugmaong tabang sa materyal ug sa espirituwal. Ngano? Tungod kay kita naghigugmaay sa usa ug usa. Buot usab nato nga magpabilin silang matinumanon sa katilingbanong pagpahayag sa ilang paglaom nga walay pagkatarog, “kay ang maong mga halad makapahimuot sa Diyos.”—Hebreohanon 10:23-25; Santiago 1:27.
Magmapasakopon
15. (a) Unsaon nimo pagbatbat ang tambag sa Hereohanon 13:17? (b) Nganong magpakitag pagtahod niadtong nagapanguna?
15 Aron makahatag kahimut-anang mga halad, kita bug-os nga mokooperar sa organisasyon sa Diyos. Walay pagbagulbol kon bahin sa awtoridad, si Pablo misulat: “Magmasinugtanon kamo sa nagapanguna kaninyo ug magpasakop kamo kanila, kay sila nagatukaw alang sa inyong mga kalag ingon nga mga tawo nga unya magahatag ug husay; aron nga sila magabuhat niini uban ang kalipay ug dili uban sa kasubo, kay ang ingon makadaot kaninyo.” (Hebreohanon 13:17) Kita angayng motahod sa tinudlong mga ansiano nga nagapanguna sa kongregasyon, aron nga sila dili mangagho sa kaguol tungod sa kakulang sa atong kooperasyon. Ang atong dili pagpasakop mahimong palas-anon sa mga magtatan-aw ug mosangpot ug espirituwal nga kadaot kanato. Ang matinabangong espiritu makapasayon sa mga ansiano sa paghatag ug tabang ug makaamot sa panaghiusa ug sa pag-uswag sa buluhatong pagsangyaw sa Gingharian.—Salmo 133:1-3.
16. Nganong tukma nga magpasakop niadtong nagapanguna taliwala kanato?
16 Pagkatukma nga kita magpasakop kanilang nagapanguna kanato! Sila nanagtudlo sa atong mga tigom ug motabang kanato sa ministeryo. Ingong mga magbalantay, nagapangita sila sa atong kaayohan. (1 Pedro 5:2, 3) Sila motabang nga padayon natong mahuptan ang maayong relasyon sa Diyos ug sa kongregasyon. (Buhat 20:28-30) Pinaagi sa pagpasakop sa maalamon ug mahigugmaong pagdumala, atong gipakita ang pagtahod sa atong Supremong Magtatan-aw, si Jehova nga Diyos, ug sa iyang Tinudlo nga Magtatan-aw, si Jesu-Kristo.—1 Pedro 2:25; Pinadayag 1:1; 2:1–3:22.
Magmainampoon
17. Unsang mga pag-ampo ang gihangyo ni Pablo, ug nganong siya may katungod nga mangayo kanila niana?
17 Sanglit si Pablo ug ang iyang mga kauban nahibulag sa mga Hebreohanon, tingali tungod sa paglutos, siya miingon: “Pag-ampo kamo alang kanamo, kay kami masaligon nga kami nagabaton ug maayong tanlag, samtang kami nagatinguha sa pagkinabuhi nga dungganon sa tanang butang. Apan giagda ko kamo sa labi pa ka mainiton sa paghimo niini aron ako mahibalik diha kaninyo sa labing madali.” (Hebreohanon 13:18, 19) Kon si Pablo maliputon pa nga tawo nga kubalan ug tanlag, unsa may iyang katungod sa paghangyo sa mga Hebreohanon nga iampo siya nga makabalik uban kanila? (Proverbio 3:32; 1 Timoteo 4:1, 2) Sa pagkatinuod, usa siya ka matinud-anon nga ministro, kinsa tungod sa maayong tanlag nakabarog sa mga tigpasiugda sa Hudaismo. (Buhat 20:17-27) Si Pablo usab masaligon nga siya makauban pag-usab sa mga Hebreohanon sa dili madugay kon moampo sila nga kini mahitabo.
18. Kon maglaom kita nga ang uban moampo alang kanato, unsang mga pangutana nga mahimong atong ibangon sa atong kaugalingon?
18 Ang hangyo ni Pablo nga iampo sa mga Hebreohanon nagpakita nga angay alang sa mga Kristohanon nga moampo alang sa usag-usa, bisan sa paghisgot sa ngalan. (Itandi ang Efeso 6:17-20.) Apan kon maglaom kita nga ang uban moampo alang kanato, dili ba angay kitang mahisama sa apostol ug tinoon nga kita ‘adunay maayong tanlag ug nagagawi nga dalayegon sa tanang panahon’? Ikaw ba matinud-anon sa tanan nimong mga pakiglabot? Ug ikaw ba adunay samang pagsalig sa pag-ampo sama kang Pablo?—1 Juan 5:14, 15.
Panapos nga mga Pulong ug Tambag
19. (a) Unsa ang mainampoong gitinguha ni Pablo alang sa mga Hebreohanon? (b) Nganong ang bag-ong pakigtugon maoy usa ka walay kataposang pakigtugon?
19 Human nakahangyo sa mga pag-ampo sa mga Hebreohanon, si Pablo mipahayag ug usa ka mainampoong tinguha, nga nagaingon: “Karon hinaot nga ang Diyos sa kalinaw, nga nagbanhaw gikan sa mga patay sa dakong magbalantay sa mga karnero uban sa dugo sa walay kataposang pakigtugon, ang atong Ginoong Jesus, magsangkap unta kaninyo sa tanang maayong butang aron kamo makatuman sa iyang kabubut-on, nga pagabuhaton diha kanato pinaagi kang Jesu-Kristo nga maoy makapahimuot sa iyang pagtan-aw; kang kinsa maiya ang himaya hangtod sa kahangtoran. Amen.” (Hebreohanon 13:20, 21) Uban ang usa ka malinawon nga yuta nga malantaw, “ang Diyos sa kalinaw” nagbanhaw kang Kristo ngadto sa dili-mamatay nga kinabuhi sa langit, diin didto gitanyag ni Jesus ang bili sa iyang giulang dugo nga naglig-on sa bag-ong pakigtugon. (Isaias 9:6, 7; Lucas 22:20) Kini maoy walay kataposang pakigtugon tungod kay kadtong anaa sa yuta makadawat ug walay kataposang kaayohan gikan sa mga pag-alagad sa 144,000 ka espirituwal nga mga anak sa Diyos kinsa magmando uban kang Jesus sa langit ug nga anaa sa bag-ong pakigtugon. (Pinadayag 14:1-4; 20:4-6) Pinaagi ni Kristo nga ang Diyos, kinsa atong gihimaya, ‘nagasangkap kanato sa tanang maayong butang nga gikinahanglan sa pagtuman sa iyang kabubut-on ug makapahimuot sa iyang pagtan-aw.’
20. Unsaon nimo sa pagbatbat ug sa pagpatin-aw sa panapos nga tambag ni Pablo ngadto sa Hebreohanong mga Kristohanon?
20 Wala makatino kon unsay pagsanong sa mga Hebreohanon sa iyang sulat, si Pablo miingon: “Karon magahangyo ako kaninyo, mga igsoon, sa pagpailob niining akong pulong sa pagdasig [sa pagpatalinghog sa Anak sa Diyos, dili sa mga tigpasiugda sa Hudaismo], kay sa pagkamatuod, hamubo ra kining akong sulat [kon tagdon ang pagkaundanon niini]. Hibaloi ninyo nga ang atong igsoong si Timoteo gibuhian na [gikan sa pagkabilanggo], kon siya mahiuli man sa dili madugay, uban kaniya ako makigkita kaninyo.” Tingali nagsulat gikan sa Roma, ang apostol naglaom nga siya uban kang Timoteo makaduaw sa mga Hebreohanon sa Jerusalem. Dayon si Pablo miingon: “Ipangomosta kami sa tanan nga nagapanguna [sama sa kugihang mga ansiano] taliwala kaninyo ug sa tanang mga balaan [kadtong adunay langitnong paglaom]. Sila nga mga taga-Italya nangomosta kaninyo. Ang dili-takos nga kalulot [sa Diyos] magauban kaninyong tanan.”—Hebreohanon 13:22-25.
Usa ka Sulat nga May Malungtarong Bili
21. Ang sulat ngadto sa mga Hebreohanon motabang kanato sa pagsabot sa unsang pangunang mga punto?
21 Tingali labaw sa bisan unsang basahon sa Balaang Kasulatan, ang sulat sa mga Hebreohanon nagatabang kanato sa pagsabot sa kahulogan sa mga halad nga gitanyag ubos sa Kasugoan. Ang sulat tin-awng nagpakita nga ang halad ni Jesu-Kristo maoy bugtong halad nga makataganag gikinahanglang lukat sa makasasalang katawhan. Ug ang talagsaong mensahe nga atong makita sa sulat mao nga kita kinahanglang magpatalinghog sa Anak sa Diyos.
22. Unsa ang pipila ka kataronganon nga magmapasalamaton kita sa sulat ngadto sa mga Hebreohanon?
22 Dugang pa, ingon sa atong makita sa miaging duha ka artikulo, kita adunay ubang mga katarongan nga magmapasalamaton alang sa balaang pagkadasig nga sulat ngadto sa mga Hebreohanon. Kini nagatabang kanato nga kita dili matak-an sa atong ministeryo, ug nagapuno kini kanato ug kaisog, kay kita nahibalo nga si Jehova mao ang atong Magtatabang. Sa makausa pa, kini nagdasig kanato sa paggamit sa atong mga ngabil ug sa tanan natong mga katakos nga dili-mahakogon sa paghatag balaang pag-alagad sa adlaw ug sa gabii ug sa pagtanyag ug kinasingkasing nga mga halad nga makapahimuot sa atong dalayegon ug mahigugmaong Diyos, si Jehova.
Unsaon Nimo sa Pagtubag?
◻ Sa unsang paagi ang sulat ngadto sa mga Hebreohanon nakatabang kanila nga makalikay sa bakak nga mga pagtulon-an?
◻ Ang mga halad nga makapahimuot sa Diyos nagasentro sa unsang hinungdanong buluhaton?
◻ Kinsa “kadtong nagapanguna,” ug nganong magpasakop kanila?
◻ Sa unsang paagi gipasiugda sa sulat ngadto sa mga Hebreohanon ang pag-ampo?
◻ Nganong makaingon kita nga ang sulat ngadto sa Hebreohanong mga Kristohanon may malungtarog bili?
[Mga hulagway sa panid 23]
Ang mga halad nga makapahimuot sa Diyos naglakip sa paghimog mga pagduaw isip magbalantay ug sa pagdasig sa kaubang mga Kristohanon pinaagi sa mahigugmaong tambag